ଭୁୁବନେଶ୍ୱର: ଗୋଟିଏ ପରିବାର । କିନ୍ତୁ ଠିକଣା ଅଲଗା । କାହାର କଂଗ୍ରେସ ତ କିଏ ବିଜେଡି ଆଉ କିଏ ସ୍ୱାଧୀନ । କଂଗ୍ରେସିଆ ବାପା କହୁଛନ୍ତି, ବିଜେଡିର ଭୁବନେଶ୍ୱର ଏମପି ପ୍ରାର୍ଥୀ ମୋ ପୁଅ ପାଇଁ ମୁଁ ଭୋଟ ମାଗୁଛି । ହେଲେ ଭୁବନେଶ୍ୱର ବାହାରେ ଶଙ୍ଖ ପାଇଁ ମୁଁ ଭୋଟ ମାଗୁନି । ମୁଁ ସଚ୍ଚା କଂଗ୍ରେସିଆ ଲୋକ । ମଲା ଯାଏଁ କଂଗ୍ରେସରେ ରହିବି ।
କଂଗ୍ରେସର ବରିଷ୍ଠ ନେତା ତଥା ଜଟଣୀ ବିଧାୟକ ସୁର ରାଉତରାୟ ଏବଂ ତାଙ୍କ ଦୁଇ ପୁଅଙ୍କ କଥା ଆମେ କହୁଛୁ । ସୁର ରାଉତରାୟଙ୍କ ଟ୍ରିପଲ୍ ଭୂମିକାକୁ ନେଇ କଂଗ୍ରେସ ନେତୃତ୍ୱ ଏକାଧିକ ବାର କୈଫୟତ୍ ମାଗି ସାରିଲେଣି । ସୁର ତାହାର ଜବାବରେ ଏହା ହିଁ କହି ଚାଲିଛନ୍ତି । ତାଙ୍କା ଜବାବ ହେଲା- ମୁଁ ପିଟା କଂଗ୍ରେସିଆ ଲୋକ । ବିଜେଡିକୁ ଭୋଟ ଦେବାକୁ କାହାରିକୁ କହିନି କି କହିବି ନାହିଁ । ଖାଲି ପୁଅଟା ବିଜେଡିରୁ ଛିଡ଼ା ହୋଇଛି ବୋଲି, ଯିଏ ପଚାରୁଛି ପୁଅକୁ ଭୋଟ ଦେଇଦିଅ ବୋଲି କହୁଛି । ନାଁ ନାଁ.. ଶଙ୍ଖ ଚିହ୍ନରେ ଭୋଟ ଦେବା କଥା ମୋ ଆଡୁ କାହାରିକୁ କହିନି । କେବଳ ପୁଅକୁ ଭୋଟ ଦେବା କଥା କହିଛି ।
ପିସିସି ସୋ କଜ୍ ନୋଟିସ୍ ଉପରେ ସୁର ରାଉତରାୟଙ୍କ ଏଭଳି ଅଜବ ଉତ୍ତର ସମସ୍ତଙ୍କ ପାଇଁ ହସର ଖୋରାକ ହୋଇଛି । ସୋସିଆଲ୍ ମିଡିଆରେ ତାଙ୍କୁ ନାନା ଟାହି ଟାପରା କରାଯାଇଛି । ଅନେକଙ୍କ କହିବା କଥା- ସୁରଙ୍କ ଭାଷାର ମର୍ମ ହେଉଛି ଯେ ତାଙ୍କର ଚଟୁ ଆମିଷ, ବେଣ୍ଟ ନିରାମିଷ । ଡାଇଲଗ୍ ମାରି ଲୋକଙ୍କୁ ମନୋରଂଜନ କରନ୍ତୁ, ହେଲେ ଭକୁଆ ବନାନ୍ତୁନୁ । ଆଜିକାଲି ସୋସିଆଲ୍ ମିଡିଆ ଯୁଗରେ କେହି ବୋକା କି ଅଜ୍ଞାନୀ ନୁହଁନ୍ତି । ସମସ୍ତେ ଜାଣିବାର ।
ସୁରଙ୍କ ବଡ଼ପୁଅ ସିଦ୍ଧାର୍ଥ ରାଉତରାୟ ବାପାଙ୍କ ନୀତି ଆଦର୍ଶରେ କଂଗ୍ରେସ ରାସ୍ତାରେ ଚାଲୁଥିବା ଦାବି କରୁଥିଲେ ମଧ୍ୟ ନିଜକୁ ସ୍ୱାଧୀନ ପ୍ରାର୍ଥୀ ଭାବେ ଉପସ୍ଥାପିତ କରୁଛନ୍ତି । ଜଟଣୀରୁ ସେ ସ୍ୱାଧୀନ ପ୍ରାର୍ଥୀ ହୋଇ ଲଢ଼ିବେ ବୋଲି ଘୋଷଣା କରିଛନ୍ତି । ଯାହା ବି ହେଉ, ସେ ବାପାଙ୍କ ନୀତି ଆଦର୍ଶର ଡାଇଲଗ୍ ମାରି କଂଗ୍ରେସ ସପକ୍ଷରେ ଯୁକ୍ତି କରୁଥିଲେ ମଧ୍ୟ ତାଙ୍କର ଦାଦା ପୁଅ ଭାଇ ସଂଗ୍ରାମ ରାଉତରାୟଙ୍କ ସହ ତାଙ୍କର ପଡୁନି । ସଂଗ୍ରାମଙ୍କ କଠୋର ବିରୋଧୀ ତଥା ନିକଟରେ ବିଜେଡି ଛାଡ଼ିଥିବା ସନ୍ତୋଷ ଜେନାଙ୍କ ସହ ସେ ହାତ ମିଳାଇଛନ୍ତି ।
ଇତିମଧ୍ୟରେ ସନ୍ତୋଷଙ୍କୁ କଂଗ୍ରେସରେ ମିଶାଇବା ପାଇଁ ସିଦ୍ଧାର୍ଥ ରାଉତରାୟ ପିସିସି ସଭାପତିଙ୍କ ସହ କଥା ତୁଟାଇଥିଲେ । ଆଜି କଂଗ୍ରେସ ଭବନରେ ମିଶ୍ରଣ ପର୍ବ ଥିଲା । ତେବେ ଏହି ଖବର ଆଗୁଆ ପାଇଁ ସଂଗ୍ରାମ ରାଉତରାୟ ନିଜ ସମର୍ଥକମାନଙ୍କ ସହ କଂଗ୍ରେସ ଭବନ ଆସି ବାଟ ଜଗିଥିଲେ । ସନ୍ତୋଷ ଜେନା ଜଣେ ଜାଗା ବେପାରୀ, ମାଫିଆ ବୋଲି ଚିଲ୍ଲାଇ ପ୍ରବଳ ନାରାବାଜି କରିଥିଲେ ।
ସିଦ୍ଧାର୍ଥ ତାଙ୍କ ପାଟି ଚୁପ୍ କରିବାକୁ ଉଦ୍ୟମ କରିଥିଲେ ମଧ୍ୟ ପାରି ନ ଥିଲେ । ଫଳରେ ଉଭୟ ଗୋଷ୍ଠୀ ମୁହାଁମୁହିଁ ଅବସ୍ଥାକୁ ଚାଲି ଆସିଥିଲେ । ଶେଷରେ ଆୟୋଜିତ ହୋଇଥିବା ମିଶ୍ରଣ ପର୍ବକୁ ବାତିଲ କରି ନେତୃବର୍ଗ ସେଠାରୁ ଚାଲି ଯାଇଥିଲେ । ସଂଗ୍ରାମ ଗଣମାଧ୍ୟମକୁ ବାଇଟ୍ ଦେଇ ସିଦ୍ଧାର୍ଥ ଓ ସନ୍ତୋଷଙ୍କ ଉପରେ ପ୍ରବଳ ବର୍ଷି ନିଜକୁ କଂଗ୍ରେସର ସର୍ଚ୍ଚା କର୍ମୀ ଭାବେ ଦାବି କରିଥିଲେ । କଂଗ୍ରେସ ଟିକେଟ୍ ମୋର । ଏଠି କେହି ପଶିବାକୁ ଉଦ୍ୟମ କଲେ ପରିଣାମ ଭୟଙ୍କର ହେବ ବୋଲି ଧମକ ଦେଇଥିଲେ । ଦମ୍ ଥିଲେ, ଜଟଣୀ ବଜାରକୁ ଆସ ଦେଖାଦେଖି ହେବା ବୋଲି ଅପର ଗୋଷ୍ଠୀକୁ ଆହ୍ୱାନ ଦେଇଥିଲେ ସଂଗ୍ରାମ ।
