ଓଡ଼ିଶା ବିଜେପିରୁ ଆସ୍ଥା ହରାଇଲେ ବୈଜୟନ୍ତ !

ଭୁବନେଶ୍ୱର: ବିଜେପିର ରାଷ୍ଟ୍ରୀୟ ଉପାଧ୍ୟକ୍ଷ ହେଉଛନ୍ତି ବୈଜୟନ୍ତ ପଣ୍ଡା । ଦଳରେ ଯୋଗଦେଲା ପରଠୁ ପ୍ରାୟ ୩ ବର୍ଷ ହେଲା ସେ ଏହି ପଦବୀରେ ଅଛନ୍ତି । ତେବେ ଓଡ଼ିଶାର ମୁଖ୍ୟମନ୍ତ୍ରୀ ହେବାକୁ ଏକଦା ସ୍ୱପ୍ନ ଦେଖୁଥିବା ବୈଜୟନ୍ତ ରାଜ୍ୟ ବିଜେପିଠାରୁ ଏବେ ଆସ୍ଥା ତୁଟାଇ ଦେଇଛନ୍ତି । ତାଙ୍କ ପରିବାରର ମିଡିଆ ହାଉସ୍ ଜରିଆରେ ଏହାର ସଙ୍କେତକୁ ନେଇ ଏବେ ଚାରିଆଡ଼େ ଚର୍ଚ୍ଚା । ଦଳର ରାଷ୍ଟ୍ରୀୟ ସ୍ତରରେ ଉଚ୍ଚ ପଦବୀରେ ଥିବା ଜଣେ ନେତାଙ୍କର ନିଜ ରାଜ୍ୟରେ ଦଳ ଉପରେ ଭରସା ନ ରହିବା ସମସ୍ତଙ୍କୁ ବିସ୍ମିତ କରିଛି ।

ଓଡ଼ିଶା ବିଜେପି ପ୍ରତି ବୈଜୟନ୍ତଙ୍କ ବୈରାଗ୍ୟ ଚର୍ଚ୍ଚାର କାରଣ ହେଉଛି ତାଙ୍କ ପାରିବାରିକ ମାଲିକାନା ସଂସ୍ଥାର ଖବର । ସୂଚନାଥାଉକି, ବିରୋଧୀ ଦଳର ନେତା ଭାବେ ଜୟନାରାୟଣ ମିଶ୍ର ଦାୟିତ୍ୱ ନେବା ଦିନ କହିଥିଲେ ଯେ ‘କଂଗ୍ରେସମୁକ୍ତ ଭାରତ’ ଏବଂ ‘ବିଜେଡିମୁକ୍ତ ଓଡ଼ିଶା’ କାର୍ଯ୍ୟକ୍ରମ ଦିଗରେ ଆମେ ଆଗକୁ ବଢ଼ିବୁ । ୨୦୨୪ ରେ ଆମେ କେମିତି ସଂଖ୍ୟାଗରିଷ୍ଠତା ହାସଲ କରିବୁ ସେ ଦିଗରେ କାର୍ଯ୍ୟ କରିବୁ । ତେବେ ପଣ୍ଡା ମିଡିଆ ହାଉସ୍ ଜୟନାରାୟଣଙ୍କ ଏହି ବକ୍ତବ୍ୟକୁ ମନଭରି ତାତ୍ସଲ୍ୟ କରିଛି । ପ୍ରିଟେଷ୍ଟ ଏବଂ ଟେଷ୍ଟ ପରୀକ୍ଷାରେ ଫେଲ୍ ହୋଇଥିବା ପିଲା ବୋର୍ଡ ପରୀକ୍ଷାରେ ୧୦୦ ରୁ ୧୦୦ ନମ୍ବରର ଲକ୍ଷ୍ୟ ରଖିବା ଭଳି କଥା ଇଏ ବୋଲି କୁହାଯାଇଛି ।

୨୦୧୯ ସାଧାରଣ ନିର୍ବାଚନ ପରବର୍ତ୍ତୀ ସମୟରେ ହୋଇଥିବା ପାଞ୍ଚ ପାଞ୍ଚଟା ଉପନିର୍ବାଚନ ଏବଂ ପୌର ଓ ପଞ୍ଚାୟତ ନିର୍ବାଚନରେ ଲଜ୍ଜାଜନକ ପରାଜୟର ତଥ୍ୟ ଦେଇ ରାଜ୍ୟ ବିଜେପିର ଏହା ଦିବାସ୍ୱପ୍ନ ବୋଲି ଉକ୍ତ ଖବରରେ କୁହାଯାଇଛି । ଗତ ସାଧାରଣ ନିର୍ବାଚନ ବେଳେ ଅମିତ ଶାହା ୧୨୦ ଆସନର ସ୍ୱପ୍ନ ଦେଖାଇଥିବା ମଧ୍ୟ ଏଥିରେ ମନେପକାଇ ଦିଆଯାଇଛି ।

ପଣ୍ଡା ଖବର ସଂସ୍ଥାର ଏହି ଖବରକୁ ରାଜନୈତିକ ପର୍ଯ୍ୟବେକ୍ଷକ ମହଲ ହାଲକାରେ ଗ୍ରହଣ କରିନାହାନ୍ତି । ଓଡ଼ିଶା ବିଜେପି ଉପରେ ବୈଜୟନ୍ତଙ୍କ ମନୋଭାବର ଏହା ପ୍ରତିଫଳନ ବୋଲି କୁହାଯାଉଛି । ପରୋକ୍ଷରେ ଧର୍ମେନ୍ଦ୍ର ପ୍ରଧାନଙ୍କୁ କୁଆଡ଼େ ଏଥିରେ ଟାର୍ଗେଟ୍ କରାଯାଇଛି । ଧର୍ମେନ୍ଦ୍ରଙ୍କ ବିଜେପିକୁ ଲୋକେ ଏଠି ଗ୍ରହଣ କରୁନାହାନ୍ତି କି କରିବେ ନାହିଁ ବୋଲି ବାର୍ତ୍ତା ଦିଆଯାଇଛି ।

ସୂଚନାଥାଉକି, କେନ୍ଦ୍ରାପଡ଼ାରେ ଶୋଚନୀୟ ପରାଜୟ ବରଣ କରିବା ପରଠାରୁ ବୈଜୟନ୍ତ ଓଡ଼ିଶାରେ ଆଉ ସକ୍ରିୟ ନାହାନ୍ତି । କାଁ ଭାଁ ତାଙ୍କୁ ଦେଖିବାକୁ ମିଳୁଛି । ରାଜ୍ୟ ବିଜେପି ସାଂଗଠନିକ କାର୍ଯ୍ୟକଳାପରେ ସେ ସଂପୃକ୍ତ ନାହାନ୍ତି କହିଲେ ଚଳେ । ତାଙ୍କର ଅଧିକାଂଶ ସମୟ ଦିଲ୍ଲୀରେ କଟୁଛି । ଚାରି ଚାରିଟା ଟର୍ମ ସାଂସଦ ମଜା ପାଇଥିବା ବୈଜୟନ୍ତଙ୍କ ଆଖି ସେଇଠି ଲାଖିଥିଲେ ମଧ୍ୟ ବାରମ୍ବାର ନିରାଶ ହେବାକୁ ପଡୁଛି । ନିଜ ପାଇଁ ରାଜ୍ୟସଭା ଆସନ ଖଣ୍ଡେ ଯୋଗାଡ଼ କରିବାର ବିଫଳତା ପାଇଁ ସେ ବେଶୀ ଧର୍ମେନ୍ଦ୍ର ପ୍ରଧାନଙ୍କୁ ଦାୟୀ କରୁଛନ୍ତି ।

ଏପଟେ ବୈଜୟନ୍ତଙ୍କ ପାଇଁ ଆଗକୁ ନିର୍ବାଚନମଣ୍ଡଳୀ ଆଶଙ୍କା ବି ରହିଛି । ବିଭିନ୍ନ କାରଣରୁ କେନ୍ଦ୍ରାପଡ଼ାରୁ ଆଉ ପ୍ରାର୍ଥୀ ହେବା ପାଇଁ ସେ ଚାହୁଁ ନାହାନ୍ତି ବୋଲି ତାଙ୍କ ନିକଟତମ ମହଲରୁ ଜଣାପଡ଼ିଛି । ବିଜୟ ସମ୍ଭାବନା ଦୃଷ୍ଟିରୁ ଉପକୂଳ ଓଡ଼ିଶା ଛାଡ଼ି ପଶ୍ଚିମ ଓଡ଼ିଶା ଉପରେ ଆଖି ପକାଇଛନ୍ତି । ଏହିକ୍ରମରେ ବରଗଡ଼ ଆସନରୁ ଲଢ଼ିବା ପାଇଁ ସେ ଆଗ୍ରହୀ ଥିବା କୁହାଯାଉଛି । ତେବେ ସେଥିପାଇଁ ଧର୍ମେନ୍ଦ୍ରଙ୍କ ଛଡ଼ା ସୁରେଶ ପୂଜାରୀ ବି ତାଙ୍କ ପାଇଁ କଣ୍ଟା ହୋଇପାରନ୍ତି । ଏହି ସମୀକରଣକୁ ଗୋଳିଆ କରିବା ପାଇଁ ଧର୍ମେନ୍ଦ୍ର-ସୁରେଶ ଲଢ଼େଇ ଷଡ଼ଯନ୍ତ୍ର ରଚାଯାଇଛି । ଶ୍ରୀ ପୂଜାରୀ ବିଜେଡିକୁ ଢ଼ଳିଥିବାର ଚର୍ଚ୍ଚା ପଣ୍ଡା ମିଡିଆ ହାଉସ୍ ରୁ ଆରମ୍ଭ ହେବା ଏହି ଷଡ଼ଯନ୍ତ୍ରକୁ ପଦାରେ ପକାଇଥିବା କୁହାଯାଉଛି । ଏଭଳି ଗୁଜବ ତିଆରି ପଛରେ ତାଙ୍କୁ ବଦନାମ କରିବା ସହ ଧର୍ମେନ୍ଦ୍ର ବିରୋଧୀ ସମୀକରଣ ଥିବାରୁ ଶ୍ରୀ ପୂଜାରୀ ପ୍ରବଳ କ୍ଷୁବ୍ଧ ହୋଇଥିବା ଜଣାପଡ଼ିଛି ।

ତେବେ ସେ ଯାହା ହେଉ, କେନ୍ଦ୍ରରେ ପ୍ରଭାବଶାଳୀ ଥିବା ଧର୍ମେନ୍ଦ୍ରଙ୍କ ଦେହରେ ହାତ ମାରିବା ବୈଜୟନ୍ତଙ୍କ ପକ୍ଷରେ ଏବେ ସମ୍ଭବ ହେଉ ନ ଥିବାରୁ ଓଡ଼ିଶାରେ ବିଜେପି ଦୁର୍ବଳତାର ଦ୍ୱାହିରେ ତାଙ୍କୁ ବଦନାମ କରିବା ପାଇଁ ନିଜ ମିଡିଆ ହାଉସ୍ କୁ ଲଗାଇଥିବା ଚର୍ଚ୍ଚା ହେଉଛି । ଧର୍ମେନ୍ଦ୍ର ବିରୋଧୀ ଲଢ଼େଇକୁ ଶକ୍ତିଶାଳୀ କରିବା ପାଇଁ ନେପଥ୍ୟରେ ସେ ଭୁବନେଶ୍ୱର ସାଂସଦ ଅପରାଜିତା ଷଡ଼ଙ୍ଗୀଙ୍କ ସହ ହାତ ମିଳାଇଥିବା ବି କୁହାଯାଉଛି । ଆଗାମୀ ଦିନରେ ଏହି ଲଢ଼େଇ କେତେବାଟ ଯିବ ତାହା ଦେଖିବାକୁ ରାଜନୈତିକ ମହଲରେ ଉତ୍ସୁକତା ସୃଷ୍ଟି ହୋଇଛି ।