ମାସ୍କ ନ ପିନ୍ଧି ଗଣିଲେଣି ୧ କୋଟି ୨୫ ଲକ୍ଷ ତଣ୍ଡ

ଲକ୍ ଡାଉନ୍ ରେ ପୁଲିସ କାର୍ଯ୍ୟକୁ ମୁଖ୍ୟମନ୍ତ୍ରୀଙ୍କ ଉଚ୍ଚପ୍ରଶଂସା

ଭୁୁବନେଶ୍ୱର: କୋଭିଡ୍ ନିୟମ ଉଲ୍ଲଂଘନରୁ ପୁଲିସ ଆଦାୟ କଲାଣି ପାଖାପାଖି ୧ କୋଟି ୪୦ ଲକ୍ଷ ଟଙ୍କା । କେବଳ ମାସ୍କ ବ୍ୟବହାର ଉଲ୍ଲଂଘନରୁ ଆଦାୟ ହୋଇଛି ୧ କୋଟି ୨୫ ଲକ୍ଷ ୮୪ ହଜାର ୧୮୦ ଟଙ୍କା ତଣ୍ଡ । ସାମାଜିକ ଦୂରତ୍ତ୍ୱ ଉଲ୍ଲଂଘନରେ ୧୧ ଲକ୍ଷ ୭୪ ହଜାର ୩୫୦ ଟଙ୍କା, ସାପ୍ତାହିକ ଲକ୍ ଡାଉନ୍ ଉଲ୍ଲଂଘନରେ ୩ ହଜାର ଟଙ୍କା ଏବଂ ରାତ୍ରୀକାଳୀନ କର୍ଫ୍ୟୁ ଉଲ୍ଲଂଘନ ପାଇଁ ୧ ଲକ୍ଷ ୩ ହଜାର ୮୦୦ ଟଙ୍କା ଆଦାୟ କରାଯାଇଛି ।

ଆଜି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଭିଡ଼ିଓ କନଫରେନ୍ସିଂ ବୈଠକରେ ପୁଲିସ ଡିଜି ଶ୍ରୀ ଅଭୟ ଏହି ସୂଚନା ଦେଇଛନ୍ତି । ଡିଜି କହିଛନ୍ତି ଲକ୍ ଡାଉନ୍ ସମୟରେ ଘରୋଇ ହିଂସା ଅଭିଯୋଗକ୍ରମେ ୯୨୦୫ ମହିଳାଙ୍କ ସହିତ ଫୋନ୍ ରେ ଯୋଗାଯୋଗ କରାଯାଇଛି । ୫୩ଟି କେସ୍ ରେ ଘରୋଇ ହିଂସାର ସୂଚନା ମିଳିଛି । ସାମଗ୍ରିକ ଭାବେ ପୁଲିସ ପକ୍ଷରୁ ବିଭିନ୍ନ କ୍ଷେତ୍ରରେ ସଚେତନତା କାର୍ଯ୍ୟକ୍ରମ, ବିଶେଷ କରି ମାସ୍କ ବ୍ୟବହାର ଓ ସାମାଜିକ ଦୂରତା ପାଳନ ପାଇଁ ଲୋକମାନଙ୍କୁ ସଚେତନ କରାଯାଉଛି ବୋଲି ଡିଜି କହିଛନ୍ତି ।

ଲକ୍ ଡାଉନ୍ ସମୟରେ ଓଡ଼ିଶା ପୁଲିସ ଉଚ୍ଚମାନର ସଂଯମତା ସହିତ ମର୍ଯ୍ୟାଦା ଓ ମାନବିକତା ପ୍ରଦର୍ଶନ କରି ପରିସ୍ଥିତିକୁ ନିୟନ୍ତ୍ରଣ କରିପାରିଛନ୍ତି ବୋଲି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ତାରିଫ୍ କରିଛନ୍ତି । ପୁଲିସ ବିଭାଗର ବରିଷ୍ଠ ଅଧିକାରୀ, ବିଭିନ୍ନ ରେଂଜର ଡିଆଇଜି, ଜିଲ୍ଲାର ଡିସିପି ତଥା ଏସପିମାନଙ୍କ ସହିତ ଭିଡ଼ିଓ କନଫରେନ୍ସିଂ ଆଲୋଚନା କାଳରେ ମୁଖ୍ୟମନ୍ତ୍ରୀ ଏଥିପାଇଁ ଓଡ଼ିଶା ପୁଲିସ ବାହିନୀକୁ ଉଚ୍ଚପ୍ରଶଂସା କରିଛନ୍ତି ।

ମୁଖ୍ୟମନ୍ତ୍ରୀ କହିଛନ୍ତି, ଲକ୍ ଡାଉନ୍ ସମୟରେ ଅନ୍ୟ ରାଜ୍ୟଗୁଡ଼ିକର ପ୍ରବାସୀ ଶ୍ରମିକମାନେ ଓଡ଼ିଶା ମଧ୍ୟ ଦେଇ ଯିବା ସମୟରେ ସେମାନଙ୍କୁ ସହାୟତା ଯୋଗାଇବା ପାଇଁ ଆମେ ଜିରୋ ୱାକିଂ ଇନସାଇଡ୍ ଓଡ଼ିଶା ନୀତି କାର୍ଯ୍ୟକାରୀ କରିଥିଲୁ । ଏହି ନୀତିକୁ ପୁଲିସ ବାହିନୀ ଉତ୍ତମ ସମନ୍ୱୟ ରଖି ସଫଳତାର ସହ କାର୍ଯ୍ୟ କରିଛନ୍ତି । ଅନ୍ୟ ରାଜ୍ୟର ପ୍ରବାସୀ ଶ୍ରମିକମାନଙ୍କୁ ମାନବୀୟ ସେବା ଯୋଗାଇ ଓଡ଼ିଶା ପୁଲିସର ଦକ୍ଷତା ଓ ବୃତ୍ତିଗତ ଉତ୍କର୍ଷତାର ନିଦର୍ଶନ କରିଛନ୍ତି ।

ବାତ୍ୟା ଅମ୍ଫନ୍ ସମୟରେ ଓଡ୍ରାଫ୍ ଓ ଅଗ୍ନିଶମ ସେବାର କର୍ମଚାରୀମାନେ ପଶ୍ଚିମବଙ୍ଗ ଯାଇ ରିଲିଫ ଓ ପୁରୁଦ୍ଧାର କାର୍ଯ୍ୟରେ ସହଯୋଗ କରିଥିଲେ । କରୋନା ଭୟ ସତ୍ତ୍ୱେ ସେମାନେ କୋଲକତାରେ ସାହାସ ଓ ମାନବିକତାର ସହ ବିପନ୍ନ ଲୋକଙ୍କୁ ସେବା ଯୋଗାଇ ଦେଲେ । କୋଲକତାକୁ ସହାୟତା ଯୋଗାଇ ଦେବାକୁ ଯାଇଥିବା ଆମର ଓଡ୍ରାଫ୍ ଓ ଅଗ୍ନିଶମ ସେବାର କର୍ମଚାରୀମାନେ କରୋନା ଭୂତାଣୁ ଦ୍ୱାରା ସଂକ୍ରମିତ ହୋଇଛନ୍ତି । ସେମାନଙ୍କ ସ୍ୱାସ୍ଥ୍ୟ ପ୍ରତି ବିଶେଷ ଧ୍ୟାନ ଦେବାକୁ ମୁଖ୍ୟମନ୍ତ୍ରୀ ପରାମର୍ଶ ଦେଇଥିଲେ ।

କରୋନା ଯୁଦ୍ଧ ସରିନାହିଁ । ତେଣୁ ଆମକୁ ଅଧିକ ସତର୍କ ହେବା ସହିତ ବୃତ୍ତିଗତ ଦକ୍ଷତାର ସହ କାମ କରିବାକୁ ପଡ଼ିବ । ଆଗାମୀ ଦିନରେ ସମାନ ମନୋଭାବ ନେଇ ସେବା ଜାରି ରଖିବାକୁ ମୁଖ୍ୟମନ୍ତ୍ରୀ ଆହ୍ୱାନ ଦେଇଥିଲେ ।

ଓଡ଼ିଶା ପୁଲିସରେ ମାନବ ସମ୍ବଳର ଯୁକ୍ତିସଙ୍ଗତ ପରିଚାଳନା କରି ଥାନାମାନଙ୍କରେ ଅଧିକ କର୍ମଚାରୀ ମୁତୟନ ପାଇଁ ମୁଖ୍ୟମନ୍ତ୍ରୀ ପରାମର୍ଶ ଦେଇଥିଲେ । ଏଥିପାଇଁ ୧୫ ଦିନ ମଧ୍ୟରେ ଉପଯୁକ୍ତ ଯୋଜନା ପ୍ରସ୍ତୁତ କରିବାକୁ ଡିଜିଙ୍କୁ ନିର୍ଦ୍ଦେଶ ଦେଇଥିଲେ ମୁଖ୍ୟମନ୍ତ୍ରୀ ।

ମୁଖ୍ୟ ଶାସନ ସଚିବ ଅସିତ୍ କୁମାର ତ୍ରିପାଠୀ, ୫-ଟି ସଚିବ ଭି.କେ.ପାଣ୍ଡିଆନ୍ ମଧ୍ୟ ବର୍ତ୍ତମାନ ସମୟରେ ପୁଲିସର ବୃତ୍ତିଗତ ଦକ୍ଷତା ଓ ମାନବୀୟ ମୂଲ୍ୟବୋଧର ଉଚ୍ଚପ୍ରଶଂସା କରିଥିଲେ । ଏହି ଦୁଇ ମଧ୍ୟରେ ଉତ୍ତମ ସମନ୍ୱୟ ରଖିବାରେ ପୁଲିସ ସଫଳ ହୋଇଥିବା କହିଥିଲେ ।