ଭୁବନେଶ୍ୱର(ମିଡ-ଡେ ଓଡ଼ିଶା): ରାଜ୍ୟ ବିଜେପିର ଅବସ୍ଥା ଆଗଠାରୁ ଆହୁରି ଶୋଚନୀୟ । ଏବେ ଯଦି ନିର୍ବାଚନ ହୁଏ ତେବେ ଅଧିକ ସିଟ୍ କଥା ଛାଡ, ୧୦ଟି ଯାକ ବିଧାନସଭା ସିଟ୍ ବଞ୍ଚାଇବା ବି ସମ୍ଭବ ନୁହେଁ । ବିଜେପିର ଜଣେ ନାମକରା ବରିଷ୍ଠ ନେତାଙ୍କ ଏହା ହେଉଛି କ୍ଷୋଭଭରା ବୟାନ । ତାଙ୍କର କହିବା କଥା, ଧର୍ମେନ୍ଦ୍ର ପ୍ରଧାନ ଦଳକୁ ଧ୍ୱଂସମୁଖୀ କରିଛନ୍ତି । ସଂଗଠନକୁ ନ ସଜାଡି ଖାଲି ନିଜ ପ୍ରଚାରରେ ଲାଗିଛନ୍ତି । କ୍ଷମତା ଓ ଅର୍ଥ ଅହଂକାରରେ ସିନିୟର୍ଙ୍କ ପ୍ରତି ସମ୍ମାନ ନାହିଁ କି ଜୁନିୟର୍ଙ୍କ ପ୍ରତି ସ୍ନେହ ଶ୍ରଦ୍ଧା ନାହିଁ । ପ୍ରବଳ ପ୍ରତାପୀ ଧର୍ମେନ୍ଦ୍ରଙ୍କ ହୁକୁମାତି ଦଳର ନେତା ଓ କର୍ମୀଙ୍କ ମନ ବଳ ଭାଙ୍ଗିଦେଇଛି । ଦୃଢ଼ ମନୋବଳ ବଦଳରେ ସମସ୍ତଙ୍କ ମନରେ ଭରିଛି ଭୟ ଓ ଆତଙ୍କ । ଏଭଳି ପରିସ୍ଥିତିରେ ଦଳ ଆଗକୁ ତ ବଢ଼ିବନି ବରଂ ନିର୍ବାଚନ ପରେ ପୁଣି ସାଇନ୍ ବୋର୍ଡ ପାର୍ଟି ହୋଇଯିବ ବୋଲି ରାଜ୍ୟ ବିଜେପିର ସେହି ଆଗଧାଡ଼ି ନେତା ନିଜ ମନଖୋଲି କହିଛନ୍ତି ।
ବ୍ୟାପକ ପ୍ରଚାର ଓ ପ୍ରସାରରେ ମାତିଥିବା ରାଜ୍ୟ ବିଜେପିର ଆସନ୍ନ ଦୁର୍ଗତି ପାଇଁ ଧର୍ମେନ୍ଦ୍ର ଓରଫ୍ ମୁକୁ ପ୍ରଧାନଙ୍କୁ ଖାଲି ସଂପୃକ୍ତ ସିନିୟର୍ ନେତା ନୁହଁନ୍ତି, ଦଳର ୯୦ ପ୍ରତିଶତ ନେତା ଓ କର୍ମୀ ଦାୟୀ କରୁଛନ୍ତି । ରାଜ୍ୟରେ ଦୁର୍ବଳ ବିଜେପି ସଂଗଠନକୁ ତୃଣମୂଳ ସ୍ତରରୁ ସୁଦୃଢ଼ କରିବା ଚେଷ୍ଟା ଛାଡ଼ି ମୁକୁ ନିଜ ପ୍ରଚାର ଓ ପ୍ରସାରରେ ମାତିଛନ୍ତି । ଦିଲ୍ଲୀର ଟାଣ ଚେର ଧରି ନିଜକୁ ନିଜେ ମୁଖ୍ୟମନ୍ତ୍ରୀ ସ୍ୱପ୍ନରେ ବିଭୋର ହୋଇଛନ୍ତି । ଅଜସ୍ର ପଇସା ଖର୍ଚ୍ଚ କରି ନିଜର ପ୍ରଚାର ଓ ପ୍ରସାର କଲେ ଲୋକେ ଭୋଟ ଦେଇ ତାଙ୍କୁ ମୁଖ୍ୟମନ୍ତ୍ରୀ କରିଦେବେ ବୋଲି ମୁକୁ ଭାବୁଛନ୍ତି । ଏହା ଦ୍ୱାରା ମୁକୁ ମରିଚିକା ପଛରେ ଗୋଡାଇ ନୟାନ୍ତ ହେବେ ସିନା ପାଣି ଟୋପେ ପାଇବେନି ବୋଲି ଦଳର ଅଧିକାଂଶ ନେତାଙ୍କ ମତ ।
ବସନ୍ତ ପଣ୍ଡାଙ୍କୁ ମୋହରା ବନାଇ ରାଜ୍ୟ ବିଜେପିରେ ମୁକୁ ଏକଚାଟିଆ ରାଜ୍ ଚଳାଇଛନ୍ତି । ବିଜୟ ମହାପାତ୍ର, କନକ ବର୍ଦ୍ଧନ ସିଂହଦେଓ, ଦିଲ୍ଲୀପ ରାୟ ଓ ପ୍ରତାପ ଷଡ଼ଙ୍ଗୀଙ୍କ ଭଳି ନେତାଙ୍କୁ ବାସିରେ ପଚାରୁନାହାନ୍ତି । ନିକଟରେ ପ୍ରଧାନମନ୍ତ୍ରୀଙ୍କ ବାଲେଶ୍ୱର ବିକାଶ ସମାବେଶକୁ କବଜା କରିଥିଲେ ମୁକୁ । ସେଠାରେ ବିଜୟ, କନକ, ଦିଲ୍ଲୀପଙ୍କୁ ଭାଷଣ ଦେବାର ସୁଯୋଗ ବି ଦେଇ ନ ଥିଲେ । ପରିସ୍ଥିତି ଏଭଳି ହୋଇଛି ଯେ ସୁନ୍ଦରଗଡ଼ରେ ଦଳର ଦୁଇଦିନିଆ କାର୍ଯ୍ୟକାରିଣୀ ବୈଠକକୁ ବିଜୟ ମହାପାତ୍ର, ଦିଲ୍ଲୀପ ରାୟ, କନକ ବର୍ଦ୍ଧନ ସିଂହଦେଓ ଏବଂ ଜୟନାରାୟଣ ମିଶ୍ରଙ୍କ ଭଳି ନେତା ଆସିନାହାନ୍ତି । ଏହି ନେତାମାନଙ୍କ ଅସନ୍ତୋଷ ଏବେ ଦାଣ୍ଡରେ ପଡି ହାଟରେ ଗଡୁଛି । ଜୁଏଲ୍ ଓରାମ୍ଙ୍କୁ ବି ପାସଙ୍ଗରେ ନେଉନାହାନ୍ତି ମୁକୁ । ଦ୍ୱିତୀୟ ଧାଡ଼ିର ହାତଗଣତି କିଛି ନେତାଙ୍କୁ ଧରି ସେ ନାଚୁଥିଲେ ମଧ୍ୟ ସେମାନଙ୍କ ହୃଦୟରେ ନାହାନ୍ତି । ବାଧ୍ୟବାଧକତା, ଭୟ ଭିତରେ ଏହି ନେତାମାନେ ମୁକୁଙ୍କ ଶରଣରେ ପଡ଼ିଛନ୍ତି । ନିଜର ପରିଚୟ ଓ ସ୍ଥିତି ରକ୍ଷା ପାଇଁ ପୃଥ୍ୱୀରାଜ ହରିଚନ୍ଦନ, ଭ୍ରୁଗୁ ବକ୍ସିପାତ୍ର, ସମୀର ମହାନ୍ତି, ଗୋଲକ ମହାପାତ୍ର, ସଜ୍ଜନ ଶର୍ମାଙ୍କ ଭଳି ନେତା ୟେସ୍ ବସ୍ ଭୂମିକା ନେଇଛନ୍ତି । ଅନ୍ତରରେ ମୁକୁଙ୍କୁ ସେମାନେ ନେତାମାନେ ଗ୍ରହଣ କରୁ ନାହାନ୍ତି । ହେଲେ ପରିସ୍ଥିତିର ତାଡ଼ନାରେ ମୁକୁ ସେମାନଙ୍କ ପାଇଁ ହୋଇଛନ୍ତି ଭଗବାନ ।
ପ୍ରଚଣ୍ଡ କ୍ଷମତା ସାଙ୍ଗକୁ ଅଜସ୍ର ଟଙ୍କା ବଳ ପାଇଥିବା ମୁକୁ ଦଳର ଅନାମଧ୍ୟେୟ ବ୍ୟକ୍ତିଙ୍କୁ ସାଙ୍ଗରେ ନେଇ ବାଟ ଚାଲୁଛନ୍ତି । ସଂଗଠନକୁ ଗୁରୁତ୍ୱ ନ ଦେଇ ନିଜର ଗୁରୁତ୍ୱ ବଢ଼େଇବା ଉଦ୍ଦେଶ୍ୟରେ ମୁକୁ ଏହି କୁଜି ନେତାଙ୍କୁ ଉଠବସ୍ କରାଉଛନ୍ତି । ଏମାନଙ୍କୁ ଧରି ନବୀନ ପଟ୍ଟନାୟକଙ୍କ ସାଙ୍ଗେ ଲଢ଼ିବାକୁ ମୁକୁଙ୍କ ଯୋଜନାକୁ ନେଇ ଦୁଃଖ ଓ ପରିହାସ କରିଛନ୍ତି ଦଳର ଅନେକ ଟାଣୁଆ ନେତା । ବିହାରରୁ ରାଜ୍ୟସଭା ଯାଇଥିବା ମୁକୁଙ୍କର ରାଜ୍ୟରେ ନିଜସ୍ୱ ନିର୍ବାଚନମଣ୍ଡଳୀ ନାହିଁ । ନିଜର ସଂଗଠନ ବଳ ନାହିଁ । ଜମିନ୍ ନ ଥାଇ ଜମିଦାର ସାଜିଥିବା ମୁକୁଙ୍କର ଏଭଳି କୁତ୍ସିତ ଓ ସ୍ୱାର୍ଥନ୍ୱେଷୀ ରାଜନୀତିକୁ ଦିଲ୍ଲୀ ହାଇକମାଣ୍ଡ ବି ଆଖି ବୁଜିଦେଇଛନ୍ତି । କେନ୍ଦ୍ର ବିଜେପି ରାଜନୀତିରେ ଦ୍ୱିତୀୟ ପ୍ରମୋଦ ମହାଜନ ଭୂଷଣ ଧରି ବେଶ୍ ପ୍ରତିପତ୍ତି ରଖିଥିବା ମୁକୁଙ୍କୁ ଆକଟ କରିବାର କ୍ଷମତା କାହାର ନାହିଁ । କେନ୍ଦ୍ରୀୟ ନେତୃତ୍ୱକୁ ନିଜ ହାତମୁଠାରେ ରଖିଥିବାରୁ ମୁକୁଙ୍କ କାର୍ଯ୍ୟକଳାପ ସାଦରେ ଗ୍ରହଣ ହୋଇଯାଇଛି । ରାଜ୍ୟର ଦଳର ବାସ୍ତବ ସ୍ଥିତି ବୁଝିବାର ଶକ୍ତି ନରେନ୍ଦ୍ର ମୋଦି କିମ୍ବା ଅମିତ୍ ସାହାଙ୍କ ପାଖରେ ନାହିଁ । ଥିଲେ, ଆଜି ଦଳର ସ୍ଥିତି ବିଗିଡ଼ି ନ ଥାଆନ୍ତା କି ବରିଷ୍ଠମାନେ ଦଳୀୟ ସଂଗଠନ କାର୍ଯ୍ୟକଳାପରୁ କୋଣଠେସା ହୋଇ ନ ଥାଆନ୍ତେ ।
ମୁକୁ ଯେତେ ଟଙ୍କା ଖର୍ଚ୍ଚ କରି ଦଳ ଓ ନିଜର ପ୍ରଚାର କଲେ ମଧ୍ୟ ତାହା ଗ୍ରହଣୀୟ ହୋଇନାହିଁ କି ସାଧାରଣ ଜନତାଙ୍କୁ ଆକୃଷ୍ଟ କରିନାହିଁ । ନିକଟରେ ଶେଷ ହୋଇଥିବା ଉପନିର୍ବାଚନ ଫଳାଫଳରୁ ତାହା ପ୍ରମାଣିତ ହୋଇଛି । ତିନିଟି ଯାକ ଆସନରେ ବିଜେପି ତୃତୀୟ ସ୍ଥାନରେ ରହି କଂଗ୍ରେସଠାରୁ ପଛରେ ପଡ଼ିଛି । ଆଗକୁ ପଞ୍ଚାୟତ ନିର୍ବାଚନ ଓ ତାହାର ଦୁଇବର୍ଷ ପରେ ସାଧାରଣ ନିର୍ବାଚନ । ଅସଜଡ଼ା ଓ ଦୁର୍ବଳ ସାଂଗଠନିକ ମେଜିଆ ଉପରେ ମୁକୁ ମୁଖ୍ୟମନ୍ତ୍ରୀ ହେବାର ସ୍ୱପ୍ନ ରଖିବା ଲୋକହସା ଛଡ଼ା କିଛି ନୁହେଁ ବୋଲି ରାଜନୈତିକ ସମୀକ୍ଷକମାନେ ମତ ଦେଇଛନ୍ତି ।
ମୁକୁଙ୍କ ଆଧିପତ୍ୟରେ ଦଳଠାରୁ ଦୂରେଇ ରହୁଥିବା ଅସହ୍ୟ ବରିଷ୍ଠ ନେତାମାନେ ନିଜର ଭବିଷ୍ୟତ ନେଇ ଦୋଛକିରେ ପଡ଼ିଛନ୍ତି । ଦଳର ଅନ୍ଧାର ଭବିଷ୍ୟତ ଦେଖି ସେମାନେ ନିଜର ଭବିଷ୍ୟତ ଯୋଜନାରେ ଲାଗିପଡ଼ିଛନ୍ତି । ତେବେ ଧର୍ମେନ୍ଦ୍ରଙ୍କ ପ୍ରତିପତ୍ତି ଆଗରେ ନ୍ୟୁନ ମନେ କରାଯାଉଥିବା ଜୁଏଲ୍ ଓରାମ୍ କିନ୍ତୁ ହାରିଯାଇନାହାନ୍ତି । ଧର୍ମେନ୍ଦ୍ରଙ୍କ ଫାର୍ସ ଦେଖି ନିଜର ସ୍ୱଭାବ ସୁଲଭ ଢ଼ଙ୍ଗରେ ମୁଚୁକୁନ୍ଦା ହସ ପକାଉଛନ୍ତି ଜୁଏଲ୍ । କିଛି ଅଲୌକିକ ଶକ୍ତି ବଳରେ ବିଜେପି ହାତକୁ କ୍ଷମତା ଆସିଲେ ସେ ହିଁ ହେବେ ମୁଖ୍ୟମନ୍ତ୍ରୀ । ଲବି କି ହାଇକମାଣ୍ଡଙ୍କୁ ପ୍ରଭାବିତ କରି ନୁହେଁ । ବରଂ ନିଜର ଆଦିବାସୀ କାର୍ଡ ଧରି ମୁଖ୍ୟମନ୍ତ୍ରୀ ଚଉକିରେ ସେ ହିଁ ବସିବେ । ତେଣୁ ଏବେଠୁଁ ବାଡେଇଛାଟି ସେ କାହିଁକି ହେବେ ? ଏହି ଗହନକୁ ମୁକୁଙ୍କ ଭଳି ପୋଖତ ରାଜନେତା ଯଦି ବୁଝିପାରିନାହାନ୍ତି ତେବେ ତାହା ତାଙ୍କର ଦୁର୍ଭାଗ୍ୟ ବୋଲି ଜୁଏଲ୍ ଇସାରା ଦେଇଛନ୍ତି ।
