ଭୁବନେଶ୍ୱର: ୟୁକ୍ରେନ୍ ର ଯୁଦ୍ଧ ବିଧ୍ୱସ୍ତ ଖାର୍କିଭ୍ ଓ ପେସୋଚିନ୍ ରେ ଫସି ରହିଥିବା ଓଡ଼ିଆ ଛାତ୍ରଛାତ୍ରୀଙ୍କୁ ଉଦ୍ଧାର କରିବା ପାଇଁ ଓଡ଼ିଶା ସରକାର ତାଙ୍କର ଉଦ୍ୟମକୁ ଜୋରଦାର କରିଛନ୍ତି । ଏହି ଦୁଇ ଅଞ୍ଚଳରେ ଥିବା ଫସି ରହିଥିବା ଛାତ୍ରଛାତ୍ରୀମାନେ ଗତ ୩ ଦିନ ଧରି ଭୋକ ଉପାସ ଓ ଆତଙ୍କରେ ଥିବା ବେଳେ ସେମାନଙ୍କୁ ମଧ୍ୟରୁ ଆଜି ୬୫ ଜଣଙ୍କୁ ଉଦ୍ଧାର କରାଯାଇଛି । ରାଜ୍ୟ ସରକାରଙ୍କ ପ୍ରଚେଷ୍ଟାରେ ଦୁଇଟି ସ୍ୱତନ୍ତ୍ର ବସ୍ ଯୋଗେ ନିରାପଦ ଭାବେ ସେମାନଙ୍କୁ ପଶ୍ଚିମ ୟୁକ୍ରେନ୍ ସୀମାକୁ ଅଣାଯାଇପାରିଛି । ଏହି ଛାତ୍ରଛାତ୍ରୀଙ୍କୁ ବିମାନ ଯୋଗେ ଭାରତକୁ ଆଣିବା ପାଇଁ ପ୍ରକ୍ରିୟା ଜାରି ରହିଥିବା ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ପକ୍ଷରୁ ସୂଚନା ଦିଆଯାଇଛି ।
ଏ ପର୍ଯ୍ୟନ୍ତ ୧୯୯ ଓଡ଼ିଆ ଛାତ୍ରଛାତ୍ରୀ ନିରାପଦରେ ଭାରତରେ ପହଞ୍ଚିସାରିଲେଣି । ସବୁ ଓଡ଼ିଆ ପିଲାଙ୍କୁ ନିରାପଦ ଭାବେ ଉଦ୍ଧାର କରିବାକୁ ରାଜ୍ୟ ସରକାର ଉଦ୍ୟମ ଜାରି ରଖିଥିବା କୁହାଯାଇଛି ।
ସୂଚନାଯୋଗ୍ୟ, କେନ୍ଦ୍ର ସରକାରଙ୍କ ସହ ସମନ୍ୱୟ ରକ୍ଷା କରି ସମସ୍ତ ଓଡ଼ିଆଙ୍କୁ ୟୁକ୍ରେନ୍ ରୁ ଉଦ୍ଧାର କରି ଓଡ଼ିଶାରେ ନିରାପଦରେ ପହଞ୍ଚାଇବାର ଦାୟିତ୍ୱ ଓଡ଼ିଶା ସରକାର ନେଇଛନ୍ତି । ୟୁକ୍ରେନ୍ ରୁ ପଳାଇ ଆସି ପଡ଼ୋଶୀ ୪ ଦେଶରେ ଫସି ରହିଥିବା ଓଡ଼ିଆ ପିଲାଙ୍କୁ ଆଣିବାକୁ ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶରେ ୪ ସ୍ୱତନ୍ତ୍ର ପ୍ରତିନିଧିଙ୍କୁ ନିଯୁକ୍ତି ଦିଆଯାଇଛି ।
କିଟ୍ ଏବଂ କିସ୍ ବିଶ୍ୱବିଦ୍ୟାଳୟର ଉପସଭାପତି ବିକ୍ରମାଦିତ୍ୟଙ୍କୁ ସମ୍ପୂର୍ଣ୍ଣ ସମନ୍ୱୟ ରକ୍ଷା ଦାୟିତ୍ୱ ସହ ପୋଲାଣ୍ଡ ପାଇଁ ସ୍ୱତନ୍ତ୍ର ପ୍ରତିନିଧି ନିଯୁକ୍ତି ଦିଆଯାଇଥିବା ବେଳେ ୟୁଏନଏଚସିଆରର ବରିଷ୍ଠ ଅଧିକାରୀ ଆରୁଷୀ ରାୟଙ୍କୁ ହଙ୍ଗେରୀ, ୟୁଏନ ପଲିସି ଅଫିସର ବୈଶାଳୀ ମହାନ୍ତିଙ୍କୁ ରୋମାନିଆ ଏବଂ ହଙ୍ଗେରିଠାରେ ଅବସ୍ଥାପିତ କନସଲଟାଣ୍ଟ ଅନୁରାଗ ପଟ୍ଟନାୟକଙ୍କୁ ସ୍ଲୋଭାକିଆ ପାଇଁ ସ୍ୱତନ୍ତ୍ର ପ୍ରତିନିଧି ଭାବେ ନିଯୁକ୍ତି ଦିଆଯାଇଛି ।
ନୂଆଦିଲ୍ଲୀଠାରେ ଥିବା ଆବାସିକ କମିସନର ନୋଡାଲ୍ ଅଫିସର ଭାବେ ଉଦ୍ଧାର କାର୍ଯ୍ୟରେ ସମନ୍ୱୟ ରକ୍ଷା କରୁଛନ୍ତି ।