ମୋହନଙ୍କ ବିରୋଧରେ ବିଦ୍ରୋହ ଘୋଷଣା!

ଭୁବନେଶ୍ୱର: ବିହାରରେ ଏନଡିଏର ବିପୁଳ ସଫଳତାର ଏକ ଶ୍ରେୟ ଯାଉଛି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କୁ । ବିହାର ନିର୍ବାଚନ ପ୍ରଭାରୀ ଦାୟିତ୍ୱରେ ଥାଇ ସେ ରଣନୀତି ପ୍ରସ୍ତୁତିଠାରୁ ନିର୍ବାଚନା ପରିଚାଳନାର ସବୁ ଦାୟିତ୍ୱ ବୁଝିଥିଲେ । ମେଣ୍ଟ ସରକାର ଗଠନରେ ମଧ୍ୟ ତାଙ୍କର ତାଙ୍କର ଗୁରୁତ୍ୱପୂର୍ଣ୍ଣ ଭୂମିକା ଥିଲା । ଜଣେ ଓଡ଼ିଆ ପୁଅର ଏହି ସଫଳତା ସ୍ୱାଭାବିକ ଭାବେ ସବୁ ଓଡ଼ିଆଙ୍କ ପାଇଁ ଗର୍ବର ବିଷୟ । ବିହାର ନିର୍ବାଚନ ଫଳ ଆସିବା ପରେ ଆଜି ପ୍ରଥମ ଥର ପାଇଁ ସେ ଜନ୍ମମାଟି ଆସିଛନ୍ତି । ତାଙ୍କୁ ସ୍ୱାଗତ ସମ୍ବର୍ଦ୍ଧନା ଦେବା ପାଇଁ ଭୁବନେଶ୍ୱର ବିମାନ ବନ୍ଦରରେ ବିପୁଳ ଜନସମାଗମ ହୋଇଥିଲା । ମାତ୍ର ତାହା ଭିତରେ ଏକ ଅଭାବନୀୟ ଚିତ୍ର ଦେଖିବାକୁ ମିଳିଛି ।

କେନ୍ଦ୍ରମନ୍ତ୍ରୀଙ୍କ ଆଗମନ ପାଇଁ ବିମାନବନ୍ଦର ଅଞ୍ଚଳ ଲୋକାରଣ୍ୟ ହୋଇଥିଲେ ମଧ୍ୟ ତାଙ୍କୁ ସ୍ୱାଗତ କରିବା ପାଇଁ ମନ୍ତ୍ରୀ ସୂରଜ ସୂର୍ଯ୍ୟବଂଶୀଙ୍କୁ ଛାଡ଼ିଦେଲେ ଅନ୍ୟ କାହାରି ଦେଖା ନ ଥିଲା । ୪୦ରୁ ଅଧିକ ବିଧାୟକ ଧର୍ମେନ୍ଦ୍ରଙ୍କ ସ୍ୱାଗତ ପାଇଁ ଲୋକ ଯୋଗାଡ଼ କରି ଆଣିଥିଲେ ମଧ୍ୟ ଧର୍ମେନ୍ଦ୍ରଙ୍କ ପାଖ ମାଡ଼ି ନ ଥିଲେ । କ୍ୟାମେରା ଦେଖିଲେ ମୁହଁ ଲୁଚାଇ ଦେଉଥିଲେ । ପୂର୍ବତନ ସଭାପତି ସମୀର ମହାନ୍ତି, ଗୋଲକ ମହାପାତ୍ର, ବିଧାୟକ ଟଙ୍କଧର ତ୍ରିପାଠୀଙ୍କ ଭଳି ହାତଗଣତି ନେତାଙ୍କୁ ଧର୍ମେନ୍ଦ୍ରଙ୍କ ପାଖରେ ଦେଖିବାକୁ ମିଳିଥିଲା ।

ଆଜି ଘଟଣାର ବଡ଼ ରୋଚକ ଅଧ୍ୟାୟଟି ଥିଲା, ବିମାନବନ୍ଦରରେ ଧର୍ମେନ୍ଦ୍ରଙ୍କୁ ସ୍ୱାଗତ ପାଇଁ ଦୁଇଦିନ ତଳୁ ପ୍ରସ୍ତୁତି ଚାଲିଥିଲେ ମଧ୍ୟ ମୁଖ୍ୟମନ୍ତ୍ରୀ ମୋହନ ମାଝୀ ଅଚାନକ କ୍ୟାବିନେଟ୍ ବୈଠକ ଡାକିବା । ଆଜି ଦିନ ୧୧ଟା ବେଳେ ଏହି ବୈଠକ ଧାର୍ଯ୍ୟ ହୋଇଥିଲା । ଅପରାହ୍ନ ୧.୫୧ ମିନିଟ୍ ରେ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟରୁ ବୈଠକର ଫଟୋ ଛଡ଼ାଯାଇଥିଲା । ସୁତରାଂ ବିମାନବନ୍ଦରରେ ଧର୍ମେନ୍ଦ୍ରଙ୍କ ପାଦ ପଡ଼ିଲା ବେଳକୁ ଲୋକସେବା ଭବନରେ ମୁଖ୍ୟମନ୍ତ୍ରୀଙ୍କ ଅଧ୍ୟକ୍ଷତାରେ ଚାଲିଥିଲା କ୍ୟାବିନେଟ୍ ବୈଠକ ।

ଚର୍ଚ୍ଚା ହେଉଛି, ଧର୍ମେନ୍ଦ୍ରଙ୍କ କାର୍ଯ୍ୟକ୍ରମରୁ ମନ୍ତ୍ରୀମାନଙ୍କୁ ଦୂରେଇ ରଖିବା ପାଇଁ କ୍ୟାବିନେଟ୍ ବୈଠକର ଆୟୋଜନ କରାଯାଇଥିଲା । ଯଦି ଏହାକୁ ହୁଇପ୍ ବୋଲି ଧରାଯାଏ, ତେବେ ମନ୍ତ୍ରୀ ସୂରଜ ସୂର୍ଯ୍ୟବଂଶୀ ହୁଇପ୍ ମାନିନାହାନ୍ତି । ଧର୍ମେନ୍ଦ୍ରଙ୍କ ସ୍ୱାଗତ କାର୍ଯ୍ୟକ୍ରମର ନେତୃତ୍ୱ ନେଇ ସେ ମୁଖ୍ୟମନ୍ତ୍ରୀଙ୍କ ବିରୋଧରେ ବିଦ୍ରୋହ ଘୋଷଣା କରିଛନ୍ତି ବୋଲି ଧରିନିଆଯିବ ।

ଖାଲି ସେତିକି ନୁହେଁ, ନିଜ ସୋସିଆଲ୍ ମିଡିଆରେ ଧର୍ମେନ୍ଦ୍ରଙ୍କୁ ସ୍ୱାଗତ ସମ୍ବର୍ଦ୍ଧନାର ଫଟୋ ସହ ଇର୍ଷଣୀୟ ପ୍ରଶଂସା କରିଛନ୍ତି ସୂରଜ । ସେ ଲେଖିଛନ୍ତି ଯେ ବିହାର ନିର୍ବାଚନରେ ଯେଉଁ ଅବିଶ୍ୱନୀୟ ଜନମତ ଆମ ଦଳ ପାଇଁ ମିଳିଲା ତାହାର ସୂତ୍ରଧର ଆମ ଓଡ଼ିଆ ପୁଅ ଧର୍ମେନ୍ଦ୍ର ପ୍ରଧାନ । ଜାତୀୟ ରାଜନୀତିର ଅନ୍ୟତମ ସଫଳ ବ୍ୟକ୍ତିତ୍ୱ ଭାବେ ସେ ଯେଉଁ ଗୌରବ ଆମ ରାଜ୍ୟ ପାଇଁ ସାଉଁଟିଛନ୍ତି ତାହା ଏହି ବିଶାଳ ସ୍ୱାଗତ ଉତ୍ସବରୁ ପ୍ରମାଣିତ ।

କେବଳ ଭୁବନେଶ୍ୱରରେ ନୁହେଁ, ଧର୍ମେନ୍ଦ୍ରଙ୍କୁ ନିଜ ନିର୍ବାଚନମଣ୍ଡଳୀ ନେଇ ଶକ୍ତି ପ୍ରଦର୍ଶନ କରିବାକୁ ଯାଉଛନ୍ତି ସୂରଜ । ଆସନ୍ତାକାଲି ଗୋହିରାଟିକିରିରେ ଉକ୍ରଳ ପ୍ରଦେଶର ଶେଷ ସ୍ୱାଧୀନ ରାଜା ମୁକୁନ୍ଦଦେବଙ୍କ ପ୍ରତିମୂର୍ତ୍ତି ନିର୍ମାଣ ଓ ପର୍ଯ୍ୟଟନସ୍ଥଳୀ ବିକାଶ ଭିତ୍ତିଭୂମି ପ୍ରକଳ୍ପର ଶିଳାନ୍ୟାସ କରିବା ସହ ଲୌହପୁରୁଷ ସର୍ଦ୍ଦାର ବଲ୍ଲଭ ଭାଇ ପଟେଲଙ୍କ ୧୫୦ତମ ଜୟନ୍ତୀ ପାଳନ ଅବସରରେ ଆୟୋଜିତ ଏକତା ଯାତ୍ରାରେ ଧର୍ମେନ୍ଦ୍ର ଯୋଗଦେବେ । ଏହାକୁ ସଫଳ କରିବା ପାଇଁ ସୂରଜ ଲାଗିପଡ଼ିଛନ୍ତି ।

ମୋହନ ମନ୍ତ୍ରିମଣ୍ଡଳର ସଦସ୍ୟମାନେ ଧର୍ମେନ୍ଦ୍ରଙ୍କ ପାଖ ମାଡ଼ିବାକୁ ଡରୁଥିଲା ବେଳେ ସୂରଜଙ୍କର ଏହି ଭିନ୍ନ ଅବତାର ସମସ୍ତଙ୍କ ନଜରକୁ ଆସିଛି ।

ସୂଚନାଥାଉକି, ନୂଆପଡ଼ା ଉପନିର୍ବାଚନରେ ଧର୍ମେନ୍ଦ୍ର ଷ୍ଟାର୍ ପ୍ରଚାରକ ଥିଲେ । ତାଙ୍କ ଉପରେ ବିହାର ବୋଝ ସତ୍ତ୍ୱେ ସେ ଥରୁଟିଏ ନୂଆପଡ଼ା ଆସିବାକୁ କୁଆଡ଼େ ଆଗ୍ରହୀ ଥିଲେ । ମାତ୍ର ତାଙ୍କୁ ସେଇ ସୁଯୋଗ ମିଳିଲା ନାହିଁ । ନୂଆପଡ଼ା ପ୍ରଚାର ମୈଦାନକୁ ତାଙ୍କର ଖାସ୍ ଅନୁଗତ ସୂରଜଙ୍କୁ ବି ଛଡ଼ା ଗଲାନାହିଁ । ଧର୍ମେନ୍ଦ୍ରଙ୍କର ଆଉ ଜଣେ ଅନୁଗତ ମନ୍ତ୍ରୀ ପୃଥ୍ୱରାଜ ହରିଚନ୍ଦନଙ୍କୁ ମଧ୍ୟ ନୂଆପଡ଼ା ଉପନିର୍ବାଚନରୁ ଦୂରେଇ ରଖାଯାଇଥିଲା ।