ନୂଆଦିଲ୍ଲୀ: ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏବେ ବି ନମ୍ବର ୱାନ୍ । ଲୋକପ୍ରିୟତାର ଶୀର୍ଷରେ । ବିରୋଧୀ ଦଳର ପ୍ରତିଦ୍ୱନ୍ଦୀଙ୍କଠାରୁ ସେ ଯଥେଷ୍ଟ ଆଗରେ । ସାଧାରଣ ନିର୍ବାଚନ ପୂର୍ବରୁ ଇଣ୍ଡିଆ ଟୁଡ଼େ ପକ୍ଷରୁ ହୋଇଥିବା ଏକ ଜନମତ ସର୍ଭେରୁ ଏହା ଜଣାପଡ଼ିଛି । ସେହିଭଳି ପ୍ରଧାନମନ୍ତ୍ରୀ ଭାବେ ନରେନ୍ଦ୍ର ମୋଦୀ ଏକ ନମ୍ବର ପସନ୍ଦରେ ଅଛନ୍ତି । ତାଙ୍କ ପଛରେ ସଂଖ୍ୟାଗରିଷ୍ଠ ଓଡ଼ିଶାବାସୀଙ୍କ ସମର୍ଥନ ରହିଛି ।
ଇଣ୍ଡିଆ ଟୁଡେ ସର୍ଭେରେ ଓଡ଼ିଶାର ୫୯ ପ୍ରତିଶତ ଲୋକ ନବୀନ ପଟ୍ଟନାୟକଙ୍କୁ ପୁର୍ନବାର ମୁଖ୍ୟମନ୍ତ୍ରୀ ଭାବେ ପସନ୍ଦ କରିଛନ୍ତି । କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ସପକ୍ଷରେ ମାତ୍ର ୨୧ ପ୍ରତିଶତ ଲୋକଙ୍କ ସମର୍ଥନ ରହିଛି । ଏହି ସର୍ଭେରେ ସାମିଲ କରାଯାଇଥିବା ଲୋକଙ୍କ ମଧ୍ୟରୁ ୪୪ ପ୍ରତିଶତ ଲୋକ ମୁଖ୍ୟମନ୍ତ୍ରୀ ଭାବେ ନବୀନ ପଟ୍ଟନାୟକଙ୍କ କାର୍ଯ୍ୟଧାରା ପ୍ରତି ସନ୍ତୋଷବ୍ୟକ୍ତ କରିଛନ୍ତି । ରାଜ୍ୟର ବିକାଶମୂଳକ କାର୍ଯ୍ୟକୁ ସେମାନେ ସମର୍ଥନ କରିଛନ୍ତି । ୧୯ ପ୍ରତିଶତ ଲୋକ ମୁଖ୍ୟମନ୍ତ୍ରୀଙ୍କ କାର୍ଯ୍ୟଧାରାରେ ଅସନ୍ତୋଷ ପ୍ରକାଶ କରିଛନ୍ତି ।
ରାଜ୍ୟର ୫୪ ପ୍ରତିଶତ ଲୋକ ନରେନ୍ଦ୍ର ମୋଦୀଙ୍କୁ ପୁନର୍ବାର ପ୍ରଧାନମନ୍ତ୍ରୀ ଭାବେ ପସନ୍ଦ କରିଥିବା ବେଳେ ରାହୁଲ ଗାନ୍ଧୀଙ୍କୁ ପ୍ରଧାନମନ୍ତ୍ରୀ ଭାବେ ମାତ୍ର ୨୧ ପ୍ରତିଶତ ଲୋକ ପସନ୍ଦ କରିଛନ୍ତି ।
ଓଡ଼ିଶାରେ ସାଧାରଣ ଲୋକଙ୍କ ଉପରେ ରାଫେଲ୍ ଦୁର୍ନୀତି ପ୍ରସଙ୍ଗର ସେଭଳି ପ୍ରଭାବ ନାହିଁ । ୭୬ ପ୍ରତିଶତ ଲୋକ ଏ ଡିଲ୍ ସମ୍ପର୍କରେ ଜାଣନ୍ତି ନାହିଁ । ଯେଉଁମାନେ ଜାଣନ୍ତି ସେମାନଙ୍କ ମଧ୍ୟରୁ ୭୯ ପ୍ରତିଶତ ଲୋକ ରାଫେଲ୍ ବିମାନର ମୂଲ୍ୟ ସର୍ବ ସାଧାରଣରେ ପ୍ରକାଶ ପାଇବା ଉଚିତ୍ ନୁହେଁ ବୋଲି ମତ ଦେଇଛନ୍ତି ।
ରାଜ୍ୟର ୨୧ଟି ଲୋକସଭା ସଂସଦୀୟ କ୍ଷେତ୍ରରେ ୮,୨୩୨ ଲୋକଙ୍କ ମତାମତ ନେଇ ଇଣ୍ଡିଆ ଟୁଡେ ନିକଟରେ ଏହି ସର୍ଭେ କରିଥିଲା ।
