ଭୁୁବନେଶ୍ୱର: ଓଡ଼ିଶାର ବିଧାୟକଙ୍କ ଉପରେ ଅରୁଚିକର ଟିପ୍ପଣୀ ଦେଇଥିବା ବୈଜୟନ୍ତ ପଣ୍ଡାଙ୍କ ଅଣଓଡ଼ିଆ ବନ୍ଧୁ ଅଭିଜିତ୍ ଆୟାର ମିତ୍ରଙ୍କୁ ବିଧାନସଭା କ୍ଷମା କରିଦେଇଛି । ଗୃହ କମିଟି ରିପୋର୍ଟକୁ ଆଧାର କରି ଆଜି ବିଧାନସଭାରେ ଏ ସମ୍ପର୍କିତ ମୋସନ୍ ପାରିତ ହୋଇଛି । ଅଭିଜିତ୍ ଆୟାର ଗୃହ କମିଟି ଆଗରେ ନିଃସର୍ତ୍ତ କ୍ଷମା ମାଗିଥିଲେ । ନିଜର ନିର୍ବୋଧତା ପାଇଁ ଭୁଲ୍ ମାଗିଥିଲେ । ଓଡ଼ିଶା ଦୟା ଓ ସହନଶୀଳତାର ମାଟି । ତେଣୁ ତାଙ୍କୁ କ୍ଷମା କରିଦିଆଯାଉ । ଗୃହ କମିଟି ସଦସ୍ୟ ଦେବୀ ପ୍ରସାଦ ମିଶ୍ରଙ୍କ ଏହି ପ୍ରସ୍ତାବ ସହ କମିଟିର ଅଧ୍ୟକ୍ଷ ନରସିଂହ ମିଶ୍ର ସହମତ ହୋଇଥିଲେ । ପରେ ସର୍ବସମ୍ମତକ୍ରମେ ଏକ ମୋସନ୍ ଜରିଆରେ ଅଭିଜିତ୍ ଙ୍କୁ କ୍ଷମା କରିଦିଆଯାଇଥିଲା ।
ଗତକାଲି ବିଧାନସଭା ଗୃହ କମିଟି ତାହାର ରିପୋର୍ଟ ଦେଇଥିଲା । ଅଭିଜିତ୍ ତାଙ୍କ ମନ୍ତବ୍ୟ ପାଇଁ କ୍ଷମା ମାଗିଥିବାରୁ ବିଧାନସଭା ଏହାକୁ ବିଚାର କରି ତାଙ୍କୁ କ୍ଷମା କରିଦେଉ ବୋଲି ସୁପାରିଶ କରିଥିଲା । ଖାଲି ସେଇ ଗୋଟିଏ ନୁହେଁ, ଅଭିଜିତ୍ ଓଡ଼ିଶା ଓ ଓଡ଼ିଶାର କଳା, ସଂସ୍କୃତି ଓ ଐତିହ୍ୟ ଉପରେ ଦେଇଥିବା ଅରୁଚିକର ମନ୍ତବ୍ୟ ସମ୍ବନ୍ଧରେ କମିଟି ତାଙ୍କ ରିପୋର୍ଟରେ ଉଲ୍ଲେଖ କରିଛନ୍ତି । ଯିଏ ଏହି ଅଣଓଡ଼ିଆ ବ୍ୟକ୍ତିଙ୍କୁ ସାଙ୍ଗରେ ନେଇ ବୁଲାଇଥିଲେ ସିଏ ଅନ୍ତତଃ ଓଡ଼ିଶାର ସମୃଦ୍ଧ କଳା, ସଂସ୍କୃତି ଏବଂ ଏହାର ପୁରାତନ କିର୍ତ୍ତୀରାଜ ସମ୍ପର୍କରେ ତାଙ୍କୁ ଅବଗତ କରାଇବାର ଥିଲା ବୋଲି କମିଟିର ହୃଦବୋଧ ହୋଇଛି । ଅଭିଜିତ୍ ଙ୍କୁ ଓଡ଼ିଶା ସମ୍ପର୍କରେ ଜ୍ଞାନ ଦେବା ପାଇଁ ରାଜ୍ୟ ସରକାର ଦସ୍ତାବିଜ୍ ଯୋଗାଇ ଦିଅନ୍ତୁ ବୋଲି କମିଟି ସୁପାରିଶ କରିଛନ୍ତି ।
ଅଭିଜିତ୍ ଙ୍କ ଟିପ୍ପଣୀକୁ ନେଇ ଗତ ସେପ୍ଟେମ୍ବର ୨୦ ତାରିଖରେ ବିଧାନସଭାରେ ଝଡ଼ ସୃଷ୍ଟି ହୋଇଥିଲା । ଏକ ଟିଭି ଚାନେଲ୍ କୁ ସାକ୍ଷାତକାର ଦେଇ ବିଧାୟକମାନଙ୍କୁ ସେ ବୁଦ୍ଦୁ ବୋଲି ଟିପ୍ପଣୀ ଦେଇଥିବାରୁ ଦଳମତ ନିର୍ବଶେଷରେ ସବୁ ବିଧାୟକ ଏହାର ନିନ୍ଦା କରିଥିଲେ । ବିରୋଧୀ ଦଳ ନେତା ନରସିଂହ ମିଶ୍ର ତାଙ୍କ ବିରୋଧରେ ସ୍ୱାଧିକାର ଭଙ୍ଗ ନୋଟିସ୍ ଦେଇଥିଲେ । ବାଚସ୍ପତିଙ୍କ ଅଧ୍ୟକ୍ଷତାରେ ସର୍ବଦଳୀୟ ବୈଠକ ବସି ମାମଲାର ଅନୁଧ୍ୟାନ ପାଇଁ ବିରୋଧୀ ଦଳ ନେତାଙ୍କ ଅଧ୍ୟକ୍ଷତାରେ ଗୃହ କମିଟି ଗଠନ ହୋଇଥିଲା । ସେଥିରେ ବିଜେପି ବିଧାୟକ ଦଳ ନେତା କନକ ବର୍ଦ୍ଧନ ସିଂହଦେଓ, ବିଜେଡ଼ି ବିଧାୟକ ଦେବୀପ୍ରସାଦ ମିଶ୍ର, ଶ୍ରୀମତୀ ପ୍ରମିଳା ମଲ୍ଲିକ, ଡ. ଅରୁଣ ସାହୁ ଏବଂ ସଞ୍ଜୟ ଦାସବର୍ମା ସଭ୍ୟ ଥିଲେ । ପରବର୍ତ୍ତୀ ବିଧାନସଭା ଅଧିବେଶନ ପୂର୍ବରୁ କିମ୍ବା ଅଧିବେଶନର ପ୍ରଥମ ଦିନରେ କମିଟି ତା’ର ରିପୋର୍ଟ ଦେବାକୁ କୁହାଯାଇଥିଲା ।
ସେପ୍ଟେମ୍ବର ୨୨ ତାରିଖରେ କମିଟିର ପ୍ରଥମ ବୈଠକ ବସିଥିଲା । ୨୮ ତାରିଖରେ ଦ୍ୱିତୀୟ ବୈଠକ ବସି ଅଭିଜିତ୍ ଙ୍କୁ ଅକ୍ଟୋବର ୧୧ ତାରିଖରେ ହାଜର ପାଇଁ ସମନ କରାଯାଇଥିଲା । ମାତ୍ର ଅଭିଜିତ୍ ହାଜର ହୋଇ ନ ଥିଲେ । ୧୧ ତାରିଖରେ କମିଟି ବସି ତାଙ୍କୁ ୨୩ ତାରିଖରେ ହାଜର ପାଇଁ ଆଉ ଥରେ ସମନ କରିଥିଲା । ୨୩ ତାରିଖରେ ଅଭିଜିତ୍ ହାଜର ହୋଇ ନିଜର ମନ୍ତବ୍ୟ ପାଇଁ କ୍ଷମା ମାଗିଥିଲେ । ନିଜକୁ ନିର୍ବୋଧ ବୋଲି କହିଥିଲେ । ତେବେ ତାଙ୍କଠାରୁ ସତ୍ୟପାଠ ମଗାଯାଇ ନଭେମ୍ବର ୨ ତାରିଖକୁ ସମୟ ଦିଆଯାଇଥିଲା । ଅଭିଜିତ୍ ୨ ତାରିଖରେ ହାଜର ହୋଇଥିଲେ ମଧ୍ୟ ସେଦିନ ସତ୍ୟପାଠ ଦେଇପାରି ନ ଥିଲେ । ପରଦିନ( ୩ ତାରିଖ) ସେ ସତ୍ୟପାଠ ଦେଇଥିଲେ । ଗତ ୧୫ ତାରିଖରେ କମିଟି ବସି ପୁଙ୍ଖାନୁପୁଙ୍ଖ ତର୍ଜମା କଲା ପରେ ରିପୋର୍ଟ ପ୍ରସ୍ତୁତ କରିଥିଲା ।
ସୂଚନାଯୋଗ୍ୟ, ଓଡ଼ିଶା ଓ ଓଡ଼ିଶାର ଅସ୍ମିତା ଉପରେ କଟୁ ଟିପ୍ପଣୀ ଦେଇଥିବା ବୈଜୟନ୍ତ ପଣ୍ଡାଙ୍କ ବନ୍ଧୁ ଅଭିଜିତ୍ ଆୟାର ମିତ୍ର ଆଇନଜାଲରେ ପଡ଼ିସାରିଛନ୍ତି । ଥାନାରେ ହୋଇଥିବା ମାମଲା ଆଧାରରେ ଗିରଫ ହୋଇ ଏବେ ଝାରପଡ଼ା ଜେଲ୍ ରେ ଅଛନ୍ତି । ତାଙ୍କୁ ଜାମିନ୍ ମିଳିପାରୁନାହିଁ ।
