ବେନାମୀ ଚିଠିରେ ହେଡଲାଇନ୍ ଷ୍ଟୋରି

ଭୁବନେଶ୍ୱର: ଖୋଦ୍ ନବୀନ ନିବାସରେ ଚାଲିଛି ପିସି କାରବାର । ସୁରକ୍ଷା କର୍ମୀମାନେ ଛୁଟି ଏବଂ ନିଜକୁ ସୁହାଇଲା ଭଳି ଡ୍ୟୁଟି ପାଇବାକୁ ଉପରିସ୍ଥ ହାକିମଙ୍କୁ ଲାଞ୍ଚ ଦେଉଛନ୍ତି । ଏକ ବେନାମୀ ଚିଠି ଆଧାରରେ ସୌମ୍ୟରଂଜନ ପଟ୍ଟନାୟକଙ୍କ ଭଡ଼ା ଲାଗିଥିବା କନକ ଟିଭିରେ ଏହା ଥିଲା ଆଜି ସଂଧ୍ୟାର ମୁଖ୍ୟ ଖବର । ‘ସମ୍ବାଦ’ ଅଫିସକୁ ଆସିଥିବା ଏକ ଚିଠିକୁ ଦେଖାଇ ଖବରଟି ପ୍ରସ୍ତୁତ ହୋଇଛି । ଖବର ପ୍ୟାକେଜ୍ ରେ ଏବଂ ଖବର ପଢ଼ୁଥିବା ଆଙ୍କର୍ ବାରମ୍ବାର ନିଜ ପାଟିରେ ନବୀନ ନିବାସରେ ପିସି କାରବାର ସମ୍ପର୍କିତ ଚିଠିଟି ବେନାମୀ ବୋଲି ଦାବି କରୁଛନ୍ତି । ଏ ସମ୍ପର୍କିତ ଅଭିଯୋଗ କାହା ମୁହଁରୁ ପାଇ ନ ଥିବା କହୁଛନ୍ତି । ସୁତରାଂ ଖବରର ସାମାନ୍ୟତମ ସତ୍ୟାସତ୍ୟ ଟିମ୍ କନକ ନ୍ୟୁଜ୍ କୁ ଜଣାନାହିଁ ।

ଏହି ଖବର ଦେଖିଲା ପରେ ଅନେକଙ୍କ ମନରେ ଆଶଙ୍କା ସୃଷ୍ଟି ହୋଇଛି । ସାଧାରଣ ଲୋକଙ୍କ କଥା ଛାଡ଼ନ୍ତୁ । ଧରାଯାଉ, ଜଣେ ବିଶିଷ୍ଟ ଭଦ୍ର ମହିଳାଙ୍କୁ ଜଣେ ବିଶିଷ୍ଟ ଭଦ୍ରବ୍ୟକ୍ତି ଅସଦାଚରଣ କି ରେପ୍ କରିଛନ୍ତି ବୋଲି ସମ୍ବାଦ ଭବନକୁ ଏକ ଅଜଣା ଚିଠି ଆସିବ । ଚିଠିଟିକୁ ଯାଞ୍ଚ ନ କରି ଏବଂ ଏହାର ସତ୍ୟାସତ୍ୟ ଅନୁସନ୍ଧାନ ନ କରି ତାମାନେ କନକ ନ୍ୟୁଜ୍ ରେ ତାହା ହେଡଲାଇନ୍ ଖବର ପାଲଟିବ ! ବାରମ୍ବାର ଏହାକୁ ବେନାମୀ ଚିଠି ଦର୍ଶାଇ ନିଜ ଉପରୁ ଦୋଷ ଛଡ଼ାଇବାର କୌଶଳ ରହିବ । ସୁତରାଂ ଯିଏ ଯାହାର ଇଜ୍ଜତ ଲୁଟିବାର ଥିବ କନକ ଟିଭି ତାଙ୍କ ପାଇଁ ବଢ଼ିଆ ପ୍ଲାଟଫର୍ମ ହେବ । ଆଜିର ହେଡଲାଇନ୍ ଖବର ହିଁ ଏହାର ଚାକ୍ଷୁସ ପ୍ରମାଣ ଛାଡ଼ି ଦେଇଛି ।

କନକ ଟିଭିରେ ଏଭଳି ଖବର ପ୍ରସାରଣ ଖୋଦ୍ ସାମ୍ବାଦିକ ମହଲରେ ଆଲୋଚନାର ବିଷୟ ହୋଇଛି । ବେନାମୀ ଚିଠି କହୁଥିବା ଟିଭି ପୁଣି ସେଇ ବେନାମୀ ଚିଠିକୁ ହେଡ଼ଲାଇନ୍ ଖବର କରିବା କି ସାମ୍ବାଦିକତା ବୋଲି ପ୍ରଶ୍ନ ଉଠିଛି । ଏକ ସ୍ପର୍ଶକାତର ଖବର ପ୍ରସାରଣରେ ସାମ୍ବାଦିକତାର ଏଥିକ୍ସକୁ ବଳି ପକାଇ ଦିଆଯାଇଛି ବୋଲି ଅନେକଙ୍କ ମତ । ଟିଆରପି ଚକ୍କରରେ ଏଭଳି ଶସ୍ତା ଖବର ତିଆରି ହୋଇଛି ବୋଲି ସେମାନେ ଭର୍ତ୍ସନା କରିଛନ୍ତି ।