ଗୁରୁତ୍ୱପୂର୍ଣ୍ଣ ତଥ୍ୟ ଦେଲେ ଶାଳିନୀ ପଣ୍ଡିତ

ଭୁବନେଶ୍ୱର: ଜାତୀୟ ସ୍ୱାସ୍ଥ୍ୟ ମିଶନ୍ ନିର୍ଦ୍ଦେଶିକା ଶ୍ରୀମତୀ ଶାଳିନୀ ପଣ୍ଡିତ ଆଜିର ସାମ୍ବାଦିକ ସମ୍ମିଳନୀରେ ଅନେକ ଗୁରୁତ୍ୱପୂର୍ଣ୍ଣ ତଥ୍ୟ ଦେଇଛନ୍ତି । ଓଡ଼ିଶାରେ କରୋନା ସଂକ୍ରମଣର ସ୍ଥିତି, ଲକ୍ ଡାଉନ୍ ର ଆବଶ୍ୟକତା ଓ ଏହାର ସୁଫଳ ଆଦି ସମ୍ପର୍କରେ ବିସ୍ତୃତ ଆଲୋଚନା କରିଛନ୍ତି । ରାଜ୍ୟ ସରକାରଙ୍କ ପଦକ୍ଷେପ, ରାଜ୍ୟବାସୀଙ୍କ ସହଯୋଗ, ଶୃଙ୍ଖଳା ଯୋଗୁଁ ଓଡ଼ିଶାରେ ସଂକ୍ରମଣ ହାର ସର୍ବନିମ୍ନ ରହିଛି । ମାତ୍ର ରାଜ୍ୟ ସମ୍ପୂର୍ଣ୍ଣ କରୋନା ସଂକ୍ରମଣ ମୁକ୍ତ ନହେଲା ପର୍ଯ୍ୟନ୍ତ ସତର୍କ ରହିବାକୁ ପଡ଼ିବ, ଲକ୍ ଡାଉନ୍ ନିୟମକୁ କଡ଼ାକଡ଼ି ପାଳନ କରିବାକୁ ହେବ । ଏଥିରେ ଢ଼ିଲା ମାରିଲେ ବିପଦ ବଢ଼ିଯାଇପାରେ । କରୋନା ବିରୋଧରେ ଯୁଦ୍ଧ ଚାଲିଛି, ଆମେ ଜିତିବା । ତାହା ଆଉ କିଛି ଦିନର କଥା ବୋଲି ଶ୍ରୀମତୀ ପଣ୍ଡିତ ଦୃଢ଼ୋକ୍ତି ଦେଖାଇଛନ୍ତି ।

ଶ୍ରୀମତୀ ପଣ୍ଡିତ ଦେଇଥିବା ଗୁରୁତ୍ୱପୂର୍ଣ୍ଣ ତଥ୍ୟଗୁଡ଼ିକ ରଖୁଛୁ ।

ଓଡ଼ିଶାରେ ଆକ୍ରାନ୍ତଙ୍କ ହାର ସର୍ବନିମ୍ନ

ଲକ୍ ଡାଉନ୍ ଶୃଙ୍ଖଳାର କଡ଼ା ଅନୁପାଳନ ପାଇଁ ଓଡ଼ିଶାରେ କରୋନା ସଂକ୍ରମଣ(କୋଭିଡ୍ ଟ୍ରାନସମିଶନ୍) ହାର ଦେଶର ଅନ୍ୟ ରାଜ୍ୟଗୁଡ଼ିକ ତୁଳନାରେ ବହୁତ କମ୍ । ଓଡ଼ିଶାର ସ୍ଥାନ ତଳୁ ତୃତୀୟ । ରାଜ୍ୟର ଟେଷ୍ଟିଂ ପଜିଟିଭିଟି ରେଟ୍ ମଧ୍ୟ ଦେଶରେ ସର୍ବନିମ୍ନ । ଭାରତବର୍ଷରେ ଏହି ହାର ୫% ଥିବା ବେଳେ ଦିଲ୍ଲୀରେ ୧୧%, ତାମିଲନାଡୁର ୯%, ମଧ୍ୟପ୍ରଦେଶରେ ୭% ଅଛି । ଅଥଚ ଓଡ଼ିଶାରେ ଏହି ହାର ମାତ୍ର ୧.୦୮% । ଓଡ଼ିଶାରେ ଏ ପର୍ଯ୍ୟନ୍ତ ୫,୫୦୦ ଟେଷ୍ଟିଂ ମଧ୍ୟରୁ ୬୦ ଜଣଙ୍କର ପଜିଟିଭ୍ ବାହାରିଛି ।

୪୧ ଆକ୍ରାନ୍ତଙ୍କ ମଧ୍ୟରୁ ୨ ଜଣ ଚିକିତ୍ସିତ, ଅନ୍ୟମାନେ ଚିକିତ୍ସା ଫ୍ରି

ଓଡ଼ିଶାରେ କରୋନା ରୋଗୀଙ୍କ ଚିକିତ୍ସା ପାଇଁ ବର୍ତ୍ତମାନ ୩୦୦୦ ବେଡ୍ ପ୍ରସ୍ତୁତ ରହିଛି । କରୋନା ଆକ୍ରାନ୍ତ ଅଛନ୍ତି ୪୧ । ସେମାନଙ୍କ ମଧ୍ୟରୁ ୩୯ ଜଣଙ୍କର ହସ୍ପିଟାଲ୍ କେୟାର୍ ଦରକାର ପଡୁନି । ମାତ୍ର ୨ ଜଣଙ୍କର ହସ୍ପିଟାଲ୍ କେୟାର୍ ଦରକାର ହେଉଛି । ଏହି ଦୁଇଜଣଙ୍କ ମଧ୍ୟରୁ ଜଣଙ୍କଠାରେ ଆଉ ସଂକ୍ରମଣ ନାହିଁ । ତାଙ୍କର ରିପୋର୍ଟ କୋଭିଡ୍ ନେଗେଟିଭ୍ ବାହାରିଛି । ତେବେ ଅନ୍ୟାନ୍ୟ ରୋଗ ପାଇଁ ତାଙ୍କୁ ହସ୍ପିଟାଲ୍ ରେ ରଖାଯାଇଛି । ଏଭଳି ଭାବେ ଜଣେ ମାତ୍ର କରୋନା ରୋଗୀ ଚିକିତ୍ସାରେ ଅଛନ୍ତି ।

ଲକ୍ଷଣହୀନ ଛୁଆ ଏବଂ ବୟସ୍କଙ୍କ ସଂକ୍ରମଣର ବାହାକ ଘର ଲୋକ

ରାଜ୍ୟରେ କରୋନା ଆକ୍ରାନ୍ତଙ୍କ ମଧ୍ୟରେ ଥିବା ଛୋଟ ଛୁଆ ଏବଂ ୭୦ ବର୍ଷରୁ ଉଦ୍ଧ୍ୱର୍ ବ୍ୟକ୍ତିମାନେ ମାସେ ହେଲାଣି ଆଦୌ ଘରୁ ବାହାରି ନ ଥିଲେ ମଧ୍ୟ ସଂକ୍ରମଣର ଶିକାର ହୋଇଛନ୍ତି । ବାହାରକୁ ସଉଦା ପାଇଁ ଯାଇଥିବା ତାଙ୍କ ଘରର ବ୍ୟକ୍ତି ସାମାଜିକ ଦୂରତ୍ୱ ପାଳନ କରିନାହାନ୍ତି, ମାସ୍କ ପିନ୍ଧିନାହାନ୍ତି ଏବଂ ବାହାରୁ ଘରକୁ ଫେରିଲା ପରେ ହାତ ସଫା କରିନାହାନ୍ତି । ଫଳରେ ସଂକ୍ରମଣ ଘରକୁ ଆଣିଛନ୍ତି, ଯାହାର ଶିକାର ହୋଇଛନ୍ତି ଏହି ଛୋଟ ଛୁଆ ଓ ବୃଦ୍ଧ ।

ଲକ୍ଷଣ ନ ଥାଇ ପଜିଟିଭ୍

ଭୁବନେଶ୍ୱରର ଏକ କଣ୍ଟେନମେଣ୍ଟ ଜୋନ୍ ରେ କୌଣସି ଲକ୍ଷଣ ନ ଥିବା ୩୦୦ ଲୋକଙ୍କର ସାମ୍ପୁଲ୍ ଟେଷ୍ଟ ହୋଇଥିଲା । ସେଥିରୁ ୪ ଜଣଙ୍କର ପଜିଟିଭ୍ ବାହାରିଲା । ଅର୍ଥାତ୍ ଲକ୍ଷଣ ନ ଥାଇ ମଧ୍ୟ ଜଣେ କରୋନାରେ ଆକ୍ରାନ୍ତ ହୋଇପାରୁଛନ୍ତି । ସେଥିପାଇଁ ସନ୍ଦିଗ୍ଧ ଅଞ୍ଚଳଗୁଡ଼ିକରେ ଲୋକଙ୍କଠାରେ କୌଣସି ଲକ୍ଷଣ ନ ଥିଲେ ମଧ୍ୟ ବ୍ୟାପକ ସାମ୍ପଲ୍ ଟେଷ୍ଟ କରିବାକୁ ନିଷ୍ପତ୍ତି ନିଆଯାଇଛି ।

ଲକ୍ ଡାଉନ୍ ର ଆବଶ୍ୟକତା କ’ଣ?

ଇଣ୍ଡିଆନ୍ କାଉନସିଲ୍ ଫର୍ ମେଡ଼ିକାଲ୍ ରିଚର୍ଚ୍ଚ(ଆଇସିଏମଆର)ର ଅନୁଧ୍ୟାନ କହୁଛି, ବିନା ଲକ୍ ଡାଉନ୍ ରେ ଜଣେ କରୋନା ପଜିଟିଭ୍ ୩୦ ଦିନରେ ୪୦୬ ଲୋକଙ୍କୁ ସଂକ୍ରମିତ କରିଦେଇପାରିବ । ଅଥଚ ଲକ୍ ଡାଉନ୍ କଟକଣା ଥିଲେ ସେହି ଆକ୍ରାନ୍ତ ବ୍ୟକ୍ତି ମାତ୍ର ୨ ଜଣଙ୍କୁ ସଂକ୍ରମିତ କରିପାରିବ ।