By Our Correspondent September 8, 2020 at 23:29:17


ଭୁବନେଶ୍ୱର: ନିଜ ଅଫିସ୍ କର୍ମଚାରୀଙ୍କ ଦ୍ୱାରା ଜଣେ ନାବାଳିକା ଗଣଦୁଷ୍କର୍ମର ଶିକାର ହୋଇଥିବା ଅଭିଯୋଗ ସଂକ୍ରାନ୍ତରେ ଓଟିଭି କର୍ତ୍ତୃପକ୍ଷ ପ୍ରଥମରୁ ଅବଗତ ଥିଲେ । ମାମଲାର ତଦନ୍ତ ପାଇଁ ଏକ ଆଭ୍ୟନ୍ତରୀଣ ଅଭିଯୋଗ କମିଟି(ଆଇସିସି) ଗଠନ କରାଯାଇଥିଲା । ଏକଥା ଆମେ କହୁନୁ, ନିଜକୁ ନିଦେ୍ର୍ଦାଷ ଦେଖାଇବାକୁ ଯାଇ ଓଟିଭି ଏହି ସଫେଇ ରଖିଛି ।

ଆଜି ଓଟିଭି ସଫେଇରେ ଦୁଇଟି କଥା ସାର୍ବଜନୀନ କରିଦେଇଛି । ପ୍ରଥମତଃ, ନାବାଳିକା ଗଣଦୁଷ୍କର୍ମର ଅଭିଯୁକ୍ତ ଓଟିଭି କର୍ମଚାରୀ ଏବଂ ସଂସ୍ଥା କର୍ତ୍ତୃପକ୍ଷ ଏ ସମ୍ପର୍କରେ ମୂଳରୁ ଅବଗତ ଥିଲେ । ଓଟିଭି ଖାଲି ସଫେଇ ଦେଇନାହିଁ ବରଂ ଅଭିଯୋଗଟି ସମ୍ପୂର୍ଣ୍ଣ ମିଛ ବୋଲି ରାୟ ଶୁଣାଇ ଦେଇଛି । ପୀଡ଼ିତାଙ୍କ ମାଆ ଓଟିଭିରେ ୬ ମାସିଆ ଠିକା କର୍ମଚାରୀ ଥିଲେ ଏବଂ ନିଜ ଝିଅ ପ୍ରତି ସଂସ୍ଥା କର୍ମଚାରୀଙ୍କ ଦ୍ୱାରା ଗଣଦୁଷ୍କର୍ମ ଅଭିଯୋଗ ଆଣି କୁଆଡ଼େ ଓଟିଭି ଏମଡି ଜାଗୀମଙ୍ଗତ ପଣ୍ଡାଙ୍କୁ ବ୍ଲାକମେଲିଂ କରି ଅର୍ଥ ଦାବି କରୁଥିଲେ ।

ଅପରପକ୍ଷରେ ପୀଡ଼ିତାଙ୍କ ୪୪ ବର୍ଷୀୟା ମାଆ ଯିଏ କି ଜଣେ ବିଧବା ତାଙ୍କ ଅଭିଯୋଗଟି ସଙ୍ଗୀନ । ତାଙ୍କ ଡ୍ୟୁଟି ବେଳର ସୁଯୋଗ ନେଇ ଘରେ ଏକୁଟିଆ ରହୁଥିବା ୧୩ ବର୍ଷର ଝିଅକୁ ଓଟିଭିର ଦୁଇଜଣ କର୍ମଚାରୀ, ଦୁଇଜଣ ସୁରକ୍ଷା କର୍ମୀ ଏବଂ ରାଉରକେଲାର ଜଣେ ପୁଲିସ ସାଙ୍ଗ ଏହିଭଳି ୭ ଜଣ ୧୫ ଦିନ ଧରି ଗଣଦୁଷ୍କର୍ମ କରିଥିଲେ । ଏକଥା ପ୍ରଘଟ କଲେ ମାଆ ଓ ଝିଅଙ୍କୁ ଜୀବନରୁ ମାରିଦେବାର ଧମକ ଦେଇଥିଲେ ।

ଗତ ମାର୍ଚ୍ଚ-ଏପ୍ରିଲ୍ ମାସ ଲକ୍ ଡାଉନ୍ ବେଳର ଏହି ଘଟଣା ତାଙ୍କ ଝିଅଠାରୁ ଜାଣିବା ପରେ ସେ ସିଧାସଳଖ ଓଟିଭି ଏମଡି ଜାଗୀମଙ୍ଗତ ପଣ୍ଡାଙ୍କୁ ରିପୋର୍ଟ କରି ନ୍ୟାୟଭିକ୍ଷା କରିଥିଲେ । ମାତ୍ର ଜାଗୀ ଏଥିପ୍ରତି ଆଖି ବୁଜିଦେଇଥିଲେ । ନା ସେ ସଂପୃକ୍ତ କର୍ମଚାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେଲେ ନା ପୁଲିସକୁ ଜଣାଇଲେ । ଜାଗୀଙ୍କୁ ଭେଟିବାକୁ ସେ ବାରମ୍ବାର ଉଦ୍ୟମ କରିଥିଲେ ମଧ୍ୟ ଭେଟ ଦେଇ ନ ଥିଲେ । ବରଂ ମାମଲାକୁ ଚପାଇ ଦେବାକୁ ଚାହିଁଥିଲେ । ଶେଷରେ ନିରୁପାୟ ହୋଇ ମହିଳା ଥାନାରେ ଅଭିଯୋଗ କଲି ବୋଲି ପୀଡ଼ିତାଙ୍କ ମାଆ କହିଛନ୍ତି ।

ଅନ୍ୟପକ୍ଷରେ ପୁଲିସ ଘଟଣାସ୍ଥଳ ପରିଦର୍ଶନ କରିଛନ୍ତି । ପୀଡ଼ିତାଙ୍କ ଡାକ୍ତରୀ ପରୀକ୍ଷା, ମାଜିଷ୍ଟ୍ରେଟ୍ ଙ୍କ ଆଗରେ ବୟାନ ରେକର୍ଡ କରିଛନ୍ତି । ସିସିଟିଭି ଫୁଟେଜ୍ ରୁ ସବୁକିଛି ସ୍ପଷ୍ଟ ହେଲାଣି । ଏହା ସତ୍ତ୍ୱେ ପୁଲିସ ଏହି ବର୍ବରକାଣ୍ଡରେ ଲିପ୍ତ ଆସାମୀମାନଙ୍କୁ ଗିରଫ କରିନାହିଁ । ମାମଲାକୁ ଚପାଇଦେବାକୁ ଉଦ୍ୟମ କରି ଆସାମୀଙ୍କୁ ସୁରକ୍ଷା ଦେଉଥିବା ଓଟିଭି ଏମଡି ଜାଗୀମଙ୍ଗତ ପଣ୍ଡାଙ୍କ ବିରୋଧରେ ମଧ୍ୟ କାର୍ଯ୍ୟାନୁଷ୍ଠାନ(ଧାରା ୨୦/୨୧ ପୋକସୋ ଆକ୍ଟ ୨୦୧୨) ପାଇଁ ସେ ଦାବି କରି ଓଡ଼ିଶା ରାଜ୍ୟ ଶିଶୁ ଅଧିକାର କମିଶନଙ୍କ ଦ୍ୱାରସ୍ଥ ହୋଇଛନ୍ତି ।

ନିଜ ଆବେଦନରେ ଓଟିଭି ସଫେଇର ବି କଡ଼ା ଜବାବ ରଖିଛନ୍ତି ଅଭିଯୋଗକାରିଣୀ ମହିଳା । ଓଟିଭି ପକ୍ଷରୁ ମାମଲାର ତଦନ୍ତ ପାଇଁ ଆଭ୍ୟନ୍ତରୀଣ ଅଭିଯୋଗ କମିଟି ଗଠନ କରାଯାଇଥିବା କୁହାଯାଇଛି । ମାତ୍ର ତାଙ୍କର ନାବାଳିକା ଝିଅ ଯିଏ କି ଅଫିସ୍ କର୍ମଚାରୀ ନୁହଁନ୍ତି ତାଙ୍କ ଉପରେ ଗଣଦୁଷ୍କର୍ମ କରାଯାଇଥିବାରୁ ଏହାର ଯଥାର୍ଥତା ନେଇ ପ୍ରଶ୍ନ ଉଠାଇଛନ୍ତି । ଅଭିଯୁକ୍ତଙ୍କୁ ସୁରକ୍ଷା ଦେବାକୁ ସମୟ ଗଡ଼ାଇ ପ୍ରମାଣ ନଷ୍ଟ କରିବା ସହ ମାମଲାକୁ ଚପାଇ ଦେବା ପାଇଁ ଏହା ଏମଡ଼ି ଜାଗୀ ପଣ୍ଡାଙ୍କର ହୀନ ପ୍ରୟାସ ବୋଲି ସେ ସିଧାସଳଖ ତାଙ୍କ ଆବେଦନରେ ଉଲ୍ଲେଖ କରିଛନ୍ତି ।

ଏଠି ପ୍ରଶ୍ନ??

-ଏକ ସଂସ୍ଥାରେ ଚାକିରି କରିଥିବା ଜଣେ ବିଧବା ସଂପୃକ୍ତ କର୍ତ୍ତୃପକ୍ଷଙ୍କୁ ବ୍ଲାକମେଲିଂ କରି ପଇସା ଆଦାୟ କରିବାକୁ ନିଜର ନାବାଳିକା ଝିଅର ଇଜ୍ଜତ ବିକ୍ରୀ କରିପାରିକ କି?

-ନାବାଳିକାଙ୍କ ମାଆ ସଂସ୍ଥାରେ ଚାକିରି କରନ୍ତି । ନାବାଳିକା ନୁହଁନ୍ତି । ତେଣୁ ନାବାଳିକା ଉପରେ ଗଣଦୁଷ୍କର୍ମ ଅଭିଯୋଗ ଆସିଥିବାରୁ ମାଆ ଚାକିରି କରିଥିବା ଅଫିସ୍ ର ଆଭ୍ୟନ୍ତରୀଣ ବିଶାଖା କମିଟିର ଆବଶ୍ୟକତା ଥିଲା କି?

-ଜଣେ ନାବାଳିକା ଝିଅ ପ୍ରତି ଗଣଦୁଷ୍କର୍ମର ଅଭିଯୋଗକୁ ସିଧାସଳଖ ମିଛ କହିବାର ଅଧିକାର ଓ ସାହାସ ଆସିଲା କେଉଁଠୁ?

-ଜଣେ ବିଧବାକୁ ବ୍ଲାକମେଲର୍ ଆଖ୍ୟା ଦେବା ଏବଂ ତାଙ୍କ ନାବାଳିକା ଝିଅ ପ୍ରତି ଗଣଦୁଷ୍କର୍ମ ମାମଲାକୁ ମିଛ କହି ଚପାଇଦେବାର ସାହାସ କରିବା କ’ଣ ନାରୀ ସମ୍ମାନ?

SHARE

1 COMMENT

LEAVE A REPLY