ସିଏଜି ହେବେ ଗିରୀଶ ମୁର୍ମୁ !

ସିଏଜି ହେବେ କି ଗିରୀଶ ଚନ୍ଦ୍ର ମୁର୍ମୁ ! ଜାତୀୟ ପାୱାର୍ କରିଡରରେ ଏବେ ସେମିତି କିଛି ଚର୍ଚ୍ଚା ଜୋର୍ ଧରିଛି । କାରଣ ବର୍ତ୍ତମାନ ସିଏଜି ଥିବା ରାଜୀବ ମହର୍ଷି, ଆସନ୍ତା ୮ ତାରିଖରେ ଅବସର ନେଉଥିବା ବେଳେ ଜାମ୍ମୁ-କାଶ୍ମୀର ଉପ ରାଜ୍ୟପାଳ ପଦରୁ ଗିରୀଶ ଚନ୍ଦ୍ର ମୁର୍ମୁ ଇସ୍ତଫା ଦେଇଛନ୍ତି । ସେପଟେ ପୂର୍ବତନ କେନ୍ଦ୍ର ମନ୍ତ୍ରୀ ତଥା ବରିଷ୍ଠ ବିଜେପି ନେତା ମନୋଜ ସିହ୍ନାଙ୍କୁ ଜାମ୍ମୁ-କାଶ୍ମୀରର ଉପ ରାଜ୍ୟପାଳ ନିଯୁକ୍ତ କରାଯିବ । ଏନେଇ ରାଷ୍ଟ୍ରପତି ଭବନ ପକ୍ଷରୁ ନିଯୁକ୍ତିନାମା ପ୍ରକାଶ ପାଇଛି । ଯେତେଦୂର ଆଶା, ଗିରୀଶ ମୁର୍ମୁଙ୍କୁ ଦେଶର ପରବର୍ତ୍ତୀ ସିଏଜି ପଦରେ ଅବସ୍ଥାପିତ କରିପାରନ୍ତି ମୋଦି ସରକାର ।

ସିଏଜି ଏକ ସାମ୍ବିଧାନିକ ପଦ । ଯେଉଁଥିରେ ମୁଖ୍ୟତଃ ଅବସରପ୍ରାପ୍ତ ପ୍ରଶାସନିକ ଅଧିକାରୀଙ୍କୁ ନିଯୁକ୍ତି ଦିଆ ଯାଇଥାଏ । ଯେଉଁ ସରକାର କ୍ଷମତାରେ ରହନ୍ତି, ସେ ତାଙ୍କର ମନ ପସନ୍ଦର ବିଶ୍ୱସ୍ତ ଅଧିକାରୀଙ୍କୁ ଏହି ପଦରେ ରଖିଥାନ୍ତି । ତେଣୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଖାସ୍ ବିଶ୍ୱସ୍ତ ଥିବା ଏହି ପୂର୍ବତନ ଓଡ଼ିଆ ପ୍ରାଶାସନିକ ଅଧିକାରୀ ଦେଶର ପ୍ରମୁଖ ଅଡିଟର୍ ଜେନେରାଲ୍ ହେବା ସମ୍ଭାବନା ଅଧିକ ।

୧୯୮୫ ବ୍ୟାଚର ଏହି ଗୁଜରାଟ କ୍ୟାଡର୍ ଆଇଏଏସ୍ ଅଧିକାରୀ, ମୋଦି ମୁଖ୍ୟମନ୍ତ୍ରୀ ଥିବା ବେଳେ ତାଙ୍କ ସହ କାମ କରୁଥିଲେ । ମୋଦି ପ୍ରଧାନମନ୍ତ୍ରୀ ହେବା ପରେ କେନ୍ଦ୍ର ଅର୍ଥ ମନ୍ତ୍ରଣାଳୟର ଖର୍ଚ୍ଚ ବିଭାଗରେ ଯୁଗ୍ମ ସଚିବ ଭାବେ ଯୋଗ ଦେଇଥିଲେ । ଗତବର୍ଷ ନଭେମ୍ବର ୩୦ ତାରିଖରେ ସେ ଚାକିରିରୁ ଅବସର ନେଇଥାନ୍ତେ । କିନ୍ତୁ ଗତବର୍ଷ ଅଗଷ୍ଟ ୫ ତାରିଖରେ ଜାମ୍ମୁ-କାଶ୍ମୀରରୁ ୩୭୦ ଧାରା ଉଚ୍ଛେଦ କରାଯାଇ ଦୁଇଟି କେନ୍ଦ୍ର ଶାସିତ ଅଞ୍ଚଳ କରାଯିବା ପରେ, ଚାକିରିରୁ ଇସ୍ତଫା ଦେଇ ସେ ଉପ ରାଜ୍ୟପାଳ ହୋଇଥିଲେ । ଅକ୍ଟୋବର ମାସରେ ଗିରୀଶ ଚନ୍ଦ୍ର ମୁର୍ମୁଙ୍କୁ ଜାମ୍ମୁ-କାଶ୍ମୀରର ଲେଫ୍ଟନାଣ୍ଟ ଗଭର୍ଣ୍ଣର ନିଯୁକ୍ତ କରାଯାଇଥିଲା ।

ସିଏଜି ଏକ ସାମ୍ବିଧାନିକ ପଦ ସତ, କିନ୍ତୁ କ୍ଷମତାରେ ଥିବା ସରକାରର ରାଜନୈତିକ କାର୍ୟ୍ୟକ୍ରମ ପାଇଁ ଏହାର ମୁଖ୍ୟଙ୍କ ଭୂମିକା ଗୁରୁତ୍ୱପୂର୍ଣ୍ଣ । ସିଏଜି ଅଧିକାଂଶ ସମୟରେ ବିଭିନ୍ନ ରାଜନେତା ଓ ରାଜନୈତିକ ଦଳଙ୍କ ସଂସ୍ପର୍ଶରେ ଆସିଥାନ୍ତି । ତେଣୁ ସେସବୁକି ହ୍ୟାଣ୍ଡଲ୍ କରି ଗିରୀଶ ମୁର୍ମୁ ହିଁ ମୋଦି ସରକାରଙ୍କ ଆର୍ଥିକ ଇମେଜ୍ ରକ୍ଷା କରିବାକୁ ଉପଯୁକ୍ତ ବ୍ୟକ୍ତିତ୍ୱ ବୋଲି ଚର୍ଚ୍ଚା ହେଉଛି ।

(ବରେନ୍ଦ୍ର କୃଷ୍ଣ ସାହୁଙ୍କ ରିପୋର୍ଟ)