ଭୁବନେଶ୍ୱର: ଓଡ଼ିଶାରେ ଏଥର ବିଜେପି କାହା ନେତୃତ୍ୱରେ ନିର୍ବାଚନ ଲଢ଼ିବ? ଏହାକୁ ନେଇ ବହୁ ଦିନରୁ ରାଜନୈତିକ ଚର୍ଚ୍ଚା ଆଲୋଚନା ଚାଲିଛି । କେନ୍ଦ୍ରୀୟ ନେତୃତ୍ୱ ଔପଚାରିକ ଭାବେ ଏ ପର୍ଯ୍ୟନ୍ତ କାହା ନାଁ ଘୋଷଣା କରିନାହାନ୍ତି । ମାତ୍ର ଦଳର ରାଷ୍ଟ୍ରୀୟ ଅଧ୍ୟକ୍ଷ ଜେ.ପି.ନଡ୍ଡାଙ୍କ ଗତକାଲିର କାର୍ଯ୍ୟକ୍ରମ ଏବଂ ଆଜି ଭୁବନେଶ୍ୱରରେ ବିଶ୍ୱସ୍ତରୀୟ ରେଳଷ୍ଟେସନ୍ ର ଭିତ୍ତିପ୍ରସ୍ତର କାର୍ଯ୍ୟକ୍ରମରୁ ଏହାର ସ୍ପଷ୍ଟ ଆଭାସ ମିଳିଯାଇଛି ।
ଭୁବନେଶ୍ୱରେ ବିଶ୍ୱସ୍ତରୀୟ ରେଳ ଷ୍ଟେସନ୍ ର ଭିତ୍ତିପ୍ରସ୍ତର ଉତ୍ସବରେ ଯୋଗଦେଇଥିବା ରେଳମନ୍ତ୍ରୀ ଅଶ୍ୱିନୀ ବୈଷ୍ଣବ ଏବଂ କୋଇଲା, ଖଣି, ସଂସଦୀୟ ବ୍ୟାପାର ମନ୍ତ୍ରୀ ପ୍ରହ୍ଲାଦ ଯୋଶୀ ଧର୍ମେନ୍ଦ୍ରଙ୍କ ନେତୃତ୍ୱର ପ୍ରଶଂସାରେ ଶତମୁଖର ହୋଇଥିଲେ । ଓଡ଼ିଶା ପାଇଁ ଧର୍ମେନ୍ଦ୍ରଙ୍କ ସ୍ୱତନ୍ତ୍ର ଭିଜନ୍ ରହିଥିବା କହି ସେମାନେ ତାଙ୍କୁ ଓଡ଼ିଶା ବିଜେପିର ଚେହେରା ବୋଲି ଜଣାଇ ଦେଇଥିଲେ ।
ଏହି ସରକାରୀ ସଭାରେ କେନ୍ଦ୍ରମନ୍ତ୍ରୀ ଅଶ୍ୱିନୀ ବୈଷ୍ଣବ କେନ୍ଦ୍ରୀୟ ଯୋଜନାରେ ଓଡ଼ିଶା ବିକାଶର ସବୁ ଶ୍ରେୟ ଦେଇଥିଲେ ଧର୍ମେନ୍ଦ୍ରଙ୍କୁ । ସେ କହିଥିଲେ, ପ୍ରଧାନ ସାର୍ ଙ୍କର ଓଡ଼ିଶା ପ୍ରତି ବହୁତ ବଡ଼ ଭିଜନ୍ ଅଛି । ତାଙ୍କର ଭିଜନ୍ କୁ ବାସ୍ତବ ରୂପ ଦିଆଗଲେ ଓଡ଼ିଶା ୧ ଟ୍ରିଲିୟନ୍ ଅର୍ଥନୀତିରେ ପରିଣତ ହୋଇଯିବ । ଓଡ଼ିଶାରେ ଆଇଟି, ଇଣ୍ଡଷ୍ଟ୍ରି, ଷ୍ଟିଲ୍, ରେଲୱେ ନେଟୱର୍କ ଉନ୍ନତି ସାଧନରେ ପ୍ରଧାନ ସାର୍ ଙ୍କର ବହୁତ ଅବଦାନ ଅଛି । ସବୁ କାମରେ ମୁଁ ତାଙ୍କୁ ପଚାରେ । ତାଙ୍କର ପରାମର୍ଶରେ ଆଗକୁ ବଢ଼େ ବୋଲି ଶ୍ରୀ ବୈଷ୍ଣବ କହିଥିଲେ ।
ସେହିଭଳି କୋଇଲା, ଖଣି ଏବଂ ସଂସଦୀୟ ବ୍ୟାପାର ମନ୍ତ୍ରୀ ପ୍ରହ୍ଲାଦ ଯୋଶୀ ମଧ୍ୟ ଧର୍ମେନ୍ଦ୍ରଙ୍କ ଦକ୍ଷତା ଓ ନେତୃତ୍ୱରର ଗୁଣଗାନ କରିଥିଲେ । ଧର୍ମେନ୍ଦ୍ରଙ୍କୁ ସେ ନିଜ ରାଜନୈତିକ ଗଡ଼ଫାଦର ଭାବେ ଚିତ୍ରଣ କରିଥିଲେ । ଏତେ ବଡ଼ ନେତା ଏବଂ ବରିଷ୍ଠ ମନ୍ତ୍ରୀ ହୋଇଥିଲେ ମଧ୍ୟ ଛୋଟ ଛୋଟ ମନ୍ତ୍ରୀମାନଙ୍କ ଚାମ୍ବରକୁ ଯାଇ ସେ ଓଡ଼ିଶା କଥା କହନ୍ତି । ଧର୍ମେନ୍ଦ୍ର ବାବୁଙ୍କଠାରୁ ଅନେକ କଥା ଶିଖିବାର ଅଛି ବୋଲି ସେ କହିଥିଲେ ।
ଧର୍ମେନ୍ଦ୍ର ତାଙ୍କ ଭାଷଣରେ ଅବଶ୍ୟ ଦୁଇ ସହଯୋଗୀ କେନ୍ଦ୍ରମନ୍ତ୍ରୀଙ୍କୁ ପ୍ରଶଂସା କରି ସୌଜନ୍ୟତା ଦେଖାଇବାକୁ ଭୁଲି ନ ଥିଲେ । ଓଡ଼ିଶାର ବିକାଶରେ ସେମାନଙ୍କର ପ୍ରମୁଖ ଭୂମିକା ଥିବା କହିଥିଲେ ।
ସୂଚନାଥାଉକି, ଧର୍ମେନ୍ଦ୍ରଙ୍କୁ ଆଗରେ ରଖି ଗତକାଲି ଶ୍ରୀ ନଡ୍ଡା କନ୍ଧମାଳର ତୁମୁଡ଼ିବନ୍ଧ ଏବଂ ଖୋର୍ଦ୍ଧାର ବାଣପୁରରେ ସାଧାରଣ ସଭା କରିଥିଲେ । ଦୁଇଟିଯାକ ସଭାରେ ଧର୍ମେନ୍ଦ୍ରଙ୍କୁ ମୁଖ୍ୟ କାର୍ପଟଦାର ଭୂମିକାରେ ଦେଖିବାକୁ ମିଳିଥିଲା । ରାଜ୍ୟ ସଭାପି ସମୀର ମହାନ୍ତିଙ୍କଠାରୁ ଆରମ୍ଭ କରି ରାଷ୍ଟ୍ରୀୟ ଉପସଭାପତି ବୈଜୟନ୍ତ ପଣ୍ଡା, ରାଷ୍ଟ୍ରୀୟ ମୁଖପାତ୍ର ସମ୍ବିତ ପାତ୍ରଙ୍କ ଉପସ୍ଥିତି କେବଳ ହାଜିରା ଏବଂ ସଂକ୍ଷିପ୍ତ ଭାଷଣରେ ସୀମିତ ଥିଲା । ମୋଟାମୋଟି ଭାବେ, ଧର୍ମେନ୍ଦ୍ରଙ୍କୁ ଆଗରେ ରଖି ବାଟ ଚାଲୁଥିଲେ ନଡ୍ଡା ।
