ଭୁବନେଶ୍ୱର: ଭୁବନେଶ୍ୱର ମେୟର ଆସନ ମହିଳାଙ୍କ ପାଇଁ ସଂରକ୍ଷଣ ଚୂଡ଼ାନ୍ତ ବିଜ୍ଞପ୍ତି ପ୍ରକାଶ ନ ପାଉଣୁ ବିଭିନ୍ନ ଦଳର ମେୟର ପ୍ରାର୍ଥୀଙ୍କୁ ନେଇ ଅଙ୍କକଷା ଆରମ୍ଭ ହୋଇଗଲାଣି । ବିଭିନ୍ନ ଦଳରୁ ଆଶାୟୀଙ୍କ ତାଲିକା ସୋସିଆଲ୍ ମିଡ଼ିଆରେ ଭାଇରାଲ୍ ହେବାରେ ଲାଗିଛି । ଏହା ଭିତରେ ଭୁବନେଶ୍ୱର ସାଂସଦ ଅପରାଜିତା ଷଡ଼ଙ୍ଗୀଙ୍କୁ ନେଇ ଭିନ୍ନ ଏକ ଚର୍ଚ୍ଚା ଆରମ୍ଭ ହୋଇଛି । ଅନ୍ୟ କେହି ନୁହଁନ୍ତି, ଖୋଦ୍ ଅପରାଜିତା କୁଆଡ଼େ ଭୁବନେଶ୍ୱରରୁ ମେୟର ପ୍ରାର୍ଥୀ ହେଉଛନ୍ତି । ଅପରାଜିତା ଏକା ବିଜେଡ଼ିକୁ ସାମନା କରିବାର ଶକ୍ତି ରଖିଥିବାରୁ ତାଙ୍କ ମେୟର ପ୍ରାର୍ଥୀତ୍ୱକୁ ନେଇ ଦଳରେ ମନ୍ତ୍ରଣା ଆରମ୍ଭ ହୋଇଥିବା କୁହାଯାଉଛି ।
ଅପରାଜିତାଙ୍କ ପ୍ରାର୍ଥୀତ୍ୱ ସପକ୍ଷରେ ଯୁକ୍ତି ବାଢ଼ୁଥିବା କିଛି ଦଳୀୟ ନେତାଙ୍କ କହିବା କଥା ହେଲା, ଆଗାମୀ ପଞ୍ଚାୟତ ନିର୍ବାଚନ ଫଳାଫଳ ସାଧାରଣ ନିର୍ବାଚନ ଉପରେ ତ ନିଶ୍ଚିତ ଗୁରୁତ୍ୱ ବହନ କରିବ । ସାଙ୍ଗକୁ ବିଏମସି ମେୟର ନିର୍ବାଚନ ଫଳାଫଳ ମଧ୍ୟ ରାଜ୍ୟ ରାଜନୀତି ଉପରେ ଗୁରୁତ୍ୱ ରଖୁଛି । ରାଜଧାନୀର ମେୟର ଆସନ ବିଜେପି ଅକ୍ତିଆର କରିପାରିଲେ ଏହା ଭୋଟରଙ୍କ ଉପରେ ଅନୁକୂଳ ପ୍ରଭାବ ପକାଇବାରେ ସାହାଯ୍ୟ କରିବ । ସୁତରାଂ ବିଜେପିର ଉଜ୍ଜଳ ଭବିଷ୍ୟତ ଦୃଷ୍ଟିରୁ ଅପରାଜିତା ହିଁ ଯୋଗ୍ୟ ମେୟର ପ୍ରାର୍ଥୀ! ଅପରାଜିତାଙ୍କ ଛଡ଼ା ଅନ୍ୟ କିଏ ପ୍ରାର୍ଥୀ ହେଲେ ବିଜେଡ଼ିକୁ ସାମନା କରିବା ସହଜ ହେବ ନାହିଁ ବୋଲି ସେମାନଙ୍କର ମତ ।
ତେବେ ଅପରାଜିତାଙ୍କ ଅନ୍ୟ ସମର୍ଥକ ଗୋଷ୍ଠୀ ମେୟର ଥିଓରିକୁ ଗ୍ରହଣ କରିବାକୁ ରାଜି ନାହାନ୍ତି । ମ୍ୟାଡାମ୍ ଙ୍କୁ ମୁଖ୍ୟମନ୍ତ୍ରୀ ମ୍ୟାଟେରିଆଲ୍ ଦର୍ଶାଇ ସେମାନେ ଭିନ୍ନ ଯୁକ୍ତି ରଖିଛନ୍ତି । ତାଙ୍କୁ ସିଧାସଳଖ ମୁଖ୍ୟମନ୍ତ୍ରୀ ରୂପରେ ଦେଖିବାକୁ ଚାହୁଁଥିବାରୁ ମେୟର ନାଁ ଶୁଣି ଚିହିଁକି ଉଠିଛନ୍ତି । ସେମାନଙ୍କର ଯୁକ୍ତି, ଭୁବନେଶ୍ୱରରେ ମ୍ୟାଡାମ୍ ମେୟର ମେକର୍ ହେବେ, ମେୟର୍ ନୁହଁନ୍ତି ।
ଅନ୍ୟ ଏକ ସମର୍ଥକ ଗୋଷ୍ଠୀର ଯୁକ୍ତି, ମ୍ୟାଡାମ୍ ଯଦି ମେୟର ଲଢ଼ିବାକୁ ଚାହାଁନ୍ତି ଏବଂ ଜିତନ୍ତି ତେବେ ସାଂସଦ ପଦ ବଜାୟ ରଖିବାରେ ଅସୁବିଧା ନାହିଁ । ପିପୁଲସ୍ ରିପ୍ରେଜେଣ୍ଟେସନ୍ ଆକ୍ଟ ଏହି ଡୁଆଲ୍ ମ୍ୟାନଟେଡ୍ ଅନୁମତି ଦେଇଛି । ଅତୀତରେ କୋଲକତା ମେୟର ସୁବ୍ରତ ମୁଖାର୍ଜୀଙ୍କ କ୍ଷେତ୍ରରେ ଏହି ବିତର୍କ ସୃଷ୍ଟି କରିଥିଲା ବୋଲି ସେମାନେ କହିଛନ୍ତି ।
ତେବେ ସେ ଯାହା ହେଉ, ବିଏମସି ନିର୍ବାଚନ ଘୋଷଣା ହେବାକୁ ବାକିଥିଲେ ମଧ୍ୟ ଏହି ମେୟର ଅଙ୍କକଷା ରାଜନୈତିକ ପାଣିପାଗକୁ ଏବେଠାରୁ ଉଷ୍ମ କରିଛି । କିଛି ଅସନ୍ତୁଷ୍ଟ ପୂର୍ବତନ କର୍ପୋରେଟରଙ୍କୁ ଅପରାଜିତା ନିଜ ସପକ୍ଷରେ ମନେଇବାର ପୂର୍ବ ଯୋଜନା କାର୍ଯ୍ୟକାରୀ କରିବାକୁ ପୁଣି ଥରେ ଅଣ୍ଟା ଭିଡ଼ିବା ଚର୍ଚ୍ଚାକୁ ଅଧିକ ଖୋରାକ ଯୋଗାଇଛି । ତେବେ ଅପରାଜିତା ଦଳୀୟ ପରିଚୟ ଅପେକ୍ଷା ନିଜସ୍ୱ ପରିଚୟରେ ଆଗକୁ ବଢ଼ୁଥିବାରୁ ତାଙ୍କ ଯୋଜନାର ସଫଳତା ନେଇ ସଂଶୟ ସୃଷ୍ଟି ହୋଇଛି । ସର୍ବୋପରି ଅପରାଜିତାଙ୍କ ଭିନ୍ନ ଗୋଠ ଏବଂ ଅହଂକାରୀ ସ୍ୱଭାବକୁ ଅନେକ ନାପସନ୍ଦ କରୁଥିବାରୁ ଆଗାମୀ ଦିନରେ ସମୀକରଣ କେଉଁ ରୂପ ନେବ ସମୟ କହିବ ।
ଏହି ସବୁ ଚର୍ଚ୍ଚା ଉପରେ ମ୍ୟାଡାମ୍ ଅପରାଜିତାଙ୍କ ପ୍ରତିକ୍ରିୟା ଜଣାପଡ଼ିନାହିଁ ।
