ପାଟକୁରା ଜଗିଲେ ଅତନୁ-ଅରୁଣ-ସଞ୍ଜୟ

ଭୁବନେଶ୍ୱର: ପାଟକୁରା ନିର୍ବାଚନ ତାରିଖ ଘୋଷଣା ପୂର୍ବରୁ ସମରସଜ୍ଜା । ବିଜୟ ମହାପାତ୍ରଙ୍କୁ ଜିତେଇ ଆଣିବାକୁ ବିଜେପିର ବ୍ଲୁ ପ୍ରିଣ୍ଟ ରେଡ୍ଡି ହେଲା ବେଳକୁ ବିଜେଡ଼ି ତା’ କାମ ବଢ଼େଇ ସରିଲାଣି । ଦଳର ତିନି ହେଭିୱେଟ୍ ମନ୍ତ୍ରୀ ଅରୁଣ କୁମାର ସାହୁ, ପୂର୍ବତନ ମନ୍ତ୍ରୀ ଅତନୁ ସବ୍ୟସାଚୀ ନାୟକ ଏବଂ ସଞ୍ଜୟ ଦାସବର୍ମାଙ୍କୁ ସେନାପତି ଦାୟିତ୍ୱରେ ଛଡ଼ାଯାଇଛି । ମନ୍ତ୍ରୀ ପ୍ରଫୁଲ୍ଲ ମଲ୍ଲିକ ଓ ରଣେନ୍ଦ୍ର ପ୍ରତାପ ସ୍ୱାଇଁଙ୍କୁ ମଧ୍ୟ ଗୁରୁ ଦାୟିତ୍ୱ ଦିଆଯାଇଛି । ଏହି ୫ ହେଭିୱେଟ୍ ଙ୍କ ଦାୟିତ୍ୱରେ ପାଟକୁରାକୁ ଛାଡ଼ିଛନ୍ତି ବିଜେଡ଼ି ସୁପ୍ରିମୋ ନବୀନ ପଟ୍ଟନାୟକ । ସେମାନଙ୍କୁ ସହଯୋଗ କରିବା ପାଇଁ ଦଳର ଦୁଇ ଡର୍ଜନ୍ ବିଧାୟକ, ପୂର୍ବତନ ବିଧାୟକ ଓ ଟାଣୁଆ ନେତା ଯାଉଛନ୍ତି ପାଟକୁରା ।

ଡେରାବିଶ ବ୍ଲକ୍, ଗରଦପୁର ବ୍ଲକ୍ ଏବଂ ମାର୍ଶାଘାଇ ବ୍ଲକ୍ ର ୭ଟି ପଞ୍ଚାୟତ ରହିଛି ପାଟକୁରା ନିର୍ବାଚନମଣ୍ଡଳୀରେ । ବିଜେଡ଼ିର ହେଭିୱେଟ୍ ମାନଙ୍କ ଦାୟିତ୍ୱରେ ଏହି ବ୍ଲକ୍ ଗୁଡ଼ିକ ବାଣ୍ଟି ଦିଆଯାଇଛି । ୨୬ ଟି ପଞ୍ଚାୟତକୁ ନେଇ ଗଠିତ ଡେରାବିଶ ବ୍ଲକ୍ ଦାୟିତ୍ୱରେ ଅରୁଣ ସାହୁ ଏବଂ ସଞ୍ଜୟ ଦାସବର୍ମା ରହିଥିବା ବେଳେ ୧୮ ଟି ପଞ୍ଚାୟତ ରହିଥିବା ଗରଦପୁର ବ୍ଲକ୍ କୁ ପ୍ରଫୁଲ୍ଲ ମଲ୍ଲିକ ଏବଂ ରଣେନ୍ଦ୍ର ପ୍ରତାପ ସ୍ୱାଇଁଙ୍କ ଦାୟିତ୍ୱରେ ଛଡ଼ାଯାଇଛି । ଅତନୁ ସବ୍ୟସାଚୀ ନାୟକଙ୍କୁ ମାର୍ଶାଘାଇ ବ୍ଲକ୍ ଦାୟିତ୍ୱ ଦିଆଯାଇଛି ।

ମାର୍ଶାଘାଇ ବ୍ଲକ୍ ର ୭ଟି ପଞ୍ଚାୟତରେ ବିଜେପି ଏମପି ପ୍ରାର୍ଥୀ ବୈଜୟନ୍ତ ପଣ୍ଡାଙ୍କୁ ଭଲ ଭୋଟ ମିଳିଥିଲା । ତେଣୁ ବିଜେଡ଼ି ପାଇଁ ଏହି ପଞ୍ଚାୟତଗୁଡ଼ିକ ଚାଲେଂଜପୂର୍ଣ୍ଣ ରହିଛି । ଆଜି ଏହି ପଞ୍ଚାୟତଗୁଡ଼ିର ଦଳୀୟ ନେତା ଓ କର୍ମୀଙ୍କୁ ନେଇ ଏକ ବୈଠକ କରିଥିଲେ ମନ୍ତ୍ରୀ ପ୍ରଫୁଲ୍ଲ ସାମଲ ଏବଂ ବିଧାୟକ ଅତନୁ ସବ୍ୟସାଚୀ ନାୟକ । ପାଟକୁରା ଦାୟିତ୍ୱରେ ଥିବା ବିଧାୟକ ଓ ଅନ୍ୟ ନେତାମାନେ ମଧ୍ୟ ସେଠି ଉପସ୍ଥିତ ଥିଲେ । ଦୁଇ ଦିନ ପୂର୍ବରୁ ମନ୍ତ୍ରୀ ଅରୁଣ ସାହୁ ଡେରାବିଶରେ ଦଳୀୟ ସମରସଜ୍ଜା କରି ଫେରିଛନ୍ତି । ପୃଥକ୍ ଭାବେ ୫ ହେଭିୱେଟ୍ ତିନୋଟି ଯାକ ବ୍ଲକ୍ ଦାୟିତ୍ୱରେ ଥିଲେ ମଧ୍ୟ ପରଷ୍ପର ମଧ୍ୟରେ ସମନ୍ୱୟ ରଖି ସମଗ୍ର ନିର୍ବାଚନମଣ୍ଡଳୀ କଥା ବୁଝିବେ ।

ମୁଖିଆମାନଙ୍କୁ ସହଯୋଗ ପାଇଁ ନିର୍ବାଚନମଣ୍ଡଳୀର ୫୧ ଟି ଯାକ ପଞ୍ଚାୟତରେ ଦଳର ବିଧାୟକ, ପୂର୍ବତନ ବିଧାୟକ ଏବଂ କିଛି ଟାଣୁଆ ନେତାଙ୍କୁ ଦାୟିତ୍ୱ ଦିଆଯାଇ ସେଠାକୁ ପଠାଯାଉଥିବା ଦଳୀୟ ମହଲରୁ ସୂଚନା ମିଳିଛି । ସେମାନଙ୍କ ମଧ୍ୟରେ ଅଛନ୍ତି ପ୍ରଣବ ବଳବନ୍ତରାୟ, ବ୍ୟୋମକେଶ ରାୟ, ପ୍ରଶାନ୍ତ ମୁଦୁଲି, ସଞ୍ଜୀବ ମଲ୍ଲିକ, ବିକ୍ରମ ପଣ୍ଡା, ଉମାକାନ୍ତ ସାମନ୍ତରାୟ, ପ୍ରଶାନ୍ତ ଜଗଦ୍ଦେବ, ଅନନ୍ତ ନାରାୟଣ ଜେନା, ନିଧି ସାମଲ, ଶ୍ରୀକାନ୍ତ ସାହୁ, ଅନୁଭବ ପଟ୍ଟନାୟକ, ସୁବାସ ବେହେରା, ପ୍ରଫୁଲ୍ଲ ସିଂ, ସୁବାସ ସିଂ ଏବଂ ପ୍ରଭାତ ଆଦିତ୍ୟ ମିଶ୍ର । ନିର୍ବାଚନ ତାରିଖ ଘୋଷଣା ହେଲା ମାତ୍ରେ ସେମାନେ ବିଭିନ୍ନ ପଞ୍ଚାୟତରେ ଡେରା ପକାଇବେ ।