ଭୁବନେଶ୍ୱର: ୨୦୨୨ ମେ’ ମାସର ଘଟଣା । ବର୍ତ୍ତମାନର ଆସିକା ବିଧାୟକ ସରୋଜ ପାଢ଼ୀ ସକାଳୁ ସକାଳୁ ତାଙ୍କର ଭୁବନେଶ୍ୱର ଘରୁ କୁଆଡ଼େ ଅନ୍ତର୍ଦ୍ଧାନ ହୋଇଗଲେ । ପାଖରେ ନା ଥିଲା ମୋବାଇଲ୍, ନା ପର୍ସ । ଖୋଜି ଖୋଜି ହାଲିଆ ହୋଇଯିବା ପରେ ତାଙ୍କ ପୁଅ କ୍ୟାପିଟାଲ୍ ଥାନାରେ ମିସିଂ ରିପୋର୍ଟ କରିଥିଲେ । ତାଙ୍କ ବାପାକୁ କିଏ ଅପହରଣ କରିଥାଇପାରନ୍ତି ବୋଲି ସନ୍ଦେହ କରିଥିଲେ । ତେବେ ପରଦିନ ଏକ ଅଜଣା ନମ୍ବରରୁ ଘରକୁ ଫୋନ୍ କରିଥିଲେ ସରୋଜ ପାଢ଼ୀ । ତାମିଲନାଡୁ ରାମେଶ୍ୱରମ୍ ପଳାଇ ଆସିଛନ୍ତି ବୋଲି ଜଣାଇଥିଲେ । ୫ ଦିନ ପରେ ସେଠାରୁ ଫେରିଥିଲେ । ତାଙ୍କର ମାନସିକ ଅବସ୍ଥା ଠିକ୍ ନ ଥିବା ସାଧାରଣରେ ଚର୍ଚ୍ଚା ହୋଇଥିଲା । ଏଥର ବିଜେପି ଟିକେଟରେ ଜିତିଥିବା ଏହି ବାବୁଜଣଙ୍କ ଟିଭି ବାଲାଙ୍କର ଡାର୍ଲିଂ । ତାଙ୍କ ବାଇଟ୍ ରେ କୁଆଡ଼େ ଟିଆରପି ଅଛି । କାହାରିକୁ ଯଦି ଗାଳି କରିବାର ଅଛି ସରୋଜ ପାଢ଼ୀଙ୍କୁ ଖୋଜା ପଡ଼େ । ଖାଲି ନାଁ ଧରେଇଦେଲେ ଆଗକୁ ମାଡ଼ିଯାନ୍ତି ବିଧାୟକ ମହାଶୟ ।
ଗଞ୍ଜାମର ବନ୍ୟା ପ୍ରପୀଡ଼ିତ ଅଞ୍ଚଳରେ କାର୍ଯ୍ୟରତ ଜଣେ ଯୁବ ଆଇଏଏସ୍ ଙ୍କ ପ୍ରତି ଆସିକା ବିଧାୟକଙ୍କ ଦୁର୍ବ୍ୟବହାର ଘଟଣା ସାରା ରାଜ୍ୟରେ ହଇଚଇ ସୃଷ୍ଟି କରିଛି । ବିଧାୟକଙ୍କ ନାଁରେ ଆଜି ଶେଷରେ ଆସିକା ଥାନାରେ ଏତଲା ଦେଇଛନ୍ତି ସଂପୃକ୍ତ ଅଧିକାରୀ ସମୀର ଜେନା । ଗଞ୍ଜାମ ଜିଲ୍ଲା ପରିଷଦ ମୁଖ୍ୟ ଉନ୍ନୟନ ଅଧିକାରୀ(ସିଡିଓ) ଭାବେ ଅବସ୍ଥାପିତ ଏହି ଯୁବ ଆଇଏଏସ୍, ବିଧାୟକଙ୍କ ଔଦ୍ଧତ୍ୟ ଓ ଅଭଦ୍ରାମୀକୁ ସହ୍ୟ କରିପାରିନାହାନ୍ତି । ବିଧାୟକଙ୍କ ଅପମାନ ଓ ହତ୍ୟା ଧମକରେ ଭୟଭୀତ ହୋଇ ଥାନାରେ ନ୍ୟାୟ ଭିକ୍ଷା କରିଛନ୍ତି ।
ସିଡିଓ ସମୀର ଜେନା ତାଙ୍କ ଏତଲାରେ ସାଂଘାତିକ ଅଭିଯୋଗ ଆଣିଛନ୍ତି ।
ଗତ ୩ ତାରିଖ ସଂଧ୍ୟା ୭ଟା ବେଳେ ଆସିକା ପୌରପାଳିକା କାର୍ଯ୍ୟନିର୍ବାହୀ ଅଧିକାରୀଙ୍କ ଅଫିସ ଚାମ୍ବରରେ ସେ(ସମୀର ଜେନା) ଅଧ୍ୟକ୍ଷଙ୍କ ସହ ଆଲୋଚନା କରୁଥିଲା ବେଳେ କାର୍ଯ୍ୟନିର୍ବାହୀ ଅଧିକାରୀଙ୍କୁ ଧରି ଆସିକା ବିଧାୟକ ସରୋଜ ପାଢ଼ୀ ଚାମ୍ବରକୁ ପଶି ଆସିଥିଲେ । ସେଠାରୁ ଅନ୍ୟମାନେ ସେଠାରୁ ଚାଲିଯିବାକୁ ନିର୍ଦ୍ଦେଶ ଦେଇଥିଲେ । ଏହାପରେ ତାଙ୍କ ଉପରେ ଚିଲାଇବା ଆରମ୍ଭ କରିଥିଲେ । କିଛି ଜାଗାରେ ରିଲିଫ୍ ବଣ୍ଟନକୁ ନେଇ ବିଧାୟକ ଖପ୍ପା ଥିଲେ । ତାଙ୍କୁ ବିରୋଧ କରୁଥିବା ଲୋକଙ୍କୁ ରିଲିଫ୍ ଦିଆଯାଉଥିବାରୁ ବିରୋଧ କରିଥିଲେ । ଖଣିମନ୍ତ୍ରୀ ବିଭୂତି ଜେନାଙ୍କ ଦ୍ୱାରା ରିଲିଫ୍ ସାମଗ୍ରୀ ଯୋଗାଡ଼ ହୋଇ ତାଙ୍କ ପରାମର୍ଶରେ ବଣ୍ଟନ କରାଯାଉଛି ବୋଲି ସିଡିଓ ନମ୍ରତାର କହିବା ସତ୍ତ୍ୱେ ବିଧାୟକ କିଛି ଶୁଣି ନ ଥିଲେ । ଭୀଷଣ ଉତକ୍ଷିପ୍ତ ହୋଇପଡ଼ିଥିଲେ ।
‘କ’ଣ ଏଠି ମିନିଷ୍ଟର ମିନିଷ୍ଟର ହଉଚୁ । ଆସିକାରେ ମୁଁ ହଉଛି ମିନିଷ୍ଟର ଆଉ ସବୁ କିଛି । ଏଠି ମୋ ଇଚ୍ଛା ବିନା କିଛି ହୁଏ ନାହିଁ’ ବୋଲି ବିଧାୟକ ତୁ.. ତା ବେ.. ବାରେ କଥା ହୋଇଥିଲେ । କିଛି ବୁଝିବା ଅବସ୍ଥାରେ ନ ଥିଲେ । ତାଙ୍କୁ(ସମୀର) କହିଥିଲେ, ମୁଁ ଗଲା ୪-୫ ଦିନ ହେଲାଣି ଦେଖୁଛି ତୁ କି ନାଟ ଲଗଉଛୁ । ତୁ ନିଜକୁ କ’ଣ ଭାବୁଛୁ? ମୋ ଆଗରେ ଅଫିସରଗିରି ଦେଖାଉଛୁ? ଅଫିସର ନ ହୋଇଥିଲେ ଗଳା ଧକ୍କା ଦେଇ ମୁଁ ତତେ ଏଠୁ ବାହାର କରିଦେଇଥାନ୍ତି । ମୋ ଉପରକୁ କଥା ଆସିଲେ, ମୁଁ ମୋ ନିଜ ବାପ କି ପୁଅକୁ ବି ଛାଡ଼ିବିନି । ଆଉ ତୋ ଅବସ୍ଥା କ’ଣ କରିବି, ତୁ ନିଜେ ବି ଭାବି ପାରିବୁନୁ । ଦରକାର ପଡ଼ିଲେ, ତୋତେ ମାରିକି ଏଠି ମାଟିରେ ମିଶେଇ ଦେବି । ତୋର ଏଠି ରହିବାର କିଛି ଆବଶ୍ୟକତା ନାହିଁ । ତୁ ଏଠୁ ଭଲରେ ଭଲରେ ପଳା ।’
ଏଥିସହ ସିଡିଓଙ୍କୁ ବିଧାୟକ ଖରାପ ଭାଷାରେ ଗାଳିମନ୍ଦ କରିଥିଲେ । ସେହି ସବୁ ଦୃଶ୍ୟ କାର୍ଯ୍ୟନିର୍ବାହୀ ଅଧିକାରୀଙ୍କ ଅଫିସ୍ ସିସିଟିଭିରେ କଏଦ ଅଛି । ବିଧାୟକଙ୍କ ଏଭଳି ଆଚରଣ ତାଙ୍କୁ ମାନସିକ ଭାବରେ ଭୀଷଣ ଆଘାତ ଦେଇଛି । ଆଇନ ଅନୁଯାୟୀ ପଦକ୍ଷେପ ନେବାକୁ ପୁଲିସକୁ ଅନୁରୋଧ କରିଛନ୍ତି । ନିଜ ପାଇଁ ନ୍ୟାୟଭିକ୍ଷା କରିବା ସହ ପୁଲିସଠାରୁ ସୁରକ୍ଷା ଲୋଡ଼ିଛନ୍ତି ଯୁବ ଆଇଏଏସ୍ ଅଧିକାରୀ ଶ୍ରୀ ଜେନା ।
ଛେପ ଢ଼ୋକିଲେ ବିଧାୟକ
ସିଡିଓଙ୍କ ସହ ସେମିତି କିଛି ହୋଇନାହିଁ କହି ଛେପ ଢ଼ୋକିଛନ୍ତି ବିଧାୟକ ସରୋଜ ପାଢ଼ୀ । ଭୁଲ୍ ବୁଝାମଣାରୁ ଯାହା ଘଟିଥିଲା ଆମ ଦୁହିଁଙ୍କ ଭିତରେ ଆପୋଷ ବୁଝାମଣାରେ ସମାଧାନ ହୋଇଯାଇଛି ବୋଲି ଗଣମାଧ୍ୟମକୁ ପ୍ରତିକ୍ରିୟା ଦେଇଛନ୍ତି । ଆଜି ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟକୁ ସେ ଆସିଥିଲେ । ଗଞ୍ଜାମରେ ବନ୍ୟା ପରବର୍ତ୍ତୀ ପଦକ୍ଷେପ ସମ୍ପର୍କରେ ଜିଲ୍ଲାର ଅନ୍ୟ ବିଧାୟକମାନଙ୍କ ସହ ସିଏମଓରେ ଆଲୋଚନା ପାଇଁ ଆସିଥିବା ସଫେଇ ଦେଇଥିଲେ । ସିଡିଓଙ୍କ ଏତଲା ଉପରେ ପ୍ରତିକ୍ରିୟା ଲୋଡ଼ିବାରୁ ସେ ଥତମତ ହୋଇଥିଲେ । ନିଜର ଭୁଲ୍ ପାଇଁ ବିଧାୟକ ଅନୁତପ୍ତ ବୋଲି ତାଙ୍କ ଜିଲ୍ଲାର ମନ୍ତ୍ରୀ ଗୋକୁଳାନନ୍ଦ ମଲ୍ଲିକ କହିଛନ୍ତି ।
କାର୍ଯ୍ୟାନୁଷ୍ଠାନ ହେଉ: ବିଜେଡି
ଗଞ୍ଜାମ ଜିଲ୍ଲାରେ ବନ୍ୟା ପ୍ରଭାବିତଙ୍କୁ ରିଲିଫ୍ ବଣ୍ଟନ ସମୟରେ ବାଧା ସୃଷ୍ଟି କରିବା ଓ କର୍ତ୍ତବ୍ୟରତ ଜଣେ ସରକାରୀ ଅଧିକାରୀଙ୍କୁ ଆସ୍କା ବିଧାୟକ ସରୋଜ ପାଢ଼ୀ ଦୁର୍ବ୍ୟବହାର କରି ହତ୍ୟା ଧମକ ଦେବା ଘଟଣାକୁ ନିନ୍ଦା କରିଛି ବିଜେଡି । ବନ୍ୟା ପ୍ରଭାବିତ ଅଞ୍ଚଳରେ ଦାୟିତ୍ୱ ନିର୍ବାହ କରୁଥିବା ଜଣେ ସରକାରୀ ଅଧିକାରୀଙ୍କୁ ଗାଳିଗୁଲଜ କରିବା ସହ ହତ୍ୟା ଧମକ ଦେବା ସଭ୍ୟ ସମାଜରେ ଗ୍ରହଣୀୟ ନୁହେଁ । ବନ୍ୟା ବିପନ୍ନ ପରିବାର ଏହି ଭୟାବହ ପରିସ୍ଥିତିରୁ ମୁକୁଳିବା ପାଇଁ ସଂଘର୍ଷ କରୁଛନ୍ତି । ସରକାରୀ ସହାୟତା ପାଇଁ ଆକୁଳ ଅପେକ୍ଷା କରିଥିବା ପରିବାର ଗୁଡ଼ିକୁ ରିଲିଫ୍ ଓ ଥଇଥାନ କାର୍ଯ୍ୟରେ ସହଯୋଗ କରିବା ପରିବର୍ତ୍ତେ ମନ୍ତ୍ରୀ ବିଭୂତି ଜେନାଙ୍କ ସହ ବ୍ୟକ୍ତିଗତ ମତଭେଦକୁ ନେଇ ଆସ୍କା ବିଧାୟକ ଗୁଣ୍ଡାଗର୍ଦ୍ଦି କରିବା ଅତ୍ୟନ୍ତ ନିନ୍ଦନୀୟ । ଏହି ଅଶୋଭନୀୟ ଆଚରଣ ପାଇଁ ବିଧାୟକଙ୍କ ନାଁରେ ଆସିକା ଥାନାରେ ସରକାରୀ ଅଧିକାରୀ ଶ୍ରୀ ଜେନା କରିଥିବା ଏତଲାର ନିରପେକ୍ଷ ତଦନ୍ତ କରାଯାଉ । ଯଦି ବିଧାୟକ ଦୋଷୀ ପ୍ରମାଣିତ ହୁଅନ୍ତି, ତେବେ ଆଇନ ଅନୁଯାୟୀ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବି କରାଯାଇଛି ।
