– କରୋନା ମୁକାବିଲାରେ ରାଜ୍ୟ ସରକାରଙ୍କ ବଡ଼ ସଫଳତା
– ଦେଶର ସର୍ବବୃହତ୍ତ କୋଭିଡ୍ ହସ୍ପିଟାଲ୍ ଓଡ଼ିଶାରେ
– କିମସ୍ ରେ ୫୦୦, ଅଶ୍ୱିନୀରେ ୧୫୦ ଶଯ୍ୟା
– ୩ ଦିନ ମଧ୍ୟରେ ପ୍ରସ୍ତୁତ ହେବ ସମ୍
ଭୁବନେଶ୍ୱର: କରୋନା ମୁକାବିଲାରେ ରାଜ୍ୟ ସରକାରଙ୍କ ଅକ୍ଲାନ୍ତ ଉଦ୍ୟମକୁ ଏକ ବଡ଼ ସଫଳତା ମିଳିଛି । ମାତ୍ର ୭ ଦିନରେ ଛିଡ଼ା ହୋଇଛି ୬୫୦ ଶଯ୍ୟାର ଦୁଇଟି କୋଭିଡ୍ ହସ୍ପିଟାଲ୍ । ଦେଶର ଏହା ସର୍ବବୃହତ୍ତ କୋଭିଡ୍ ହସ୍ପିଟାଲ୍ ର ମାନ୍ୟତା ଆଣିଛି । ଓଡ଼ିଶା ମାଇନିଂ କର୍ପୋରେସନ୍(ଓଏମସି) ପ୍ରାୟୋଜନରେ ଭୁବନେଶ୍ୱର କିମସ୍ ରେ ୫୦୦ ଶଯ୍ୟା ଓ କଟକର ଅଶ୍ୱିନୀରେ ୧୫୦ ଶଯ୍ୟାର ଦୁଇଟି ଯାକ କୋଭିଡ୍ ହସ୍ପିଟାଲ୍ ଆଜିଠାରୁ କାର୍ଯ୍ୟକ୍ଷମ ହୋଇଛି । ଏଣିକି କରୋନା ରୋଗୀମାନଙ୍କୁ ଏହି ଦୁଇଟି ସ୍ୱତନ୍ତ୍ର ହସ୍ପିଟାଲ୍ ରେ ଚିକିତ୍ସା ସୁବିଧା ମିଳିବ । ତାହା ପୁଣି ମାଗଣାରେ । ରୋଗୀଙ୍କ ଚିକିତ୍ସା, ରହିବା ଓ ଖାଇବା ଖର୍ଚ୍ଚ ରାଜ୍ୟ ସରକାର ବହନ କରିବେ ବୋଲି ପୂର୍ବରୁ ମୁଖ୍ୟମନ୍ତ୍ରୀ ଘୋଷଣା କରିସାରିଛନ୍ତି ।
ରେକର୍ଡ ସମୟ ମଧ୍ୟରେ ଦୁଇଟି ଯାକ ସ୍ୱତନ୍ତ୍ର ହସ୍ପିଟାଲ୍ ରୋଗୀମାନଙ୍କ ପାଇଁ ପ୍ରସ୍ତୁତ ହୋଇଥିବାରୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଖୁସି ପ୍ରକଟ କରି କିମସ୍ ଏବଂ ଅଶ୍ୱିନୀ ହସ୍ପିଟାଲ୍ କର୍ତ୍ତୃପକ୍ଷଙ୍କୁ ଧନ୍ୟବାଦ ଓ ଅଭିନନ୍ଦନ ଜଣାଇଛନ୍ତି । ସେମାନଙ୍କ ସହଯୋଗ ପାଇଁ ମାତ୍ର ସପ୍ତାହକ ମଧ୍ୟରେ ଏହା ପ୍ରସ୍ତୁତ ହୋଇପାରିଲା ବୋଲି ମୁଖ୍ୟମନ୍ତ୍ରୀ କହିଛନ୍ତି । ଏଥିସହ ଡାକ୍ତର ଓ ପାରାମେଡ଼ିକାଲ୍ କର୍ମଚାରୀଙ୍କ ସହ କଥାବାର୍ତ୍ତା କରିଥିଲେ ମୁଖ୍ୟମନ୍ତ୍ରୀ । କରୋନା ବିରୋଧୀ ସଂଗ୍ରାମରେ ସେମାନଙ୍କ ଅବଦାନକୁ ମୁଖ୍ୟମନ୍ତ୍ରୀ ଭୂୟସୀ ପ୍ରଶଂସା କରିଥିଲେ ।
ଏହି ସ୍ୱତନ୍ତ୍ର କୋଭିଡ୍ ହସ୍ପିଟାଲ୍ ରେ କରୋନା ରୋଗୀଙ୍କ ଉତ୍ତମ ଚିକିତ୍ସା ପାଇଁ ଓଡ଼ିଶା ସମ୍ପୂର୍ଣ୍ଣ ପ୍ରସ୍ତୁତ ବୋଲି ମୁଖ୍ୟମନ୍ତ୍ରୀ କହିଛନ୍ତି । ତେବେ ସାମାଜିକ ଦୂରତ୍ୱ ଏବଂ ଲକ୍ ଡାଉନ୍ ଗାଇଡଲାଇନ୍ କୁ କଡ଼ାକଡ଼ି ପାଳନ କଲେ ଯାଇ ଆମେ କରୋନା ଯୁଦ୍ଧକୁ ଜିତିପାରିବା ବୋଲି ମୁଖ୍ୟମନ୍ତ୍ରୀ କହିଛନ୍ତି ।
