ବିଜେଡି ପାଇଁ ଅଗ୍ନି ପରୀକ୍ଷାର ବେଳ

ଭୁବନେଶ୍ୱର: ଉପରାଷ୍ଟପତି ଜଗଦୀପ ଧନଖଡ଼ ଗତକାଲି ଅଚାନକ ତାଙ୍କ ପଦରୁ ଇସ୍ତଫା ଦେଇଛନ୍ତି । ସ୍ୱାସ୍ଥ୍ୟଗତ କାରଣ ଦର୍ଶାଇ ସେ ତାଙ୍କ ପଦରୁ ଇସ୍ତଫା ଦେଇଛନ୍ତି । ପରବର୍ତ୍ତୀ ଉପରାଷ୍ଟ୍ରପତିଙ୍କୁ ନେଇ ଜାତୀୟ ରାଜନୀତି ଅଧିକ ଚଳଚଞ୍ଚଳ ହୋଇଥିବା ବେଳେ ଓଡ଼ିଶାରେ ବିଜୁ ଜନତା ଦଳ ପାଇଁ ଅଗ୍ନିପରୀକ୍ଷାର ବେଳ ଆଣିଛି । ଉପରାଷ୍ଟ୍ରପତି ନିର୍ବାଚନରେ ବିଜେଡିର ଭୂମିକା କ’ଣ ହେବ ତାକୁ ନେଇ ସମସ୍ତଙ୍କର ଉତ୍କଣ୍ଠା ଦେଖିବାକୁ ମିଳିଛି ।

ଭାରତୀୟ ସମ୍ବିଧାନର ଧାରା ୬୩ରୁ ୭୧ ଏବଂ ଉପରାଷ୍ଟ୍ରପତି(ନିର୍ବାଚନ) ଆଇନ, ୧୯୭୪ ଅନୁଯାୟୀ ଉପରାଷ୍ଟ୍ରପତି ନିର୍ବାଚନ ହେବ । ଧନକଡ଼ଙ୍କ ଇସ୍ତଫାର ୬୦ ଦିନ ମଧ୍ୟରେ ଅର୍ଥାତ ସେପ୍ଟେମ୍ବର ୧୯ ପୂର୍ବରୁ ଏହି ପ୍ରକ୍ରିୟା ଶେଷ ହେବ । ୭୮୮ ସାଂସଦଙ୍କୁ ନେଇ ଗଠିତ ଇଲେକଟ୍ରୋରାଲ୍ କଲେଜ ଦ୍ୱାରା ଉପରାଷ୍ଟ୍ରପତି ନିର୍ବାଚିତ ହେବେ । ଯେଉଁଥିରେ ୫୪୩ ଲୋକସଭା ଏବଂ ୨୪୫ ରାଜ୍ୟସଭା ସାଂସଦ ଅଛନ୍ତି ।

ବର୍ତ୍ତମାନ ଲୋକସଭାରେ ବିଜେଡି ସାଂସଦଶୂନ୍ୟ ହୋଇଥିବା ବେଳେ ରାଜ୍ୟସଭାରେ ଦଳର ୭ ଜଣ ସାଂସଦ ଅଛନ୍ତି । ସେମାନେ ହେଲେ ମୁନ୍ନା ଖାଁ, ମାନସ ମଙ୍ଗରାଜ, ସସ୍ମିତ ପାତ୍ର, ସୁଲତା ଦେଓ, ଦେବାଶିଷ ସାମନ୍ତରାୟ, ଶୁଭାଶିଷ ଖୁଣ୍ଟିଆ ଏବଂ ନିରଞ୍ଜନ ବିଶି । ଜାତୀୟ ରାଜନୀତି ଖାତା ଖତିଆନାରେ ଏହି ବିଜେଡି ସାଂସଦ ମାନେ ବିଜେପି ନେତୃତ୍ୱାଧୀନ ଏନଡିଏ ମେଣ୍ଟରେ ନାହାନ୍ତି କି କଂଗ୍ରେସ ନେତୃତ୍ୱାଧୀନ ଇଣ୍ଡି ମେଣ୍ଟ ରେ ନାହାନ୍ତି । ନବୀନ ପଟ୍ଟନାୟକଙ୍କ ଭାଷାରେ ତାଙ୍କ ଦଳ ସମଦୂରତ୍ୱ ବଜାୟ ରଖିଛନ୍ତି । ଏହି ପୃଷ୍ଠଭୂମିରେ ଉପରାଷ୍ଟ୍ରପତି ନିର୍ବାଚନରେ ବିଜେଡିର ୭ଟି ଭୋଟ ର ନିଶ୍ଚିତ ଭାବେ ଗୁରୁତ୍ୱ ରହିଛି । ରାଜନୀତି ଗଣିତରେ ଏହି ଭୋଟ ହୁଏତ ନିର୍ଣ୍ଣାୟକ ହୋଇପାରେ ।

ସମସ୍ତଙ୍କ ମନରେ ପ୍ରଶ୍ନ, ୱକଫ୍ ବିଲ୍ ଭଳି ବିଜେଡିର ଦୋମୁହାଁ ଆଭିମୁଖ୍ୟ ରହିବ ନା ଦଳର ଇଜ୍ଜତ ଏବଂ ଭବିଷ୍ୟତକୁ ଆଖିରେ ରଖି ନିଷ୍ପତ୍ତି ନେବ?

ସୂଚନାଥାଉକି, ୱକଫ୍ ବିଲ୍ ପ୍ରସଙ୍ଗରେ ବିଜେଡିର ବିଜେପି ପ୍ରେମ ଧରାପଡ଼ିଯାଇଥିଲା । ଦଳର ମୁଖିଆ ନବୀନ ପଟ୍ଟନାୟକ ବିଜେପି ଏବଂ କଂଗ୍ରେସଠାରୁ ସମଦୂରତ୍ୱର ପରିଚୟ ଦେଉଥିଲେ ମଧ୍ୟ ବିଜେପି ସହ ଭିତିରି ସମ୍ପର୍କ ପଦାରେ ପଡ଼ିସାରିଛି । ପ୍ରଥମେ ୱକଫ୍ ବିଲ୍ କୁ ବିରୋଧ କରାଯିବ ବୋଲି ନିଷ୍ପତ୍ତି ଘୋଷଣା କରିଥିଲେ ମଧ୍ୟ ରାଜ୍ୟସଭାରେ ଠିକ୍ ମତଦାନ ପୂର୍ବରୁ ବିବେକାନୁମୋଦିତ ଭୋଟ ଆଳରେ ୱକଫ୍ ବିଲ୍ ସମର୍ଥନରେ ଭୋଟ ଦେବାକୁ ସାଂସଦମାନଙ୍କୁ କୁହାଗଲା ।

ଦଳର ଏଭଳି ପରିବର୍ତ୍ତିତ ଆଭିମୁଖ୍ୟ ଜାତୀୟ ରାଜନୀତିରେ ଝଡ଼ ସୃଷ୍ଟି କରିଥିଲା । ଖୋଦ୍ ବିଜେଡିର ଦୁଇ ସାଂସଦ ଶେଷ ମୁହୂର୍ତ୍ତର ଦଳୀୟ ନିଷ୍ପତ୍ତିକୁ ଅମାନ୍ୟ କରିଥିଲେ । ଦେବାଶିଷ ସାମନ୍ତରାୟ ଭୋଟଦାନରୁ ବିରତ ରହିଥିଲା ବେଳେ ମୁନ୍ନା ଖାଁ ବିଲ୍ ବିପକ୍ଷରେ ଭୋଟ ଦେଇଥିଲେ । ଅନ୍ୟ ୫ ଜଣ ଯାକ ସାଂସଦ ୱକଫ୍ ବିଲ୍ ସମର୍ଥନରେ ଭୋଟ ଦେଇଥିଲେ । ବିଜେପି ସରକାରକୁ ସମର୍ଥନ ଦେବା ପାଇଁ ଦଳର ଇଜ୍ଜତକୁ ସେମାନେ ବଳି ଦେଇଥିଲେ ।

୨୦୨୪ ନିର୍ବାଚନ ପରାଜୟ ପରେ ୱକଫ୍ ବିଲ୍ କୁ ସମର୍ଥନ ବିଜେଡି ପାଇଁ ଦ୍ୱିତୀୟ ବଡ଼ ଝଟକା ଥିଲା । ଏହାକୁ ନେଇ ଦଳ ଭିତରେ ପ୍ରବଳ ଅସନ୍ତୋଷ ଏବଂ ବିଦ୍ରୋହ ଏବେ ବି ଲାଗି ରହିଛି । ଆବଶ୍ୟକ ନ ଥିବା ସତ୍ତ୍ୱେ ବିଜେଡିର ଇଜ୍ଜତକୁ ବାଜି ଲଗାଇ ୱକଫ୍ ବିଲ୍ କୁ କାହିଁକି ସମର୍ଥନ ଦିଆଗଲା ତାହା ଏବେ ବି ସମସ୍ତଙ୍କୁ ଆନ୍ଦୋଳିତ କରୁଛି । ଏହି ନିଷ୍ପତ୍ତି ପଛରେ ଭି.କେ ପାଣ୍ଡିଆନଙ୍କ ଭୂମିକା ଆଜି ସର୍ବଜନବିଦିତ । ଏହା ଦଳ ପାଇଁ ଯଥେଷ୍ଟ କ୍ଷତି ଆଣିଥିଲେ ମଧ୍ୟ ପାଣ୍ଡିଆନଙ୍କର ସେଥିପ୍ରତି ପରବାଏ ନ ଥିବା ଦଳୀୟ ମହଲ ଅନୁଭବ କରିଛନ୍ତି । ସମୁଦାୟ ପ୍ରକରଣରେ ନବୀନ ପଟ୍ଟନାୟକଙ୍କ ସ୍ୱୀକୃତି ଥିବାରୁ ବରିଷ୍ଠ ନେତାମାନେ ନାଚାର ।

ଇତିମଧ୍ୟରେ ରାଜ୍ୟ ରାଜନୀତି ଏକ ଗୁରୁତ୍ୱପୂର୍ଣ୍ଣ ମୋଡ଼ରେ ରହିଛି । ରାଜ୍ୟରେ ନାରୀ ନିର୍ଯ୍ୟାତନା, ଆଇନ ଶୃଙ୍ଖଳା ପରିସ୍ଥିତି ଗମ୍ଭୀର ହୋଇଥିବା ବେଳେ ବିଜେପି ସରକାରଙ୍କ ବିରୋଧରେ ଜନ ଅସନ୍ତୋଷ ବଢ଼ି ଚାଲିଛି । ବିରୋଧୀ ଶିବିର ପାଇଁ ଏହା ରାଜନୈତିକ ମୁଦ୍ଦା ପାଲଟିଛି । ଭକ୍ତ ଦାସଙ୍କ ନେତୃତ୍ୱରେ କଂଗ୍ରେସ ସକ୍ରିୟ ହୋଇ ଆନ୍ଦୋଳନାତ୍ମକ କାର୍ଯ୍ୟକ୍ରମକୁ ଆଗେଇ ନେଉଛନ୍ତି । ସବୁ ବର୍ଗର ବରିଷ୍ଠ ନେତାଙ୍କୁ ସେ ଏକାଠି କରିବାରେ ସକ୍ଷମ ହୋଇଛନ୍ତି ।

ଅନୁରୂପ ଭାବେ ବିଜେଡି ବିଭିନ୍ନ ପ୍ରସଙ୍ଗରେ ରାଜ୍ୟ ସରକାରଙ୍କ ବିରୋଧରେ ଗର୍ଜନ ତର୍ଜନ କରୁଥିଲେ ମଧ୍ୟ ଲୋକମାନଙ୍କର ବିଶ୍ୱାସ ଫେରାଇବା କଷ୍ଟକର ହୋଇଛି । ୱକଫ୍ ବିଲ୍ ଉପରେ ବିଜେପି ସହ ଉତ୍ତମ ସମ୍ପର୍କ ଧରାପଡ଼ିଥିବାରୁ ଓଡ଼ିଶାବାସୀଙ୍କ ପାଇଁ ତାହା ବିଶ୍ୱାସଘାତକ ହୋଇଛି । ରାଜ୍ୟରେ ବିଜେପି ସରକାରଙ୍କ ବିରୋଧରେ ବିଜେଡି କାର୍ଯ୍ୟକ୍ରମକୁ ଲୋକେ ଡ୍ରାମା କହି ଉପହାସ କରୁଛନ୍ତି । ସୁତରାଂ ବିଜେଡିର ବିଶ୍ୱାସନୀୟତା ସଙ୍କଟରେ ପଡ଼ିଛି । ବରଂ ମୁଖ୍ୟ ବିରୋଧୀ ଦଳ ଭାବେ କଂଗ୍ରେସ ବେଶୀ ଆଦୃତ ହେବା ଆରମ୍ଭ କରିଛି ।

ଏହି ପରିପ୍ରେକ୍ଷୀରେ ଓଡ଼ିଶାବାସୀଙ୍କ ବିଶ୍ୱାସ ଫେରାଇବା ବିଜେଡି ପାଇଁ ମୁଖ୍ୟ ଚାଲେଂଜ ହୋଇଥିବା ବେଳେ ଉପରାଷ୍ଟ୍ରପତି ନିର୍ବାଚନ ଦଳ ପାଇଁ ଅଗ୍ନି ପରୀକ୍ଷା ସଦୃଶ ହୋଇଛି । ଯଦି ଦଳ ଏନଡିଏ ପ୍ରାର୍ଥୀଙ୍କୁ ବିରୋଧ କରେ ତେବେ ଲୋକଙ୍କର ବିଶ୍ୱାସ ଫେରିପାଇବାର ଅଧିକ ସମ୍ଭାବନା ଅଛି । ମାତ୍ର କୌଣସି ଆଳରେ ଏନଡିଏ ପ୍ରାର୍ଥୀଙ୍କୁ ସମର୍ଥନ କଲେ ବିଜେଡିର ଭବିଷ୍ୟତ ଅନ୍ଧାର ହେବା ସୁନିଶ୍ଚିତ । ଭୋଟ ଦାନରୁ ବିରତ ରହିଲେ ବି ତାହା ବିଜେପିକୁ ସମର୍ଥନ ବୋଲି ଲୋକ ଧରିନେବେ ।

ସୁତରାଂ ଉପରାଷ୍ଟ୍ରପତି ନିର୍ବାଚନରେ ବିଜେଡିର ଭୂମିକା ଦଳର ଭବିଷ୍ୟତ ନିର୍ଣ୍ଣୟ କରିବ ବୋଲି ରାଜନୈତିକ ସମୀକ୍ଷକମାନେ ମତ ଦେଇଛନ୍ତି ।