ଭୁବନେଶ୍ୱର: ପରବର୍ତ୍ତୀ ଡିଜିପି ଚର୍ଚ୍ଚାରେ ଆଜି ଏକ ଟ୍ୱିଷ୍ଟ୍ ଆସିଛି । ବରିଷ୍ଠତା ତାଲିକାର ଚତୁର୍ଥ ଓ ପଞ୍ଚମରେ ଥିବା ଅତିରିକ୍ତ ଡିଜି ପାହ୍ୟାର ଦୁଇ ଅଧିକାରୀ ସଞ୍ଜୀବ ପଣ୍ଡା ଏବଂ ଯଶବନ୍ତ ଜେଠୱାଙ୍କୁ ଡିଜି ପାହ୍ୟାକୁ ପଦୋନ୍ନତି ମିଳିଛି । ଏ ସଂକ୍ରାନ୍ତ ପ୍ରସ୍ତାବକୁ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଆଜି ଅନୁମୋଦନ କରିଛନ୍ତି । ୧୯୯୪ ବ୍ୟାଚ୍ ର ଏହି ଦୁଇ ଅଧିକାରୀଙ୍କୁ ବରିଷ୍ଠତା ଭିତ୍ତିରେ ଡିଜି ପାହ୍ୟାକୁ ପଦୋନ୍ନତି ମିଳିବା ପରେ ପରବର୍ତ୍ତୀ ଡିଜିପି ଚର୍ଚ୍ଚାରେ ନୂଆ ମୋଡ଼ ଆସିଛି । ସଞ୍ଜୀବ ପଣ୍ଡା ପରବର୍ତ୍ତୀ ଡିଜି ହେବା ଏକ ପ୍ରକାର ନିଶ୍ଚିତ ବୋଲି କୁହାଯାଉଛି ।
ନୂଆ ଡିଜିପି ପାଇଁ ୧୧ ବରିଷ୍ଠ ଆଇପିଏସଙ୍କ ତାଲିକା ରାଜ୍ୟ ସରକାର ମେ ୧୪ରୁ ୟୁପିଏସସିକୁ ସୁପାରିଶ କରିସାରିଛନ୍ତି । ତିନି ଜଣଙ୍କ ନାଁ ବାଛିବାକୁ ଗଲା ୭ ତାରିଖରେ ୟୁପିଏସ୍ ଅଧ୍ୟକ୍ଷ ଅଜୟ କୁମାରଙ୍କ ଅଧ୍ୟକ୍ଷତାରେ ନୂଆଦିଲ୍ଲୀରେ ଚୟନ କମିଟି ବୈଠକ ବସିଥିଲା । ସେଥିରେ ମୁଖ୍ୟ ଶାସନ ସଚିବ ଶ୍ରୀମତୀ ଅନୁ ଗର୍ଗ ଏବଂ ଡିଜିପି ୱାଇ.ବି ଖୁରାନିଆ ଯୋଗଦେଇଥିଲେ । ମାତ୍ର ସେଦିନ ଚୟନ କମିଟି ବୈଠକ ଅଧାରୁ ବାତିଲ ହୋଇଥିଲା । ସେହି ବୈଠକରେ ୩ ଜଣଙ୍କ ନାଁ ଚୂଡ଼ାନ୍ତ ହୋଇଥାନ୍ତା । ତାପରେ ରାଜ୍ୟ ସରକାର ଜଣଙ୍କୁ ଡିଜିପି ଭାବେ ନିଯୁକ୍ତି ଦେଇଥାନ୍ତେ ।
ସୂଚନା ଅନୁଯାୟୀ, ବରିଷ୍ଠତା ଭିତ୍ତିରେ ଯେଉଁ ୩ ଜଣଙ୍କ ନାଁ ଆସିଥିଲା, ସେଥିରୁ ଜଣଙ୍କୁ ବାଦ୍ ଦେବା ପାଇଁ ରାଜ୍ୟ ସରକାରଙ୍କ ପକ୍ଷରୁ କୁହାଯାଇଥିଲା । ସଂପୃକ୍ତ ଅଧିକାରୀଙ୍କ ନାଁରେ ଓପିଆରବି ପରୀକ୍ଷା ମାମଲାରେ ତଦନ୍ତ ଚାଲିଥିବା ଏବଂ ସରକାର ବିଭାଗୀୟ କାର୍ଯ୍ୟାନୁଷ୍ଠାନ ପାଇଁ ପଦକ୍ଷେପ ନେଉଛନ୍ତି ବୋଲି କୁହାଗଲା । ୟୁପିଏସସି ଅଧ୍ୟକ୍ଷ ଏହାର ବୈଧ ଦସ୍ତାବିଜ ଚାହିଁବାରୁ ସରକାର ସମୟ ମାଗିଥିଲେ । ତେଣୁ ଚୂଡ଼ାନ୍ତ ନିଷ୍ପତ୍ତି ଅଟକି ଯାଇଥିଲା ।
ସୂଚନାଥାଉକି, ବରିଷ୍ଠତା ଭିତ୍ତିରେ ୧୯୯୦ ବ୍ୟାଚ୍ ର ଆଇପିଏସ୍ ଅଗ୍ନିଶମ ସେବା ଡିଜି ସୁଧାଂଶୁ ଷଡ଼ଙ୍ଗୀ, ୧୯୯୩ ବ୍ୟାଚ୍ ର ଜେଲ୍ ଡିଜି ସୁଶାନ୍ତ ନାଥ ଏବଂ ଗୁଇନ୍ଦା ଡିଜି ଆର ପି କୋଚେଙ୍କ ନାଁ ବହୁ ପୂର୍ବରୁ ଚର୍ଚ୍ଚା ହେଉଥିଲା । ପରବର୍ତ୍ତୀ ସମୟରେ ଏହି ରେସ୍ ରେ ସାମିଲ ହୋଇଥିଲେ ସଞ୍ଜୀବ ପଣ୍ଡା । ଏକ ପାୱାରଫୁଲ୍ ଗୋଷ୍ଠୀ କୁଆଡ଼େ ତାଙ୍କ ପାଇଁ ଲବି କରୁଛନ୍ତି । ମାଓ ଦମନ କ୍ଷେତ୍ରରେ ତାଙ୍କର ଦକ୍ଷତାକୁ ମାପକାଠି କରିଛନ୍ତି । ଆଜି ତାଙ୍କୁ ଅତିରିକ୍ତ ଡିଜିରୁ ଡିଜି ପାହ୍ୟାକୁ ପଦୋନ୍ନତି ମିଳିବା ପରେ ତାଙ୍କର ଡିଜିପି ନିଯୁକ୍ତି ସମ୍ଭାବନା ଅଧିକ ବୋଲି କୁହାଯାଉଛି ।
ଆସନ୍ତା ୧୬ ତାରିଖରେ ବର୍ତ୍ତମାନର ଡିଜିପି ୱାଇ. ବି ଖୁରାନିଆ ଅବସର ନେଉଛନ୍ତି । ସ୍ଥଗିତ ଥିବା ୟୁପିଏସସି ଚୟନ କମିଟି ଆସନ୍ତା ୧୩ ତାରିଖରେ ବସିପାରେ । ନଚେତ୍ ସେ ପର୍ଯ୍ୟନ୍ତ କାମଚଳା ଡିଜିପି ନିଯୁକ୍ତି ପାଇବେ । ବର୍ତ୍ତମାନ ବିଜୁ ପଟ୍ଟନାୟକ ରାଜ୍ୟ ପୁଲିସ ଏକାଡେମୀର ନିର୍ଦ୍ଦେଶକ ଥିବା ଶ୍ରୀ ପଣ୍ଡାଙ୍କ ପାଇଁ ସର୍ବୋଚ୍ଚ ପଦବୀର ରାସ୍ତା କ୍ଲିୟର୍ ହୋଇଥିବାରୁ ସମସ୍ତଙ୍କର ଉତ୍କଣ୍ଠା ବଢ଼ିଛି ।
