ସ୍ପେଶାଲ୍ ଫୋକସ୍ ଷ୍ଟେଟ୍ ଦାବି କଲେ ନବୀନ

ଭୁବନେଶ୍ୱର: ପୂର୍ବାଞ୍ଚଳ ଜୋନାଲ୍ ପରିଷଦ ବୈଠକରେ ଯୋଗଦେଇ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଓଡ଼ିଶାକୁ ସ୍ପେଶାଲ୍ ଫୋକସ୍ ଷ୍ଟେଟ୍ ମାନ୍ୟତାର ଦାବି କରିଛନ୍ତି । ପ୍ରାକୃତିକ ବିପର୍ଯ୍ୟୟରେ ଓଡ଼ିଶା ଯୁଝୁଥିବା ଦର୍ଶାଇ ସେ ଏହି ଯୁକ୍ତି ଉପସ୍ଥାପନ କରିବା ସହ ଫନି ସାୟତା ପାଇଁ କେନ୍ଦ୍ର ସରକାରଙ୍କୁ ଧନ୍ୟବାଦ ଜଣାଇଥିଲେ । ଆଜି ଲୋକସେବା ଭବନରେ କେନ୍ଦ୍ର ଗୃହମନ୍ତ୍ରୀ ଅମିତ ଶାହାଙ୍କ ସଭାପତିତ୍ୱରେ ଅନୁଷ୍ଠିତ ଏହି ବୈଠକରେ ମୁଖ୍ୟମନ୍ତ୍ରୀ ସମଗ୍ର ପୂର୍ବାଞ୍ଚଳ ସମେତ ଓଡ଼ିଶାର ଅନେକ ଗୁରୁତ୍ୱପୂର୍ଣ୍ଣ ପ୍ରସଙ୍ଗ ଉତଥାପନ କରିଛନ୍ତି ।

ଜୋନାଲ୍ ପରିଷଦର ମୁଖ୍ୟ ଉଦ୍ଦେଶ୍ୟ ଜାତୀୟ ସଂହତି । ତେବେ ଆର୍ଥିକ, ଭିତ୍ତିଭୂମି ଏବଂ ବୈଷୟିକ କ୍ଷେତ୍ରରେ ସଂହତି ହେଲେ ଯାଇ ଭାବଗତ ସଂହତି ଦୃଢ଼ୀଭୂତ ହୋଇପାରିବ ବୋଲି ନବୀନ ମତ ରଖିଥିଲେ । ଟେଲି ଯୋଗାଯୋଗ, ରେଲୱେ ଯୋଗାଯୋଗ ଏବଂ ବ୍ୟାଙ୍କିଂ ସେବାରେ ପୂର୍ବାଞ୍ଚଳ ରାଜ୍ୟଗୁଡ଼ିକ ପଛରେ ପଡ଼ିଛନ୍ତି । ପୂର୍ବାଞ୍ଚଳକୁ ଆର୍ଥିକ ଅନୁଦାନ ଦ୍ୱିଗୁଣିତ କରାଗଲେ ଯାଇ ଏହା ଦେଶର ଅନ୍ୟ ରାଜ୍ୟମାନଙ୍କ ସହ ସମକକ୍ଷ ହୋଇପାରନ୍ତା । ଏହି ଯୁକ୍ତି ସହ ପୂର୍ବାଞ୍ଚଳ ଭିତ୍ତିଭୂମି ବିକାଶ ପାଇଁ ସ୍ପେଶାଲ ଆର୍ଥିକ ପ୍ୟାକେଜ ଘୋଷଣା କରିବାକୁ ଦାବି କରିଥିଲେ ନବୀନ ।

କୋଇଲା ରୟାଲିଟି ପ୍ରସଙ୍ଗ ଉଠାଇ ମୁଖ୍ୟମନ୍ତ୍ରୀ କହିଥିଲେ, ୨୦୧୨ରୁ ଏଯାଏଁ କୋଇଲା ରୟାଲିଟି ସଂଶୋଧନ କରାଯାଇନାହିଁ । ତୁରନ୍ତ କୋଇଲା ରୟାଲିଟି ବୃଦ୍ଧି ଓ କ୍ଲିନ୍ ଏନର୍ଜି ସେସ୍ ରୁ ଓଡ଼ିଶାକୁ ଭାଗ ମିଳୁ ।

ସେହିଭଳି ଧାନ ସଂଗ୍ରହ ସବସିଡି ମିଳି ନ ଥିବାରୁ ବୈଠକରେ ଉଦବେଗ ପ୍ରକାଶ କରିଥିଲେ ନବୀନ । ସବସିଡି ବିଳମ୍ବ ହେତୁ ଚାଷୀମାନେ ହଇରାଣ ହେଉଥିବା କହିଥିଲେ ।

ରେଳ ଭିତ୍ତିଭୂମି ପାଇଁ ରାଜ୍ୟ ମାଗଣା ଜମି ଯୋଗାଇଦେବା ସହ ୫୦% ଅର୍ଥ ଦେଉଛି । ତା ସତ୍ତ୍ୱେ ବି କାର୍ଯ୍ୟ ଯଥେଷ୍ଟ ଅଗ୍ରଗତି କରୁନାହିଁ ବୋଲି ନବୀନ ଦର୍ଶାଇଥିଲେ ।

ସମ୍ବିଧାନ ଅଷ୍ଟମ ପରିଚ୍ଛେଦରେ ହୋ, ମୁଣ୍ଡାର. ଭୂମିଜ ଭାଷା ସାମିଲ ପାଇଁ ମଧ୍ୟ ଦାବି କରିଥିଲେ ମୁଖ୍ୟମନ୍ତ୍ରୀ ।

ଗୃହମନ୍ତ୍ରୀ ଶ୍ରୀ ଶାହାଙ୍କ ସଭାପତିତ୍ୱରେ ଅନୁଷ୍ଠିତ ବୈଠକରେ ଓଡ଼ିଶା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ସମେତ ପଶ୍ଚିମ ବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ, ବିହାର ମୁଖ୍ୟମନ୍ତ୍ରୀ ନୀତିଶ କୁମାର ଏବଂ ଝାଡଖଣ୍ଡ ମୁଖ୍ୟମନ୍ତ୍ରୀ ହେମନ୍ତ ସୋରେନ୍ ଙ୍କ ପକ୍ଷରୁ ରାଜ୍ୟର ଅର୍ଥମନ୍ତ୍ରୀ ଯୋଗଦେଇଛନ୍ତି ।