ଡବଲ ଇଞ୍ଜିନକୁ ଧୂଲେଇଲେ ସୁଜାତା

ଭୁବନେଶ୍ୱର: ବିଜେଡି ନେତ୍ରୀ ସୁଜାତା ରାଉତ କାର୍ତ୍ତିକେୟନଙ୍କର ଖବରକାଗଜ ଆଲେଖ୍ୟକୁ ନେଇ ପୁଣି ଚର୍ଚ୍ଚା । ପୂର୍ବରୁ ବନ୍ୟା ଉପରେ ଲେଖିଥିଲେ । ଏବେ ଏମଏମଡିଆର ସଂଶୋଧନ ଆଇନ ଉପରେ ଲେଖିଛନ୍ତି ଆଲେଖ୍ୟ । ଏମଏମଡିଆର ସଂଶୋଧନ ଆଇନ ଓ ଓଡ଼ିଶା ଉପରେ ଏହାର ପ୍ରଭାବକୁ ସେ ବିଶ୍ଲେଷଣ କରିଛନ୍ତି । ତାଙ୍କର ସେହି ଆଲେଖ୍ୟର ଶୀର୍ଷକ ରହିଛି ‘ପରିବର୍ତ୍ତନର ପ୍ରତିଫଳନ’ । ଡବଲ ଇଞ୍ଜିନ ସରକାରଙ୍କ ଡବଲ ପ୍ରତାରଣା ସମ୍ପର୍କରେ ଏଥିରେ ସେ ବୁଝାଇ ଲେଖିଛନ୍ତି ।

ସୁଜାତା ଲେଖିଛନ୍ତି- ଓଡ଼ିଶାର ଭୂଭାଗ ଭାରତର ମୋଟ ଭୂଭାଗର ମାତ୍ର ୫ ପ୍ରତିଶତ, କିନ୍ତୁ ଦେଶର ମୋଟ ଖଣିଜ ସମ୍ପଦର ପ୍ରାୟ ୪୪ ପ୍ରତିଶତ ଓଡ଼ିଶାରେ ରହିଛି । ଭାରତର ୯୮ ପ୍ରତିଶତ କ୍ରୋମାଇଟ୍, ୯୩ ପ୍ରତିଶତ ନିକେଲ୍, ୫୯ ପ୍ରତିଶତ ବକ୍ସାଇଟ୍, ୨୮ ପ୍ରତିଶତ ଲୁହାପଥର, ୨୪ ପ୍ରତିଶତ କୋଇଲା ଏବଂ ୩୫ ପ୍ରତିଶତ ମାଙ୍ଗାନିଜ୍ ଓଡ଼ିଶାରେ ଗଚ୍ଛିତ ଅଛି । ଏତଦବ୍ୟତୀତ ତମ୍ବା, ଗ୍ରାଫାଇଟ୍, ଭାନାଡିଅମ୍ ଭଳି ଅନ୍ୟାନ୍ୟ ମୂଲ୍ୟବାନ ଖଣିଜ ସମ୍ପଦର ମଧ୍ୟ ପ୍ରଚୁର ଭଣ୍ଡାର ଓଡ଼ିଶାରେ ରହିଛି । ମହାପ୍ରଭୁ ଶ୍ରୀଜଗନ୍ନାଥଙ୍କ ଆଶୀର୍ବାଦରୁ ଓଡ଼ିଶା ମାଟିରେ ଏହି ବିପୁଳ ଖଣିଜ ସମ୍ପଦ ଗଚ୍ଛିତ ଅଛି । ଏହି ସମ୍ପଦ ଉପରେ ଟିକସ ଲାଗୁ କରି ମିଳୁଥିବା ଅର୍ଥକୁ ଲୋକଙ୍କ ବିକାଶ ଏବଂ ଦୀର୍ଘସ୍ଥାୟୀ ଭିତ୍ତିଭୂମି ନିର୍ମାଣରେ ବିନିଯୋଗ କରିବା ହେଉଛି ରାଜ୍ୟ ସରକାରଙ୍କ ଦାୟିତ୍ୱ । କିନ୍ତୁ ଏମଏମଡିଆର ସଂଶୋଧନ ଆଇନ ପ୍ରଣୟନ ହେବା ଫଳରେ ଓଡ଼ିଶାବାସୀ ଲକ୍ଷ ଲକ୍ଷ କୋଟି ଟଙ୍କା ବକେୟା ଲେଭି ଆଦାୟ କରିବାର ଅଧିକାର ହରାଇଛନ୍ତି । ଏହାସହିତ ଓଡ଼ିଶା ପ୍ରତିବର୍ଷ ପ୍ରାୟ ୧୨ ହଜାର କୋଟି ଟଙ୍କାର ଟିକସ ଆଦାୟରୁ ମଧ୍ୟ ବଞ୍ଚିତ ହେବ ।

ଏହି ଅର୍ଥରେ ଓଡ଼ିଶାର ଲୋକମାନଙ୍କ ପାଇଁ କେତେ କ’ଣ କରାଯାଇପାରିଥାନ୍ତା । ୫ ହଜାର କୋଟି ଆବଶ୍ୟକତା ଥିବା ଭୁବନେଶ୍ୱର ମେଟ୍ରୋ ପ୍ରକଳ୍ପ, ୧୦ ହଜାର କୋଟି ଟଙ୍କାର ଆବଶ୍ୟକତା ଥିବା ସମସ୍ତ ସରକାରୀ ବିଦ୍ୟାଳୟର ରୂପାନ୍ତରଣ କାର୍ଯ୍ୟ, ହଜାର କୋଟି ଟଙ୍କାର ଗଙ୍ଗାଧର ମେହେର ପ୍ରକଳ୍ପ, ଏସସିବି ମେଡିକାଲ୍ କଲେଜ ଓ ହସ୍ପିଟାଲକୁ ବିଶ୍ୱସ୍ତରୀୟ କାର୍ଯ୍ୟ, ପାରାଦ୍ୱୀପର ଆଇଓସିଏଲ ପେଟ୍ରୋକେମିକାଲ୍ କମ୍ପ୍ଲେକ୍ସ, ଲକ୍ଷ ଲକ୍ଷ ପରିବାରକୁ ସ୍ୱାସ୍ଥ୍ୟ ସୁରକ୍ଷା, ୬୦ ଲକ୍ଷ ଛାତ୍ରଛାତ୍ରୀଙ୍କ ପାଇଁ ମଧ୍ୟାହ୍ନ ଭୋଜନରେ ପ୍ରାତଃଭୋଜନ ଯୋଡ଼ିବା ଇତ୍ୟାଦି କାର୍ଯ୍ୟ ହୋଇପାରିଥାନ୍ତା ।

ଏହି କ୍ଷତି ସତ୍ତ୍ୱେ ଓଡ଼ିଶାର ୨୦ ଜଣ ବିଜେପି ସାଂସଦ ନିରବ ରହିଲେ । ଏହାଠାରୁ ଅଧିକ ଦୁର୍ଭାଗ୍ୟଜନକ ହେଉଛି ଏହି ସଂଶୋଧନ ବିରୋଧରେ ସ୍ୱର ଉଠାଇବା ବଦଳରେ ସେମାନେ ଖୋଲାଖୋଲି ଭାବେ ଏହାର ସମର୍ଥନ କରୁଛନ୍ତି । କେନ୍ଦ୍ରରେ ଯେଉଁ ଦଳର ସରକାର ଥିଲେ ମଧ୍ୟ ଦୀର୍ଘ ୨୪ ବର୍ଷ ଧରି ଶ୍ରୀ ନବୀନ ପଟ୍ଟନାୟକ ଓଡ଼ିଶାବାସୀଙ୍କ ଏହି ଅଧିକାରକୁ ସୁରକ୍ଷା ଦେଇ ଆସିଥିଲେ । କିନ୍ତୁ ମାତ୍ର ୨୪ ମାସ ମଧ୍ୟରେ ବିଜେପି ସରକାର ଓଡ଼ିଶାର ଅଧିକାରକୁ ସମର୍ପଣ କରିଦେଇଛନ୍ତି । ଏହି ଗୁରୁତର ପ୍ରସଙ୍ଗରେ ଆଲୋଚନା ପାଇଁ ବିଧାନସଭାର ସ୍ୱତନ୍ତ୍ର ଅଧିବେଶନ ଡାକିବାକୁ ନବୀନ ପଟ୍ଟନାୟକ ଦେଇଥିବା ପତ୍ରର ଉତ୍ତର ମଧ୍ୟ ମୁଖ୍ୟମନ୍ତ୍ରୀ ଏ ପର୍ଯ୍ୟନ୍ତ ଦେଇନାହାନ୍ତି । ବିଜେପିର ସାଂସଦମାନଙ୍କ ପରି ବିଜେପିର ରାଜ୍ୟ ସରକାର ମଧ୍ୟ ଏ ପ୍ରସଙ୍ଗରେ ନିରବ ।

ରାଜ୍ୟର ଖଣି ଓ ଖଣିଜ ସମ୍ପଦ ଉପରେ ଟିକସ ଲାଗୁ କରିବାର ସାମ୍ବିଧାନିକ ଅଧିକାରକୁ କେନ୍ଦ୍ର ହାତକୁ ନେବା ଫଳରେ ଓଡ଼ିଶା ନିଜ ସମ୍ପଦ ପାଇଁ କେନ୍ଦ୍ରର ଅନୁଗ୍ରହ ଉପରେ ନିର୍ଭରଶୀଳ ହୋଇପଡ଼ିବ । ଖଣି ଖୋଳାଯିବ ଓଡ଼ିଶାର ମାଟିରେ । ଧୂଳି ଓ ଧୂଆଁ ସହିବେ ଓଡ଼ିଶାର ଲୋକ । ବିସ୍ଥାପିତ ହେବେ ଆମ ଲୋକ । ପ୍ରଭାବିତ ହେବ ଆମ ପରିବେଶ ଓ ସ୍ଥାନୀୟ ସମୁଦାୟ । ଖଣି ଓଡ଼ିଶାର, କ୍ଷତି ଓଡ଼ିଶାର, କିନ୍ତୁ ଟିକସ ଓ ଲେଭି ଉପରେ ଅଧିକାର ଓଡ଼ିଶାର ରହିବ ନାହିଁ ।

ଗତ ଅଗଷ୍ଟ ୧୩ ତାରିଖରେ, ଯେତେବେଳେ ପାର୍ଲିଆମେଣ୍ଟରେ ଏମଏମଡିଆର ସଂଶୋଧନ ବିଲ୍ ପାରିତ ହେଲା, ସେତେବେଳେ ଓଡ଼ିଶାରୁ ନିର୍ବାଚିତ ୨୦ ଜଣ ବିଜେପି ସାଂସଦ ନିରବ ରହିଥିଲେ । ବିଜେପି କହେ ଯେ “ଓଡ଼ିଆ ଅସ୍ମିତା’ ଓ “ପରିବର୍ତ୍ତନ’ ନାମରେ ଓଡ଼ିଶାବାସୀ ତାଙ୍କୁ ଜନାଦେଶ ଦେଇଛନ୍ତି । ଓଡ଼ିଶାବାସୀଙ୍କୁ “ଡବଲ୍ ଇଞ୍ଜିନ୍’ ସରକାର ପ୍ରତିଶ୍ରୁତି ଦେଇଥିଲା ବିଜେପି । କିନ୍ତୁ ଆଜି ଡବଲ୍ ପ୍ରତାରଣା ପାଉଛନ୍ତି ଓଡ଼ିଶାବାସୀ । ଏମଏମଡିଆର ସଂଶୋଧନ ଆଇନ ଏହାର ବଡ଼ ଉଦାହରଣ ବୋଲି ସୁଜାତା ଲେଖିଛନ୍ତି ।