ବଲାଙ୍ଗୀର: ଭୁବନେଶ୍ୱରରେ ଡ. ଅଚ୍ୟୁତ ସାମନ୍ତଙ୍କ ଦ୍ୱାରା ପ୍ରତିଷ୍ଠିତ ‘କିସ୍’ ଖାଲି ରାଜ୍ୟରେ କି ଦେଶରେ କାହିଁକି ଅନ୍ତର୍ଜାତୀୟସ୍ତରରେ ଖ୍ୟାତି ଅର୍ଜନ କରିଛି । ଆଦିବାସୀ ଜନଜାତିଙ୍କ ଶିକ୍ଷାକ୍ଷେତ୍ରକୁ ଆହୁରି ବ୍ୟାପକ କରିବା ପାଇଁ ବଲାଙ୍ଗୀର ଜିଲ୍ଲା ଭଳି ପଛୁଆ ଅଞ୍ଚଳରେ ‘କିସ୍’ ର ଆଉ ଏକ ଶାଖା ଖୋଲିଛି । ଶନିବାର ଦିନ ଭୁବନେଶ୍ୱର ‘କିସ୍’ ର ବଲାଙ୍ଗୀର ଶାଖା(ମୋତିଲାଲ୍ ଓସ୍ୱାଲ୍-କିସ୍ ଜନଜାତି ବିଦ୍ୟାଳୟ)ର ଉଦଘାଟନ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ।
ଏହି ଅବସରରେ ମୁଖ୍ୟମନ୍ତ୍ରୀ କହିଥିଲେ, ବଲାଙ୍ଗୀର ଭଳି ପଛୁଆ ଅଞ୍ଚଳରେ ଶିକ୍ଷାର ବିକାଶ ନିହାତି ଦରକାର । ‘କିସ୍’ ବଲାଙ୍ଗୀର ଶାଖା ଶିକ୍ଷା କ୍ଷେତ୍ରରେ ବିକାଶ ଆଣିବ । ଶିକ୍ଷା ଆଗକୁ ବଢ଼ିବାକୁ ଶକ୍ତି ଦେଇଥାଏ । ତେଣୁ ସମୟ ଆସିଛି ଶିକ୍ଷାର ବିକାଶ ପାଇଁ ଏକତାର ସହ ଆଗକୁ ବଢ଼ିବାକୁ ହେବ ।
ଅନୁସୂଚିତ ଜାତି ଓ ଜନଜାତି ପିଲାଙ୍କ ଶିକ୍ଷା କ୍ଷେତ୍ରରେ ରାଜ୍ୟ ସରକାର ନେଇଥିବା ପଦକ୍ଷେପ ସମ୍ପର୍କରେ ମୁଖ୍ୟମନ୍ତ୍ରୀ ସୂଚନା ଦେଇଥିଲେ । ରାଜ୍ୟରେ ୬୫୦୦ ହଷ୍ଟେଲ୍ ରେ ଏବେ ୬ ଲକ୍ଷରୁ ଅଧିକ ପିଲା ପାଠ ପଢ଼ୁଛନ୍ତି । ସେଠାରେ ଗୁଣାତ୍ମକ ଶିକ୍ଷାକୁ ଧ୍ୟାନ ଦିଆଯାଉଛି । ରାଜ୍ୟର ସବୁ ବ୍ଲକ୍ ରେ ଆଦର୍ଶ ବିଦ୍ୟାଳୟ ଖୋଲାଯାଇଛି । ୧୦୧ଟି ସ୍କୁଲକୁ ସେଣ୍ଟର ଅଫ୍ ଏକ୍ସିଲେନ୍ସ କରାଯିବାର ପ୍ରକ୍ରିୟା ଚାଲିଛି ।
‘କିସ୍’ ବଲାଙ୍ଗୀର ଶାଖାକୁ ଉଦଘାଟନ କଲା ପରେ ମୁଖ୍ୟମନ୍ତ୍ରୀ ବିଦ୍ୟାଳୟ ପରସରକୁ ବୁଲି ଦେଖିଥିଲେ । ‘କିସ୍’ର ପ୍ରତିଷ୍ଠାତା ସାଂସଦ ଡ. ଅଚ୍ୟୁତ ସାମନ୍ତ ଓ ଓସ୍ୱାଲ୍ ଗ୍ରୁପ୍ ର ଅଧ୍ୟକ୍ଷ ତଥା ପରିଚାଳନା ନିର୍ଦ୍ଦେଶକ ମୋତିଲାଲ୍ ଓସ୍ୱାଲ୍ ଙ୍କୁ ମୁଖ୍ୟମନ୍ତ୍ରୀ ନିଜ ବକ୍ତବ୍ୟରେ ପ୍ରଶଂସା କରି ଧନ୍ୟବାଦ ଜଣାଇଥିଲେ । ଡ. ସାମନ୍ତ ତାଙ୍କ ଭାଷଣରେ ଉକ୍ତ ଅନୁଷ୍ଠାନର ମହତ୍ତ୍ୱ ଉଦେ୍ଦଶ୍ୟ ସମ୍ପର୍କରେ କହିଥିଲେ । ଶ୍ରୀ ମୋତିଲାଲ୍ ଓସ୍ୱାଲ୍ ତାଙ୍କ ଭାଷଣରେ ଭୁବନେଶ୍ୱର ‘କିସ୍’ କୁ ପ୍ରଶଂସା କରିବା ସହ ଏହାର କ୍ୟାମ୍ପସ୍ ତାଙ୍କୁ ବିମୋହିତ କରିଛି ବୋଲି କହିଥିଲେ ।
ସୂଚନାଯୋଗ୍ୟ, ମୋତିଲାଲ୍ ଓସ୍ୱାଲ୍ ଗ୍ରୁପ୍ ର ଆର୍ଥିକ ସହାୟତା ଏବଂ ‘କିସ୍’ ର ସହଭାଗିତାରେ ‘କିସ୍’ ଜମିରେ ନିର୍ମିତ ହୋଇଛି ଏହି ଆବାସିକ ବିଦ୍ୟାଳୟ । ଏଥିରେ ଛାତ୍ରଛାତ୍ରୀମାନେ ମାଗଣାରେ ସମ୍ପୂର୍ଣ୍ଣ ପାଠ ପଢ଼ିବେ । ପ୍ରଥମ ପର୍ଯ୍ୟାୟରେ ପ୍ରଥମରୁ ଦ୍ୱାଦଶ ଶ୍ରେଣୀ ପର୍ଯ୍ୟନ୍ତ ୧୫୦୦ ଗରିବ ଜନଜାତିର ଛାତ୍ରଛାତ୍ରୀ ପାଠ ପଢ଼ିବେ । ପରେ ‘କିସ୍’ ବିଶ୍ୱବିଦ୍ୟାଳୟରେ ପଢ଼ିବେ ବୋଲି ଡ. ଅଚ୍ୟୁତ ସାମନ୍ତ ସୂଚନା ଦେଇଥିଲେ ।
