ଭୁୁବନେଶ୍ୱର: ଇନଫରମେସନ୍ ଟେକନୋଲୋଜି ବ୍ୟବହାରରେ ସବୁବେଳେ ଆଗରେ ରହୁଥିବା ଶିକ୍ଷା ଓ କୃଷିମନ୍ତ୍ରୀ ଡ. ଅରୁଣ ସାହୁ ଏବେ ନିଜ ନିର୍ବାଚନମଣ୍ଡଳୀ ସହ ଅନଲାଇନ୍ ସମ୍ପର୍କ ଯୋଡିଛନ୍ତି । କୋଭିଡ୍ ନିୟମ ପାଳନ ସହ ଲୋକଙ୍କ ସମସ୍ୟା ସହିତ ନିଜକୁ ସଂଶ୍ଲିଷ୍ଟ ରଖିବା ଏବଂ ସଂଗଠନକୁ କ୍ରିୟାଶୀଳ ରଖିବା ପାଇଁ ଅରୁଣ ଆପଣେଇଛନ୍ତି ଏହି ପନ୍ଥା । ଗତ ୧ ତାରିଖରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଦଳୀୟ ବିଧାୟକମାନଙ୍କୁ ଏହି ମନ୍ତ୍ର ଦେଇଥିଲେ । ମୁଖ୍ୟମନ୍ତ୍ରୀ କହିଥିଲେ, ଲୋକଙ୍କ ସହ ଯୋଡି ହେବା ପାଇଁ ଟେକନୋଲୋଜିର ବ୍ୟବହାର କର ।
ଭୁବନେଶ୍ୱର ନିଜ ବାସଭବନରୁ ଆଜି ଭିଡ଼ିଓ କନଫରେନ୍ସିଂରେ ନୟାଗଡ଼ ଲୋକଙ୍କ ସହ ଯୋଡି ହୋଇଥିଲେ ଅରୁଣ । ବିଭିନ୍ନ ବର୍ଗର ଜନସାଧାରଣଙ୍କ ସହ ବିଭିନ୍ନ ସମସ୍ୟା ଉପରେ ବହୁ ସମୟ ଧରି କଥା ହୋଇଥିଲେ । କରୋନା ସଙ୍କଟ ସମୟରେ ଜୀବନ ଓ ଜୀବିକା ସହିତ ଲଢ଼ିବାର ସାହାସ ଦେଇଥିଲେ ମନ୍ତ୍ରୀ । କରୋନା ସମୟରେ ରାଜ୍ୟ ସରକାର କୃଷିକ୍ଷେତ୍ରକୁ ପ୍ରାଥମିକତା ଦେଇଛନ୍ତି । ଖୋଦ୍ ମୁଖ୍ୟମନ୍ତ୍ରୀ ଏହାକୁ କଟକଣାମୁକ୍ତ ରଖି ଜୀବିକାର ବାଟ ଖୋଲି ଦେଇଛନ୍ତି । ଏହାର ସଦୁପଯୋଗ କରିବା ପାଇଁ ଅରୁଣ ସମସ୍ତଙ୍କୁ ପରାମର୍ଶ ଦେଇଥିଲେ ।
ସେହିଭଳି ଦଳୀୟ କର୍ମୀ, ଛାମୁଆ ସଂଗଠନର କର୍ମକର୍ତ୍ତାମାନଙ୍କ ସହ ରାଜନୈତିକ କାର୍ଯ୍ୟକ୍ରମ ସମ୍ପର୍କରେ ଆଲୋଚନା କରିଥିଲେ । ରାଜନୈତିକ ସଭା, ସମିତି ଭଳି କାର୍ଯ୍ୟକ୍ରମ ଉପରେ କଟକଣା ଲାଗିଥିବାରୁ ବିନା ସଭା ସମିତିରେ ସଂଗଠନକୁ ଅଧିକରୁ ଅଧିକ ମଜବୁତ କରିବା ଦିଗରେ କାର୍ଯ୍ୟ କରାଯିବ । ଅନଲାଇନ୍ ଜରିଆରେ ସବୁ କାର୍ଯ୍ୟ ହେଉଥିବାରୁ ସଂଗଠନ ମଜବୁତ କାର୍ଯ୍ୟ ଅଟକିବ ନାହିଁ । ଲୋକଙ୍କ ସମସ୍ୟା ବୁଝିବା ଏବଂ ସଂଗଠନକୁ ସଶକ୍ତ ରଖିବାରେ ନିଜକୁ ନିୟୋଜିତ ରଖିବାକୁ କର୍ମକର୍ତ୍ତାମାନଙ୍କୁ ଅରୁଣ ସଜାଗ କରିଥିଲେ ।
ସମସ୍ତେ ମାସ୍କ ପିନ୍ଧିବା ଏବଂ ସାମାଜିକ ଦୂରତା ରକ୍ଷା କରିବା । ନିଜେ ଏହାକୁ ପାଳନ କରି ଅନ୍ୟମାନଙ୍କୁ ପାଳନ କରିବାକୁ ପ୍ରବର୍ତ୍ତାଇବା ଏବେ ସମସ୍ତଙ୍କର ମୁଖ୍ୟ ଦାୟିତ୍ୱ । ଏଥିପ୍ରତି ସମସ୍ତେ ଯଥେଷ୍ଟ ଧ୍ୟାନ ରଖିବାକୁ ସମସ୍ତଙ୍କୁ ଅନୁରୋଧ କରିଥିଲେ ମନ୍ତ୍ରୀ ଅରୁଣ ସାହୁ ।
