ପାଣ୍ଡିଆନ୍ ସତ, ଆଉ ସବୁ ମିଛ!!

ଭୁୁବନେଶ୍ୱର: ନବୀନ ପଟ୍ଟନାୟକ ସୁସ୍ଥ ହୋଇ ହସ୍ପିଟାଲରୁ ଫେରିଲେ । ତାଙ୍କ ପାଇଁ ସମସ୍ତେ ଖୁସି । ସେ ଶତାୟୁ ହୁଅନ୍ତୁ, ଏହା ସମସ୍ତଙ୍କର କାମ୍ୟ । ଗତକାଲି ରାତିରେ ସମ୍ମମ୍ ଅଲ୍ଟିମେଟ୍ ରୁ ଡିସଚାର୍ଜ ହେବା ଏବଂ ନବୀନ ନିବାସ ଆସିବା ବେଳର ଭିଡିଓ ବର୍ତ୍ତମାନ ସୋସିଆଲ୍ ମିଡିଆରେ ଛାଇ ଗଲାଣି । ରୋଚକ କଥା ହେଉଛି, ଏହି ଭିଡିଓରେ ନବୀନ ବାବୁଙ୍କ ଉପରେ ଲୋକଙ୍କର ଆଖି ଲାଖି ରହୁନି । ଆଖି ଲାଖୁଛି, ପାଣ୍ଡିଆନଙ୍କ ଉପରେ । ପାଣ୍ଡିଆନଙ୍କ ହାତ ଧରି ନବୀନ ବାବୁ ହସ୍ପିଟାଲରୁ ବାହାରୁଛନ୍ତି । ଖୁସି ମନରେ ତାଙ୍କ ସହ ଗପି ଗପି ଆସୁଛନ୍ତି । ଟିକେ ବାହାରକୁ ଆସିଲା ପରେ ସ୍ୱାଗତ ପାଇଁ ଅପେକ୍ଷାରତ ନେତାଙ୍କ ମଧ୍ୟରେ କେବଳ ବବି ଦାସଙ୍କୁ ମୁହୂର୍ତ୍ତକ ପାଇଁ ଯାହା ଦେଖିବାକୁ ମିଳୁଛି ।

ନବୀନ ନିବାସ/ବିଜେଡି ଆଇଟି ସେଲ୍ ରୁ ଜାରି ଏହି ଭିଡିଓରେ କି ବାର୍ତ୍ତା ଦିଆଯାଇଛି ତାହା ବୁଝାଇ କହିବାର ଆବଶ୍ୟକତା ନାହିଁ । ସରଳ ଭାଷାରେ ଏହି ବାର୍ତ୍ତାର ଅର୍ଥ ହେଉଛି, ନବୀନଙ୍କର ଏକମାତ୍ର ଭରସା ପାଣ୍ଡିଆନ୍ । ଯେତେ ବିପଦ ଆସୁ ନା କାହିଁକି ପାଣ୍ଡିଆନଙ୍କ ହାତ ଛାଡ଼ିବାର ନାହିଁ । ତେଣିକି ଯାହା ବି ହୋଇଯାଉ!!

ଖାସ୍ କରି ଭିଡିଓଟି ବିଜେଡିରେ ପାଣ୍ଡିଆନ୍ ବିରୋଧୀ ନେତାଙ୍କ ପାଇଁ ଉଦ୍ଦିଷ୍ଟ ବୋଲି କୁହାଯାଉଛି । ଏହି ଭିଡିଓ ଜରିଆରେ ନବୀନ ନିବାସରୁ ଏକ ପ୍ରକାର ଚେତାବନୀ ଦିଆଯାଇଛି ବୋଲି କୁହାଯାଇପାରିବ । ସେହି ଚେତାବନୀ ହେଉଛି- ବିଜେଡିରେ ନବୀନ ପଟ୍ଟନାୟକ ଯେମିତି ସତ୍ୟ, ଭି.କେ ପାଣ୍ଡିଆନ୍ ମଧ୍ୟ ସେମିତି ସତ୍ୟ । ଏହି ସତ୍ୟକୁ ସମସ୍ତେ ଗ୍ରହଣ କରିବାକୁ ବାଧ୍ୟ । ଯିଏ ଗ୍ରହଣ କରୁନାହାନ୍ତି, ଦଳ ଛାଡ଼ି ପଳାଅ ।

ଚର୍ଚ୍ଚା ଅନୁଯାୟୀ, ନବୀନ ପଟ୍ଟନାୟକ ଅସୁସ୍ଥ ହୋଇ ଏଠା ହସ୍ପିଟାଲରେ ଭର୍ତ୍ତି ହେବାରେ ସବୁଠାରୁ ବେଶୀ ଫାଇଦା ହୋଇଛି ପାଣ୍ଡିଆନଙ୍କର । କାରଣ ଦୀର୍ଘ ମାସ ହେଲା ସେ ନବୀନ ନିବାସରେ ଆତ୍ମଗୋପନ ଅବସ୍ଥାରେ ଥିଲେ । ବିଜେଡିର ପରାଜୟ ଯୋଗୁଁ ନେତା ଓ କର୍ମୀଙ୍କ ଆକ୍ରୋଶର ସାମନା କରିବାକୁ ତାଙ୍କର ସାହାସ ନ ଥିଲା । ଦଳ ସହିତ ପାଣ୍ଡିଆନଙ୍କର ଆଉ କୌଣସି ସମ୍ପର୍କ ନାହିଁ କହି ନିଜେ ନବୀନ ବାବୁ ତାଙ୍କୁ ଘଣ୍ଟ ଘୋଡ଼ାଇ ରଖିଥିଲେ । ଯଦିଓ ବିଜେଡିର ସବୁ କାର୍ଯ୍ୟ ଉପରେ ତାଙ୍କ ନିୟନ୍ତ୍ରଣ ଜାରି ରହିଛି ।

ପାଣ୍ଡିଆନଙ୍କର ଫାଇଦା ଏୟା ଯେ ନବୀନ ନିବାସରୁ ସେ ପଦାକୁ ବାହାରିଛନ୍ତି । ନବୀନଙ୍କ ପାଖେ ପାଖେ ରହି ଏବଂ ନବୀନଙ୍କ ସହ ହାତ ଧରାଧରିର ଭିଡିଓ ଜରିଆରେ ପୁଣି ଥରେ ନିଜର ଔକାତ୍ ଦେଖାଇଛନ୍ତି । ନବୀନଙ୍କ ଇଚ୍ଛାରେ ବିଜେଡିର ସେ ହିଁ ସର୍ବମୟ କର୍ତ୍ତା ବୋଲି ଦୃଢ଼ ବାର୍ତ୍ତା ଦେଇଛନ୍ତି । ଏହା ପରେ ବିଜେଡି ଅସନ୍ତୁଷ୍ଟ ଶିବିରରୁ ଏ ପର୍ଯ୍ୟନ୍ତ କାହାର ପ୍ରତିକ୍ରିୟା ଆସିନାହିଁ । ଗଣମାଧ୍ୟମକୁ ଆସି ପାଣ୍ଡିଆନଙ୍କ ବିରୋଧରେ କହିବାକୁ କାହାରି ସାହାସ ନାହିଁ ।

୧୭ ତାରିଖ ସଂଧ୍ୟାରେ ସମ୍ମମ୍ ହସ୍ପିଟାଲରେ ନବୀନ ବାବୁ ଭର୍ତ୍ତି ହେବା ପରେ ବିଜେଡିର ଆଗଧାଡ଼ିର ନେତାମାନେ ତାଙ୍କୁ ଦେଖିବାକୁ ଲାଇନ୍ ଲଗାଇଥିଲେ । ମାତ୍ର ସେ ଚିକିତ୍ସିତ ହେଉଥିବା ତୃତୀୟ ମହଲା ଆଇସିୟୁକୁ କାହାରିକୁ ଛଡ଼ା ଯାଇ ନ ଥିଲା । କେବଳ ନବୀନଙ୍କ ପାଖରେ ରହି ତାଙ୍କର ସବୁକଥା ବୁଝୁଥିଲେ ପାଣ୍ଡିଆନ୍ ଏବଂ ପତ୍ନୀ ସୁଜାତା ।

ସେଦିନ ରାତିରେ ବିଜେଡିର ବରିଷ୍ଠ ନେତା ରଣେନ୍ଦ୍ର ପ୍ରତାପ ସ୍ୱାଇଁ ଏବଂ ପାଣ୍ଡିଆନଙ୍କ ମଧ୍ୟରେ ଉଚ୍ଚବାଚ ହୋଇଥିବା ଏକ ଖବରକାଗଜରେ ବାହାରିଥିଲା । ନବୀନଙ୍କ ସ୍ୱାସ୍ଥ୍ୟାବସ୍ଥା ବୁଝିବାକୁ ଯାଇଥିବା ନେତାମାନଙ୍କୁ ପାଣ୍ଡିଆନ୍ ଅଟକାଉଥିଲେ ବୋଲି ଏଥିରେ ପ୍ରକାଶ ପାଇଥିଲା । ଏପରିକି ସ୍ୱାସ୍ଥ୍ୟମନ୍ତ୍ରୀ, ଆଇନମନ୍ତ୍ରୀ ଏବଂ ଏକାମ୍ର ବିଧାୟକ ବାବୁ ସିଂଙ୍କ ବାଟ ଜଗିଥିଲେ ବୋଲି ପ୍ରଚାର ହେଲା । ପିସିସି ସଭାପତି ଭକ୍ତ ଚରଣ ଦାସଙ୍କୁ ପାଣ୍ଡିଆନ୍ ଦୁର୍ବ୍ୟବହାର କଲେ ବୋଲି କୁହାଗଲା ।

ମାତ୍ର ଏହି ଖବରକୁ ପିସିସି ସଭାପତି ଏବଂ ଏକାମ୍ର ବିଧାୟକ ଖଣ୍ଡନ କରିଥିଲେ । ପାଣ୍ଡିଆନ୍ ସେମାନଙ୍କୁ ଅଟକାଇ ନ ଥିଲେ କି ଦୁର୍ବ୍ୟବହାର କରି ନ ଥିଲେ ବୋଲି ସେମାନେ ଗଣମାଧ୍ୟମକୁ ପ୍ରତିକ୍ରିୟା ଦେଇଥିଲେ । ମାତ୍ର ଖବରରେ ଯାହାର ଅସନ୍ତୋଷ ଏବଂ ରାଗକୁ ବ୍ୟକ୍ତ କରାଯାଇଥିଲା, ସେହି ରଣେନ୍ଦ୍ର ପ୍ରତାପ ଓରଫ୍ ରାଜା ସ୍ୱାଇଁ କିନ୍ତୁ ଏ ପର୍ଯ୍ୟନ୍ତ ପାଟି ଖୋଲିନାହାନ୍ତି । ଖବରକୁ ନେଇ କୌଣସି ପ୍ରତିକ୍ରିୟା ଦେଇନାହାନ୍ତି ।

ସାରା ରାଜ୍ୟରେ ଏହି ଖବରଟି ଚର୍ଚ୍ଚାର ବିଷୟ ହୋଇଥିଲା ବେଳେ ରାଜା ସ୍ୱାଇଁଙ୍କ ନିରବତା ବିଜେଡିର ଭବିଷ୍ୟତକୁ ନେଇ କରାଯାଉଥିବା ଆକଳନ ଉପରେ ପ୍ରଶ୍ନ ଚିହ୍ନ ଲଗାଇଛି । ରାଜନୈତିକ ପର୍ଯ୍ୟବେକ୍ଷକ ମହଲର ମତ ଅନୁଯାୟୀ, ବିଜେଡିରେ ଅନେକ ଦକ୍ଷ ନେତା ଥିଲେ ମଧ୍ୟ ନବୀନଙ୍କ ଇଚ୍ଛା ବିରୋଧରେ ଯାଇ ଅର୍ଥାତ୍ ପାଣ୍ଡିଆନଙ୍କ ବିରୋଧରେ ଖୋଲାଖୋଲି ବିଦ୍ରୋହ କରିବାର ତାକତ୍ ନାହିଁ । ପ୍ରଭାତ ତ୍ରିପାଠୀ, ଅମର ଶତପଥୀଙ୍କ ଭଳି ହାତଗଣତି ନେତା ପାଟି ଖୋଲିଥିଲେ ମଧ୍ୟ ଉଦେ୍ଦଶ୍ୟରେ ସଫଳ ହୋଇନାହାନ୍ତି ।

ବର୍ତ୍ତମାନର ପରିପ୍ରେକ୍ଷୀରେ ବିଜେଡି ଭାଙ୍ଗିଯିବାର ଆକଳନ କରିବା ନିରର୍ଥକ ବୋଲି ରାଜନୈତିକ ବିଶେଷଜ୍ଞମାନେ କହିଛନ୍ତି । କାରଣ ଯେଉଁମାନେ ବିଦ୍ରୋହ କରିବେ ସେମାନେ ଯିବେ କୁଆଡ଼େ? ରାଜ୍ୟ ବିଜେପିର ଯେଉଁ ଅବସ୍ଥା ସେଠାକୁ ଗଲେ ମହରଗରୁ ଯାଇ କାନ୍ତାରରେ ପଡ଼ିବା ଅବସ୍ଥା ହେବ । ଗୁରୁତପୂର୍ଣ୍ଣ ଶୁଣାକଥାଟି ହେଉଛି, ବିଜେଡିରୁ କୌଣସି ନେତାଙ୍କୁ ବିଜେପି ଗ୍ରହଣ କରିବ ନାହିଁ । ଏହାକୁ ନେଇ କୁଆଡ଼େ ଗୋପନରେ ସହମତି ହୋଇଛି । ଏହା ସତ ହୋଇଥିଲେ ବିଜେଡି ନେତାଙ୍କ ପାଇଁ ବିଜେପି ଦ୍ୱାର ବନ୍ଦ ।

ବାକି ରହିଲା, କଂଗ୍ରେସ । ରାଜ୍ୟ କଂଗ୍ରେସ ଏବେ ଚଳଚଞ୍ଚଳ ହୋଇଛି ଏବଂ ଲୋକଙ୍କ ମନକୁ ଛୁୂଇଁବା ଆରମ୍ଭ କରିଛି । ତେବେ ସାଂଗଠନିକ ଦୃଷ୍ଟିରୁ ଦଳ ସଶକ୍ତ ହେବାକୁ ଆହୁରି ସମୟ ଲାଗିବ । ଅଣ କଂଗ୍ରେସରେ ବିଶ୍ୱାସ ରଖି ଆସିଥିବା ନେତାଙ୍କୁ କଂଗ୍ରେସରେ ସୁଯୋଗ ମିଳିବା କିନ୍ତୁ କଷ୍ଟକର । ସୁତରାଂ କଂଗ୍ରେସରେ ନାମକରା ବିଜେଡି ନେତାଙ୍କୁ ସ୍ଥାନ ମିଳିବା ସମ୍ଭବ ନ ହୋଇପାରେ ।

ସବୁଠାରୁ ବଡ଼କଥା ହେଉଛି, ପାଣ୍ଠି । ବିଜେଡିର ପାଣ୍ଠି କାହା ପାଖରେ ଅଛି ସମସ୍ତେ ଜାଣନ୍ତି । ଯାହାଙ୍କ ହାତରେ ପାଣ୍ଠି ଚାବିକାଠି ସେ ହିଁ ଦଳକୁ ନିୟନ୍ତ୍ରଣ କରିବେ । ଦକ୍ଷତା ଥାଇ ପାଣ୍ଠି ନ ଥିଲେ କିଛି କରିହେବ ନାହିଁ । ତେଣୁ ବିଜେଡିରୁ କିଛି ନେତା ବାହାରି ବିକଳ୍ପ ମଞ୍ଚ କରିବାକୁ ହେଲେ ପାଣ୍ଠି ସମସ୍ୟା ରହିବ ।

ଅନ୍ୟପକ୍ଷରେ, ବିଜୟ ମହାପାତ୍ର/ଦିଲ୍ଲୀପ ରାୟଙ୍କ ନେତୃତ୍ୱରେ ଏକ ନୂତନ ଆଞ୍ଚଳିକ ଦଳ ଗଠନ କଥା ବେଳେ ବେଳେ ଚର୍ଚ୍ଚା ହେଉଛି । ମାତ୍ର ବିଜେଡିର ଏକ ଗୋଷ୍ଠୀ ଯେ ସେମାନଙ୍କ ସହ ସାମିଲ ହେବେ ତାହା ସମ୍ଭବ ଲାଗୁନି । କାରଣ ପ୍ରସ୍ତାବିତ ନୂତନ ଆଞ୍ଚଳିକ ଦଳରେ ନେତୃତ୍ୱ, ବିଶ୍ୱନୀୟତା, ଗ୍ରହଣୀୟତା ଏବଂ ସ୍ଥାୟିତ୍ୱକୁ ନେଇ ଅନେକ ପ୍ରଶ୍ନ ରହିଛି ।

ସୁତରାଂ ନବୀନ ପଟ୍ଟନାୟକଙ୍କ ଇଚ୍ଛା, ଆଶୀର୍ବାଦ ଏବଂ ପାଣ୍ଠି ଥିବା ଯାଏଁ ପାଣ୍ଡିଆନ୍ ବିଜେଡିର ସର୍ବେସର୍ବା ହୋଇ ରହିବେ! ଓଡ଼ିଶାବାସୀ ତାଙ୍କୁ ଗ୍ରହଣ କରନ୍ତୁ ନ କରନ୍ତୁ ସେଥି ନେଇ ନବୀନ ବାବୁ ବି ବିଚଳିତ ନୁହଁନ୍ତି । ନବୀନ ବାବୁ ପାଣ୍ଡିଆନଙ୍କୁ ଛାଡ଼ିପାରିବେ ନାହିଁ କି ପାଣ୍ଡିଆନ୍ ସୁଯୋଗକୁ ହାତଛଡ଼ା କରିବା ଅବସ୍ଥାରେ ନାହାନ୍ତି । କ୍ଷମତା ପାଇବା ପାଇଁ ସବୁ ନିନ୍ଦା, ଅପବାଦକୁ ସମ୍ଭାଳିବାକୁ ସମ୍ଭବତଃ ପ୍ରସ୍ତୁତ ହୋଇସାରିଛନ୍ତି ।

ରାଜନୀତିରେ ଆଜି କଥା କାଲିକି ରହି ନ ପାରେ । ନୂଆ ନୂଆ ସମୀକରଣ ଆସେ । ବର୍ତ୍ତମାନ ବିଜେଡି-ବିଜେପି ଭିତିରି ସମ୍ପର୍କର କିଏ ସୂତ୍ରଧର ତାହା ରାଜନୀତିରେ ରୁଚି ରଖୁଥିବା ପ୍ରାୟ ସମସ୍ତଙ୍କୁ ଜଣା । ଆଗାମୀ ଦିନରେ ବିଜେପି-ବିଜେଡି ଏକାଠି ଲଢ଼ିଲେ ଆଶ୍ଚର୍ଯ୍ୟ ହେବାର ନାହିଁ କି ପାଣ୍ଡିଆନ ବଳୀୟାନ୍ ରହିଲେ ଆଶ୍ଚର୍ଯ୍ୟ ହେବାର ନାହିଁ ।