By Our Correspondent August 18, 2017 at 10:28:19


ଭୁବନେଶ୍ୱର: ନବୀନ ପଟ୍ଟନାୟକଙ୍କୁ ଦେଶର ଶ୍ରେଷ୍ଠ ପ୍ରଶାସକର ମାନ୍ୟତା ଦେଇଛି ଇଂରାଜୀ ପତ୍ରିକା ‘ଆଉଟଲୁକ୍’ । ୫ ଜଣ ଦକ୍ଷ ମୁଖ୍ୟମନ୍ତ୍ରୀଙ୍କୁ ପଛରେ ପକାଇ ନବୀନ ଏହି ସମ୍ମାନ ବାଜି ମାରିନେଇଛନ୍ତି । ଆଉଟଲୁକ୍ ସ୍ପିକ୍ ଆଉଟ୍ ଆୱାର୍ଡର ‘ଶ୍ରେଷ୍ଠ ପ୍ରଶାସକ’ ବିଭାଗ ତାଲିକାରେ ଓଡ଼ିଶା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ସମେତ ବିହାର ମୁଖ୍ୟମନ୍ତ୍ରୀ ନୀତୀଶ କୁମାର, ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ, ମହାରାଷ୍ଟ୍ର ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡ଼ନାଭିସ୍, କର୍ଣ୍ଣାଟକ ମୁଖ୍ୟମନ୍ତ୍ରୀ ସିଦ୍ଧରମେୟା ଓ ତ୍ରିପୁରା ମୁଖ୍ୟମନ୍ତ୍ରୀ ମାଣିକ ସରକାର ସ୍ଥାନ ପାଇଥିଲେ । ଅନଲାଇନ୍ ଭୋଟିଂ ମାଧ୍ୟମରେ ହୋଇଥିବା ଚୟନରେ ନବୀନ ପଟ୍ଟନାୟକଙ୍କୁ ସର୍ବାଧିକ ଭୋଟ ମିଳିଛି । ସେ ହୋଇଛନ୍ତି ଦେଶର ଶ୍ରେଷ୍ଠ ପ୍ରଶାସକ । ରାଜ୍ୟରେ ଅର୍ଥନୈତିକ ପ୍ରଗତି, ପର୍ଯ୍ୟାପ୍ତ ସୁଯୋଗ ସୃଷ୍ଟି, ପ୍ରଶାସନରେ ସ୍ୱଚ୍ଛତା, ସାମାଜିକ ନିରାପତ୍ତା ଓ ପୁଞ୍ଜିନିବେଶ ପାଇଁ ଅନୁକୂଳ ପରିବେଶ ସୃଷ୍ଟି କରିପାରିଛନ୍ତି ବୋଲି ଅନଲାଇନ୍ ଭୋଟିଂ ଆଧାରରେ ଆଉଟଲୁକ୍ ପତ୍ରିକା ନବୀନଙ୍କୁ ସାର୍ଟିଫିକେଟ୍ ଦେଇଛି ।
‘ଆଉଟଲୁକ୍’ ଭଳି ସମ୍ମାନଜନକ ପତ୍ରିକାର ଏହି ସମ୍ମାନଜନକ ପୁରସ୍କାର ନବୀନଙ୍କ ଲୋକପ୍ରିୟତା ଓ ଭାବମୂର୍ତ୍ତିକୁ ସମଗ୍ର ଦେଶରେ ଆହୁରି ଆଦୃତ କରାଇଛି । ଅତୀତରେ ନବୀନଙ୍କ ଦ୍ୱିତୀୟ ଟର୍ମରେ ‘ଇଣ୍ଡିଆ ଟୁଡେ’ ପତ୍ରିକା ତାଙ୍କୁ ଦେଶର ଶ୍ରେଷ୍ଠ ମୁଖ୍ୟମନ୍ତ୍ରୀ ମାନ୍ୟତା ଦେଇଥିଲା । ଲୋକପ୍ରିୟ ମୁଖ୍ୟମନ୍ତ୍ରୀ ତାଲିକାରେ ମଧ୍ୟ ସେ ଦୁଇ ଦୁଇ ଥର ସ୍ଥାନ ପାଇଥିଲେ । ଲଗାତର ଚତୁର୍ଥ ଥର ପାଇଁ ରାଜ୍ୟର ଶାସନଡୋରି ଧରିଥିବା ନବୀନଙ୍କୁ ଏବେ ଆଉଟଲୁକ୍ ପତ୍ରିକା ‘ଶ୍ରେଷ୍ଠ ପ୍ରଶାସକ’ର ମାନ୍ୟତା ଦେଇଥିବାରୁ ବିଜୁ ଜନତା ଦଳର କାଟତି ବଢ଼ିଯାଇଛି । ସାଧାରଣ ନିର୍ବାଚନ ଆଗକୁ ଥିବାବେଳେ ବିଜେଡ଼ି ପାଇଁ ଏହା ବଢିଆ ପୁଞ୍ଜି ହୋଇଛି । ନବୀନଙ୍କ ଲୋକପ୍ରିୟତାକୁ ବିକି ଭାଙ୍ଗି ଚାଲିଥିବା ଦଳ ନେତାଙ୍କ ଛାତି କୁଣ୍ଢେମୋଟ ହୋଇଛି । ବିଜେପିର କ୍ରମବର୍ଦ୍ଦିଷ୍ଣୁ ଲୋକପ୍ରିୟତାରେ ବିଚଳିତ ବିଜେଡ଼ି ପାଇଁ ଏହା ସଞ୍ଜିବନୀ ହୋଇଛି । ଆଉଟଲୁକ୍ ସାର୍ଟିଫିକେଟ୍ ବିଜେପିକୁ ଚେକ୍ ଲଗାଇବାରେ ଯଥେଷ୍ଟ ସହାୟକ ହେବ ବୋଲି ସେମାନେ ଧରିନେଇଛନ୍ତି ।
ଉତଫୁଲ୍ଲିତ ବିଜୁ ଜନତା ଦଳର ନେତାମାନେ ଏହାର ବ୍ୟାପକ ପ୍ରଚାର ଓ ପ୍ରସାର ପାଇଁ ପ୍ରସ୍ତୁତି ଆରମ୍ଭ କରିଛନ୍ତି । ନବୀନଙ୍କୁ ଆଉଟଲୁକ୍ ସମ୍ମାନ ଆଜି ସଂଧ୍ୟାରେ ମିଳିଲା ପରେ ବିଜେଡ଼ିର ପର୍ବ ଆରମ୍ଭ ହେବ । ନବୀନଙ୍କୁ ସ୍ୱାଗତ ତୋରଣରେ ଦିଲ୍ଲୀରୁ ଭୁବନେଶ୍ୱର ଛାଇ କରିଦିଆଯିବ । ରବିବାର ମୁଖ୍ୟମନ୍ତ୍ରୀ ଦିଲ୍ଲୀରୁ ଫେରିଲା ପରେ ଭୁବନେଶ୍ୱର ରାଜରାସ୍ତା ଫଟାଇବେ ବିଜେଡ଼ି ନେତା ଓ କର୍ମୀ । ସେଥିପାଇଁ ଆଜିଠାରୁ ବ୍ୟାପକ ପ୍ରସ୍ତୁତି ଆରମ୍ଭ ହୋଇଛି । ଖାଲି ଭୁବନେଶ୍ୱର ନୁହେଁ, ଦଳୀୟ ବିଧାୟକମାନେ ନିଜ ନିଜ ନିର୍ବାଚନମଣ୍ଡଳୀରେ ନବୀନ ପର୍ବ ଧୂମଧାମରେ ପାଳିବା ପାଇଁ ଯୋଜନା ପ୍ରସ୍ତୁତ ହୋଇଛି । ଏଭଳି ମଉକାକୁ କେହି ଯେଭଳି ହାତଛଡ଼ା ନ କରନ୍ତି ସେଥିପ୍ରତି ସତର୍କ ହୋଇଯାଇଛନ୍ତି ବିଜେଡ଼ି କ୍ୟାମ୍ପ । । ଦଳର କାର୍ପଟଦାର ବୋଲାଉଥିବା ଯୁବଗୋଷ୍ଠୀ ନବୀନ ପର୍ବ ପାଳନର ଦାୟିତ୍ୱ ନେଇଛନ୍ତି ।
SHARE

LEAVE A REPLY

1 + eleven =