ମାଧିଆ ଭାଇ ନିଶରେ ଖୁସି !

ଭୁବନେଶ୍ୱର: ଗତ ସପ୍ତାହରେ ୪ଟି ଜାଗାରେ ପୌର ଉପନିର୍ବାଚନ ଅନୁଷ୍ଠିତ ହୋଇଥିଲା । ଚାରୋଟି ଯାକ ଜାଗାରେ ବିଜେଡି ପ୍ରାର୍ଥୀ ତ ବିଜୟୀ ହୋଇଥିଲେ । ମାତ୍ର ବଡ଼ କଥାଟି ହେଉଛି, ଗଞ୍ଜାମ ଜିଲ୍ଲାର ଚିକିଟି ଏନଏସିର ୱାର୍ଡ ନଂ ୩ ରେ ବିଜେଡି ପ୍ରାର୍ଥୀ ୪୮୪ ଭୋଟ ପାଇଥିଲା ବେଳେ ବିଜେପି ପ୍ରାର୍ଥୀଙ୍କୁ ମିଳିଥିଲା ଜମାରୁ ୧୫ ଖଣ୍ଡ ଭୋଟ । ସେହିଭଳି ଜଗତସିଂହପୁର ମ୍ୟୁନିସିପାଲିଟି ୬ ନମ୍ବର ୱାର୍ଡରେ ମାତ୍ର ୨୧ ଖଣ୍ଡ ଭୋଟ ପାଇ ବିଜେପି ତୃତୀୟ ସ୍ଥାନରେ ଥିଲା ।

ଏହି ଦୃଶ୍ୟପଟରେ ବିଜେପି କିନ୍ତୁ ଭାରି ଖୁସି । ରାଜସ୍ଥାନ, ମଧ୍ୟପ୍ରଦେଶ ଓ ତେଲେଙ୍ଗାନାରେ ସେମାନେ ଜିତିଛନ୍ତି । ଏହି ନ୍ୟାୟରେ ଓଡ଼ିଶାରେ ବି କୁଆଡ଼େ ଅଲବତ୍ ଜିତିବେ । ଏଠି ସରକାର ଗଠନ କରିବେ । ଏହି ବିଶ୍ୱାସକୁ ଧରି ରାଜ୍ୟ ବିଜେପି ନେତାଏ ଏଥର କ୍ଷମତା ଦଖଲ କରିବାର ସ୍ୱପ୍ନକୁ ତାଜା କରିଛନ୍ତି । ତିନି ରାଜ୍ୟରେ ବିଜେପିର ବିପୁଳ ବିଜୟ ପରେ ପ୍ରବଳ ଉତ୍ସାହିତ ହୋଇଯାଇଛନ୍ତି ।

ଶନିବାର ଦିନ ଫଳାଫଳ ଆସିବା କ୍ଷଣି ବିଜୟ ଉତ୍ସବ ପାଳନ କରିବା ପରେ ରବିବାର ଦିନ ରାଜ୍ୟ ସଭାପତି ମନମୋହନ ସାମଲ ଅତର୍ଚ୍ଛିଆ ସାମ୍ବାଦିକ ସମ୍ମିଳନୀ କରି ଭବିଷ୍ୟବାଣୀ ଶୁଣାଇଛନ୍ତି । ୨୦୨୪ ରେ ଓଡ଼ିଶା ରାଜନୀତି ୟୁ ଟର୍ଣ୍ଣ କରିବ ବୋଲି ଗ୍ୟାରେଣ୍ଟି ଦେଇଛନ୍ତି । ସେପଟେ କେନ୍ଦ୍ରାପଡ଼ାରେ ଦଳର ରାଷ୍ଟ୍ରୀୟ ଉପାଧ୍ୟକ୍ଷ ବୈଜୟନ୍ତ ପଣ୍ଡା ଏକ ଦଳୀୟ ସମାବେଶରେ ଯୋଗଦେଇ ଏଥର ଓଡ଼ିଶା ବିଜେପି ସରକାର ଦେଖିବ ବୋଲି ଦମ୍ଭ ଦେଖାଇଛନ୍ତି । ଏପରିକି ମୁଖ୍ୟମନ୍ତ୍ରୀ ହେବାର ସ୍ୱପ୍ନ ଦେଖିବା ଆରମ୍ଭ କରିଥିବା ସୋସିଆଲ୍ ମିଡିଆରେ ଚର୍ଚ୍ଚା ହେଉଛି ।

ଅବଶ୍ୟ ବିଜେପି ନେତାଙ୍କ ଏହି ସ୍ୱପ୍ନକୁ ଦିବାସ୍ୱପ୍ନ କହି କଟାକ୍ଷ କରିଛନ୍ତି ବିଜେଡିର ବରିଷ୍ଠ ନେତା ତଥା ମନ୍ତ୍ରୀ ଅତନୁ ସବ୍ୟସାଚୀ ନାୟକ । ସେ କହିଛନ୍ତି, ଅନ୍ୟ ରାଜ୍ୟ ନିର୍ବାଚନ ଫଳାଫଳର ଓଡ଼ିଶାରେ କୌଣସି ପ୍ରଭାବ ନାହିଁ । ଏଠି କେବଳ ନବୀନ ମଡେଲ ଚାଲେ । ବିକାଶର ମଡେଲ ହେଉଛି ନବୀନ ମଡେଲ ବୋଲି ସେ ଗଣମାଧ୍ୟମକୁ ପ୍ରତିକ୍ରିୟା ଦେଇଛନ୍ତି ।

ଉଲ୍ଲେଖଥାଉକି, ମୁଣ୍ଡ ଉପରେ ସାଧାରଣ ନିର୍ବାଚନ ଥିବାରୁ ରାଜସ୍ଥାନ, ମଧ୍ୟପ୍ରଦେଶ, ଛତିଶଗଡ଼ ଏବଂ ତେଲେଙ୍ଗାନା ବିଧାନସଭା ନିର୍ବାଚନ ଫଳାଫଳ ଜାତୀୟ ରାଜନୀତିରେ ଯଥେଷ୍ଟ ଗୁରୁତ୍ୱ ବହନ କରୁଥିଲା । ଆଉ ତିନୋଟି ରାଜ୍ୟରେ ବିଜେପିର ବିପୁଳ ବିଜୟ ମୋଦୀ ସରକାର ଓ କେନ୍ଦ୍ରୀୟ ବିଜେପିକୁ ନିଶ୍ଚିତ ଭାବେ ଉଲ୍ଲସିତ କରିଛି । ଏହି ଧାରାରେ ଓଡ଼ିଶା ବିଜେପି ନେତା ସାମିଲ ହୋଇ ଅତ୍ୟଧିକ ଉତ୍ସାହିତ ହୋଇଛନ୍ତି । ହବା ବି ସ୍ୱାଭାବିକ । କର୍ମୀଙ୍କ ମନୋବଳକୁ ବଢ଼ାଇବାର ଏହା ଗୋଟିଏ ଭଲ ସୁଯୋଗ । ତେବେ ନିଜର ନିଶ ନ ଥାଇ ମାଧିଆ ଭାଇ ନିଶରେ ଖୁସି ହେଲେ ଯେଉଁ ଅବସ୍ଥା, ଓଡ଼ିଶା ବିଜେପି ନେତାଙ୍କ କ୍ଷେତ୍ରରେ ତାହା ପ୍ରଯୁଜ୍ୟ ବୋଲି ସାଧାରଣରେ ଚର୍ଚ୍ଚା ହେଉଛି ।

ରାଜନୈତିକ ପର୍ଯ୍ୟବେକ୍ଷକଙ୍କ ମତରେ ରାଜସ୍ଥାନ, ମଧ୍ୟପ୍ରଦେଶ କି ଛତିଶଗଡ଼ ସାଙ୍ଗରେ ଓଡ଼ିଶା ରାଜନୀତିକୁ ବର୍ତ୍ତମାନ ସ୍ଥିତିରେ ତୁଳନା କରିବା ଠିକ୍ ହେବ ନାହିଁ । କେନ୍ଦ୍ରରେ ନରେନ୍ଦ୍ର ମୋଦୀଙ୍କ ଲୋକପ୍ରିୟତା ଯେମିତି ଓଡ଼ିଶାରେ ନବୀନ ପଟ୍ଟନାୟକଙ୍କ ଲୋକପ୍ରିୟତା ତାହାଠାରୁ ଅଧିକ ପଛେ କମ ନୁହେଁ । ଲଗାତର ପାଞ୍ଚ ଥର ଧରି ମୁଖ୍ୟମନ୍ତ୍ରୀ ରହିବା ପରେ ମଧ୍ୟ ତାଙ୍କର ଭାବମୂର୍ତ୍ତି ଉପରେ ଆଞ୍ଚ ଆସିନାହିଁ କି ଲୋକପ୍ରିୟତା କମିନାହିଁ । ତାଙ୍କର ଦୃଢ଼ ନେତୃତ୍ୱ ଦଳକୁ ସୁଂଗଠିତ କରି ରଖିଛି । ନବୀନଙ୍କ ଆଶୀର୍ବାଦରେ ୫-ଟି ଓ ନବୀନ ଓଡ଼ିଶାର ଅଧ୍ୟକ୍ଷ ଭାବେ କାର୍ତ୍ତିକ ପାଣ୍ଡିଆନଙ୍କ ନୂତନ ଅବତାର ବିଜେଡି ନେତା ଓ କର୍ମୀଙ୍କ ମନବଳକୁ ଆହୁରି ସୁଦୃଢ଼ କରିଛି । ବିଜେଡି ନେତାଙ୍କୁ ଉତ୍ତର ଦାୟିତ୍ୱ ବଣ୍ଟା ଦିଆଯାଇଥିବାରୁ ସେମାନେ ନିଜ ନିଜ ଅଞ୍ଚଳରେ ଲୋକଙ୍କ ସହ ଯୋଡି ହେବାରେ ଦିନରାତି ଅକ୍ଲାନ୍ତ ପରିଶ୍ରମ ଜାରି ରଖିଛନ୍ତି ।

ମାତ୍ର ମୁଖ୍ୟ ବିରୋଧୀ ଦଳ ଭାବେ ବିଜେପିର ସେଭଳି ଆଖିଦୃଶିଆ ସାଂଗଠନିକ କାର୍ଯ୍ୟକ୍ରମ ଦେଖିବାକୁ ମିଳୁନାହିଁ । ଲୋକଙ୍କ ସହ ଯୋଡି ହେବାର ସଂକଳ୍ପ ପ୍ରଚାରରେ ସୀମିତ ରହିଯାଇଛି । ଦଳର ଆଗଧାଡ଼ିର ନେତାମାନେ କେବଳ ଭୁବନେଶ୍ୱର ପାର୍ଟି ଅଫିସରେ ସାମ୍ବାଦିକ ସମ୍ମିଳନୀରେ ଦେଖିବାକୁ ମିଳୁଛନ୍ତି । ଟିଭିରେ ମୁହଁ ଦେଖାଇ ସେମାନେ ଖୁସି ମନୋଉଛନ୍ତି । ତୃଣମୂଳସ୍ତରକୁ ଯାଇ ରାଜ୍ୟ ସରକାରଙ୍କ ବିରୋଧରେ ଜନମତ ସୃଷ୍ଟି କରିବାରେ ସମ୍ପୂର୍ଣ୍ଣ ବିଫଳ ହୋଇଛନ୍ତି । ପୂର୍ବରୁ ଲାଗି ରହିଥିବା ଏହି ଧାରାରେ ବ୍ରେକ୍ ଲାଗୁନାହିଁ । ମୋଦୀଙ୍କ ଭରସାରେ ରାଜ୍ୟ ନେତା ଅଟକି ଯାଇଛନ୍ତି ।

ରାଜ୍ୟର ବିଜେପି ନେତାଙ୍କ ମଧ୍ୟରେ ଏକତା ନଥିବାରୁ କାର୍ଯ୍ୟକ୍ରମ ଓ ସମନ୍ୱୟର ଘୋର ଅଭାବ ରହିଛି । ୨୦୧୪ ରୁ ୨୦୧୯ ପର୍ଯ୍ୟନ୍ତ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ପ୍ରଚ୍ଛଦପଟରେ ରହି ରାଜ୍ୟ ବିଜେପିକୁ ପରିଚାଳନା କରୁଥିଲେ । ନବୀନ ପଟ୍ଟନାୟକଙ୍କର ବିକଳ୍ପ ଭାବେ ତାଙ୍କୁ ଉପସ୍ଥାପିତ କରାଯାଉଥିଲା । ମାତ୍ର ସବୁ ନେତାଙ୍କୁ ସାଙ୍ଗରେ ନେଇ ନ ପାରିବା ତାଙ୍କ ନେତୃତ୍ୱକୁ ନିଷ୍ପ୍ରଭ କରିଦେଲା । ବିଜେଡିରେ ତାଙ୍କର ଯେତିକି ଶତ୍ରୁ ନାହାନ୍ତି ନିଜ ଦଳରେ ଅଧିକ ଶତ୍ରୁ ସୃଷ୍ଟି କରିଛନ୍ତି । ଦଳରେ ସେ ଗ୍ରହଣୀୟ ହୋଇପାରିନାହାନ୍ତି ।

ଫଳସ୍ୱରୂପ ୨୦୧୯ ନିର୍ବାଚନ ପରଠୁ ରାଜ୍ୟ ବିଜେପିରେ ନେତୃତ୍ୱ ସଙ୍କଟ ଦେଖିବାକୁ ମିଳୁଛି । ଭୁବନେଶ୍ୱର ସାଂସଦ ଅପରାଜିତା ଷଡ଼ଙ୍ଗୀ ଦଳୀୟ ସଂଗଠନରୁ ନିଜକୁ ପୃଥକ୍ କରି ସମାନ୍ତରାଳ ସଂଗଠନ ଜରିଆରେ ମୁଖ୍ୟମନ୍ତ୍ରୀ ଦାବିଦାର ବନି ଯାଇଛନ୍ତି । ମନମୋହନ ସାମଲ ରାଜ୍ୟ ସଭାପତି ଦାୟିତ୍ୱ ପାଇଲା ପରେ ସମସ୍ତଙ୍କୁ ଏକାଠି ନେଇ ଚାଲିବେ ବୋଲି ଦୃଢ଼ତା ଦେଖାଇଥିଲେ ମଧ୍ୟ ସେଥିରେ ସଫଳ ହୋଇପାରିନାହାନ୍ତି । ରାଜ୍ୟ ସଂଗଠନ ସୁଦୃଢ଼ କରିବାକୁ ହାଇକମାଣ୍ଡ ସୁନୀଲ ବଂଶଲଙ୍କୁ ପ୍ରଭାରୀ ଦାୟିତ୍ୱ ଦେଇ ଓଡ଼ିଶା ପଠାଇଥିଲେ ମଧ୍ୟ ସେ ଏଠିକା ଅବସ୍ଥା ଦେଖି ଅଧାରୁ ପଳାଇଛନ୍ତି ।

ଆହୁରି ଗୁରୁତ୍ୱପୂର୍ଣ୍ଣ କଥା ହେଉଛି, ବିଜେଡି-ବିଜେପି ସମ୍ପର୍କକୁ ନେଇ ଲୋକଙ୍କ ମଧ୍ୟରେ ରହିଥିବା ଘୋର ଦ୍ୱନ୍ଦ ବିଜେପିକୁ ଅଧିକ କ୍ଷତିଗ୍ରସ୍ତ କରିଛି । ସଂସଦୀୟ ମାମଲାରେ ମୋଦୀ ସରକାରଙ୍କୁ ନବୀନ ସରକାରଙ୍କ ସମର୍ଥନ ରହୁଥିବା ବେଳେ ବିଭିନ୍ନ କ୍ଷେତ୍ରରେ ନବୀନଙ୍କୁ ମୋଦୀଙ୍କ ପ୍ରଶଂସା ଦେଖିବାକୁ ମିଳୁଛି । ନବୀନଙ୍କ ଲୋକପ୍ରିୟତା ଦୃଷ୍ଟିରୁ ଓଡ଼ିଶାରେ ବିଜେପି ଏବେ ଉଧେଇ ପାରିବ ନାହିଁ ବୋଲି କେନ୍ଦ୍ରୀୟ ନେତୃତ୍ୱ ହୃଦୟଙ୍ଗମ କରିଥିବାରୁ ଓଡ଼ିଶା ଉପରୁ ସେମାନେ ଫୋକସ୍ ହଟାଇ ଦେଇଥିବା ଖୋଦ୍ ଦଳୀୟ ନେତାମାନେ ସ୍ୱୀକାର କରୁଛନ୍ତି ।

ଅନ୍ୟପକ୍ଷରେ ରାଜ୍ୟରେ ବିଜେଡି ଓ କେନ୍ଦ୍ରରେ ବିଜେପିର ସ୍ୱାର୍ଥ ଦୃଷ୍ଟିରୁ ପରଷ୍ପର ନିକଟତର ହୋଇଥିବା ଲୋକଙ୍କ ମନର ଧାରଣା ଅଧିକରୁ ଅଧିକ ଦୃଢ଼ୀଭୂତ ହେବାରେ ଲାଗିଛି । ଏହାଦ୍ୱାରା ରାଜ୍ୟରେ ବିଜେପିର ଅଧିକ କ୍ଷତି ହେଉଛି । କେନ୍ଦ୍ରୀୟ ନେତୃତ୍ୱର ଇସାରା ନ ଥିବାରୁ ବିଜେପି ସଂଗଠନ ଏଠି ସବଳ ହୋଇପାରୁନାହିଁ ବୋଲି ରାଜ୍ୟ ପର୍ଯ୍ୟବେକ୍ଷକ ମହଲ ବିଶ୍ୱାସ କରୁଛନ୍ତି । ଏହାଦ୍ୱାରା ଓଲଟି କଂଗ୍ରେସ ଲାଭବାନ ହୋଇପାରେ ବୋଲି ସେମାନଙ୍କ ବିଚାର । ତେଣୁ ରାଜ୍ୟ ବିଜେପି ନେତୃତ୍ୱ ଏଠି ସରକାର ଗଠନର ଦମ୍ଭ ଦେଖାଇବା ଧର୍ମକୁ ଆଖିଠାର ବୋଲି ଦଳର କିଛି ଆଗଧାଡ଼ିର ନେତା ସ୍ୱୀକାର କରିଛନ୍ତି ।

ଉଲ୍ଲେଖଯୋଗ୍ୟ, ଓଡ଼ିଶାରେ ଦୁର୍ନୀତିଗ୍ରସ୍ତ ଓ ଭ୍ରଷ୍ଟ ସରକାରଙ୍କୁ ହଟାଯିବ ବୋଲି ଗତକାଲି ଭୁବନେଶ୍ୱର ପାର୍ଟି ଅଫିସରେ ମନମୋହନ ସାମଲ ସାମ୍ବାଦିକ ସମ୍ମିଳନୀ କରୁଥିଲା ବେଳେ ନବୀନ ନିବାସରୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ଫୋନ୍ କରି ତିନି ରାଜ୍ୟରେ ବିଜୟ ପାଇଁ ଅଭିନନ୍ଦନ ଜଣାଉଥିଲେ । ଉଭୟଙ୍କ ମଧ୍ୟରେ ୧୦ ମିନିଟ୍ ଧରି କଥାବାର୍ତ୍ତା ହୋଇଥିବା ଜଣାପଡ଼ିଛି ।