By Our Correspondent August 18, 2017 at 16:08:02


ନୂଆଦିଲ୍ଲୀ: ଆଜି ଦିଲ୍ଲୀର ଓଡ଼ିଶା ଭବନରେ ଭେଟାଭେଟି ହୋଇଥିଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଓ କେନ୍ଦ୍ର ପେଟ୍ରୋଲିୟମ୍ ମନ୍ତ୍ରୀ ଧର୍ମେନ୍ଦ୍ର ପ୍ରଧାନ । ପାରାଦ୍ୱୀପରେ ଆଇଓସିଏଲ୍ ତୈଳ ବିଶୋଧାନଗାରର ଟିକସ ଆଦାୟ ପ୍ରସଙ୍ଗରେ ଉଭୟ ଆଲୋଚନା କରିଥିଲେ । ଟିକସ ଆଦାୟକୁ ନେଇ ଲାଗି ରହିଥିବା ଅଚଳାବସ୍ଥାର ସମାଧାନ ପାଇଁ ବାଟ ଖୋଜିଥିଲେ । ଆଲୋଚନା ସଫଳ ହୋଇଥିବା ଦୁହେଁ କହିଛନ୍ତି । ନବୀନ କହିଛନ୍ତି, ଆଲୋଚନାର ଫଳାଫଳକୁ ନେଇ ସେ ପଜିଟିଭ୍ ଅଛନ୍ତି । ଆଶା, ଓଡ଼ିଶାର ସ୍ୱାର୍ଥ ପ୍ରତି ଗୁରୁତ୍ୱ ଦିଆଯିବ । ଧର୍ମେନ୍ଦ୍ର କହିଛନ୍ତି, ଓଡ଼ିଶା ଓ ଆଇଓପିଏଲ୍ ଉଭୟଙ୍କ ସ୍ୱାର୍ଥ ରହିଲା ଭଳି ସମାଧାନର ବାଟ ବାହାର କରାଯାଉଛି । ଆବଶ୍ୟକ ପଡ଼ିଲେ ୨୦୦୪ ଏମଓୟୁର ପୁର୍ନବିଚାର କରାଯାଇପାରେ । ସୁଫଳ ନେଇ ସେ ଆଶାବାଦୀ ।
ଦିନ ୧୧ଟାରେ ଓଡ଼ିଶା ଭବନରେ ଏକାଠି ହୋଇଥିଲେ ନବୀନ ଓ ଧର୍ମେନ୍ଦ୍ର । ସାମନା ସାମନି ବେଳେ ଉଭୟଙ୍କ ମୁହଁରେ ଭରା ସ୍ମିତହାସ୍ୟ ଥିଲା । ସ୍ୱାଗତ ପର୍ବରେ ଆଗୁଆ ନବୀନଙ୍କ ଭଲମନ୍ଦ ପଚାରିବାକୁ ଭୁଲି ନ ଥିଲେ ଧର୍ମେନ୍ଦ୍ର । ବିଷୟବସ୍ତୁ ଆଲୋଚନା କରିବା ପୂର୍ବରୁ ଉଭୟଙ୍କ ମଧ୍ୟରେ କିଛି ସମୟ ମଜାଖୁସି ହୋଇଥିଲା । ତାପରେ ହୋଇଥିଲା ଗମ୍ଭୀର ଆଲୋଚନା । ଦୀର୍ଘ ୪୦ ମିନିଟ୍ ଧରି ଆଲୋଚନା ପରେ ଉଭୟ ବାହାରକୁ ଆସି ଗଣମାଧ୍ୟମକୁ ବାଇଟ୍ ଦେଇଥିଲେ ।
ଉଲ୍ଲେଖଯୋଗ୍ୟ, ୨୦୦୪ ମସିହାରେ ଆଇଓସିଏଲ୍ ଓ ଓଡ଼ିଶା ସରକାରଙ୍କ ମଧ୍ୟରେ ପାରାଦ୍ୱୀପ ତୈଳ ବିଶୋଧନାଗାର ପ୍ରକଳ୍ପ ପାଇଁ ଏମଓୟୁ ସ୍ୱାକ୍ଷର ହୋଇଥିଲା । ସର୍ତ୍ତ ରହିଥିଲା ୨୦୦୯-୧୦ରେ ପ୍ରକଳ୍ପ ନିର୍ମାଣ ସରିବ । ବ୍ୟବସାୟିକ ଭିତ୍ତିରେ ଉତ୍ପାଦନ ଆରମ୍ଭ ହେବାର ୧୧ ବର୍ଷ ପର୍ଯ୍ୟନ୍ତ ପର୍ଯ୍ୟନ୍ତ ରାଜ୍ୟ ସରକାର ବିକ୍ରୀ କର ଛାଡ଼ ପ୍ରୋତ୍ସାହନ ଦେବେ । ତେବେ ପ୍ରକଳ୍ପ ନିର୍ମାଣ କାର୍ଯ୍ୟ ୬ ବର୍ଷ ବିଳମ୍ବ ହୋଇଥିବାର ଯୁକ୍ତି ଦେଖାଇ ରାଜ୍ୟ ସରକାର ଏମଓୟୁ ସର୍ତ୍ତ ମାନିବାକୁ ରାଜି ହୋଇନାହାନ୍ତି । ପ୍ରକଳ୍ପକୁ ଆର୍ଥିକ ପ୍ରୋତ୍ସାହନ ପ୍ରତ୍ୟାହାର ପାଇଁ ଗତ ଫେବୃଆରୀ ମାସରେ କ୍ୟାବିନେଟ୍ ନିଷ୍ପତ୍ତି ନେଇଥିଲା । ଏହା ହିଁ ବିବାଦର ସୂତ୍ରପାତ କରିଛି ।
ତେବେ ରାଜ୍ୟର ସ୍ୱାର୍ଥକୁ ଗୁରୁତ୍ୱ ନ ଦେଇ ବିଜେପି ଓ ବିଜେଡ଼ି ରାଜନୈତିକ କାଦୁଅଫିଙ୍ଗାରେ ମାତିଗଲେ । ଓଡ଼ିଶା-ଆଇଓପିଏଲ୍ ଲଢ଼େଇ ନବୀନ-ଧର୍ମେନ୍ଦ୍ର ଲଢ଼େଇ ପାଲଟିଗଲା । ଇତିମଧ୍ୟରେ ରାଜ୍ୟ ସରକାର ଓ ପେଟ୍ରୋଲିୟମ୍ ମନ୍ତ୍ରଣାଳୟ ଅଫିସରସ୍ତରରେ ଏକାଧିକ ଆଲୋଚନା ହୋଇଥିଲେ ମଧ୍ୟ ସମାଧାନର ବାଟ ବାହାରିନାହିଁ । ଉଭୟ ପକ୍ଷର ଜିଦଜାଦ୍ ୬ ମାସ ଚାଲିଲା ପରେ ଆଜି ମୁଖ୍ୟମନ୍ତ୍ରୀ ଓ ଭାବୀ ମୁଖ୍ୟମନ୍ତ୍ରୀ ଏକାଠି ବସି ସମାଧାନର ବାଟ ଖୋଜିବା ରାଜନୈତିକ ମହଲରେ ଚର୍ଚ୍ଚାର ବିଷୟ ହୋଇଛି ।
SHARE

1 COMMENT

  1. “ମୁଖ୍ୟମନ୍ତ୍ରୀ ଓ ଭାବୀ ମୁଖ୍ୟମନ୍ତ୍ରୀ”
    Real punch line of your story; good writing, keep it up @Samar.

LEAVE A REPLY

5 + eighteen =