ଭୁବନେଶ୍ୱର: ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ପାଟକୁରା ନିର୍ବାଚନ ପ୍ରଚାର ଆଗମନ ପରିପ୍ରେକ୍ଷୀରେ ଜଣେ କାର୍ଯ୍ୟରତ ସାମ୍ବାଦିକଙ୍କ ଉପରେ ଚିହିଁକି ଯାଇ ହାତ ଉଠାଇଛନ୍ତି କେନ୍ଦ୍ରାପଡ଼ା ଏସପି ନୀତି ଶେଖର । ତାହା ପୁଣି ବିଜେଡ଼ିର ଦୁଇ ହେଭିୱେଟ୍ ଙ୍କ ଉପସ୍ଥିତିରେ । ମୁଖ୍ୟମନ୍ତ୍ରୀଙ୍କ ସୁରକ୍ଷା ଆଳରେ ଏସପିଙ୍କର ଏଭଳି ଆଚରଣର ଭିଡ଼ିଓ ସୋସିଆଲ୍ ମିଡ଼ିଆରେ ଭାଇରାଲ୍ ହେବା ପରେ ହଟଚମଟ ସୃଷ୍ଟି ହୋଇଛି । ବିଭିନ୍ନ ମହଲରେ ଏହା ତୀବ୍ର ପ୍ରତିକ୍ରିୟା ସୃଷ୍ଟି କରିବା ପରେ ଏସପି କ୍ଷମା ମାଗିଛନ୍ତି ।
କେନ୍ଦ୍ରାପଡ଼ାର ବାରିମୂଳଠାରେ ଏହି ଅଘଟଣ ଘଟିଥିଲା । ବୁଧବାର ଦିନ ଭୁବନେଶ୍ୱରରୁ ହେଲିକପ୍ଟରରେ ଯାଇଥିବା ମୁଖ୍ୟମନ୍ତ୍ରୀ ବାରିମୂଳରେ ପହଞ୍ଚି ପାଟକୁରା ନିର୍ବାଚନମଣ୍ଡଳୀରେ ପ୍ରଚାର ପାଇଁ ଯିବାକୁ ଥିବାରୁ ହେଲିପ୍ୟାଡ଼ ନିକଟରେ ବିଜେଡ଼ି କର୍ମୀଙ୍କ ସହ ଗଣମାଧ୍ୟମ ପ୍ରତିନିଧିଙ୍କ ଭିଡ଼ ଜମିଥିଲା । ସୁରକ୍ଷା କର୍ଡନ ବାହାରେ ସମସ୍ତେ ଛିଡ଼ା ହେବାର ବ୍ୟବସ୍ଥା ହୋଇଥିଲା । ନିଜେ ଏସପି ସେଠାରେ ଉପସ୍ଥିତ ରହି ଭିଡ଼ ନିୟନ୍ତ୍ରଣ କରୁଥିଲା ବେଳେ କିଛି ବିଜେଡ଼ି କର୍ମୀ କର୍ଡନ ଭିତରକୁ ପଳାଇ ଯାଇଥିଲେ । ଏସପି ସେମାନଙ୍କୁ ଠେଲି ଠେଲି ବାହାରକୁ ଆଣିବା ଭିତରେ ନିର୍ଦ୍ଧାରିତ ଜାଗାରେ ଛିଡ଼ା ହୋଇଥିବା ସାମ୍ବାଦିକମାନଙ୍କୁ ବି ଛାଡ଼ି ନ ଥିଲେ । ଏହି ଗହଳି ଭିତରେ ଏସପିଙ୍କ ଧକ୍କାର ଶିକାର ହୋଇଥିଲେ ନ୍ୟଜ୍ ୧୮ ଓଡ଼ିଆ ଚାନେଲ୍ ର ଭୁବନେଶ୍ୱର ପ୍ରତିନିଧି ଅଜେଶ ମଲ୍ଲିକ । ସେ ନିଜକୁ ସାମ୍ବାଦିକର ପରିଚୟ ଦେଇଥିଲେ ମଧ୍ୟ ଏସପି ତାହା ଶୁଣିବା ପରିବର୍ତ୍ତେ ଅଧିକ ଚିହିଁକି ଉଠିଥିଲେ । ରାଗ ତମ ତମ ଏସପି ତାଙ୍କ ଉପରକୁ ହାତ ଉଠାଇଥିଲେ । ଏହି ଘଟଣା ବେଳେ ନିକଟରେ ଉପସ୍ଥିତ ଥିଲେ ବିଜେଡ଼ି ହେଭିୱେଟ୍ ପ୍ରଣବ ପ୍ରକାଶ ଦାସ ଏବଂ ସଞ୍ଜୟ ଦାସବର୍ମା । ଏସପିଙ୍କ ଏଭଳି କାର୍ଯ୍ୟକୁ ସେଠି ଉପସ୍ଥିତ ସାମ୍ବାଦିକମାନେ ବିରୋଧ କରିବା ପରେ ବିଜେଡ଼ି ନେତାମାନେ ବୁଝାସୁଝା କରି ପରିସ୍ଥିତି ଶାନ୍ତ କରାଇଥିଲେ ।
ତେବେ ସୋସିଆଲ୍ ମିଡ଼ିଆରେ ଏହି ଦୃଶ୍ୟ ଭାଇରାଲ୍ ହୋଇଯିବାରୁ ବିଭିନ୍ନ ମହଲରେ ତୀବ୍ର ପ୍ରତିକ୍ରିୟା ସୃଷ୍ଟି କରିଛି । ସାମ୍ବାଦିକମାନେ ଏହାର ପ୍ରତିବାଦ କରିଛନ୍ତି । ବିରୋଧ ଓ ପ୍ରତିବାଦର ସ୍ୱର ଜୋର ହେଉଥିବା ବେଳେ ଏସପି ଶ୍ରୀ ଶେଖର କ୍ଷମା ମାଗିଛନ୍ତି । କହିଛନ୍ତି, ମୁଁ କୌଣସି ଉଦ୍ଦେଶ୍ୟ ରଖି ସାମ୍ବାଦିକଙ୍କୁ ଏଭଳି ବ୍ୟବହାର କରିନାହିଁ । ସେଠାରେ କେବଳ ଗହଳି ନିୟନ୍ତ୍ରଣ କରିବାକୁ ଚେଷ୍ଟା କରୁଥିଲି ଏବଂ ପ୍ରବଳ ପାଟିତୁଣ୍ଡ ଭିତରେ ଉଚ୍ଚ ସ୍ୱରରେ କଥା କହିବାକୁ ପଡୁଥିଲା । ସାମ୍ବାଦିକମାନଙ୍କ ପ୍ରତି ମୋର ଯଥେଷ୍ଟ ସମ୍ମାନ ରହିଛି ଏବଂ କେବେ ବି କୌଣସି ସାମ୍ବାଦିକଙ୍କ ପ୍ରତି ଖରାପ ବ୍ୟବହାର କରିନାହିଁ । ମୋ ବ୍ୟବହାର କ’ଣ ସ୍ଥାନୀୟ ସାମ୍ବାଦିକମାନେ ଭଲଭାବେ କହିପାରିବେ । ତେବେ ଯାହା ବି ହେଉ, ଏହା ଯଦି କାହାରିକୁ ଆଘାତ ଦେଇଥାଏ ତେବେ ମୁଁ କ୍ଷମା ମାଗୁଛି ଏବଂ ସାଧାରଣ ସେବା କାର୍ଯ୍ୟରେ ସମସ୍ତଙ୍କ ସହଯୋଗ ଚାହୁଁଛି ।
