ଭୁୁବନେଶ୍ୱର: ଆମେ ଗଠନ କରିବା ଏକ ସଶକ୍ତ ଓଡ଼ିଶା ଯେଉଁଠାରେ ଦାରିଦ୍ର୍ୟ ଅତୀତର ପୃଷ୍ଠାରେ ଲୀନ ହୋଇଯିବ । ଏକ ସଶକ୍ତ ଓଡ଼ିଶା ଯେଉଁଠାରେ ମହିଳାମାନେ ବିକାଶ ଓ ଅଭିବୃଦ୍ଧିରେ ସମାନ ଭାବେ ଭାଗିଦାର ହେବେ । ଏକ ସଶକ୍ତ ଓଡ଼ିଶା ଯେଉଁଠାରେ ସମସ୍ତ ଦୁର୍ବଳ ବର୍ଗର ଲୋକମାନେ ବିକାଶର ଦୃଶ୍ୟପଟରେ ସାମିଲ ହେବେ । ଏକ ସଶକ୍ତ ଓଡ଼ିଶା ଯେଉଁଠାରେ ଯୁବକମାନଙ୍କର ସ୍ୱପ୍ନର ସଫଳ ରୂପାୟନ ହୋଇପାରିବ ।
ରାଜ୍ୟରେ ପଞ୍ଚମ ପାଳି ଆରମ୍ଭ କରିଥିବା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆଜି ଏଭଳି ଭାବପୂର୍ଣ୍ଣ ଭାଷାରେ ବିକାଶର ପ୍ରତିବଦ୍ଧତାକୁ ଦୋହରାଇ ନିଜ ମନ୍ତ୍ରୀ ପରିଷଦର ସଦସ୍ୟମାନଙ୍କ ସହଯୋଗ ଲୋଡିଛନ୍ତି । ପଞ୍ଚମ ପାଳିର ପ୍ରଥମ ଦିନରେ ସହଯୋଗୀମାନଙ୍କୁ ଜଣାଇ ଦେଇଛନ୍ତି କି ସାରା ବିଶ୍ୱ ଜାଣିବା ଦରକାର ଯେ ବିକାଶର ପରିଭାଷାରେ ଓଡ଼ିଶାର ସମୟ ଆସିଯାଇଛି ।
ପଞ୍ଚମ ଥର ପାଇଁ ରାଜ୍ୟର ଦାୟିତ୍ୱ ନେବାର କେଇ ଘଣ୍ଟା ପରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆଜି ତାଙ୍କ ନୂଆ ମନ୍ତ୍ରୀ ପରିଷଦର ବୈଠକ କରିଥିଲେ । ନୂଆ ସହଯୋଗୀମାନଙ୍କୁ ସେ ଶାସନର ଟି ମନ୍ତ୍ର ପଢ଼ାଇଥିଲେ । ପୂର୍ବରୁ ତାଙ୍କ ସରକାର ଥ୍ରୀ-ଟି ମନ୍ତ୍ର ( ଟିମ୍ ୱାର୍କ, ଟ୍ରାନସପେରନ୍ସି, ଟେକ୍ନୋଲୋଜି) ଉପରେ ଗୁରୁତ୍ୱ ଦେଇ ଆସୁଥିବା ବେଳେ ମୁଖ୍ୟମନ୍ତ୍ରୀ ଆଜି ସେଥିରେ ଆଉ ଗୋଟିଏ ଟି(ଟାଇମ୍) ଯୋଡ଼ିଥିଲେ । ମୁଖ୍ୟମନ୍ତ୍ରୀ କହିଥିଲେ, ‘ସମୟ’ ହେଉଛି ଏକ ଗୁରୁତ୍ୱପୂର୍ଣ୍ଣ ଦିଗ । ଆମର ଯୁବକମାନେ ଆଜି ସବୁକିଛି ତୁରନ୍ତ କରିବାକୁ ଚାହୁଁଥିବାରୁ ‘ସମୟ’ ଉପରେ ଗୁରୁତ୍ୱ ଦେବାକୁ ମୁଖ୍ୟମନ୍ତ୍ରୀ ତାଙ୍କର ନୂଆ ସହଯୋଗୀମାନଙ୍କୁ ପରାମର୍ଶ ଦେଇଥିଲେ ।
ଏହି ପରିପ୍ରେକ୍ଷୀରେ ନିର୍ବାଚନ ବେଳେ ବିଜେଡ଼ି ଦେଇଥିବା ପ୍ରତିଶ୍ରୁତିକୁ ଅକ୍ଷରେ ଅକ୍ଷରେ ପାଳନ କରିବା ଉପରେ ମୁଖ୍ୟମନ୍ତ୍ରୀ ଗୁରୁତ୍ୱ ଦେଇଥିଲେ । ଦଳର ଇସ୍ତାହାରକୁ ନୀତିଗତ ଭାବେ ସରକାରଙ୍କ ପ୍ରାଥମିକତା କ୍ଷେତ୍ର ଭାବେ ଅନୁମୋଦନ କରାଯାଇଥିଲା । ଖାଲି ସେତିକି ନୁହେଁ, ଏହାକୁ ପୂରଣ କରିବା ପାଇଁ ମନ୍ତ୍ରୀମାନଙ୍କ ପାଇଁ ନିର୍ଦ୍ଧାରିତ ସମୟ ଧାର୍ଯ୍ୟ କରାଯାଇଛି । ଆଜିଠାରୁ ଠିକ୍ ୩୬୫ ଦିନ ପରେ ୨୦୨୦ ମଇ ୨୯ ତାରିଖ ଦିନ ବିଜେଡ଼ିର ପ୍ରତିଶ୍ରୁତି ଓ ଏହାର ରୂପାୟନ ସମ୍ପର୍କରେ ଲୋକଙ୍କ ପାଖରେ ଉପସ୍ଥାପିତ କରାଯିବ ।
ମୁଖ୍ୟମନ୍ତ୍ରୀ କହିଥିଲେ, ‘ମୁଁ ଜାଣେ ଯେ କେତେକ ପ୍ରତିଶ୍ରୁତି ପାଳନ କରିବା ପାଇଁ ସମୟ ଲାଗେ । ମୁଁ ଚାହେଁ, ଆମର ମନ୍ତ୍ରୀ ପରିଷଦ ସଦସ୍ୟମାନେ ଏହି ପ୍ରତିଶ୍ରୁତିଗୁଡ଼ିକର ସଫଳ ରୂପାୟନ ପାଇଁ ନିଜର ଶ୍ରେଷ୍ଠ ଉଦ୍ୟମ କରନ୍ତୁ ।
ମନ୍ତ୍ରୀ ପରିଷଦ ବୈଠକ ଆରମ୍ଭରେ ମୁଖ୍ୟମନ୍ତ୍ରୀ ଓଡ଼ିଶାବାସୀଙ୍କୁ ପୁଣିଥରେ କୃତଜ୍ଞତା ଜଣାଇଥିଲେ । ଓଡ଼ିଶାର ସାଢ଼େ ଚାରି କୋଟି ଜନସାଧାରଣ ଆମକୁ ପୁଣି ଥରେ ଆର୍ଶିବାଦ କରି ସେବା କରିବା ପାଇଁ ଆଉ ଥରେ ସୁଯୋଗ ଦେଇଛନ୍ତି । ଲୋକଙ୍କ ଏହି ବିଶ୍ୱାସ ଓ ଭରସା ପାଇଁ ମୁଁ ସେମାନଙ୍କ ନିକଟରେ ଚିର ଋଣୀ ବୋଲି ମୁଖ୍ୟମନ୍ତ୍ରୀ କହିଥିଲେ ।
