By Our Correspondent August 19, 2017 at 23:12:51


ଭୁବନେଶ୍ୱର: ପୁରୀ-ହରିଦ୍ୱାର କଳିଙ୍ଗ ଉତ୍କଳ ଏକ୍ସପ୍ରେସ୍ ଦୁର୍ଘଟଣା ବିଜୁ ଜନତା ଦଳର ପ୍ରସ୍ତାବିତ ନବୀନ ସ୍ୱାଗତ ଯାତ୍ରାକୁ ଅଟକାଇଦେଇଛି । ଏଭଳି ଦୁଃଖଦ ମୁହୁର୍ତ୍ତରେ ଆଡମ୍ବରପୁର୍ଣ୍ଣ ସମ୍ବର୍ଦ୍ଧନା ଯାତ୍ରା ନ କରିବାକୁ ଦଳ ନିଷ୍ପତ୍ତି ନେଇଛି । ଆଉଟଲୁକ୍ ପତ୍ରିକାରେ ନବୀନଙ୍କୁ ‘ଶ୍ରେଷ୍ଠ ପ୍ରଶାସକ’ ଉପାଧି ମିଳିଥିବାରୁ ଆସନ୍ତାକାଲି ଭୁବନେଶ୍ୱର ଫେରୁଥିବା ନବୀନଙ୍କ ସ୍ୱାଗତ ସମ୍ବର୍ଦ୍ଧନା ପାଇଁ ଦଳ ପକ୍ଷରୁ ଜାକଜମକ ପ୍ରସ୍ତୁତି ହୋଇଥିଲା । ଏୟାରପୋର୍ଟରୁ ନବୀନ ନିବାସ ଯାଏଁ ସ୍ୱାଗତ ଯାତ୍ରାର ଆୟୋଜନ କରାଯାଇଥିଲା । ମାତ୍ର ସଂଧ୍ୟାରେ ରେଳ ଦୁର୍ଘଟଣା ଖବର ଏହି ଆୟୋଜନକୁ ମିଳାଇ ଦେଇଛି । ବରାଦି ଦିଆଯାଇଥିବା ବାଜା ବାଣ ବାଲାଙ୍କୁ ଟଙ୍କା ଫେରସ୍ତ କରାଯାଇଛି ।
ଆଜି ରାତି ୯ଟାରେ ବିଜେଡ଼ି ପକ୍ଷରୁ ଏକ ସାମ୍ବାଦିକ ସମ୍ମିଳନୀ ଡକାଯାଇଥିଲା । ଉପସ୍ଥିତ ଥିଲେ ଦଳର ସାଧାରଣ ସମ୍ପାଦକ ସଞ୍ଜୟ ଦାସବର୍ମା, ଅତନୁ ସବ୍ୟସାଚୀ ନାୟକ, ପ୍ରଣବ ପ୍ରକାଶ ଦାସ ଓ ପୁଷ୍ପେନ୍ଦ୍ର ସିଂହଦେଓ । ପୁରୀ-ହରିଦ୍ୱାର ଟ୍ରେନ ଦୁର୍ଘଟଣାର ଦୁଃଖଦ ମୁହୂର୍ତ୍ତ ବେଳେ ଆସନ୍ତାକାଲି ଭୁବନେଶ୍ୱର ଫେରୁଥିବା ମୁଖ୍ୟମନ୍ତ୍ରୀଙ୍କୁ ତାଙ୍କର କୃତିତ୍ୱ ପାଇଁ ନିରାଡମ୍ବର ଭାବେ ଶୁଭେଚ୍ଛା ଜଣାଇବାକୁ ଦଳ ପକ୍ଷରୁ ସେମାନେ ଅନୁରୋଧ କରିଛନ୍ତି । ରେଳ ଦୁର୍ଘଟଣାରେ ମୃତାହତ ପରିବାରଙ୍କ ପ୍ରତି ମୁଖ୍ୟମନ୍ତ୍ରୀଙ୍କ ଦୁଃଖ ଜଣାଇବା ସହ ଦଳ ପକ୍ଷରୁ ଗଭୀର ସମବେଦନା ଜ୍ଞାପନ କରିଛନ୍ତି । ଆସନ୍ତାକାଲି ଦଳ ପକ୍ଷରୁ ଏକ ଟିମ୍ ଟ୍ରେନ ଦୁର୍ଘଟଣାଗ୍ରସ୍ତ ଅଞ୍ଚଳ ଓ ଆହତମାନେ ଚିକିତ୍ସିତ ହେଉଥିବା ହସ୍ପିଟାଲ୍ ଯିବେ ବୋଲି ସେମାନେ ସୂଚନା ଦେଇଛନ୍ତି । ମୃତକଙ୍କ ପରିବାର ଓ ଆହତଙ୍କୁ ପର୍ଯ୍ୟାପ୍ତ ସହାୟତା ଯୋଗାଇବାକୁ କେନ୍ଦ୍ର ରେଳ ବିଭାଗକୁ ନିବେଦନ କରିଛନ୍ତି ।
ଅନ୍ୟପକ୍ଷରେ ଲୁଲୁ ସେନା ପକ୍ଷରୁ ଆସନ୍ତାକାଲି ଧର୍ମେନ୍ଦ୍ର ପ୍ରଧାନଙ୍କ ପାଇଁ ଭୁବନେଶ୍ୱରର ଭଞ୍ଜ କଳାମଣ୍ଡପରେ ଆୟୋଜନ କରାଯାଇଛି ଆଡମ୍ବରପୂର୍ଣ୍ଣ ଭବ୍ୟ ସମ୍ବର୍ଦ୍ଧନା ଉତ୍ସବ । ପାଇକ ବିଦ୍ରୋହକୁ ଜାତୀୟସ୍ତରରେ ମାନ୍ୟତା ଦେବାରେ ଧର୍ମେନ୍ଦ୍ରଙ୍କ ଅବଦାନ ପାଇଁ ଲୁଲୁ ସେନା ଏହି ଉତ୍ସବର ଆୟୋଜନ କରିଛି । ଧର୍ମେନ୍ଦ୍ରଙ୍କୁ ବିମାନବନ୍ଦରରୁ ଏକ ବିରାଟ ପଟୁଆରରେ ପାଛୋଟି ନେବାକୁ ଜୋରଦାର ପ୍ରସ୍ତୁତି ହୋଇଛି । ତେବେ ରେଳ ଦୁର୍ଘଟଣା ପରିପ୍ରେକ୍ଷୀରେ ନବୀନ ସ୍ୱାଗତ ପର୍ବକୁ ବିଜେଡ଼ି ବାତିଲ କରିଥିବା ବେଳେ ଧର୍ମେନ୍ଦ୍ରଙ୍କ ପାଇଁ ଆୟୋଜିତ ଭବ୍ୟ ସମ୍ବର୍ଦ୍ଧନା ଉତ୍ସବ ଆଡମ୍ବର ହେବ ନା ନିରାଡମ୍ବର ହେବ ତାହାକୁ ନେଇ ରାଜନୈତିକ ମହଲରେ ଉତ୍ସୁକତା ସୃଷ୍ଟି ହୋଇଛି ।
SHARE

LEAVE A REPLY

sixteen + 7 =