ଭୁବନେଶ୍ୱର: ମୁଖ୍ୟମନ୍ତ୍ରୀ ମୋହନ ମାଝୀଙ୍କ ଦିଲ୍ଲୀ ଭିଆଇପି ବଙ୍ଗଳା ଖବରକୁ ନେଇ ଏବେ ରୋଚକ ସ୍ଥିତି । ଗଣମାଧ୍ୟମରେ ଖବରଟି ଆସିଲା ପରେ ମୁଖ୍ୟମନ୍ତ୍ରୀଙ୍କ ଆତ୍ମଘୋଷିତ ଭାବମୂର୍ତ୍ତି ରକ୍ଷାକାରୀମାନଙ୍କ ମୁଣ୍ଡ ଖରାପ । ଦିଲ୍ଲୀରେ ବଙ୍ଗଳା ନେଇଥିବା ଅନ୍ୟ ରାଜ୍ୟର ମୁଖ୍ୟମନ୍ତ୍ରୀଙ୍କ ତାଲିକା ଏବଂ ଦିଲ୍ଲୀ ଗସ୍ତ କାଳରେ ମୁଖ୍ୟମନ୍ତ୍ରୀଙ୍କ ହୋଟେଲ ରହଣି ଖର୍ଚ୍ଚ ସହ ବଙ୍ଗଳା ଖର୍ଚ୍ଚର ଏକ ତୁଳନାତ୍ମକ ତଥ୍ୟ ଚାରିଆଡ଼େ ବଣ୍ଟା ଯାଉଛି । ମୁଖ୍ୟମନ୍ତ୍ରୀ ଶ୍ରୀ ମାଝୀ ଜଣେ ମହାନ୍ ବ୍ୟକ୍ତି ଏବଂ ଯାହା କରୁଛନ୍ତି ରାଜ୍ୟର ସ୍ୱାର୍ଥ ପାଇଁ କରୁଛନ୍ତି ବୋଲି ସାଧାରଣରେ ବାର୍ତ୍ତା ଦେବାକୁ ଉଦ୍ୟମ ହୋଇଛି ।
କଥାଟି, ମନ୍ଦିରରେ କିଏ ନା ମୁଁ କଦଳୀ ଖାଇନି ଭଳି ହୋଇଛି । ପ୍ରଥମତଃ, ପ୍ରଥମ ଥର ପାଇଁ ଓଡ଼ିଶାର ଜଣେ ମୁଖ୍ୟମନ୍ତ୍ରୀ ଦିଲ୍ଲୀରେ ବଙ୍ଗଳା ନେଇଥିବାରୁ ଗଣମାଧ୍ୟମରେ ଖବର ହେବା ସ୍ୱାଭାବିକ । ଏହା ଖବର ହୋଇଛି, ପ୍ରସଙ୍ଗ ହୋଇନି । ତେଣୁ ତାକୁ ନେଇ ବ୍ୟତିବ୍ୟସ୍ତ ହେବାର କାରଣ ନାହିଁ । ମାତ୍ର ମୁଖ୍ୟମନ୍ତ୍ରୀଙ୍କୁ ସମ୍ଭବତଃ ଦେଖେଇ ହେବା ପାଇଁ କିଛି ପାଖଲୋକ ଏହାକୁ ପ୍ରସଙ୍ଗ କରିବାକୁ ଉଦ୍ୟମ କରିଛନ୍ତି । ଦିଲ୍ଲୀରେ ବଙ୍ଗଳା ନେଇଥିବା ଅନ୍ୟ ରାଜ୍ୟର ମୁଖ୍ୟମନ୍ତ୍ରୀଙ୍କ ତାଲିକା ପ୍ରସ୍ତୁତ କରିଛନ୍ତି । ମୁଖ୍ୟମନ୍ତ୍ରୀ ଦିଲ୍ଲୀ ଗଲେ ତାଙ୍କର ହୋଟେଲ ରହଣି ଖର୍ଚ୍ଚର ହିସାବ କରିଛନ୍ତି । ବଙ୍ଗଳାରେ ରହିଲେ କେତେ ଖର୍ଚ୍ଚ ବଞ୍ଚିବ ତାହାର ହିସାବ ମଧ୍ୟ ବାହାର କରିଛନ୍ତି ।
ସୂଚନା ଅନୁଯାୟୀ, ପ୍ରସ୍ତୁତ ଏହି ତଥ୍ୟକୁ ପ୍ରମୁଖ ଗଣମାଧ୍ୟମଗୁଡ଼ିକରେ ବାହାର କରିବା ପାଇଁ ପ୍ରସ୍ତୁତକାରୀମାନେ ଯୋଗାଯୋଗ କରିଥିଲେ ମଧ୍ୟ ନିରାଶ ହୋଇଥିଲେ । ସ୍ୱାଭାବିକ ଭାବେ ଏକ ଅପ୍ରାସଙ୍ଗିକ ଖବରକୁ ନେବା ପାଇଁ ଗଣମାଧ୍ୟମ ସଂସ୍ଥା ମନା କରିଦେଇଥିଲେ । ଏହାପରେ ସୋସିଆଲ୍ ମିଡିଆରେ ଏହି ତଥ୍ୟକୁ ସେୟାର କରାଯିବା ସହ କିଛି ଛୋଟଛୋଟ ମିଡିଆରେ ଏହାକୁ ଖବର କରି ମୁଖ୍ୟମନ୍ତ୍ରୀଙ୍କ ଦିଲ୍ଲୀ ବଙ୍ଗଳାର ଯଥାର୍ଥତା ପ୍ରତିପାଦିତ କରିବାକୁ ଉଦ୍ୟମ କରାଯାଇଛି ।
ଏହାକୁ ନେଇ ବିଭିନ୍ନ ମହଲରେ ଅନେକ ପ୍ରଶ୍ନ ଉଙ୍କି ମାରିଛି । କଥା ଉଖୁରା ଯାଇଥିବାରୁ ମୁଖ୍ୟମନ୍ତ୍ରୀ ଦିଲ୍ଲୀରେ ବଙ୍ଗଳା ନେବାର ଯଥାର୍ଥତା ଉପରେ ପ୍ରଶ୍ନ ଉଠିଲାଣି ।
ପ୍ରଥମତଃ, ମୁଖ୍ୟମନ୍ତ୍ରୀମାନେ ଦିଲ୍ଲୀରେ ବଙ୍ଗଳା ନେବାର ନିୟମ ନାହିଁ କି ଆବଶ୍ୟକତା ନାହିଁ । ଯଦି ସେମିତି ଅଛି ତାହାର ଚିଠି ଦେଖାଯିବ କି? ଯଦି ନାହିଁ, ଅନ୍ୟ ରାଜ୍ୟର କେଉଁ ମୁଖ୍ୟମନ୍ତ୍ରୀ ଦିଲ୍ଲୀରେ ବଙ୍ଗଳା ନେବା ଅର୍ଥ ନୁହେଁ ଯେ ତାହା ନିୟମ ହୋଇଗଲା । ଅନ୍ୟ ରାଜ୍ୟର ମୁଖ୍ୟମନ୍ତ୍ରୀ ଯଦି ଏହାର ବ୍ୟତିକ୍ରମ ସାଜିଛନ୍ତି, ଆମ ମୁଖ୍ୟମନ୍ତ୍ରୀ ଯେ ସେଇ ରାସ୍ତାରେ ଯିବେ ତାହା ନୁହେଁ । କିଏ ଚୋରି କରୁଛି ବୋଲି ମୁଁ କ’ଣ ଚୋରି କରିବି? ସୁତରାଂ ଏକ ବ୍ୟତିକ୍ରମକୁ ମୁଖ୍ୟମନ୍ତ୍ରୀ ଆଇନ ଭାବିବା ଠିକ୍ ନୁହେଁ ।
ଦ୍ୱିତୀୟତଃ, ମୁଖ୍ୟମନ୍ତ୍ରୀ ଦିଲ୍ଲୀ ଗସ୍ତରେ ଗଲେ ଅଶୋକା ହୋଟେଲ କି ଅନ୍ୟ ଫାଇଭ୍ ସେଭେନ୍ ଷ୍ଟାର୍ ହୋଟେଲରେ ରହିବା ପାଇଁ କୋଉଠି ନିୟମ ନାହିଁ । ମୁଖ୍ୟମନ୍ତ୍ରୀଙ୍କ ରହଣି ପାଇଁ ଓଡ଼ିଶା ଭବନରେ ସୁଇଟ୍ ଅଛି । ସରକାରୀ ବ୍ୟବସ୍ଥାରେ ମୁଖ୍ୟମନ୍ତ୍ରୀ ଅନ୍ୟ ଯେଉଁଠି ଚାହିଁଲେ ରହିପାରିବେ । ତାଙ୍କର ଭାବମୂର୍ତ୍ତି ରକ୍ଷାକାରୀମାନେ ଏହି କଥାଟିକୁ ବୋଧହୁଏ ଭୁଲିଯାଇ ଅଯଥା ବଙ୍ଗଳା ସହ ହୋଟେଲ ଖର୍ଚ୍ଚର ତୁଳନା କରିଛନ୍ତି । (ଅବଶ୍ୟ ବଙ୍ଗଳା ଖର୍ଚ୍ଚ ହିସାବ ବେଳେ ତାଙ୍କ ସୁରକ୍ଷା ପାଇଁ ନିୟୋଜିତ ହେବାକୁ ଥିବା ୧ ପ୍ଲାଟୁନ୍ ଫୋର୍ସର ଖର୍ଚ୍ଚ ହିସାବ ନାହିଁ) । ତା’ ଅର୍ଥ କ’ଣ ମୁଖ୍ୟମନ୍ତ୍ରୀ ଯେତେବେଳେ ବି ଦିଲ୍ଲୀ ଗଲେ ବଡ଼ ଷ୍ଟାର୍ ହୋଟେଲରେ ରହିବା ତାଙ୍କର ପସନ୍ଦ ଏବଂ ନିଜର ବଙ୍ଗଳା ନହେଲେ ସେଇ ହୋଟେଲରେ ହିଁ ରହୁଥିବେ?
ଏହାର ଉତ୍ତର ନ ଦେଇ ମୁଖ୍ୟମନ୍ତ୍ରୀଙ୍କ ବଙ୍ଗଳା ଖବରରେ ଏମିତି ପାଗେଳା ହେବା ସମସ୍ତଙ୍କୁ ଆଶ୍ଚର୍ଯ୍ୟ କରିଛି । ଅନେକ ଏହାକୁ ଭୁଲ୍ ପିଆର୍ ମ୍ୟାନେଜମେଣ୍ଟ ବୋଲି ଆକ୍ଷେପ କରିଛନ୍ତି ।
