ଓଡ଼ିଆଙ୍କୁ ଛିଗୁଲେଇଲେ ରଘୁବରଙ୍କ ପୁଅ!

ଭୁୁବନେଶ୍ୱର: ଓଡ଼ିଶାର ପୂର୍ବତନ ରାଜ୍ୟପାଳ ରଘୁବର ଦାସ ଏବଂ ତାଙ୍କ ପରିବାର ସଦସ୍ୟଙ୍କର ପୁରୀ ବଡ଼ଦାଣ୍ଡରେ ତିନି ରଥ ସାମନାରେ ଉଠାଇଥିବା କିଛି ଫଟୋ ସୋସିଆଲ୍ ମିଡିଆରେ ଦେଖିବାକୁ ମିଳିଛି । ଗତକାଲି ପବିତ୍ର ରଥଯାତ୍ରା ଅବସରରେ ଏହି ଫଟୋ ନିଜ ଫେସବୁକ୍ ଆକାଉଣ୍ଟରେ ଛାଡ଼ିଛନ୍ତି ରଘୁବର ଦାସଙ୍କ ପୁଅ ଲଳିତ ଦାସ । ଗୋଟେ ଫଟୋରେ ଲଳିତ ନାଲି ଜ୍ୟାକେଟ୍ ପିନ୍ଧି ରଥ ସାମନାରେ ଛିଡ଼ା ହୋଇଛନ୍ତି । ନିଜ ଫେସ୍ ବୁକ୍ ରେ ଏହି ଫଟୋ ଛାଡ଼ି ସେ ଓଡ଼ିଶାବାସୀଙ୍କୁ ତାଙ୍କ ନିଜ କଥା ମନେ ପକାଇଦେଇଛନ୍ତି ।

ଠିକ୍ ଦୁଇବର୍ଷ ତଳେ ଏହି ବାବୁଙ୍କର କାରନାମା ଦାଣ୍ଡରେ ପଡ଼ି ହାଟରେ ଗଡ଼ିଥିଲା । ସେ ଥିଲା ୨୦୨୪ ଜୁଲାଇ ରଥଯାତ୍ରା ସମୟର କଥା । ଆମର ରାଜ୍ୟପାଳ ଥିଲେ ତାଙ୍କ ବାପା ଝାଡ଼ଖଣ୍ଡର ପୂର୍ବତନ ମୁଖ୍ୟମନ୍ତ୍ରୀ ରଘୁବର ଦାସ । ପୁରୀ ରଥଯାତ୍ରା ଦେଖିବାକୁ ଆସିଥିବା ଲଳିତଙ୍କ ବିରୋଧରେ ସାଂଘାତିକ ଅଭିଯୋଗ ଆସିଥିଲା । ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ଗସ୍ତ ପାଇଁ ପୁରୀ ରାଜଭବନ ଇନଚାର୍ଜ ଡ୍ୟୁଟି କରୁଥିବା ଆସିଷ୍ଟାଣ୍ଟ ସେକ୍ସନ ଅଫିସର(ଏଏସଓ) ବୈକୁଣ୍ଠ ପ୍ରଧାନଙ୍କୁ ସେ ତାଙ୍କର ବନ୍ଧୁମାନଙ୍କ ସହ ପିଟି ଲହୁଲୁହାଣ କରିଥିଲେ ।

ବୈକୁଣ୍ଠଙ୍କର ଭୁଲ୍ ଥିଲା ଯେ ରାଜ୍ୟପାଳଙ୍କ ପୁଅ ଲଳିତ, ତାଙ୍କର ଦୁଇବନ୍ଧୁ, ଦୁଇ ପିଏସଓ ଏବଂ ରାଜ୍ୟପାଳଙ୍କ ରୋଷେୟାଙ୍କୁ ଷ୍ଟେସନରୁ ସେଠାକୁ ଆଣିବା ପାଇଁ ଗୋଟେ ଧଇଁଆ ଗାଡ଼ିର ବ୍ୟବସ୍ଥା କରିଥିଲେ । ଦାମୀ ଗାଡ଼ି ପଠାଇ ନ ଥିବାରୁ ରାଜ୍ୟପାଳଙ୍କ ପୁଅ ଭୀଷଣ ରାଗିଗଲେ । ପିଟିଲେ ତ ପିଟିଲେ, ଜୋତାରେ ଛେପ ପକାଇ ବୈକୁଣ୍ଠଙ୍କୁ ଚଟେଇଥିଲେ ।

୨୦୨୪ ଜୁଲାଇ ୭ରେ ଘଟଣା ଘଟିଥିଲା । ରାଜ୍ୟପାଳ ପୁଅଙ୍କ ମାଡ଼ମରା ଘଟଣା ସମ୍ପର୍କରେ ପରଦିନ ଅର୍ଥାତ ୮ ତାରିଖରେ ବୈକୁଣ୍ଠ ରାଜ୍ୟପାଳଙ୍କ ପ୍ରମୁଖ ସଚିବଙ୍କୁ ଜଣାଇ ନ୍ୟାୟ ଭିକ୍ଷା କରିଥିଲେ । ପରେ ଏ ନେଇ ତାଙ୍କ ପତ୍ନୀ ସାୟୋଜି ପ୍ରଧାନ ପୁରୀ ସମୁଦ୍ରକୂଳ ଥାନାରେ ଏତଲା ଦେଇଥିଲେ । ମାତ୍ର ପୁଲିସ ଏହାକୁ ଗ୍ରହଣ କଲାନାହିଁ । ଏଏସଓ ସଂଘର ଅଭିଯୋଗକ୍ରମେ ରାଜ୍ୟ ସଚିବାଳୟ ସେବା ସଂଘ ଘଟଣାରେ ହସ୍ତକ୍ଷେପ କରିବା ପରେ ସମୁଦ୍ରକୂଳ ଥାନା ମାମଲାକୁ ପଞ୍ଜୀକରଣ କରିଥିଲା । ମାତ୍ର ଅଭିଯୁକ୍ତଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କଲାନାହିଁ । ଓଡ଼ିଆ ଅଫିସରଙ୍କୁ ମାଡ଼ ମାରି ଜୋତାରେ ଛେପ ଚଟାଇଥିବା ଅଣଓଡ଼ିଆ ବ୍ୟକ୍ତିଙ୍କୁ ସୁରକ୍ଷା ଦିଆଗଲା ।

ଓଡ଼ିଆ ଅସ୍ମିତାର ନାରା ଦେଇ ସରକାରକୁ ଆସିଥିବା ବିଜେପିର ଏହା କି ପ୍ରକାର ଓଡ଼ିଆ ଅସ୍ମିତା ବୋଲି ପ୍ରବଳ ସମାଲୋଚନା ହେଲା । ବିରୋଧୀ ଦଳ ଏହି ପ୍ରସଙ୍ଗକୁ ନେଇ ବିଧାନସଭା ହୁଲସ୍ତୁଲ କରିଥିଲେ । ଘଟଣାର ତଦନ୍ତ ପାଇଁ ପୁରୀ ଜିଲ୍ଲାପାଳଙ୍କୁ ନିର୍ଦ୍ଦେଶ ଦିଆଯାଇଛି ଏବଂ ୧୫ ଦିନ ଭିତରେ ଜିଲ୍ଲାପାଳ ରିପୋର୍ଟ ଦେଲା ପରେ କାର୍ଯ୍ୟାନୁଷ୍ଠାନ ହେବ ବୋଲି ଆଇନମନ୍ତ୍ରୀ ପୃଥ୍ୱୀରାଜ ହରିଚନ୍ଦନ ସଫେଇ ଦେଇଥିଲେ ।

ମାତ୍ର ଦୁଇବର୍ଷ ବିତିଗଲା ପଛେ କିଛି ହେଲା ନାହିଁ । ରଘୁବର ଦାସଙ୍କ ପୁଅ ଦେହରେ ହାତ ମାରିବାକୁ ମୋହନ ସରକାର ସାହାସ କଲେ ନାହିଁ । ସରକାରକୁ ଆସୁ ଆସୁ ଓଡ଼ିଆ ଅସ୍ମିତାକୁ ଚୂଲିକି ଠେଲିଦେଲେ । ଓଡ଼ିଶାର ପବିତ୍ର ମାଟି ପୁଣି ବଡ଼ଦାଣ୍ଡରେ ବଡ଼ଠାକୁରଙ୍କ ରଥ ସାମନାରେ ଛିଡ଼ା ହୋଇ ଲଳିତ ଫେସବୁକ ରେ ଛାଡ଼ିଥିବା ଫଟୋ ଓଡ଼ିଆଙ୍କୁ ଛିଗୁଲାଇଲା ଭଳି ହୋଇଛି ।