ଚିଠିରେ ଖେଳ କଲେ ନବୀନ

ଭୁବନେଶ୍ୱର: ସୀମା ପୁନଃ ନିର୍ଦ୍ଧାରଣ ବିଲ୍ କୁ ନେଇ ଜାତୀୟ ରାଜନୀତି ହଟଚମଟ ଥିବା ବେଳେ ବିଜେଡି ସୁପ୍ରିମୋ ନବୀନ ପଟ୍ଟନାୟକଙ୍କ ଭୂମିକା ସମସ୍ତଙ୍କର ଦୃଷ୍ଟି ଆକର୍ଷଣ କରିଛି । ଏଥିରେ ଓଡ଼ିଶା କ୍ଷତିଗ୍ରସ୍ତ ହେଉଥିବାରୁ ରାଜ୍ୟର ସ୍ୱାର୍ଥ ରକ୍ଷା ପାଇଁ ଗୋଟିଏ ପରେ ଗୋଟିଏ ଚିଠି ଲେଖି ଚାଲିଛନ୍ତି । ଗତକାଲି ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କୁ ଚିଠି ଲେଖି ବିଧାନସଭାରେ ସଂକଳ୍ପ ପାରିତ କରିବାକୁ ପରାମର୍ଶ ଦେଇଥିବା ବେଳେ ଆଜି ଏହି ପ୍ରସଙ୍ଗରେ ରାଜ୍ୟର ସବୁ ସାଂସଦମାନଙ୍କୁ ଚିଠି ଲେଖିଛନ୍ତି । କେନ୍ଦ୍ରରେ ଓଡ଼ିଶାର ଅଧିକାର ପାଇଁ ସଂସଦ ଭିତରେ ଓ ବାହାରେ ସ୍ୱର ଉଠାଇବାକୁ ଅନୁରୋଧ କରିଛନ୍ତି ।

ଉଭୟ ରାଜ୍ୟ ଓ ଦେଶର ସ୍ୱାର୍ଥ ସମ୍ବଳିତ ଏତେ ବଡ଼ ପ୍ରସଙ୍ଗରେ ମୋଦୀ ସରକାରଙ୍କ ପଦକ୍ଷେପକୁ ବିରୋଧ କରିବା ନବୀନ ପଟ୍ଟନାୟକଙ୍କ ପାଇଁ ପ୍ରଥମ ବୋଲି କୁହାଯାଉଛି । ଗୁରୁତ୍ୱପୂର୍ଣ୍ଣ କଥା ହେଲା, ନବୀନ ପଟ୍ଟନାୟକଙ୍କର ସରକାର ନାହିଁ । ଲୋକସଭାରେ ବିଜେଡିର ଜଣେ ବି ସାଂସଦ ନାହାନ୍ତି । ଅଥଚ ଓଡ଼ିଶାର ସ୍ୱରକୁ ନବୀନ ବାବୁ ତାଙ୍କ ଚିଠି ମାଧ୍ୟମରେ ସାରା ଭାରତବର୍ଷରେ ପହଞ୍ଚାଇବାରେ ସଫଳ ହୋଇଛନ୍ତି । ଏହା ତାଙ୍କର ବ୍ୟକ୍ତିତ୍ୱ ଓ ନେତୃତ୍ୱର ଆକର୍ଷଣ ବୋଲି ରାଜନୈତିକ ପର୍ଯ୍ୟବେକ୍ଷକ ମହଲରେ ଆଲୋଚନା ହେଉଛି ।

ନବୀନ ତାଙ୍କ ଚିଠିରେ ମହିଳା ସଂରକ୍ଷଣକୁ ସୀମା ନିର୍ଦ୍ଧାରଣଠାରୁ ଅଲଗା କରିବାକୁ କେନ୍ଦ୍ର ସରକାରଙ୍କୁ ପରାମର୍ଶ ଦେଇଛନ୍ତି । ମହିଳାଙ୍କୁ ସମ୍ମାନ ଓ ମହିଳାଙ୍କ ପାଇଁ ଆସନ ସଂରକ୍ଷଣରେ ବିଜେଡିର ଦୃଷ୍ଟିଭଙ୍ଗୀକୁ ସେ ପୁଣି ସ୍ପଷ୍ଟ କରିଛନ୍ତି । ବିଜେଡି ସବୁବେଳେ ଏହାକୁ ସମର୍ଥନ କରି ଆସିଛି । ମାତ୍ର ୧୩୧ ତମ ସଂଶୋଧନ ବିଲ୍ କୁ ନେଇ ସେ ଆପତ୍ତି ଉଠାଇଛନ୍ତି । ଏହାହେଲେ ଓଡ଼ିଶାର ରାଜନୈତିକ ପ୍ରତିନିଧିତ୍ୱ ଓ ଅର୍ଥନୈତିକ ସ୍ୱାର୍ଥ ଦୁର୍ବଳ ହୋଇଯିବ ବୋଲି ସେ ଯୁକ୍ତି ଦର୍ଶାଇଛନ୍ତି ।

ଲୋକସଭାରେ ବର୍ତ୍ତମାନ ୫୪୩ ଆସନରୁ ଓଡ଼ିଶାର ୨୧ଟି ଆସନ ଥିବାରୁ ପ୍ରତିନିଧିତ୍ୱ ହାର ରହିଛି ୩.୯% । ପ୍ରସ୍ତାବିତ ସମ୍ବିଧାନ ସଂଶୋଧନରେ ଓଡ଼ିଶାର ଆସନ ୨୯କୁ ବଢ଼ୁଥିବାରୁ ପ୍ରତିନିଧିତ୍ୱ ହାର ୩.୪% କୁ କମିବ । କ୍ଷତି ସହିବାକୁ ଥିବା ୬ ରାଜ୍ୟ ଭିତରେ ଓଡ଼ିଶା ରହିବ । ଏଥିରେ ଆମ ରାଜ୍ୟକୁ ପଏଣ୍ଟ ୫ କ୍ଷତି ସହିବାକୁ ହେବ । ନୂଆ ନିୟମରେ ଅଧିକ ଜନସଂଖ୍ୟା ଥିବା ରାଜ୍ୟ ଫାଇଦାରେ ରହିବେ । ଜନସଂଖ୍ୟା ନିୟନ୍ତ୍ରଣରେ ଉଦାହରଣ ସୃଷ୍ଟି କରିଥିବା ଓଡ଼ିଶା କେନ୍ଦ୍ରୀୟ ଅନୁଦାନ ଓ ପାଣ୍ଠି ପାଇବାରେ ଅବହେଳିତ ହେବ ।

ଓଡ଼ିଶା ଲୋକେ ଆପଣଙ୍କୁ ସଂସଦକୁ ପଠାଇଛନ୍ତି । ସୁତରାଂ ଓଡ଼ିଶାର ସ୍ୱାର୍ଥ ବିରୋଧୀ ଏହି କାର୍ଯ୍ୟ କରିବାକୁ ଆପଣମାନେ ଦିଅନ୍ତୁ ନାହିଁ ବୋଲି ସାଂସଦମାନଙ୍କୁ ପରାମର୍ଶ ଦେଇଛନ୍ତି ନବୀନ । ସେଥିରେ ଲେଖିଛନ୍ତି, ଜନସଂଖ୍ୟା ନିୟନ୍ତ୍ରଣ ଓ ମାନବ ସମ୍ବଳର ବିକାଶ ସତ୍ତ୍ୱେ ଓଡ଼ିଶା ଦଣ୍ଡିତ ନ ହେଉ । ରାଜ୍ୟର ଅର୍ଥନୈତିକ ଓ ରାଜନୈତିକ ସ୍ୱାର୍ଥକୁ ଆପଣମାନେ ସୁରକ୍ଷା ଦିଅନ୍ତୁ । କେନ୍ଦ୍ରରେ ଓଡ଼ିଶା ଅଧିକାର ପାଇଁ ସଂସଦ ଭିତରେ ଓ ବାହାରେ ସ୍ୱର ଉଠାନ୍ତୁ । ଏହା ନ ହେଲେ ସାଢ଼େ ୪ କୋଟି ଓଡ଼ିଆଙ୍କ ଆଶା, ଭବିଷ୍ୟତ ପିଢ଼ି ପ୍ରତି ବଡ଼ ଅନ୍ୟାୟ ହେବ ବୋଲି ନବୀନ ସତର୍କ କରାଇଛନ୍ତି ।

ନବୀନଙ୍କର ଚିଠିକୁ ନେଇ ବିଜେପି ପ୍ରତିକ୍ରିୟାଶୀଳ ହୋଇଛି । ଆଇନମନ୍ତ୍ରୀ ପୃଥ୍ୱାରାଜ ହରିଚନ୍ଦନ ଏବଂ ରାଜସ୍ୱମନ୍ତ୍ରୀ ସୁରେଶ ପୂଜାରୀ ପୃଥକ୍ ଭାବେ ଅତି କଠୋର ଭାଷାରେ ବିଜେଡି ସଭାପତିଙ୍କୁ ଟାର୍ଗେଟ୍ କରିଛନ୍ତି । ପାଞ୍ଚ ଥରର ମୁଖ୍ୟମନ୍ତ୍ରୀ ନବୀନ ବାବୁଙ୍କୁ ୧୩୧ ତମ ସଂଶୋଧନ ବିଲ୍ ଉପରେ ପାଠ ପଢ଼ାଇବାକୁ ଚେଷ୍ଟା କରିଛନ୍ତି ନବାଗତ ଶ୍ରୀ ହରିଚନ୍ଦନ । ସେହିଭଳି ଶ୍ରୀ ପୂଜାରୀ କହିଛନ୍ତି, ରାହୁଲ ଗାନ୍ଧୀଙ୍କ କଥାରେ ପଡି ନବୀନ ବାବୁ ବିଲ୍ କୁ ବିରୋଧ କରୁଛନ୍ତି । ପ୍ରସ୍ତାବ ଆସିବ ବୋଲି ଜାଣିବା ପୂର୍ବରୁ କଂଗ୍ରେସ କଥାରେ ସାମିଲ ହୋଇଛନ୍ତି । ଚୋରା ପୀରତି ଛାଡ଼ି ଯାହା କହିବା କଥା ଖୋଲାଖୋଲି କୁହନ୍ତୁ ବୋଲି ସେ ତାତ୍ସଲ୍ୟ କରିଛନ୍ତି ।