ଭୁବନେଶ୍ୱର: ବିଜୁ ଜନତା ଦଳର ୯ ଜଣ ବିଧାୟକ ବିଜେପି ସହ ନିବିଡ଼ ସମ୍ପର୍କରେ ଅଛନ୍ତି । ସେମାନଙ୍କ ମଧ୍ୟରେ ଅଛନ୍ତି ଜଣେ ପୂର୍ବତନ ମନ୍ତ୍ରୀ । ଧର୍ମେନ୍ଦ୍ର ପ୍ରଧାନଙ୍କ ସହ ସେମାନଙ୍କ ବରାବର ଯୋଗାଯୋଗ ରହିଛି । ବାର୍ଗେନିଂ ବି ସରିଛି । କେବଳ ପରିସ୍ଥିତି ଓ ସମୟକୁ ଅପେକ୍ଷା କରିଛନ୍ତି । ସାଧାରଣ ନିର୍ବାଚନ ବେଳକୁ ଯେ କୌଣସି ମୁହୁର୍ତ୍ତରେ ସେମାନେ ସେୟାଡ଼କୁ ଡେଇଁଯିବେ । ଏହା କୌଣସି ଖଟି ଆଲୋଚନାର କଥା ନୁହେଁ, ଖୋଦ୍ ଗୁଇନ୍ଦା ବିଭାଗର ରିପୋର୍ଟ । ବିଭାଗ ପକ୍ଷରୁ ଦୁଇମାସ ତଳୁ ମୁଖ୍ୟମନ୍ତ୍ରୀଙ୍କୁ ଏହି ସୂଚନା ଦିଆଯାଇଛି । ଗୁଇନ୍ଦା ରିପୋର୍ଟ ମିଳିବା ପରେ ମୁଖ୍ୟମନ୍ତ୍ରୀ ଏହି ୯ ବିଧାୟକଙ୍କ ଉପରେ ସତର୍କ ନଜର ରଖିଛନ୍ତି । ସେମାନଙ୍କ ଗତିବିଧିକୁ ସ୍କାନରରେ ରଖିଛନ୍ତି ।
ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି, ୯ ବିଧାୟକଙ୍କ ମଧ୍ୟରୁ ଅଧିକ ହେଉଛନ୍ତି ଉପକୂଳ ଅଞ୍ଚଳର । ପଶ୍ଚିମ ଓଡ଼ିଶାର ଜଣେ ନାମଜାଦା ଯୁବ ବିଧାୟକ ବିଜେପି ଓ ଧର୍ମେନ୍ଦ୍ରଙ୍କ ସହ ଯୋଗାଯୋଗରେ ମାମଲତକାର ହୋଇଛନ୍ତି । ନବୀନଙ୍କ ଲୋକପ୍ରିୟତା ଓ ବିଜେଡ଼ିର ସ୍ଥିତି ସେଭଳି ଖରାପ ନ ଥିଲେ ମଧ୍ୟ ସେମାନଙ୍କ ନିଜର ସମସ୍ୟା ଅଛି । ନିଜ ନିଜ ସ୍ଥିତି ନେଇ ଆତଙ୍କିତ ହୋଇପଡ଼ିଛନ୍ତି । କିଏ ଦଳରେ ନିଜର ଗୁରୁତ୍ୱ ହରାଇଥିବା ଅନୁଭବ କରୁଛନ୍ତି ତ ଆଉ କାହାର ଟିକେଟ କଟିବା ଭୟ ରହିଛି । କେତେଜଣ ଟିକେଟ ପାଇଲେ ବି ନିଜ ନିର୍ବାଚନମଣ୍ଡଳୀରୁ ନିର୍ଘାତ୍ ହାରିବାର ଭୟ ରହିଛି । ତେଣୁ ସମୟ ଦେଖି ବିଜେପିକୁ ଡେଇଁଗଲେ ନିଜର ବ୍ୟକ୍ତିଗତ ଫାଇଦା ହାସଲର ହିସାବ ନିକାସ କରିଛନ୍ତି । ଯେଉଁମାନଙ୍କର ବିଜେଡ଼ି ଟିକେଟ କଟିବ ସେମାନେ ବିଜେପିରୁ ଲଢ଼ିବେ ଆଉ ଯିଏ ଟିକେଟ ପାଇ ବି ହାରିବାର ଭୟ ରଖିଛନ୍ତି ସେମାନେ ବିଜେପି ସହ ହାତ ମିଳାଇ ମୋଟା ଅଙ୍କର ମାଲ୍ ପକାଇ ବସିଯିବେ । ଏହି ସର୍ତ୍ତରେ ଧର୍ମେନ୍ଦ୍ର ପ୍ରଧାନଙ୍କ କ୍ୟାମ୍ପ୍ ପକ୍ଷରୁ ମୋଟା ଅଫର୍ ମିଳିଛି ଯାହା ବିଜେଡ଼ି ବିଧାୟକଙ୍କ ପାଟିରୁ ଲାଳ ଗଡ଼ାଇ ଦେଇଛି ।
‘ମିଡ଼ ଡେ ଓଡ଼ିଶା’ ପାଖରେ ରହିଥିବା ନିର୍ଦ୍ଦିଷ୍ଟ ସୂଚନା ଅନୁଯାୟୀ, ଧର୍ମେନ୍ଦ୍ରଙ୍କଠାରୁ ଆପଏଣ୍ଟମେଣ୍ଟ ମାଗି ଉପକୂଳ ଅଞ୍ଚଳର ଜଣେ ଯୁବ ବିଧାୟକ ଗତ ଏପ୍ରିଲ୍ ମାସରେ ଦିଲ୍ଲୀ ଯାଇଥିଲେ । ତାଙ୍କ ସରକାରୀ ବାସଭବନରେ ପ୍ରାୟ ଘଣ୍ଟାଏ କାଳ ନିଭୃତ ଆଲୋଚନା କରିଥିଲେ । ଆଲୋଚନାକାଳରେ ଧର୍ମେନ୍ଦ୍ରଙ୍କଠାରୁ ସେ ଲୋଭନୀୟ ପ୍ରତିଶ୍ରୁତି ପାଇଥିଲେ । ନିଜର କିଛି ବ୍ୟବସାୟିକ ସ୍ୱାର୍ଥରେ ଧର୍ମେନ୍ଦ୍ରଙ୍କ ସହଯୋଗ ମାଗି ଚଟାପଟ ହାସଲ କରିନେଇଥିଲେ । ଏହି ଭେଟଘାଟକୁ ବିଧାୟକ ଅତ୍ୟନ୍ତ ଗୋପନ ରଖିଥିଲେ ମଧ୍ୟ ଖବରଟି ପରଦିନ ଭୁବନେଶ୍ୱରକୁ ପଳାଇ ଆସିଥିଲା । କିଛି ବିଧାୟକ ଖୁଲମ୍ ଖୋଲା ନ ହୋଇ ସେମାନଙ୍କର ଚେଲା ଚାମଣ୍ଡାଙ୍କ ଦ୍ୱାରା ଧର୍ମେନ୍ଦ୍ର ଯୋଗସୂତ୍ରରେ ଅଛନ୍ତି ।
ବିଜେଡ଼ି ସଂସଦୀୟ ଦଳରେ କ୍ରସ୍ ଭୋଟିଂ ଓ ବିଭାଜନ ସୃଷ୍ଟି ଉଦ୍ୟମ ଚର୍ଚ୍ଚା ଜୋର୍ ଧରିବା ବେଳକୁ ହାତଗଣତି ବିଧାୟକଙ୍କ ବିଜେପି ଲଟରପଟର ଦଳୀୟ ରାଜନୀତିକୁ ସରଗରମ କରିଛି । ବିଜେଡ଼ି ସୁପ୍ରିମୋଙ୍କୁ ଏହା ବିଚଳିତ କରିଛି । ସେପଟେ ଏହି ଷଡ଼ଯନ୍ତ୍ର ପଛରେ ହାଇଏଣ୍ଡ ସାଂସଦଙ୍କ ଭୂମିକା ଉପରେ ସମସ୍ତଙ୍କ ନଜର ପଡ଼ିଛି । ସାମ୍ପ୍ରତିକ ପରିସ୍ଥିତିରେ ଓଡ଼ିଶାର ରାଜନୈତିକ ପାଣିପାଗ ଯାହା ବିଜେପି ମୁହାଁ ବିଜେଡ଼ିର ହାତଗଣତି ସାଂସଦ ଓ ବିଧାୟକଙ୍କ ସମ୍ଭାବ୍ୟ ମେଳିକୁ ସୁପର୍ ଫ୍ଲପ୍ ସୋ ବୋଲି ରାଜନୈତିକ ବିଶେଷଜ୍ଞମାନେ ବିଚାର କରୁଛନ୍ତି । ଏହାଦ୍ୱାରା ସେମାନଙ୍କର ଲାଭ ପରିବର୍ତ୍ତେ ପ୍ରଚୁର କ୍ଷତି ହେବ ବୋଲି କହିଛନ୍ତି । ବିଜେଡ଼ିରେ ବିଭାଜନ ସୃଷ୍ଟି ପ୍ରସଙ୍ଗରେ ରାଜଦୀପ୍ ସରଦେଶାଇଙ୍କ ଟ୍ୱିଟ୍ ଏବଂ ଦ ଇକୋନିମିଷ୍ଟ ପତ୍ରିକାର ଆକଳନ ବାସ୍ତବଠାରୁ ଦୂରରେ ବୋଲି ବି ସେମାନଙ୍କର ମତ । ଓଡ଼ିଶାରେ ସେଭଳି ସ୍ଥିତି ସୃଷ୍ଟି ହୋଇନାହିଁ ବୋଲି ସେମାନଙ୍କ ଆକଳନ। ତେବେ ସେ ଯାହା ହେଉ, ନବୀନଙ୍କ ସ୍କାନରରେ ଥିବା ସାଂସଦ ଓ ୯ ବିଧାୟକଙ୍କ ଭବିଷ୍ୟତ ଯେ ଅନ୍ଧାରରେ ତାହା ଏବେଠୁଁ ଜଳ ଜଳ ଦିଶିଲାଣି ।
