ସାଇତି ରଖାଯିବ ମହାପ୍ରଭୁଙ୍କ ଏବର୍ଷର ରଥ

ପୁରୀ: ମହାପ୍ରଭୁଙ୍କ ଏବର୍ଷର ରଥକୁ ଭଙ୍ଗାଯିବ ନାହିଁ । ତିନୋଟି ଯାକ ରଥକୁ ସଂରକ୍ଷଣ କରି ରଖାଯିବ । ଗତ ପରିଚାଳନା କମିଟି ଓ ଛତିଶା ନିଯୋଗର ମିଳିତ ବୈଠକରେ ଏହି ନିଷ୍ପତ୍ତି ନିଆଯାଇଥିବା ସମ୍ପର୍କରେ ଆଜି ସୂଚନା ଦେଇଛନ୍ତି ଶ୍ରୀମନ୍ଦିର ମୁଖ୍ୟ ପ୍ରଶାସକ ଡ. କ୍ରିଷନ୍ କୁମାର । ଶ୍ରୀଜଗନ୍ନାଥ ବଲ୍ଲଭ ମଠରେ ତିନି ରଥକୁ ସାଇତି ରଖିବା ପାଇଁ ପ୍ରାଥମିକ ନିଷ୍ପତ୍ତି ହୋଇଛି । ତେବେ କିଭଳି ରଖାଯିବ ତାହା ଉପରେ ତର୍ଜମା ଚାଲିଥିବା ସେ କହିଛନ୍ତି ।

ଆଜି ଶ୍ରୀମନ୍ଦିର କାର୍ଯ୍ୟାଳୟରେ ଅନୁଷ୍ଠିତ ଏକ ଗୁରୁତ୍ୱପୂର୍ଣ୍ଣ ବୈଠକରେ ଏହା ଉପରେ ଆଲୋଚନା ହୋଇଥିଲା । ମହାରଣା, ଭୋଇ ସେବାୟତମାନଙ୍କ ସହ ଶ୍ରୀମନ୍ଦିର ମୁଖ୍ୟ ପ୍ରଶାସକ ଓ ପରିଚାଳନା କମିଟିର ସଦସ୍ୟମାନେ ବ୍ୟାପକ ବିଚାର ବିମର୍ଷ କରିଥିଲେ । ବୈଠକ ପରେ ଡ. କ୍ରିଷନ୍ କୁମାର ଗଣମାଧ୍ୟମକୁ କହିଛନ୍ତି, ବିଧି ମୁତାବକ ତିନି ରଥକୁ ଭଙ୍ଗାଯିବ । ଭଙ୍ଗାଯିବା ପରେ ଯେତିକି ଅଂଶ ସଂରକ୍ଷିତ ରଖିହେବ ସେହି ଅଂଶକୁ ଶ୍ରୀଜଗନ୍ନାଥ ବଲ୍ଲଭ ମଠକୁ ନିଆଯିବ । ପୂର୍ବରୁ ପ୍ରସ୍ତୁତ ହୋଇଥିବା ଶ୍ରୀଜଗନ୍ନାଥ ବଲ୍ଲଭ ଉନ୍ନୟନ ପ୍ରକଳ୍ପ ମାଷ୍ଟର୍ ପ୍ଲାନ୍ ଅନୁଯାୟୀ ପ୍ରତୀକାତ୍ମକ ରଥ ନିର୍ମାଣ ପ୍ରସ୍ତାବକୁ କାର୍ଯ୍ୟକାରୀ କରାଯିବ । ସଂରକ୍ଷିତ ଅଂଶ ଓ ଅନ୍ୟ ଅଂଶକୁ ସେଠାରେ ନିର୍ମାଣ କରାଯାଇ ସାଇତି ରଖାଯିବ ।

ତେବେ ଏଗୁଡ଼ିକୁ କିଭଳି ରଖାଯିବ ସେ ନେଇ ଆଜି ଆଲୋଚନା ହୋଇଥିଲା । ପରବର୍ତ୍ତୀ ସମୟରେ ଏହା ଉପରେ ଅଧିକ ଆଲୋଚନା, ଜର୍ତମା କରାଯାଇ ନିଷ୍ପତ୍ତି ନିଆଯିବାକୁ ସ୍ଥିର ହୋଇଛି । ଏଥିପାଇଁ ଏକ ଟେକ୍ନିକାଲ୍ ଟିମ୍ ର ସହାୟତା ନିଆଯିବ ବୋଲି ମୁଖ୍ୟ ପ୍ରଶାସକ କହିଛନ୍ତି ।

କୋଭିଡ୍ ହସ୍ପିଟାଲ୍, କେୟାର ସେଣ୍ଟର୍ ହେବ

ଶ୍ରୀମନ୍ଦିର ସେବାୟତ,ଶ୍ରୀମନ୍ଦିର କାର୍ଯ୍ୟାଳୟ ଅଧିକାରୀ ଓ କର୍ମଚାରୀମାନଙ୍କ ସ୍ୱାସ୍ଥ୍ୟକୁ ନଜରରେ ରଖି ରାଜ୍ୟ ସରକାରଙ୍କ ପକ୍ଷରୁ ପୁରୀରେ ଏକ କୋଭିଡ୍ ହସ୍ପିଟାଲ୍ ଓ କୋଭିଡ୍ କେୟାର ସେଣ୍ଟର୍ ସ୍ଥାପନ ପାଇଁ ଶ୍ରୀମନ୍ଦିର ପ୍ରଶାସନ ନିଷ୍ପତ୍ତି ନେଇଛି । ପୁରୀର ଏକ ହୋଟେଲ୍ ରେ ୧୫ ଶଯ୍ୟାର ହସ୍ପିଟାଲ୍ ଏବଂ ୩୦ ଶଯ୍ୟାର କୋଭିଡ୍ କେୟାର୍ ସେଣ୍ଟର୍ ହେବ । ଜିଲ୍ଲା ପ୍ରଶାସନ, ଶ୍ରୀମନ୍ଦିର ପ୍ରଶାସନ ଏବଂ ସେବାୟତ ପ୍ରତିନିଧିଙ୍କ ଏକ ଟିମ୍ କୁ ଏହାର ଦାୟିତ୍ୱ ଦିଆଯାଇଛି । ଶ୍ରୀମନ୍ଦିର ସେବାୟତ, ଶ୍ରୀମନ୍ଦିର କାର୍ଯ୍ୟାଳୟର ଅଧିକାରୀ ଓ କର୍ମଚାରୀମାନଙ୍କ ସୁରକ୍ଷା ଦୃଷ୍ଟିରୁ ଏହି ବ୍ୟବସ୍ଥା କରାଯାଉଥିବା ମୁଖ୍ୟ ପ୍ରଶାସକ ଡ. କ୍ରିଷନ୍ କୁମାର ସୂଚନା ଦେଇଛନ୍ତି ।