ବିଜେପିରେ ମିଶିବାକୁ ବିଜେଡି ଛାଡ଼ିଲେ

ଭୁବନେଶ୍ୱର: ରାଜ୍ୟସଭା ସାଂସଦ ଦେବାଶିଷ ସାମନ୍ତରାୟ ବିଜେଡିରୁ ଇସ୍ତଫା ଦେଇଛନ୍ତି । ଆଜି ସେ ତାଙ୍କର ଇସ୍ତଫାପତ୍ର ସଭାପତି ନବୀନ ପଟ୍ଟନାୟକଙ୍କୁ ପଠାଇଛନ୍ତି । ଏତେ ବର୍ଷ ଧରି ଲୋକଙ୍କ ସେବା ପାଇଁ ତାଙ୍କୁ ସୁଯୋଗ ଦେଇଥିବାରୁ ସେ ନବୀନ ବାବୁଙ୍କୁ କୃତଜ୍ଞତା ଜଣାଇବା ସହ ଏବେ ଦଳରେ ତାଙ୍କୁ ଯୋଜନାବଦ୍ଧ ଭାବେ ପଚରା ଯାଉ ନ ଥିଲା ବୋଲି ଅନୁଭବ କରିଛନ୍ତି । ତାଙ୍କ ସେବାକୁ ଦଳ ଆଉ ଆବଶ୍ୟକ କରୁ ନ ଥିବାରୁ ସେ ଇସ୍ତଫା ଦେଉଛନ୍ତି ବୋଲି ସେଥିରେ ଲେଖିଛନ୍ତି ।

ଦେବାଶିଷ ସାମନ୍ତରାୟ ବିଜେଡିରୁ ଅଚାନକ ଇସ୍ତଫା ଦେଇନାହାନ୍ତି । ବହୁ ଦିନ ହେଲା ସେ ବିଜେପି ସହ ଯୋଗାଯୋଗ ଉଦ୍ୟମରେ ଥିଲେ । ବିଜେପି ଶୀର୍ଷ ନେତୃତ୍ୱଙ୍କୁ ଭେଟି ନିଜ ପାଇଁ ଜାଗାଟିଏ ପାଇଁ ବ୍ୟାକୁଳ ଥିଲେ । ବହୁ ଚେଷ୍ଟା ପରେ ତାଙ୍କୁ ସେହି ସୁଯୋଗ ଆସିଲା । ଗୃହମନ୍ତ୍ରୀ ଅମିତ୍ ଶାହଙ୍କୁ ଗୋପନରେ ଭେଟିବା ପରେ ଗତକାଲିଠାରୁ ତାଙ୍କୁ ନେଇ ଜୋର୍ ଚର୍ଚ୍ଚା ହୋଇଥିଲା । ଆଜି ସେ ବିଜେଡି ଓ ରାଜ୍ୟସଭା ସଦସ୍ୟ ପଦରୁ ଇସ୍ତଫା ଦେଇ ବିଜେପିରେ ଯୋଗଦେଉଥିବା ଗତକାଲି ସଂଧ୍ୟାରୁ ପ୍ରଚାର ହୋଇଥିଲା । ଆଜି ସକାଳେ ନବୀନ ବାବୁ ଦଳର ବରିଷ୍ଠ ନେତାମାନଙ୍କୁ ଡାକି ଏହା ଉପରେ ବିଚାର ବିମର୍ଷ କରିଥିଲେ । ବିଶ୍ୱାସଘାତକଙ୍କର ବିଜେଡିରେ ସ୍ଥାନ ନାହିଁ ବୋଲି ସମସ୍ତେ ଏକମତ ହୋଇଥିଲେ ।

ଏକଦା ନବୀନ ବାବୁଙ୍କର ବିଶ୍ୱସ୍ତ ଥିଲେ ଦେବାଶିଷ ସାମନ୍ତରାୟ । ସମୟ ଏମିତି ଥିଲା ଯେ ନବୀନ ବାବୁଙ୍କ ଆଶୀର୍ବାଦରେ ଦେବାଶିଷ ଧରାକୁ ସରା ମଣୁ ନ ଥିଲେ । ଯାହା ଚାହୁଁଥିଲେ ସେୟା କରୁଥିଲେ । ନବୀନଙ୍କ ଦୟାରୁ କଟକ ବାରବାଟୀ ଆସନରୁ ସେ ୨୦୦୯ ଏବଂ ୨୦୧୪ରେ ବିଧାୟକ ହୋଇଥିଲେ । ୨୦୨୪ରେ ନବୀନ ତାଙ୍କୁ ରାଜ୍ୟସଭା ପଠାଇଥିଲେ । ଦଳୀୟ ସଂଗଠନରେ ବିଭିନ୍ନ ଗୁରୁତ୍ୱପୂର୍ଣ୍ଣ ପଦପଦବୀ ଦେଇଥିଲେ । ତେବେ ବିଜେଡି କ୍ଷମତାରୁ ଯିବା ପରେ ଦେବାଶିଷଙ୍କ ଆଭିମୁଖ୍ୟ ବଦଳି ଯାଇଥିଲା । ଦଳୀୟ ପରିଚାଳନା ନେଇ ଅସନ୍ତୋଷ ଜାହିର କରିଥିଲେ । ୱାକଫ୍ ବିଲ୍ ପ୍ରସଙ୍ଗରେ ସେ ଖାଲି ଭିକେ ପାଣ୍ଡିଆନଙ୍କୁ ଟାର୍ଗେଟ୍ କରି ନ ଥିଲେ ବରଂ ନବୀନଙ୍କ ନେତୃତ୍ୱକୁ ଏକ ପ୍ରକାର ଚାଲେଂଜ କରିଥିଲେ ।

ଖୁବ୍ ଶୀଘ୍ର ବିଜେପିରେ ଯୋଗଦେବେ ବୋଲି ଦେବାଶିଷ ଗଣମାଧ୍ୟମକୁ ସୂଚନା ଦେଇଛନ୍ତି ।

ଦଳ ପାଇଁ କ୍ଷତି ନୁହେଁ: ଦେବାଶିଷ ସାମନ୍ତରାୟ ବିଜେଡିରୁ ଇସ୍ତଫା ଦେବା ଦଳ ପାଇଁ କ୍ଷତିକାରକ ନୁହେଁ ବୋଲି ବିଜେଡି ପକ୍ଷରୁ କୁହାଯାଇଛି । ଏକ ସାମ୍ବାଦିକ ସମ୍ମିଳନୀରେ ବରିଷ୍ଠ ନେତ୍ରୀ ପ୍ରମିଳା ମଲ୍ଲିକ ତାଙ୍କୁ କଟୁ ସମାଲୋଚନା କରିଛନ୍ତି । ନବୀନ ବାବୁଙ୍କଠାରୁ ସେ ଯାହା ନେବା କଥା ନେଇସାରିଛନ୍ତି । ବିଜେଡି ସରକାରରୁ ଚାଲିଯିବା ପରେ ତାଙ୍କର ଏଠି ଆଉ ସ୍ୱାର୍ଥ ନାହିଁ । ଏଭଳି ସ୍ୱାର୍ଥବାଦୀ ନେତା ଦଳ ପାଇଁ କ୍ଷତିକାରକ ବୋଲି ଶ୍ରୀମତୀ ମଲ୍ଲିକ କହିଛନ୍ତି । ଦଳର ମୁଖପାତ୍ର ଡ. ଲେନିନ୍ ମହାନ୍ତି କହିଛନ୍ତି, ଦଳ ପାଇଁ ଦେବାଶିଷଙ୍କର କିଛି ଅବଦାନ ନାହିଁ । ତାଙ୍କର ବ୍ୟବସାୟିକ ସ୍ୱାର୍ଥକୁ ଆଖିରେ ରଖି ସେ ବିଜେପି ମୁହଁ ହୋଇଛନ୍ତି । ଏଭଳି ନେତାଙ୍କୁ ସାବଧାନ ହେବା ଦରକାର ବୋଲି ସେ କହିଛନ୍ତି ।