ଭୁବନେଶ୍ୱର: ଏବର୍ଷ ରାଜ୍ୟ ସରକାରଙ୍କ ପଖାଳ ଖିଆରେ ଦେଢ଼ କୋଟି(୮୫ ଲକ୍ଷ ନୁହେଁ)ରୁ ଅଧିକ ଟଙ୍କା ଖର୍ଚ୍ଚ ହୋଇଛି । ଓଡ଼ିଆଙ୍କ ପ୍ରିୟ ପଖାଳ ପ୍ରସ୍ତୁତ କରିବାକୁ ଅଣଓଡ଼ିଆ ରୋଷେୟାଙ୍କୁ ବିମାନରେ ଆଣି ଷ୍ଟାର୍ ହୋଟେଲରେ ରଖାଯାଇଥିଲା । ପଖାଳ ସାଙ୍ଗରେ ଆଳୁ ଚକଟାରେ କଞ୍ଚାଲଙ୍କା, ପିଆଜ, ରସୁଣ ଦଳାଦଳି ଆଉ ଲୁଣି ଶୁଖୁଆ ସୁନ୍ଦର ହୋଇଥିଲେ ମଧ୍ୟ ୨୦ରୁ ଅଧିକ ବ୍ୟଞ୍ଜନ ପ୍ରସ୍ତୁତ କରାଯାଇଥିଲା । ତଳେ ଚକାମୁଣ୍ଡ ପକାଇ ପକାଳ ଖାଇବାର ମଜା ରହିଥିଲା ବେଳେ ଏଠି ଫାଇଭ୍ ଷ୍ଟାର ହୋଟେଲ୍ ସଜ୍ଜାରେ ସୁଦୃଶ୍ୟ ଡାଇନିଂ ଟେବୁଲରେ ଭିଭିଆଇପି ଓ ଚେଲାଚାମଣ୍ଡାମାନଙ୍କର ପଖାଳ ଖିଆ ହେଲା ।
ଏସବୁ କରିବା ପଛରେ ରାଜ୍ୟ ସରକାରଙ୍କର କୁଆଡ଼େ ମହତ୍ ଉଦ୍ଦେଶ୍ୟ ଥିଲା । ସେହି ମହତ୍ ଉଦ୍ଦେଶ୍ୟ ହେଉଛି, ଓଡ଼ିଆ ଅସ୍ମିତାର ପ୍ରତୀକ ‘ପଖାଳ’ କୁ ବିଶ୍ୱସ୍ତରକୁ ନେବା । ଗିନିଜ୍ ୱାର୍ଲଡ୍ ବୁକ୍ ରେ ସ୍ଥାନ ଦେବା । ପଖାଳକୁ ତା’ର ମୌଳିକ ରୂପରେ ପ୍ରଦର୍ଶିତ କରିଥିଲେ ଆମ ଓଡ଼ିଆ ଛୋଟ ହୋଇଯାଇଥାନ୍ତେ । ଓଡ଼ିଶାର ଗରିବୀକୁ ପ୍ରଚଣ୍ଡ ପ୍ରହାର ବାଜିଥାନ୍ତା । ଆମ ଓଡ଼ିଆଙ୍କୁ ଗରିବ କହି ବିଶ୍ୱବାସୀ ଛି ଛାକର କରିଥାନ୍ତେ । ତେଣୁ ବିଶ୍ୱସ୍ତରରେ ଓଡ଼ିଆ ଅସ୍ମିତାର ଟେକ ରଖିବା ପାଇଁ ଏହି ପ୍ରୟାସ କରାଯାଇଛି ।
ଉପମୁଖ୍ୟମନ୍ତ୍ରୀ ତଥା ପର୍ଯ୍ୟଟନ ମନ୍ତ୍ରୀ ଶ୍ରୀମତୀ ପ୍ରଭାତୀ ପରିଡ଼ା ଆଜି ତାଙ୍କ ଭାଷାରେ ଏଭଳି ସଫେଇ ଦେଇଛନ୍ତି । ସାମ୍ବାଦିକମାନେ ପଖାଳ ଖର୍ଚ୍ଚ କୁ ନେଇ ପ୍ରଶ୍ନ କରିବାରୁ ମ୍ୟାଡାମ୍ କହିଛନ୍ତି- ଯେତେବେଳେ ଗିନିଜ୍ ବୁକ୍ ରେ ରେକର୍ଡ କରିବାର ଥାଏ, ତାକୁ ସେଭଳି ଢ଼ଙ୍ଗରେ ପ୍ରସ୍ତୁତ କରାଯାଏ । ଏହା ଠିକ୍ ଯେ ପଖାଳକୁ ଗରିବର ଖାଦ୍ୟ ବୋଲି ଧରାଯାଏ । କିନ୍ତୁ ଯେତେବେଳେ ଏହାକୁ ବିଶ୍ୱରେ ପ୍ରଦର୍ଶିତ କରାଯିବ, ୧୦ଟି ଦେଶରେ ହେବ, ଯଦି ଆମେ ବ୍ୟାପକ ବ୍ୟବସ୍ଥା କରିବାନି, କ’ଣ ପୁଣି ଗରିବ ହୋଇ ଫେରି ଆସିବା?
ସୂଚନାଥାଉକି, ରାଜ୍ୟ ସରକାରଙ୍କ ଆୟୋଜିତ ଚଳିତବର୍ଷ ମାର୍ଚ୍ଚ ୨୦ ପଖାଳ ଦିବସ(ପରବ) ପାଳନରେ ଖର୍ଚ୍ଚ ହୋଇଛି ୧ କୋଟି ୫୪ ଲକ୍ଷ ଟଙ୍କା । ଆୟୋଜନର ଦାୟିତ୍ୱ ନେଇଥିବା କଲର୍ ପ୍ଲସ୍ ସଂସ୍ଥାକୁ ଇଭେଣ୍ଟ ମ୍ୟାନେଜମେଣ୍ଟ ବାବଦରେ ପୈଠ ହୋଇଛି ୮୫ ଲକ୍ଷ ୬୬ ହଜାର ୯୯୪ ଟଙ୍କା । ସେଥିମଧ୍ୟରେ କାର୍ଯ୍ୟକ୍ରମର ସମ୍ପାଦନ ଏବଂ ପରିଚାଳନା ପାଇଁ ୭୭ ଲକ୍ଷ ୮୮ ହଜାର ୧୭୭ ଟଙ୍କା ବିଲ୍ ହୋଇଥିବା ବେଳେ ସୁପରିଭିଜନ ବାବଦରେ ୬ ଲକ୍ଷ ୬୦ ହଜାର ୧୫ ଟଙ୍କା ବିଲ୍ ହୋଇଛି ।
ଅନ୍ୟ ଏକ ବିଲ୍ ରେ ପୈଠ ହୋଇଛି ୬୮ ଲକ୍ଷ ୩୬ ହଜାର ୯୪୬ ଟଙ୍କା । ଏଥିରେ ବି ସୁପରଭିଜନ ଖର୍ଚ୍ଚ ପଡ଼ିଛି ୪ ଲକ୍ଷ ୭୬ ହଜାର ୫୧୨ ଟଙ୍କା । ଏହି ବିଲ୍ ରେ ରହିଛି ଅଫିସିଆଲ୍ ଏବଂ ଅତିଥିମାନଙ୍କ ହୋଟେଲ ରହଣୀ ଖର୍ଚ୍ଚ ୧ ଲକ୍ଷ ୯୯ ହଜାର ୨୮୫ ଟଙ୍କା, ହୋଟେଲରେ ଖାଇବା ଖର୍ଚ୍ଚ ୯ ଲକ୍ଷ ୪୪ ହଜାର ୫୫ ଟଙ୍କା, ପାନ୍ଥନିବାସରେ ରହିବା ଓ ଖାଇବା ବାବଦ ୯ ଲକ୍ଷ ୪୩ ହଜାର ୩୮୩ ଟଙ୍କା, ଗିନିଜ୍ ୱାଲର୍ଡ ବୁକ୍ ଫି ବାବଦ ୩୧ ଲକ୍ଷ ୩୫ ହଜାର ୭୪୮ ଟଙ୍କା, ମେମୋଣ୍ଟୋ, ୱେଷ୍ଟକୋର୍ଟ ଏବଂ ଅନ୍ୟାନ୍ୟ ଖର୍ଚ୍ଚ ୭ ଲକ୍ଷ ୫୯ ହଜାର ୪୮୩ ଟଙ୍କା ଏବଂ ଅଫିସରମାନଙ୍କ ବିମାନ ଖର୍ଚ୍ଚ ୨ ଲକ୍ଷ ୯୨ ହଜାର ୭୦୮ ଟଙ୍କା ।
