ପ୍ରଧାନମନ୍ତ୍ରୀଙ୍କ ଘୋଷଣା: ମେ ୩ ଯାଏଁ ବଢ଼ିଲା ଲକ୍ ଡାଉନ୍

ନୂଆଦିଲ୍ଲୀ: ଦେଶରେ ଲକ୍ ଡାଉନ୍ ଅବଧିକୁ ମେ ୩ ତାରିଖ ଯାଏଁ ବଢ଼ାଇ ଦିଆଯାଇଛି । ଜାତି ଉଦେ୍ଦଶ୍ୟରେ ସମ୍ବୋଧନ କରି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଆଜି ଏହି ଗୁରୁତ୍ୱପୂର୍ଣ୍ଣ ଘୋଷଣା କରିଛନ୍ତି । ଦେଶରେ ୨୧ ଦିନିଆ ଲକ୍ ଡାଉନ୍ ଆଜି(ଏପ୍ରିଲ୍ ୧୪) ରେ ଶେଷ ହେଉଥିଲା । ମାତ୍ର ବିଶ୍ୱ ସ୍ୱାସ୍ଥ୍ୟ ସଂଗଠନ, ବିଶେଷଜ୍ଞଙ୍କ ପରାମର୍ଶ ଏବଂ ସବୁ ରାଜ୍ୟର ମୁଖ୍ୟମନ୍ତ୍ରୀଙ୍କ ସହିତ ଆଲୋଚନା ପରେ ଲକ୍ ଡାଉନ୍ ଅବଧିକୁ ଆଉ ୧୯ ଦିନ ପାଇଁ ବୃଦ୍ଧି କରିଛନ୍ତି ପ୍ରଧାନମନ୍ତ୍ରୀ । ଏହାକୁ କଡ଼ାକଡ଼ି ଭାବେ ଲାଗୁ କରାଯିବ ବୋଲି ପ୍ରଧାନମନ୍ତ୍ରୀ କହିଛନ୍ତି ।

ତେବେ କିଛି ଜରୁରୀ ଗତିବିଧି, ଚାଷୀମାନଙ୍କର ଜୀବନ ଜୀବିକା, ରବି ଫସଲ ଅମଳ ଆଦି କୁ ଧ୍ୟାନ ଦେଇଛନ୍ତି ପ୍ରଧାନମନ୍ତ୍ରୀ । କରୋନା ସ୍ଥିତିର ଜିଲ୍ଲା ଓ ଥାନାୱାରୀ ସମୀକ୍ଷା କରାଯିବ । ସ୍ଥିତିକୁ ଦେଖି ଏପ୍ରିଲ୍ ୨୦ ପରେ କିଛି କିଛି ଜାଗାରେ ଲକ ଡାଉନ୍ କଟକଣାକୁ ସର୍ତ୍ତମୂଳକ ଭାବେ ସାମାନ୍ୟ କୋହଳ କରାଯିବ । ଯଦି ସ୍ଥିତି ଠିକ୍ ନ ଥାଏ ତେବେ ଲକ୍ ଡାଉନ୍ କୁ ଆହୁରି କଡ଼ାକଡ଼ି କରାଯିବ । କରୋନା ସଂକ୍ରମଣକୁ ବଢ଼ିବାକୁ ଦିଆଯିବ ନାହିଁ ବୋଲି ପ୍ରଧାନମନ୍ତ୍ରୀ ସତର୍କ କରାଇଛନ୍ତି । ଆସନ୍ତାକାଲି ଏହାର ବିସ୍ତୃତ ଗାଇଡଲାଇନ୍ ଜାରି ହେବ ବୋଲି ପ୍ରଧାନମନ୍ତ୍ରୀ କହିଛନ୍ତି ।

କରୋନା ସ୍ଥିତିର ମୁକାବିଲାରେ ଭାରତ ସରକାର ଯଥେଷ୍ଟ ଆଗୁଆ ପଦକ୍ଷେପ ନେଇଥିବାରୁ ଆଜି ସ୍ଥିତି ନିୟନ୍ତ୍ରଣରେ ଅଛି । ଭାରତ ତୁଳନାରେ ବଡ଼ ବଡ଼ ଦେଶଗୁଡ଼ିକରେ କରୋନା ସଂକ୍ରମଣ ୨୫/୩୦ ଗୁଣ ବଢ଼ିଛି । ଯଥେଷ୍ଟ ପୂର୍ବରୁ ଆମର ଆଗୁଆ ପଦକ୍ଷେପ ଏବଂ ଦେଶବାସୀଙ୍କ ତ୍ୟାଗ, ଅପୂର୍ବ ସହଯୋଗ ଯୋଗୁଁ ଏହା ସମ୍ଭବ ହୋଇପାରିଛି । ‘ସାମାଜିକ ଦୂରତ୍ୱ’ ର ବହୁତ ଲାଭ ଆମକୁ ମିଳିଛି । ଆର୍ଥିକ ଦୃଷ୍ଟିରୁ ଆମକୁ ବହୁତ ମୂଲ୍ୟ ଦେବାକୁ ପଡ଼ିଥିଲେ ମଧ୍ୟ ଜୀବନ ଆଗରେ ଏହାକୁ ତୁଳନା କରାଯାଇପାରିବ ନାହିଁ । ଯଦି ଆମେ ଯଥେଷ୍ଟ ପୂର୍ବରୁ ପଦକ୍ଷେପ ନେଇ ନ ଥାନ୍ତେ ତେବେ ଭାରତର ଅବସ୍ଥା କ’ଣ ହୋଇଥାଆନ୍ତା ତାହା ଭାବିଲେ ରୁମ ଟାଙ୍କୁରି ହୋଇଯାଉଛି ବୋଲି ପ୍ରଧାନମନ୍ତ୍ରୀ କହିଛନ୍ତି ।

ରାଜ୍ୟ ସରକାରମାନଙ୍କ ପଦକ୍ଷେପକୁ ମଧ୍ୟ ତାରିଫ୍ କରିଛନ୍ତି ପ୍ରଧାନମନ୍ତ୍ରୀ । ଉଚିତ ସମୟରେ ଉଚିତ ପଦକ୍ଷେପ ନେଇ ରାଜ୍ୟମାନେ କରୋନା ପରିସ୍ଥିତିକୁ ଭଲ ଭାବେ ସମ୍ଭାଳିଛନ୍ତି । ତେବେ ଆମକୁ ଆହୁରି ଅଧିକ ସତର୍କ ରହିବାକୁ ପଡ଼ିବ ବୋଲି ପ୍ରଧାନମନ୍ତ୍ରୀ କହିଛନ୍ତି ।

ଶେଷରେ ପ୍ରଧାନମନ୍ତ୍ରୀ ଭାରତର ବୈଜ୍ଞାନିକମାନଙ୍କୁ କରୋନା ଭୂତାଣୁ ପ୍ରତିଷେଧକ ଟୀକା ବାହାର କରିବା ଉଦ୍ୟମରେ ଗବେଷଣା ଜାରି ରଖି ସଫଳତା ପାଇବାକୁ ଆହ୍ୱାନ ଦେଇଥିଲେ । ଲୋକମାନେ ଲକ୍ ଡାଉନ୍ ନିୟମକୁ କଡ଼ାକଡ଼ି ପାଳନ କରନ୍ତୁ ଏବଂ ସାମାଜିକ ଦୂରତ୍ୱ ବଜାୟ ରଖନ୍ତୁ ବୋଲି ପ୍ରଧାନମନ୍ତ୍ରୀ ନିବେଦନ କରିଛନ୍ତି ।

ସୂଚନାଯୋଗ୍ୟ ଓଡ଼ିଶା ପ୍ରଥମ ରାଜ୍ୟ ଭାବେ ଲକ୍ ଡାଉନ୍ ଅବଧିକୁ ଏପ୍ରିଲ୍ ୩୦ ତାରିଖ ଯାଏଁ ପୂର୍ବରୁ ବଢ଼ାଇ ସାରିଛି । ଓଡ଼ିଶା ପରେ ଆହୁରି ୧୦ଟି ରାଜ୍ୟ ମଧ୍ୟ ଲକ୍ ଡାଉନ୍ ଅବଧିକୁ ବୃଦ୍ଧି କରିଛନ୍ତି ।