ଭୁବନେଶ୍ୱର: ବିଜେପୁରରେ କିଏ ଗୁଳି ଫୁଟାଇଲା ତାହାକୁ ନେଇ ବିଜେଡ଼ି-ବିଜେପି ମୁହାଁମୁହିଁ ହୋଇଛନ୍ତି । ବିଜେପି ସିଧାସଳଖ ମନ୍ତ୍ରୀ ସୁଶାନ୍ତ ସିଂଙ୍କୁ ଆସାମୀ କରିଦେଇଛି । ସୁଶାନ୍ତଙ୍କ ନିର୍ଦ୍ଦେଶରେ ଯୁବମୋର୍ଚ୍ଚା ମଣ୍ଡଳ ସଭାପତି ମନୋରଂଜନ ମେହେରଙ୍କ ଘର ଉପରକୁ ଗୁଳିମାଡ଼ ହୋଇଛି ବୋଲି ବିଜେପି ନେତାମାନେ ଅଭିଯୋଗ କରିଛନ୍ତି । ଦଳର ଏକ ଉଚ୍ଚ ପ୍ରତିନିଧିଦଳ ଆଜି ଗୃହ ସଚିବଙ୍କୁ ଭେଟି ଘଟଣାର ନିରପେକ୍ଷ ତଦନ୍ତ ଦାବି କରିଛନ୍ତି । ଗୃହ ସଚିବଙ୍କଠାରୁ ଆଶ୍ୱାସନା ପାଇ ପ୍ରତିନିଧି ଦଳ ଫେରିଥିବା ବେଳେ ସଂଧ୍ୟାରେ ବିଜେପି ଏକ ପ୍ରେସ୍ ମିଟ୍ କରି ଆସନ୍ତାକାଲି ସବୁ ଜିଲ୍ଲା ସଦର ମହକୁମାରେ ପ୍ରତିବାଦ ବିକ୍ଷୋଭ ଡାକରା ଦେଇଛି ।
ସେପଟେ ଗୁଳିକାଣ୍ଡରେ ସଂପୃକ୍ତି ଅଭିଯୋଗକୁ ବିଜେଡ଼ି ଅସ୍ୱୀକାର କରିଛି । ବିଜେପି ରାଜନୈତିକ ଫାଇଦା ହାସଲ ପାଇଁ ଏଭଳି କାଣ୍ଡ ଭିଆଇପି ଥିବା ଦଳ ଅଭିଯୋଗ କରିଛି । ମନ୍ତ୍ରୀ ସୁଶାନ୍ତ ସିଂ ମଧ୍ୟ ଗୁଳିକାଣ୍ଡ ପଛରେ ବିଜେପିର ସଂପୃକ୍ତି ଥିବା ସିଧାସଳଖ ଅଭିଯୋଗ କରିଛନ୍ତି । ନିର୍ବାଚନ ଘୁଞ୍ଚାଇବାକୁ ଏହା ବିଜେପିର ଷଡ଼ଯନ୍ତ୍ର ବୋଲି ସେ କହିଛନ୍ତି । କିଛି ନେତା ଏହାକୁ ବିଜେପି ଅର୍ନ୍ତଦ୍ୱନ୍ଦର ପରିଣାମ ବୋଲି ଆରୋପ ଲଗାଇଛନ୍ତି ।
ତେବେ ଦୁଇ ଦଳ ନେତାଙ୍କ କଥାରେ ସତ୍ୟତା କେତେ ତାହା ସେମାନଙ୍କୁ ବି ଜଣାନାହିଁ । ରାଜନୈତିକ ଫାଇଦା ରଖି ବିନା ତଥ୍ୟ ପ୍ରମାଣରେ ଦୁଇ ଦଳ ପରଷ୍ପରକୁ ଦାୟୀ କରୁଥିବା ସ୍ପଷ୍ଟ । ବିଜେଡ଼ି-ବିଜେପି ବାଲା ଏଠି ଯେତେ ବାଡ଼ିଆପିଟା ହେଲେ ମଧ୍ୟ ଓଡ଼ିଶାବାସୀ ଯାହା ବୁଝିବା କଥା ବୁଝିସାରିଛନ୍ତି । ବିଜେପୁର ଉପନିର୍ବାଚନ ଜିତିବା ପାଇଁ କିଏ କ’ଣ ଶକ୍ତି ଲଗାଇଛି ତାହା ବି ଓଡ଼ିଶାବାସୀଙ୍କୁ ଅଛପା ନାହିଁ । ଗଣମାଧ୍ୟମରେ ଖାଲି ବିବୃତି ଦେଇ ଲୋକଙ୍କ ମନ ବୁଝେଇ ହେବ ନାହିଁ ବୋଲି ବିଜେଡ଼ି ଓ ବିଜେପି ନେତାମାନେ ଭଲ ଭାବେ ଜାଣିଥିଲେ ମଧ୍ୟ ପଇସା ଓ କ୍ଷମତା ଥିବାରୁ ଏମିତି ଫାଲତୁ ନାଟ କରିବାକୁ ସେମାନେ ନିଜର ଦାୟିତ୍ୱ ବୋଲି ଭାବିନେଇଛନ୍ତି ।
ବିଜେପୁର ଉପନିର୍ବାଚନର ଗୁରୁତ୍ୱ କାହାରିକୁ ଜଣାଇବାର ଆବଶ୍ୟକତା ନାହିଁ । ବିଜେଡ଼ି ପାଇଁ ଏହା ସମ୍ମାନର ପ୍ରଶ୍ନ ହୋଇଥିଲା ବେଳେ ବିଜେପି ପାଇଁ କର ବ। ମର ପରିସ୍ଥିତି । ଏହି ଦୁଇ ଦଳର ବାଡ଼ିଆପିଟା ଭିତରେ କଂଗ୍ରେସ ନିଜର ସ୍ଥିତି ବି ସୁଦୃଢ଼ କଲାଣି । ତେଣୁ କିଏ ଏକ ନମ୍ବର, ଦୁଇ ନମ୍ବର କି ତିନି ନମ୍ବର ନିଜେ ନିଜେ ଢ଼ିଣ୍ଡିମ୍ ପିଟିବାର ଆବଶ୍ୟକତା ନାହିଁ । ଏହା ନିରାଟ ସତ ଯେ ଉପନିର୍ବାଚନ ଦିନ ଯେତିକି ଗଡ଼ିବ ହିଂସାକାଣ୍ଡ ସେତିକି ବଢ଼ିବ । ତେଣୁ ଏହା ଭିତରେ ସବୁଠୁ ବଡ଼ ପ୍ରଶ୍ନ ହୋଇଛି, ଉପନିର୍ବାଚନ ତାରିଖ ଘୋଷଣାରେ ବିଳମ୍ବ । ଏହା ହିଁ ସବୁ ବିବାଦର ମଂଜି । ତାରିଖ କାହିଁକି ଘୋଷଣା ହେଉନି ତାହାର ଜବାବ କାହାରି ପାଖରେ ନାହିଁ । ଏମିତି ବି କୁହାଗଲାଣି ବିଜେଡ଼ି ହେଉ କି ବିଜେପି ହେଉ ବିଜେପୁରରେ ନିଜର ପରାଜୟ ସୁନିଶ୍ଚିତ ଜାଣି, ଉପନିର୍ବାଚନ ତାରିଖ ଗଡ଼ିବାକୁ ଚାହିଁ ବସିଛନ୍ତି । ଏଥିପାଇଁ ନିର୍ବାଚନ କମିଶନଙ୍କ ଉପରେ କିଛି ଅଦୃଶ୍ୟ ଶକ୍ତି ବି କାମ କରୁଥାଇପାରେ । ଉପନିର୍ବାଚନ ତାରିଖ ଘୋଷଣା ହେବାକୁ ବାକି ଥିବା ବେଳେ ବିଜେପୁରରେ ହିଂସାକାଣ୍ଡ ଘଟାଇ ଅନିର୍ଦ୍ଦିଷ୍ଟ କାଳ ପାଇଁ ତାରିଖ ଟାଳି ଦେବାକୁ ଏହା ଯୋଜନାବଦ୍ଧ ଷଡ଼ଯନ୍ତ୍ର ହୋଇଥାଇପାରେ ବୋଲି ମଧ୍ୟ ରାଜନୈତିକ ମହଲରେ ଚର୍ଚ୍ଚା ହେଉଛି ।
