ଭୁବନେଶ୍ୱର: ମହାନଦୀ ସମେତ ବିଭିନ୍ନ ନଦୀରେ ବନ୍ୟାଜଳ ହ୍ରାସ୍ ପାଇଛି । ବନ୍ୟା ସ୍ଥିତିରେ ସୁଧାର ଆସିଥିଲେ ମଧ୍ୟ ଲୋକଙ୍କ ଦୁର୍ଦ୍ଦଶା କିନ୍ତୁ କମିନାହିଁ । ଏବେ ବି ବନ୍ୟାଜଳରେ ବନ୍ଦୀ ହୋଇ ରହିଛନ୍ତି ଶହ ଶହ ଲୋକ । ହଜାର ହଜାର ହେକ୍ଟର ଚାଷ ଜମି ବନ୍ୟାଜଳରେ ବୁଡ଼ି ରହିଛି । ଜମିରେ ଚାଷୀଙ୍କ ବ୍ୟାପକ ପନିପରିବା ନଷ୍ଟ ହୋଇଯାଇଛି । ଏହି ବନ୍ୟାରେ ସବୁଠାରୁ ବେଶୀ ପ୍ରଭାବିତ ହୋଇଛି ବାଲେଶ୍ୱର, ଭଦ୍ରକ ଏବଂ ଯାଜପୁର । ଏହି ତିନୋଟି ଜିଲ୍ଲାରେ ସ୍ଥିତି ସଙ୍ଗୀନ ହୋଇଯାଇଛି । ପୁରୀ, ଜଗତସିଂହପୁର, ଖୋର୍ଦ୍ଧା ଏବଂ କଟକର କିଛି କିଛି ଅଞ୍ଚଳ ମଧ୍ୟ ବିଶେଷ ପ୍ରଭାବିତ ହୋଇଛି ।
ରାଜସ୍ୱମନ୍ତ୍ରୀ ସୁରେଶ ପୂଜାରୀଙ୍କ ସୂଚନା ଅନୁଯାୟୀ ଏହି ୭ଟି ଜିଲ୍ଲା ସମେତ ରାଜ୍ୟର ୨୨ଟି ଜିଲ୍ଲା ବନ୍ୟାରେ ପ୍ରଭାବିତ ହୋଇଛି । ୮ ଲକ୍ଷରୁ ଅଧିକ ଲୋକ କ୍ଷତିଗ୍ରସ୍ତ ହୋଇଛନ୍ତି । କୃଷି ଓ ରାଜସ୍ୱ ବିଭାଗ ପକ୍ଷରୁ କ୍ଷୟକ୍ଷତି ଆକଳନ କାର୍ଯ୍ୟ ଚାଲିଛି । ବିଭିନ୍ନ ସ୍ଥାନରୁ ଘର ଭଙ୍ଗା ରିପୋର୍ଟ ମଧ୍ୟ ଆସୁଛି । ସ୍କୁଲ ଏବଂ ଅଙ୍ଗନବାଡ଼ି ଘର ଭାଙ୍ଗିଛି । ଏହାର ମରାମତି ପାଇଁ ରାଜ୍ୟ ସରକାର ଅର୍ଥ ଦେବେ । ବିଭିନ୍ନ ନଦୀ ବନ୍ଧରେ ଘାଇ ହୋଇଥିବା ସ୍ଥାନରେ ନିର୍ମାଣ ପାଇଁ ଜଳ ସମ୍ପଦ ବିଭାଗକୁ ନିର୍ଦ୍ଦେଶ ଦିଆଯାଇଛି । ସହଯୋଗ ରାଶି ଭାବେ କେନ୍ଦ୍ର ସରକାର ୫୦୦ କୋଟି ଟଙ୍କା ଦେଇଥିବା ରାଜସ୍ୱମନ୍ତ୍ରୀ ସୂଚନା ଦେଇଛନ୍ତି ।
ଆଉ ବନ୍ୟା ଆଶଙ୍କା ନାହିଁ
ରାଜ୍ୟରେ ଆଉ ବନ୍ୟା ଆଶଙ୍କା ନାହିଁ । ମହାନଦୀ ସମେତ ବିଭିନ୍ନ ନଦୀର ବନ୍ୟାଜଳ ହ୍ରାସ୍ ପାଇବାରେ ଲାଗିଛି । ଏହି ପର୍ଯ୍ୟାୟରେ ଆଉ ବନ୍ୟାର ଆଶଙ୍କା ନାହିଁ । ଜଳସମ୍ପଦ ବିଭାଗର ସର୍ବୋଚ୍ଚ ଯନ୍ତ୍ରୀ ଦିଲ୍ଲୀପ ରାଉତ ଆଜି ଏହି ସୂଚନା ଦେଇଛନ୍ତି । କେଉଁଥିପାଇଁ ବନ୍ୟା ହେଲା ତାହାର କାରଣ ମଧ୍ୟ କହିଛନ୍ତି ।
ଜୁନ୍ ମାସରେ ସ୍ୱାଭାବିକଠାରୁ ୪୭% କମ୍ ବର୍ଷା ହେଲା । ସେଥିପାଇଁ ଜଳଭଣ୍ଡାରଗୁଡ଼ିକରେ ଅଧିକ ପାଣି ରଖାଯାଇଥିଲା । ମାତ୍ର ଜୁଲାଇ ମାସରେ ଏହା ସମ୍ପୂର୍ଣ୍ଣ ଓଲଟା ହେଲା । ଏଲନିନୋ ପ୍ରଭାବରେ ଜୁଲାଇରେ କମ୍ ବର୍ଷାର ଆକଳନ ଥିଲେ ମଧ୍ୟ ସ୍ୱାଭାବିକଠାରୁ ୩୮% ଅଧିକ ବର୍ଷା ହେଲା । କିଛି ଅଞ୍ଚଳରେ କମ୍ ସମୟ ଭିତରେ ୩୦୦ ମିମିରୁ ଅଧିକ ବର୍ଷା ହେଲା । ତେଣୁ ରାଜ୍ୟରେ ବନ୍ୟା ପରିସ୍ଥିତି ସୃଷ୍ଟି ହେଲା । ମହାନଦୀରେ ବନ୍ୟା ନିୟନ୍ତ୍ରଣ ପାଇଁ ଉପଯୁକ୍ତ ବ୍ୟବସ୍ଥା ରହିଛି । ତେଣୁ ସେଠାରେ ବନ୍ୟାର ପ୍ରକୋପକୁ ହ୍ରାସ୍ କରାଯାଇପାରିଲା । ମାତ୍ର ବୈତରଣୀରେ ବନ୍ୟା ନିୟନ୍ତ୍ରଣ ପାଇଁ କୌଣସି ସ୍ଥାୟୀ ବ୍ୟବସ୍ଥା ନାହିଁ ବୋଲି ସର୍ବୋଚ୍ଚ ଯନ୍ତ୍ରୀ କହିଛନ୍ତି ।
