ଭୁବନେଶ୍ୱର: ଆଫ୍ରିକୀୟ ଦେଶ ସୁଦାନକୁ କାମ କରିବାକୁ ଯାଇ ସେଠାରେ ନିଖୋଜ ହୋଇଯାଇଥିବା ଜଗତସିଂହପୁର ଜିଲ୍ଲା କୋଟକଣା ଗାଁର ଯୁବକ ଆଦର୍ଶ ସୁରକ୍ଷିତ ଭାବେ ଉଦ୍ଧାର ପାଇଛନ୍ତି । ଭୁବନେଶ୍ୱର ବିମାନବନ୍ଦରରେ ପହଞ୍ଚିଲା ପରେ ଆତ୍ମୀୟ ଓ ପରିବାର ଲୋକଙ୍କୁ ଦେଖି ଖୁସିରେ ଭୋ ଭୋ କାନ୍ଦି ପକାଇଥିଲେ । ଗଣମାଧ୍ୟମ ପ୍ରଶ୍ନରେ ସେ ତାଙ୍କ ଅପହରଣ କାହାଣୀ କହିଥିଲେ । ଅପହର୍ତ୍ତାମାନେ ତାଙ୍କୁ ଏକ ମାସ ଧରି ଅନ୍ଧାର ଘରେ ବନ୍ଦୀ କରି ରଖିଥିଲେ । ବେଳେ ବେଳେ ମାଂସ ଖାଇବାକୁ ଦେଉଥିଲେ । ହେଲେ ଭାତ ଦେଉ ନ ଥିଲେ । ମୁଁ ତିନିବର୍ଷ ହେଲା ଭାତ ଖାଇନି । ଆଜି ଘରକୁ ଗଲେ ପଖାଳ ଆଉ ଶାଗ ଭଜା ଖାଇବି ବୋଲି ଛଳ ଛଳ ଆଖିରେ କହିଥିଲେ ଆଦର୍ଶ ।
ଆଦର୍ଶ ସୁଦାନର ଉତ୍ତର ଡରଫର୍ ରାଜ୍ୟର ଏଲ୍ ଫାସର୍ ସହରରେ ନିଖୋଜ ଥିଲେ । ଭାରତ ସରକାର ତାଙ୍କୁ ଆନ୍ତର୍ଜାତିକ ମଧ୍ୟସ୍ଥିଙ୍କ ସହଯୋଗରେ ଉଦ୍ଧାର କରିଛନ୍ତି । ଜଗତସିଂହପୁର ଜିଲ୍ଲା ତିର୍ତ୍ତୋଲ ଥାନା କୋଟକଣା ଗ୍ରାମର ଏହି ଯୁବକ ୨୦୨୨ ମସିହାରୁ ସୁଦାନରେ କାମ କରୁଥିଲେ । ପରେ ସେ ନିଖୋଜ ହୋଇଯାଇଥିବା ତାଙ୍କ ପରିବାର ଲୋକଙ୍କ ପାଖକୁ ଖବର ଆସିଥିଲା ।
ଆଦର୍ଶଙ୍କ କହିବାନୁଯାୟୀ, ସେଠାରେ ଆତଙ୍କବାଦୀମାନେ ତାଙ୍କୁ, ସେ କାମ କରୁଥିବା କମ୍ପାନୀର ମାଲିକଙ୍କ ସମେତ ୩ ଜଣଙ୍କୁ ଅପହରଣ କରିନେଇଥିଲେ । ପରେ ଅନ୍ୟ ଦୁଇଜଣଙ୍କୁ ଛାଡ଼ିଦେଇଥିଲେ ମଧ୍ୟ ତାଙ୍କୁ ଭାରତୀୟ ଜାଣି ଛାଡ଼ି ନ ଥିଲେ । ତାଙ୍କୁ ପ୍ରଥମେ ଜଙ୍ଗଲରେ ରଖିଥିଲେ । ଖାଇବାକୁ ନ ଦେଇ ମାଡ଼ ମାରୁଥିଲେ । ସେଠାରୁ ଗୋଟିଏ ଘରକୁ ନେଇ ମାସେ କାଳ ଅନ୍ଧାରରେ ରଖିଥିଲେ । ଅପହରଣକାରୀମାନେ ବାରମ୍ବାର ତାଙ୍କୁ ଶାହାରୁଖ ଖାନ୍ ଙ୍କ ବିଷୟରେ ପଚାରୁଥିଲେ । ସେଠାରୁ ସେ ଜୀବନ ନେଇ ଆଉ ଜନ୍ମମାଟିକୁ ଫେରିବେ ଏ ବିଶ୍ୱାସ ତାଙ୍କର ନ ଥିଲା ।
ଆଦର୍ଶଙ୍କୁ ଉଦ୍ଧାର କରିବା ପାଇଁ ତାଙ୍କ ପତ୍ନୀ ଏବଂ ପରିବାର ଲୋକେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କୁ ନିବେଦନ କରିଥିଲେ । ମୁଖ୍ୟମନ୍ତ୍ରୀଙ୍କ ନିଦେ୍ର୍ଦଶରେ ରାଜ୍ୟ ସରକାର କେନ୍ଦ୍ର ବୈଦେଶିକ ବ୍ୟାପାର ମନ୍ତ୍ରଣାଳୟକୁ ପତ୍ର ଲେଖି ତାଙ୍କୁ ଉଦ୍ଧାର କରିବା ପାଇଁ ଅନୁରୋଧ କରିଥିଲେ । ଏଥିସହିତ ନୂଆଦିଲ୍ଲୀରେ ଅବସ୍ଥାପିତ ଆବାସିକ କମିସନର ମଧ୍ୟ ବୈଦେଶିକ ମନ୍ତ୍ରଣାଳୟକୁ ପତ୍ରଲେଖି ସୁଦାନରେ ଅବସ୍ଥାପିତ ଭାରତୀୟ ରାଷ୍ଟ୍ରଦୂତ କାର୍ଯ୍ୟାଳୟ ସହିତ ଯୋଗାଯୋଗରେ ରହି ଆଦର୍ଶଙ୍କ ଖୋଜ୍ ଖବର ନେବା ଏବଂ ତାଙ୍କୁ ସୁରକ୍ଷିତ ଭାବେ ଫେରାଇ ଆଣିବା ପାଇଁ ଅନୁରୋଧ କରିଥିଲେ ।
ଆଜି ଆଦର୍ଶଙ୍କ ଫେରିବା ଖବର ପାଇ ମୁଖ୍ୟମନ୍ତ୍ରୀ ଶ୍ରୀ ମାଝୀ ଖୁସି ବ୍ୟକ୍ତ କରିବା ସହ କେନ୍ଦ୍ର ସରକାରଙ୍କ ବୈଦେଶିକ ବ୍ୟାପାର ମନ୍ତ୍ରଣାଳୟକୁ ଧନ୍ୟବାଦ ଅର୍ପଣ କରିଛନ୍ତି ।
ତାଙ୍କୁ ସୁରକ୍ଷିତ ଭାବେ ଫେରାଇ ଅଣାଯାଇଥିବାରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ, ବୈଦେଶିକ ବ୍ୟାପାର ମନ୍ତ୍ରୀ ଡ. ଏସ୍. ଜୟଶଙ୍କର ଏବଂ ମୁଖ୍ୟମନ୍ତ୍ରୀ ଶ୍ରୀ ମାଝୀଙ୍କୁ ଧନ୍ୟବାଦ ଜଣାଇଛନ୍ତି ଆଦର୍ଶ । ମୁଖ୍ୟମନ୍ତ୍ରୀଙ୍କୁ ସ୍ୱତନ୍ତ୍ର ଭାବେ ଧନ୍ୟବାଦ ଦେଇ ସେ କହିଛନ୍ତି, ମୋ ମାଟିକୁ ମୁଁ ନିରାପଦ ଭାବେ ଫେରି ଆସିଥିବାରୁ ମୁଖ୍ୟମନ୍ତ୍ରୀଙ୍କ ନିକଟରେ ମୁଁ ଓ ପରିବାର ଋଣୀ’ ।
