ଭୁୁବନେଶ୍ୱର: ବହୁ ଚର୍ଚ୍ଚିତ ତିଖିରି ପଞ୍ଚାୟତ ସରପଞ୍ଚ ଚାମେଲି ଓଝାଙ୍କ ଆନ୍ଦୋଳନ କେନ୍ଦ୍ରାପଡ଼ାରୁ ଭୁବନେଶ୍ୱର ଆସିଛି । ନ୍ୟାୟ ପାଇଁ ଲୋୟର ପିଏମଜିଠାରେ ସେ ଆମରଣ ଅନଶନ ଆରମ୍ଭ କରିଛନ୍ତି । ତାଙ୍କ ପ୍ରତି ହୋଇଥିବା ଅନ୍ୟାୟ ଓ ଅତ୍ୟାଚାରର ବିଚାର ଦାବି କରିଛନ୍ତି । ମହାକାଳପଡ଼ା ବିଡିଓ ରବିନାରାୟଣ ଆଚାର୍ଯ୍ୟଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଏବଂ ଆଇଆଇସି ମାନସ ମଲ୍ଲିକଙ୍କ ବିରୋଧରେ କଠୋର ପଦକ୍ଷେପ ଗ୍ରହଣ ପାଇଁ ସେ ଦାବି କରିଛନ୍ତି । ଦାବି ପୂରଣ ନ ହେବା ପର୍ଯ୍ୟନ୍ତ ଆମରଣ ଅନଶନ ଜାରି ରହିବ ବୋଲି ଚେତାବନୀ ଦେଇଛନ୍ତି ।
ଚାମେଲି କହିଛନ୍ତି, ମୋ ପ୍ରତି ହୋଇଥିବା ଅନ୍ୟାୟ ଅତ୍ୟାଚାର ସାରା ଓଡ଼ିଶା ଦେଖିଲା । ମୋ ବିରୋଧରେ ମିଛ କେସ୍ ଦିଆଗଲା । ଗାଡ଼ି ଭିତରେ ନିର୍ମମ ଭାବରେ ମାଡ଼ ମରାଗଲା । ମୋ ପାଟି ବନ୍ଦ କରିବାକୁ ବହୁତ ଚେଷ୍ଟା କରାଗଲା । ମାତ୍ର ବର୍ତ୍ତମାନ ସୁଦ୍ଧା ଅପରାଧୀଙ୍କ ବିରୋଧରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଗଲା ନାହିଁ । ଇତିମଧ୍ୟରେ ଗୋଟେ ମାସ ହୋଇଗଲାଣି । ବହୁତ ଅପେକ୍ଷା କଲି । ବହୁତ ଚିଠି ବି ଦେଲି । ଯେତେବେଳେ ସୁଫଳ ପାଇଲିନି ବାଧ୍ୟହୋଇ ଏଠି ଲୋୟର ପିଏମଜିରେ ଆମରଣ ଅନଶନରେ ବସିଲି ।
ଚାମେଲି ପୂର୍ବରୁ କେନ୍ଦ୍ରାପଡ଼ା ଜିଲ୍ଲା ପୁଲିସ ଓ ପ୍ରଶାସନକୁ ଜୁନ୍ ୨୪ ତାରିଖ ଡେଡଲାଇନ୍ ଦେଇଥିଲେ । କଣ୍ଟ ପୂରିବା ପରେ ନ୍ୟାୟ ନ ମିଳିବାରୁ ୨୫ ତାରିଖରେ ରାସ୍ତାକୁ ଓହ୍ଲାଇଥିଲେ । ଶତାଧିକ ସମର୍ଥକଙ୍କ ସହ କେନ୍ଦ୍ରାପଡ଼ା ଏସପିଙ୍କ ଅଫିସ ସାମନାରେ ଧାରଣାରେ ବସିଥିଲେ । ଏସପିଙ୍କ ଅଫିସ୍ ଆଗରେ ଚାମେଲିଙ୍କ ଧାରଣା କେବଳ କେନ୍ଦ୍ରାପଡ଼ା ପ୍ରଶାସନ ନୁହେଁ, ରାଜ୍ୟ ସରକାରଙ୍କ ପାଇଁ ମୁଣ୍ଡବ୍ୟଥାର କାରଣ ସାଜିଥିଲା । ଜିଲ୍ଲା ଓ ପୁଲିସ ପ୍ରଶାସନ ତତ୍ପର ହୋଇ ଉଠିଥିଲେ । କେନ୍ଦ୍ରାପଡ଼ା ଏସଡିପିଓ ଏବଂ ଅତିରିକ୍ତ ଏସପି ଚାମେଲିଙ୍କ ପାଖକୁ ଆସି ତାଙ୍କୁ ସମ୍ପୂର୍ଣ୍ଣ ନ୍ୟାୟ ମିଳିବ ବୋଲି ଏସପିଙ୍କ ପକ୍ଷରୁ ପ୍ରତିଶ୍ରୁତି ଦେଇଥିଲେ । ଏସପି ନିଜେ ଏହି ଘଟଣାର ତତ୍ତ୍ୱାବଧାନ କରୁଛନ୍ତି ଏବଂ ତାଙ୍କୁ ସହଯୋଗ କରିବାକୁ ଅନୁରୋଧ କରିଥିଲେ । ଏହାପରେ ଚାମେଲି ଧାରଣାରୁ ହଟିଥିଲେ ।
ସୂଚନାଥାଉକି, ମହାକାଳପଡ଼ା ବ୍ଲକ୍ ଅଫିସରେ ଜୁନ୍ ୧୧ରେ ଚାମେଲିଙ୍କ ପ୍ରତି ଅଘଟଣ ଘଟିଥିଲା । ପୁଲିସଠାରୁ ମାଡ଼ ଖାଇ ଅସୁସ୍ଥ ହୋଇଥିବା ଚାମେଲି କେନ୍ଦ୍ରାପଡ଼ା ହସ୍ପିଟାଲରେ ୭ ଦିନ ଚିକିତ୍ସିତ ହୋଇଥିଲେ । ୧୮ ତାରିଖରେ ଗାଁକୁ ଫେରିବା ପୂର୍ବରୁ ଜିଲ୍ଲାପାଳଙ୍କୁ ଭେଟି ନ୍ୟାୟ ମାଗିଥିଲେ । ମହାକାଳପଡ଼ା ବିଡିଓ ଏବଂ ଆଇଆଇସିଙ୍କୁ ନିଲମ୍ବନ ସହ ସମସ୍ତ ଅଭିଯୁକ୍ତଙ୍କୁ ଗିରଫ କରାଗଲେ ଯାଇ ସେ ନ୍ୟାୟ ପାଇବେ ବୋଲି କହିଥିଲେ ।
