ଭୁୁବନେଶ୍ୱର: ୨୦୨୧ଜାନୁଆରୀ ଓ ଫେବ୍ରୁଆରୀରେ କୋଟିଆ ଅଞ୍ଚଳରେ ପଞ୍ଚାୟତ ନିର୍ବାଚନ କରାଇଥିଲେ ଆନ୍ଧ୍ର ସରକାର । ଏହାକୁ ବିରୋଧ କରି ସୁପ୍ରିମକୋର୍ଟରେ ଅବମାନନା କେସ୍ କରିଥିଲେ ଓଡ଼ିଶା ସରକାର । ଅଞ୍ଚଳରେ ସ୍ଥିତାବସ୍ଥା ବଜାୟ ରହିବାକୁ ସୁପ୍ରିମକୋର୍ଟ ରାୟ ଦେଇଥିଲେ । ମାତ୍ର ସୁପ୍ରିମକୋର୍ଟର ଆଦେଶକୁ ମାନି ନାହାନ୍ତି ଆନ୍ଧ୍ରର ତେଲୁଗୁ ଦେଶମ ପାର୍ଟି(ଟିଡିପି) ସରକାର । କୋଟିଆ ଅଞ୍ଚଳରେ ପୁଣି ପଞ୍ଚାୟତ ନିର୍ବାଚନ କରିବାକୁ ଯାଉଛନ୍ତି । ଅଥଚ କୋଟିଆର ସୁରକ୍ଷା ପାଇଁ ଡବଲ୍ ଇଞ୍ଜିନ୍ ସରକାରଙ୍କ ନିର୍ବାଚନୀ ପ୍ରତିଶ୍ରୁତି ହୋଇଯାଇଛି ପାଣିର ଗାର ।
ଓଡ଼ିଶାର କୋଟିଆରେ ପୁଣି ଆନ୍ଧ୍ର ନିର୍ବାଚନ । କୋରାପୁଟ ଜିଲ୍ଲା ପଟ୍ଟାଙ୍ଗୀ ବ୍ଲକ୍ ଅନ୍ତର୍ଗତ ଏହି ଅଞ୍ଚଳର ତିନୋଟି ପଞ୍ଚାୟତରେ ନଭେମ୍ବର ୨୮ରେ ପଞ୍ଚାୟତ ଭୋଟ କରିବାକୁ ଯାଉଛନ୍ତି ଆନ୍ଧ୍ର ସରକାର । ଗତକାଲି ଏହାର ବିଜ୍ଞପ୍ତି ପ୍ରକାଶ ପାଇ ସାରିଥିଲା ବେଳେ ଓଡ଼ିଶା ସରକାରଙ୍କ ପକ୍ଷରୁ ପ୍ରତିବାଦ ବି ନାହିଁ । ଲଢ଼େଇ ଦୂରେ ଥାଉ । ଓଲଟି ବିରୋଧୀ ଦଳଙ୍କ ସହ ଆରୋପ-ପ୍ରତ୍ୟାରୋପର ଲଢ଼େଇରେ ମାତିଛନ୍ତି । ଆନ୍ଧ୍ର ସରକାରଙ୍କଠାରୁ ‘କୋଟିଆ’ ଜବାବ ମାଗିବା ବଦଳରେ ପୂର୍ବ ବିଜେଡି ସରକାରଠୁ ଜବାବ ମାଗି ଉହଁକି ଉଠିଛନ୍ତି ରାଜସ୍ୱ ମନ୍ତ୍ରୀ ସୁରେଶ ପୂଜାରୀ ।
୨୦୨୪ ସାଧାରଣ ନିର୍ବାଚନରେ କୋଟିଆ ପ୍ରସଙ୍ଗରେ ଦିଆଯାଇଥିବା ପ୍ରତିଶ୍ରୁତି କୁଆଡ଼େ ଗଲା ବୋଲି ଗତକାଲି ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କୁ ପ୍ରଶ୍ନ କରି ଚିଠି ଲେଖିଥିଲେ ବିରୋଧୀ ଦଳ ନେତା ନବୀନ ପଟ୍ଟନାୟକ । ରାଜ୍ୟ ସରକାର ତୁରନ୍ତ ଆଭିମୁଖ୍ୟ ସ୍ପଷ୍ଟ କରିବାକୁ ସେ ଦାବି କରିଥିଲେ । ମୋହନଙ୍କୁ ନବୀନ ପଚାରିଥିବା ଏହି ପ୍ରଶ୍ନରେ ରାଜସ୍ୱ ମନ୍ତ୍ରୀ ସୁରେଶ ପୂଜାରୀ କିନ୍ତୁ ଗରମ ହୋଇଯାଇଛନ୍ତି । ବିଜେଡି ସରକାରର ୨୪ ବର୍ଷର ଶାସନକାଳକୁ ସେ କଟାକ୍ଷ କରି କୋଟିଆ ପ୍ରସଙ୍ଗରେ ଖୋଲା ବିତର୍କର ଆହ୍ୱାନ ଦେଇଛନ୍ତି ।
ଯାହାର ମୁହଁତୋଡ଼ ଜବାବ ଦେଇଛି ବିଜେଡି । ୨୦୨୫ରେ ଗଠିତ ୧୬ ଜଣିଆ ଉଚ୍ଚସ୍ତରୀୟ କୋଟିଆ କମିଟିର ସୁପାରିଶ କ’ଣ ଥିଲା ଏବଂ ତାହା କୁଆଡ଼େ ଗଲା ବୋଲି ରାଜ୍ୟ ସରକାରଙ୍କୁ ପ୍ରଶ୍ନ କରିଛନ୍ତି ବରିଷ୍ଠ ବିଧାୟକ ଡ. ଅରୁଣ ସାହୁ । ଆନ୍ଧ୍ରରେ ଏବେ ତେଲୁଗୁଦେଶମ୍ ପାର୍ଟିର ସରକାର ଅଛି । ଆଉ ଟିଡିପି ଏନଡିଏର ଏକ ପ୍ରମୁଖ ସହଯୋଗୀ । କେନ୍ଦ୍ରରେ ସଂଖ୍ୟା ଗରିଷ୍ଠ ବଜାୟ ରଖିବା ପାଇଁ ଟିଡିପିର ସହଯୋଗର ଆବଶ୍ୟକତା ରହିଛି । ସେ ଦୃଷ୍ଟିରୁ ଓଡ଼ିଶା ବିଜେପି ସରକାର ନିରବ ରହିଛନ୍ତି ବୋଲି ନବୀନଙ୍କ ଚିଠିକୁ ଦୋହରାଇଛନ୍ତି ଅରୁଣ । କେନ୍ଦ୍ର ସରକାରଙ୍କ ପାଖରେ ଡବଲ ଇଞ୍ଜିନ ଆତ୍ମସମର୍ପଣ କରିଛନ୍ତି ବୋଲି ସେ କହିଛନ୍ତି ।
ପୁଣି ଏକ ସାମ୍ବାଦିକ ସମ୍ମିଳନୀରେ ବିଜେଡିର କହିବାନୁଯାୟୀ, ଦୁଇ ଦଶକରୁ ଅଧିକ ସମୟ କୋଟିଆର ଲୋକମାନେ ଯୋଜନାବଦ୍ଧ ବିକାଶ ମାଧ୍ୟମରେ ନିରନ୍ତର ଧ୍ୟାନ ପାଇଥିଲେ, ଯାହା ସେମାନଙ୍କ ଦୈନନ୍ଦିନ ଜୀବନ ସହିତ ଅଞ୍ଚଳରେ ଓଡ଼ିଶାର ପ୍ରଶାସନିକ ଉପସ୍ଥିତିକୁ ଦୃଢ଼ କରିଥିଲା । ୨୦୦୦ରୁ ୨୦୨୪ ମଧ୍ୟରେ ଗମନାଗମନ, ଶିକ୍ଷା, ସ୍ୱାସ୍ଥ୍ୟଠାରୁ ଆରମ୍ଭ କରି ବିଭିନ୍ନ କଲ୍ୟାଣକାରୀ ଯୋଜନା, ପେନସନ୍ ଓ ରାସନ୍ ସୁବିଧା ନିମନ୍ତେ ୧୦୮ କୋଟିରୁ ଅଧିକ ଟଙ୍କା ଖର୍ଚ୍ଚ ହୋଇଥିଲା ।
କୋଟିଆ ଓ ଓଡ଼ିଶାର ଲୋକେ ରାଜ୍ୟର ଭୌଗଳିକ ଅଖଣ୍ଡତା ଉପରେ କୌଣସି ଆପୋଷକୁ ଗ୍ରହଣ କରିବେ ନାହିଁ । କୋଟିଆ ଓଡ଼ିଶାର, ଏହାର ବାସିନ୍ଦାମାନେ ଓଡ଼ିଆ ଏବଂ ସେମାନଙ୍କ ଅଧିକାରକୁ ଦୃଢ଼ ଓ ବିନା ଦ୍ୱିଧାରେ ବିଜେଡି ରକ୍ଷା କରିବ ବୋଲି କୁହାଯାଇଛି ।
ପିସିସି ସଭାପତି ଭକ୍ତ ଦାସ କହିଛନ୍ତି, କୋଟିଆ ପ୍ରସଙ୍ଗରେ ରାଜ୍ୟ ବିଜେପି ସରକାର ମୁହଁ ଖୋଲିବେ ନାହିଁ । କାରଣ ଟିଡିପି ଯଦି ଏନଡିଏରୁ ସମର୍ଥନ ପ୍ରତ୍ୟାହାର କରିନିଏ ତେବେ ସରକାର ଭାଙ୍ଗିଯିବ । ତେଣୁ ରାଜ୍ୟ ବିଜେପି ଚୁପ୍ । କଂଗ୍ରେସ କିନ୍ତୁ ଚୁପ୍ ବସିବ ନାହିଁ ବୋଲି ସେ କହିଛନ୍ତି ।
ଗତକାଲି ଆନ୍ଧ୍ରର ପଞ୍ଚାୟତ ନିର୍ବାଚନ ବିଜ୍ଞପ୍ତି ଏବଂ ମୁଖ୍ୟମନ୍ତ୍ରୀଙ୍କୁ ବିରୋଧୀ ଦଳ ନେତାଙ୍କ ଚିଠି ପରିପ୍ରେକ୍ଷୀରେ ଆଜି ରାଜସ୍ୱ ମନ୍ତ୍ରୀ ଭିସି ଜରିଆରେ କୋରାପୁଟ ପ୍ରଶାସନ ସହ ବୈଠକ କରିଥିଲେ । କୋଟିଆରେ ଆନ୍ଧ୍ରର ଗତିବିଧି ଉପରେ ନଜର ରଖିବାକୁ ସେ ଜିଲ୍ଲାପାଳ ଓ ଏସପିଙ୍କୁ ନିର୍ଦ୍ଦେଶ ଦେଇଛନ୍ତି । ହେଲେ ଆନ୍ଧ୍ର ବିରୋଧରେ ପାଟି ଖୋଲିନାହାନ୍ତି ରାଜସ୍ୱ ମନ୍ତ୍ରୀ ।
