ଭୁବନେଶ୍ୱର: ଜଣେ ଦୁଇଜଣ ନୁହେଁ, ଆଉ ୪ ରାଜ୍ୟସଭା ସାଂସଦ ଏବେ ବିଜେପି ଲିଙ୍କ୍ ରେ । ମମତା ମହନ୍ତ ଏବଂ ସୁଜିତ୍ କୁମାରଙ୍କ ଦେଖାଦେଖି ବିଜେଡିର ଏହି ସାଂସଦମାନେ ବିଜେପି ଆଡକୁ ଆକର୍ଷିତ ହୋଇଥିବା ବିଶ୍ୱସ୍ତ ସୂତ୍ରରୁ ସୂଚନା ମିଳିଛି । ମମତା ଓ ସୁଜିତଙ୍କ କ୍ଷେତ୍ରରେ ବିଜେପିକୁ ଟିକେ ପରିଶ୍ରମ କରିବାକୁ ପଡ଼ିଥିଲା ବେଳେ ଏମାନଙ୍କୁ ମନାଇବା ପାଇଁ ବିଜେପିକୁ ପରିଶ୍ରମ କରିବାକୁ ପଡ଼ୁନାହିଁ । ବିଜେପି ଶୀର୍ଷନେତାଙ୍କ ଆଶୀର୍ବାଦ ନେବା ପାଇଁ ବିଜେଡିର ସଂପୃକ୍ତ ସାଂସଦମାନଙ୍କର ଡହଳ ବିକଳ ଅବସ୍ଥା ହୋଇଛି । ଉପରେ ପଡ଼ି ବିପକ୍ଷ ନେତାମାନଙ୍କ ସହ ଏମାନେ ଯୋଗସୂତ୍ର ବଢ଼ାଇଛନ୍ତି ।
ସୂଚନା ଅନୁଯାୟୀ, ଓଡ଼ିଶାରେ ଶାସନଗାଦିରୁ ଯିବା ପରେ ନବୀନ ପଟ୍ଟନାୟକଙ୍କ ନେତୃତ୍ୱକୁ ଏହି ସାଂସଦମାନେ ତୁଚ୍ଛ ମଣିବାକୁ ଆରମ୍ଭ କରିଛନ୍ତି । ବିଜେଡିର ଭବିଷ୍ୟତ ନେଇ ସେମାନେ ଆଶଙ୍କିତ ଅଛନ୍ତି । ତେଣୁ ବେଳ ଥାଉ ଥାଉ ବାଟ କାଟିବାକୁ କୁଆଡ଼େ ମନସ୍ଥ କରିଛନ୍ତି । ଏହାଦ୍ୱାରା ସେମାନଙ୍କ କ୍ଷମତା ଅତୁଟ ରହିବା ସହ ବ୍ୟକ୍ତିଗତ ସ୍ୱାର୍ଥ ରକ୍ଷା ହୋଇପାରିବ । ତେଣୁ ମମତା ମହନ୍ତ ଏବଂ ସୁଜିତ କୁମାରଙ୍କ ଭଳି ସେମାନେ ସୁରକ୍ଷିତ ଜାଗା ଅପେକ୍ଷାରେ ଅଛନ୍ତି ।
ଦୁଇ ବିଜେଡି ସାଂସଦଙ୍କୁ ହାତେଇବା ପରେ ବିଜେପିର ରାଜ୍ୟସଭା ଅପରେସନ୍ ଧିମା ପଡ଼ିଥିବା ବେଳେ ବିଜେଡିର ଏହି ୪ ରାଜ୍ୟସଭା ସାଂସଦ କିନ୍ତୁ ବିଜେପି ନେତୃବୃନ୍ଦଙ୍କ ଆଶୀର୍ବାଦ ପାଇବା ପାଇଁ ବ୍ୟଗ୍ର ହୋଇପଡ଼ିଛନ୍ତି । ପାର୍ଲାମେଣ୍ଟ ଚାଲୁଥିବାରୁ ସେଠାରେ ପ୍ରଭାବଶାଳୀ ନେତାଙ୍କ ସହ ନିଜର ସମ୍ପର୍କ ବଢ଼ାଇବାର ସୁଯୋଗ ହାତଛଡ଼ା କରୁନାହାନ୍ତି । ଅଧିବେଶନରେ ସେମାନଙ୍କର ମନ ଲାଗୁନାହିଁ । ବଡ଼ନେତାମାନଙ୍କୁ ଗୋପନରେ ଯାଇ ଭେଟୁଛନ୍ତି ।
ବିଜେଡିର ବଡ଼ ନେତାମାନଙ୍କ ପାଖରେ ଏହି ଖବର ଥିଲେ ମଧ୍ୟ ସେମାନେ କାହାକୁ ଗୁହାରି କରିବେ ଜାଣିପାରୁନାହାନ୍ତି । ଆଜି ୨୦ରୁ ଅଧିକ ବିଧାୟକ ନବୀନ ନିବାସ ଯାଇ ନବୀନ ବାବୁଙ୍କୁ ଭେଟିବା ବେଳେ ଏହି ପ୍ରସଙ୍ଗ ଉଠିବାର ଥିଲା । ଦୁଇ ତିନି ଜଣ ବିଧାୟକ ଏ ସମ୍ପର୍କରେ ପାଟି ଖୋଲିବାକୁ ଚାହିଁଥିଲେ, ମାତ୍ର ସାହାସ କରି ନ ଥିଲେ ।
ଦଳର ଜଣେ ବରିଷ୍ଠ ନେତାଙ୍କ କହିବାନୁଯାୟୀ, ମିଡିଆରେ ବିଭିନ୍ନ ଖବର ଆସୁଛି । ମାତ୍ର ଏହାର ସତ୍ୟତା ଆମକୁ ଜଣାନାହିଁ । ଆଗକୁ କ’ଣ ହେବ ନ ହେବ ତାହା ନବୀନ ବାବୁ ବୁଝିବେ । ମମତା ମହାନ୍ତ ଏବଂ ସୁଜିତ କୁମାରଙ୍କ କ୍ଷେତ୍ରରେ ମିଡିଆ ଚର୍ଚ୍ଚା ସତ ହୋଇଥିବା ସେ ଅବଶ୍ୟ ସ୍ୱୀକାର କରିଛନ୍ତି ।
ଦଳର ଜଣେ ବରିଷ୍ଠ ବିଧାୟକ କହିଛନ୍ତି, ଆଉ ଯେଉଁ ବିଜେଡି ରାଜ୍ୟସଭା ସାଂସଦମାନେ ବିଜେପିକୁ ଯିବାକୁ ଆଗ୍ରହୀ ସେମାନେ ତୁରନ୍ତ ପଳେଇଯିବା ଭଲ । ସୁବିଧାବାଦରେ ବିଶ୍ୱାସ ରଖୁଥିବା ଏଭଳି କୃତଘ୍ନ ନେତାମାନେ ଦଳ ପାଇଁ ବୋଝ । ଯୋଗ୍ୟତା ନ ଥିବା ନେତାଙ୍କୁ କ୍ଷମତା ଚଖାଇଲେ ଏଭଳି ଦଶା ଭୋଗିବାକୁ ପଡ଼େ । ଏହି ଅଳିଆ ସଫା ହେବା ବିଜେଡି ପାଇଁ ଶୁଭଙ୍କର ବୋଲି ତାଙ୍କର ମତ ।
ସୂଚନାଥାଉକି, ରାଜ୍ୟସଭାରେ ଓଡ଼ିଶାର ଆସନ ସଂଖ୍ୟା ୧୦ । ବିଜେପି-ବିଜେଡି ବୁଝାମଣାରେ ଗୋଟିଏ ଆସନ କେନ୍ଦ୍ରମନ୍ତ୍ରୀ ଅଶ୍ୱିନୀ ବୈଷ୍ଣବ ନେଇଛନ୍ତି । ବାକି ୯ଟି ଆସନ ବିଜେଡି ହାତରେ ଥିଲା । ରାଜ୍ୟରେ ବିଜେଡି କ୍ଷମତା ହରାଇବା ପରେ ଆଗ ମମତା ମହାନ୍ତ ଏବଂ ପରେ ସୁଜିତ କୁମାର ବିଜେଡିରୁ ଇସ୍ତଫା ଦେଇ ବିଜେପିକୁ ପଳେଇଲେ । ବିଜେପି ଟିକେଟରେ ମମତା ପୁଣି ରାଜ୍ୟସଭା ଯାଇଥିଲା ବେଳେ ଅନୁରୂପ ଭାବେ ସୁଜିତ କୁମାରଙ୍କ କାମ ସରିଯାଇଛି । ଏବେ ବିଜେଡିର ୭ ରାଜ୍ୟସଭା ସାଂସଦ ଅଛନ୍ତି । ସେମାନେ ହେଲେ- ଡ. ସସ୍ମିତ୍ ପାତ୍ର, ମାନସ ମଙ୍ଗରାଜ, ସୁଲତା ଦେଓ, ମୁନା ଖାଁ, ଦେବାଶିଷ ସାମନ୍ତରାୟ, ଶୁଭାଶିଷ ଖୁଣ୍ଟିଆ ଓ ନିରଞ୍ଜନ ବିଶି ।
