ଭୁବନେଶ୍ୱର: ସୋନିଆ ଗାନ୍ଧୀଙ୍କୁ ମହମ୍ମଦ ମୋକିମ୍ ଙ୍କ ଚିଠି କଂଗ୍ରେସରେ ହଇଚଇ ସୃଷ୍ଟି କରିଛି । ପିସିସି ସଭାପତି ଭକ୍ତ ଚରଣ ଦାସଙ୍କ ନେତୃତ୍ୱକୁ ଖୋଲା ଚାଲେଞ୍ଜ ପଛରେ ଅଧିକାଂଶ ବରିଷ୍ଠ ନେତାଙ୍କ ସମର୍ଥନ ଥିଲେ ମଧ୍ୟ ଆଜି ଗଣମାଧ୍ୟମରେ ନାପସନ୍ଦ କରିବାକୁ ବାଧ୍ୟ ହୋଇଛନ୍ତି । ସୋନିଆ ଗାନ୍ଧୀଙ୍କୁ ଚିଠି ଲେଖିବା ଭୁଲ୍ ନୁହେଁ । ମାତ୍ର ଚିଠି ଗଣମାଧ୍ୟମକୁ ଆସିବା ଠିକ୍ ହୋଇନାହିଁ ବୋଲି କହି ଭକ୍ତଙ୍କ ବିଷୟକୁ ବାଆଁରେଇ ଦେଇଛନ୍ତି । ଦଳର ଦୁଇ ଶୀର୍ଷ ନେତୃତ୍ୱଙ୍କ ଉପରକୁ ଅଙ୍ଗୁଳି ଉଠାଉଥିବା ବ୍ୟକ୍ତିଙ୍କୁ ଖୋଲାଖୋଲି ସମର୍ଥନ କରିବାକୁ ସେମାନେ ସାହାସ କରିନାହାନ୍ତି ।
ପୂର୍ବତନ ପିସିସି ସଭାପତି ଜୟଦେବ ଜେନା ଗଣମାଧ୍ୟମକୁ ଅତି ଚତୁରତାର ସହ ପ୍ରତିକ୍ରିୟା ଦେଇଛନ୍ତି । ମନକଥା ଖୋଲି ଚିଠି ଲେଖିବାରେ ସମସ୍ତଙ୍କର ଅଧିକାର ଅଛି । ସେଭଳି ଗୁରୁତ୍ୱପୂର୍ଣ୍ଣ କଥାରେ ମ୍ୟାଡାମ୍ ଙ୍କୁ ଚିଠି ଲେଖିଲେ ସେ ଉତ୍ତର ଦିଅନ୍ତି । ମୋତେ ବହୁତ ଥର ଏମିତି ଉତ୍ତର ଦେଇଛନ୍ତି । ମାତ୍ର ଏହା କେହି ଜାଣନ୍ତି ନାହିଁ । ହେଲେ ମୋକିମ୍ ବାବୁ ଦେଇଥିବା ଚିଠି ଗଣମାଧ୍ୟମକୁ ଲିକ୍ ହେବା ଠିକ୍ ହୋଇନାହିଁ । ଏହା ଦୁଃଖଦାୟକ ବୋଲି ଶ୍ରୀ ଜେନା କହିଛନ୍ତି ।
ଅନ୍ୟତମ ବରିଷ୍ଠ ନେତା ସୁରେଶ ରାଉତରାୟ ଏବଂ ଅନନ୍ତ ସେଠୀ ମଧ୍ୟ ସମାନ ପ୍ରତିକ୍ରିୟା ଦେଇଛନ୍ତି । ଶ୍ରୀ ରାଉତରାୟ କହିଛନ୍ତି ମୋକିମ୍ ଯାହା କଲେ ଠିକ୍ ହେଲା ନାହିଁ । ଚିଠି ଗଣମାଧ୍ୟମରେ ଆସିବା ଯୋଗୁଁ ଦଳର କ୍ଷତି ହେଲା । ଏହାଦ୍ୱାରା ସେ ତାଙ୍କ ଝିଅର କ୍ୟାରିୟର୍ ନଷ୍ଟ କରୁଛନ୍ତି । ଶ୍ରୀ ସେଠୀ କହିଛନ୍ତି, ଚିଠି ଲେଖି ସମସ୍ୟା କହିବାରେ ଅସୁବିଧା ନାହିଁ । ମାତ୍ର ଏହା ପ୍ରେସ୍ କୁ ଆସିବା ଠିକ୍ ହୋଇନାହିଁ । ତାହାକୁ ମୁଁ ନାପସନ୍ଦ କରୁଛି ।
ଭକ୍ତ ଦାସଙ୍କ କାର୍ଯ୍ୟକଳାପରେ ନରସିଂହ ମିଶ୍ର, ନିରଞ୍ଜନ ପଟ୍ଟନାୟକ, ଜୟଦେବ ଜେନାଙ୍କ ଭଳି ରାଜ୍ୟ କଂଗ୍ରେସର ତୁଙ୍ଗ ନେତାଙ୍କଠାରୁ ଆରମ୍ଭ କରି ବିଧାୟକ ରମେଶ ଜେନା, ସୋଫିଆ ଫିରଦୋସ୍ କେହି ସନ୍ତୁଷ୍ଟ ନାହାନ୍ତି । ସମସ୍ତଙ୍କୁ ଏକାଠି ଧରି ନୂଆପଡ଼ା ଉପନିର୍ବାଚନ ସାମନା କରିବାରେ ଭକ୍ତ ବିଫଳ ହୋଇଛନ୍ତି । ଏହା ଦଳକୁ ବହୁତ କ୍ଷତି କଲା । ପିସିସି ସଭାପତିରୁ ବଞ୍ଚିତ ହେଲା ପରେ ମହମ୍ମଦ ମୋକିମ୍ ସ୍ୱାଭାବିକ ଭାବେ ଭକ୍ତ ଦାସଙ୍କର ବିରୋଧୀ ହୋଇପାରନ୍ତି । ମାତ୍ର ତାଙ୍କ ଉପରେ ରାଗ ସୁଜାଇବାକୁ ଯାଇ ଝିଅ ସୋଫିଆଙ୍କୁ ଅଣଦେଖା କରିବା ଠିକ୍ ହୋଇନାହିଁ ବୋଲି କୁହାଯାଉଛି ।
ସେହିଭଳି ଉପନିର୍ବାଚନ ହାରିବା ପରେ ଭକ୍ତଙ୍କ ବିଭୀଷଣ ମନ୍ତବ୍ୟ ବିବାଦ ସୃଷ୍ଟି କରିଥିଲା । ମୋକିମ୍ ନିଜ ଦେହକୁ ଏହା ନେଇଥିଲେ । ସାଙ୍ଗରେ ବିଧାୟକ ରମେଶ ଜେନାଙ୍କୁ ବି ଯୋଡ଼ିଥିଲେ । ଗଣମାଧ୍ୟମ ପ୍ରଶ୍ନ ଏଡିଟ୍ କରାଯାଇ ଉତ୍ତରକୁ କଦର୍ଥ କରାଯାଇଛି ବୋଲି ଭକ୍ତଙ୍କ ସଫେଇ ସେମାନଙ୍କୁ ଶାନ୍ତ କରିପାରିନାହିଁ । ଏହି ବିବାଦର ସମାଧାନ ହେବା ପରିବର୍ତ୍ତେ ଥାନାକୁ ମାମଲା ଯାଇଛି । ବିଧାୟକ ରମେଶ ଜେନାଙ୍କ ବିରୋଧରେ ପିସିସି କୋଷାଧ୍ୟକ୍ଷ ସିଦ୍ଧାର୍ଥ ଦାସଙ୍କ ଏତଲା କଂଗ୍ରେସ ଗୋଷ୍ଠୀ କନ୍ଦଳକୁ ତୀବ୍ର କରିଛି । ଏହି ଦୃଶ୍ୟପଟରେ ମୋକିମ୍ ଙ୍କ ପଛରେ ଅଧିକାଂଶ ନେତଙ୍କ ସମର୍ଥନ ରହୁଛି । ତେବେ ମୋକିମ୍ କେନ୍ଦ୍ରୀୟ ନେତୃତ୍ୱକୁ ମାଡ଼ କରିବା ସେମାନଙ୍କୁ ଅସୁବିଧାରେ ପକାଇଛି ।
ଉଲ୍ଲେଖ ଥାଉକି, ମୋକିମ୍ ଙ୍କ ବିରୋଧରେ ଦଳୀୟ ଶୃଙ୍ଖଳତାଗତ କାର୍ଯ୍ୟାନୁଷ୍ଠାନ ହେବ ବୋଲି ଚର୍ଚ୍ଚା ହେଉଛି । ମାତ୍ର ଦଳ ପକ୍ଷରୁ ସେଭଳି କୌଣସି ସୂଚନା ଆସିନାହିଁ । ସେହିଭଳି ମୋକିମ୍ ଏକ ନୂଆ ରାଜନୈତିକ ଦଳ ଗଠନ କରିବେ ବୋଲି ମଧ୍ୟ କୁହାଯାଉଛି । ମାତ୍ର ମୋକିମ୍ ଏହାକୁ ଏଡ଼ାଇ ଦେଇଛନ୍ତି । ସେପଟେ ସୋନିଆଙ୍କୁ ମୋକିମ୍ ଙ୍କ ଚିଠି ନେଇ ଦିଲ୍ଲୀ ଗସ୍ତରେ ଥିବା ପିସିସି ସଭାପତି ଶ୍ରୀ ଦାସଙ୍କର ପ୍ରତିକ୍ରିୟା ଆସିନାହିଁ ।
