ଭୁବନେଶ୍ୱର: ଜେଲ୍ ହାଜତ ମୃତ୍ୟୁର ଚାପ ସମ୍ଭାଳି ପାରିନାହାନ୍ତି ରାଜ୍ୟ ସରକାର । ଏସପି ଅଖିଳେଶ୍ୱର ସିଂହଙ୍କୁ ଆଜି ରାତିରେ ପୁରୀରୁ ବଦଳି କରାଯାଇଛି । ସମ୍ବଲପୁର ଏସପି କନୱଲ୍ ବିଶାଲ ସିଂହଙ୍କୁ ତାଙ୍କ ଜାଗାରେ ପୁରୀ ଏସପି ଭାବେ ନିଯୁକ୍ତି ଦିଆଯାଇଛି । ଅଖିଲେଶ୍ୱରଙ୍କୁ କଟକସ୍ଥିତ ପୁଲିସ ମୁଖ୍ୟାଳୟରେ ଅବସ୍ଥାପିତ କରାଯାଇଥିବା ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ପକ୍ଷରୁ ସୂଚନା ଦିଆଯାଇଛି ।
ସେହିଭଳି ବାସେଳିସାହି ଥାନା ଏସଆଇ ବିପ୍ଲବ କୁମାର ପ୍ରଧାନ, କନେଷ୍ଟବଳ ଜଗନ୍ନାଥ ସ୍ୱାଇଁ ଏବଂ ବାବୁଲି ବେହେରାଙ୍କୁ ନିଲମ୍ବନ କରାଯାଇଛି । ଦାୟିତ୍ୱହୀନ ଆଚରଣ ଏବଂ କାର୍ଯ୍ୟରେ ଅବହେଳା ପାଇଁ ତାଙ୍କୁ ନିଲମ୍ବନ କରାଯାଇଥିବା ପୁଲିସ ମୁଖ୍ୟାଳୟ ପକ୍ଷରୁ ଟ୍ୱିଟ୍ କରାଯାଇଛି ।
ପୁରୀ ହାଜତ ମୃତ୍ୟୁ ମାମଲାରେ ରାଜ୍ୟ ସରକାର କଡ଼ା ଆଭିମୁଖ୍ୟ ଗ୍ରହଣ କରି ଏସପିଙ୍କୁ ବଦଳି କରିଥିବା ବେଳେ ବୀରମିତ୍ରପୁର ଅନୁରୂପ ହାଜତ ମୃତ୍ୟୁ ଅଭିଯୋଗ ଘଟଣାରେ ଏସପି କର୍ଯ୍ୟାନୁଷ୍ଠାନରୁ ବର୍ତ୍ତିଯାଇଛନ୍ତି । ତେବେ ବୀରମିତ୍ରପୁର ଥାନା ଆଇଆଇସି ସ୍ମୃତିପ୍ରଭା ପ୍ରଧାନଙ୍କୁ ଚାକିରିରୁ ନିଲମ୍ବନ କରାଯାଇଛି ।
ଗତକାଲି ପୁରୀ ଓ ବୀରମିତ୍ରପୁରରେ ହାଜତ ମୃତ୍ୟୁ ଅଭିଯୋଗ ହୋଇଥିଲା । ଏହାକୁ ନେଇ ଉଭୟ ସ୍ଥାନରେ ପୁଲିସ ସହ ଉତ୍ତ୍ୟକ୍ତ ଜନତାଙ୍କର ମୁହାଁମୁହିଁ ହୋଇଥିଲା । ବିଜେପି ଓ କଂଗ୍ରେସ ଏହି ଘଟଣାକୁ ତୀବ୍ର ସମାଲୋଚନା କରି ରାସ୍ତାକୁ ଓହ୍ଲାଇଛନ୍ତି । ଆଜି ବିଧାନସଭାରେ ମଧ୍ୟ ପ୍ରବଳ ହଙ୍ଗାମା କରିଛନ୍ତି ।
ଗୋଟିଏ ଦିନରେ ଦୁଇ ଦୁଇଟି ହାଜତ ମୃତ୍ୟୁ ଅଭିଯୋଗ ସାରା ରାଜ୍ୟରେ ଆଲୋଡ଼ନ ସୃଷ୍ଟି କରିଥିବା ବେଳେ ରାଜ୍ୟ ସରକାରଙ୍କୁ ପ୍ରବଳ ସମାଲୋଚନାର ଶିକାର ହେବାକୁ ପଡ଼ିଛି । ଜାତୀୟ ମାନବାଧିକାର କମିଶନ ମଧ୍ୟ ଏହି ମାମଲାକୁ ଗମ୍ଭୀରତାର ସହ ନେଇଛନ୍ତି । ପୁଙ୍ଖାନୁପୁଙ୍ଖ ତଦନ୍ତ କରି ୪ ସପ୍ତାହ ମଧ୍ୟରେ ରିପୋର୍ଟ ଦେବାକୁ ରାଜ୍ୟ ସରକାର, ମୁଖ୍ୟଶାସନ ସଚିବ ଓ ଡିଜିଙ୍କୁ ଆଜି ନିର୍ଦ୍ଦେଶ ଦେଇଛନ୍ତି ।
ସୂଚନାଯୋଗ୍ୟ, ପୁରୀ ଲୋକନାଥ ରୋଡ୍ ର କେ.ରମେଶ(୩୧) ଙ୍କୁ ବାସେଳିସାହି ଥାନା ହାଜତରେ ପୁଲିସ ପିଟି ପିଟି ମାରିଦେଇଥିବା ତାଙ୍କ ପରିବାର ଲୋକେ ଅଭିଯୋଗ କରିଥିଲେ । ଏସପି ଏହାକୁ ଅସ୍ୱୀକାର କରିଥିଲେ ମଧ୍ୟ ରମେଶଙ୍କ ଦେହସାରା ମାଡ଼ ଦାଗ ସହ ନୋଳା ଫାଟି ରକ୍ତ ଜମାଟ ବାନ୍ଧିଥିବାରୁ ତୀବ୍ର ଉତ୍ତେଜନା ପ୍ରକାଶ ପାଇଥିଲା । ଜିଲ୍ଲା ମୁଖ୍ୟ ଡାକ୍ତରଖାନା ପରିସରରେ ଏହାକୁ ନେଇ ପୁଲିସ-ଜନତା ସଂଘର୍ଷ ହୋଇଥିଲା । ସଂପୃକ୍ତ ଥାନା ଅଧିକାରୀ ଓ କର୍ମଚାରୀଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଦାବି କରି କଂଗ୍ରେସ ଓ ବିଜେପି ଆନେ୍ଦାଳନକୁ ଓହ୍ଲାଇଥିଲେ ।
ଅନ୍ୟପକ୍ଷରେ ଏସପି ହାଜତ ମୃତ୍ୟୁକୁ ଅସ୍ୱୀକାର କରିଥିଲେ ମଧ୍ୟ ଏହାକୁ ହାଜତ ମୃତ୍ୟୁ ଭାବେ ଗ୍ରହଣ କରି ମାମଲା ରୁଜୁ କରିବା ସହ ତଦନ୍ତ ଆରମ୍ଭ କରିଥିଲେ । ଉଭୟ ପୁରୀ ଓ ବୀରମିତ୍ରପୁର ମାମଲା ତଦନ୍ତରେ ଜାତୀୟ ମାନବାଧିକାର କମିଶନ ଗାଇଡଲାଇନ୍ ପାଳନ କରାଯାଉଥିବା ଡିଜି ଶ୍ରୀ ଅଭୟ କହିଥିଲେ ।
ପୁରୀରେ ମୃତ୍ୟୁବରଣ କରିଥିବା ରମେଶ ନାଁରେ ବହୁ ଅପରାଧିକ ମାମଲା ଥିଲା । ଏକ ଡକାୟତି ପାଇଁ ଯୋଜନା କରୁଥିବା ସୂଚନା ପାଇ ପୁଲିସ ତାଙ୍କୁ ବୁଧବାର ରାତିରେ ଭୁବନେଶ୍ୱର-ପୁରୀ ରାସ୍ତାରେ ଧରିବାକୁ ଚେଷ୍ଟା କରିଥିଲା । ସେ ଖସିଯିବାକୁ ଚେଷ୍ଟା କଲା ବେଳେ ଧସ୍ତାଧସ୍ତି ହୋଇଥିଲା ଏବଂ ରମେଶ ଆହତ ହୋଇଥିଲେ । ତାଙ୍କୁ ପ୍ରଥମେ ବାସେଳିସାହି ଥାନା ଓ ପରେ ଡାକ୍ତରଖାନା ନିଆଯାଇଥିଲା । ସେଠାରେ ତାଙ୍କର ମୃତ୍ୟ ହୋଇଥିଲା ବୋଲି ଏସପି ସଫେଇ ଦେଇଥିଲେ ।
ତେବେ ମାମଲା ଜଟିଳ ରୂପ ନେବା ପରେ ପୁରୀ ଏସପି ବଳି ପଡ଼ିଛନ୍ତି । ବାସେଳିସାହି ଥାନା ଅଧିକାରୀ ପୂର୍ବରୁ ୧୫ ଦିନିଆ ଛୁଟିରେ ଥିବାରୁ କାର୍ଯ୍ୟାନୁଷ୍ଠାନରୁ ବର୍ତ୍ତି ଯାଇଛନ୍ତି ।
