ଭୁବନେଶ୍ୱର: ଆଗାମୀ ପଞ୍ଚାୟତ ନିର୍ବାଚନରେ ଲଢ଼ିବାକୁ ଥିବା ପ୍ରାର୍ଥୀମାନଙ୍କ ପାଇଁ ସତ୍ୟପାଠ ଦାଖଲ ବାଧ୍ୟତାମୂଳକ କରାଯାଇଛି । ବିଧାୟକ, ସାଂସଦଙ୍କ ଭଳି ପଞ୍ଚାୟତ ନିର୍ବାଚନ ପ୍ରାର୍ଥୀମାନେ ନାମାଙ୍କନପତ୍ର ଦାଖଲ ବେଳେ ସତ୍ୟପାଠ ଦେବାକୁ ପଡ଼ିବ । ସତ୍ୟପାଠରେ ଭୁଲ୍ ତଥ୍ୟ ଦେଇଥିବା ପ୍ରମାଣିତ ହେଲେ ସଂପୃକ୍ତ ପ୍ରାର୍ଥୀଙ୍କୁ ଜରିମାନା ସହ ୬ ମାସ ଜେଲ୍ ଦଣ୍ଡ ଭୋଗିବାକୁ ପଡ଼ିବ । ଏବେ ବିଧାନସଭା ନ ଥିବାରୁ ଅଧ୍ୟାଦେଶ ଜରିଆରେ ଓଡ଼ିଶା ପଞ୍ଚାୟତ ଆଇନରେ ଏଥିପାଇଁ ସଂଶୋଧନ କରାଯାଇଛି । ଆଇନ ବିଭାଗ ପକ୍ଷରୁ ଏହାର ଗେଜେଟ୍ ନୋଟିଫିକେସନ୍ ଜାରି ହୋଇଛି ।
ନୂଆ ବ୍ୟବସ୍ଥାରେ ପଞ୍ଚାୟତ ସରପଞ୍ଚ, ସମିତି ସଭ୍ୟ ଏବଂ ଜିଲ୍ଲା ପରିଷଦ ସଭ୍ୟ ପ୍ରାର୍ଥୀମାନେ ନାମାଙ୍କନପତ୍ର ଦାଖଲ ବେଳେ ସତ୍ୟପାଠ ଦେବାକୁ ବାଧ୍ୟ । ସେଥିରେ ନିଜର ଶିକ୍ଷାଗତ ଯୋଗ୍ୟତା, ସମ୍ପତ୍ତି ବିବରଣୀ ଏବଂ ନିଜ ନାଁରେ ଥିବା ଅପରାଧିକ ମାମଲାର ସମସ୍ତ ତଥ୍ୟ ରହିବ । ଏହି ସତ୍ୟପାଠରେ ସତ ଲୁଚାଇବାକୁ ଯାଇ ମିଥ୍ୟା ତଥ୍ୟ ଦେଲେ ବିପଦ । ମିଥ୍ୟା ତଥ୍ୟ ପ୍ରମାଣିତ ହେଲେ ପ୍ରାର୍ଥୀ ଜରିମାନା ସାଙ୍ଗକୁ ୬ ମାସ ପର୍ଯ୍ୟନ୍ତ ଜେଲ୍ ଦଣ୍ଡ ଭୋଗିବେ ।
ସଂଶୋଧିତ ଆଇନରେ ପଞ୍ଚାୟତ ପ୍ରତିନିଧିମାନଙ୍କୁ ବିପର୍ଯ୍ୟୟ ମୁକାବିଲା ପାଇଁ ଅଧିକ କ୍ଷମତା ଦିଆଯାଇଛି । ପ୍ରାକୃତିକ ବିପର୍ଯ୍ୟୟ ବେଳେ ରିଲିଫ୍, ଥଇଥାନ ଓ ପୁନଃନିର୍ମାଣରେ ପଞ୍ଚାୟତ ପ୍ରତିନିଧିମାନେ ସାମିଲ ରହିବେ । ପୂର୍ବ ବ୍ୟବସ୍ଥାରେ ପଞ୍ଚାୟତ ପ୍ରତିନିଧିମାନଙ୍କୁ ଆଇନ ଏହି କ୍ଷମତା ଦେଇ ନ ଥିଲା ।
