ଭୁବନେଶ୍ୱର: ବର୍ଷେ ପରେ ପୁଣି ଚର୍ଚ୍ଚାକୁ ଆସିଛି ଗୋଲଡେନ୍ ବାବା ଓରଫ୍ ଜ୍ୟୋତି ରଞ୍ଜନ ବେଉରା । ଏହି ହାଇ ପ୍ରୋଫାଇଲ୍ ନକଲି ବାବାର ଅର୍ଥନୈତିକ କାରବାର ଓ ଅପରାଧ ଲିଙ୍କ୍ ର ଖୋଳତାଡ଼ କରିବ ପ୍ରବର୍ତ୍ତନ ନିଦେ୍ର୍ଦଶାଳୟ(ଇଡ଼ି) । ଗୋଲଡେନ୍ ବାବା ର ଯାବତୀୟ କାରବାର ସଂକ୍ରାନ୍ତରେ ଓଡ଼ିଶା ପୁଲିସ ଓ କ୍ରାଇମବ୍ରାଞ୍ଚ ର ଅର୍ଥନୈତିକ ଅପରାଧ ଶାଖା(ଇଓଡବ୍ଲୁ)କୁ ଇତିମଧ୍ୟରେ ଅନେକ ଗୁରୁତ୍ୱପୂର୍ଣ୍ଣ ତଥ୍ୟ ମିଳିସାରିଛି । ହେଲେ ଇଡି ସ୍କାନର୍ କୁ ଆସିବା ପଛର ରହସ୍ୟକୁ ନେଇ ଏବେ ଜୋର୍ ଚର୍ଚ୍ଚା ।
ଗୋଲଡେନ୍ ବାବା କିଏ, କ’ଣ କରୁଥିଲା, କାହିଁକି ଗିରଫ ହେଲା ତାହାକୁ ନେଇ ମିଡ଼ିଆରେ ଅନେକ ଚର୍ଚ୍ଚା ହୋଇସାରିଛି । ବଡ଼ବିଲ୍ ର ଏକ ଖଣି କମ୍ପାନୀ ଏମଏସ୍ ନ୍ୟାସନାଲ୍ ଏଣ୍ଟରପ୍ରାଇଜେସ୍ ପାଇଁ ୧୧୦ କୋଟି ଟଙ୍କାର ଋଣ କରାଇଦେବାର ଲୋଭ ଦେଇ ୧୨ କୋଟି ଟଙ୍କା ଠକିନେଇଥିଲା । ତାହାପୁଣି ଚେକ୍ ଜାଲିଆତି ଜରିଆରେ । ଠକେଇର ଶିକାର ସଂପୃକ୍ତ ସଂସ୍ଥାର ମାଲିକ ଚରଣଜିତ୍ ସିଂ ଗ୍ରେବାଲ ଚନ୍ଦ୍ରଶେଖରପୁର ଥାନାରେ ଏତଲା ଦେବା ପରେ ୨୦୧୮ ଡିସେମ୍ବର ୩୧ ତାରିଖରେ ପୁଲିସ ଏହି ବିଖ୍ୟାତ ଠକ ଗୋଲଡ଼େନ ବାବାକୁ ଗିରଫ କରିଥିଲା ।
ପରବର୍ତ୍ତୀ ସମୟରେ କ୍ରାଇମବ୍ରାଞ୍ଚର ଅର୍ଥନୈତିକ ଅପରାଧ ଶାଖାର ଖୋଳତାଡ଼ ବେଳେ ବାବା ଏଭଳି ଅନେକ ସଂସ୍ଥାକୁ ଚୂନ ମାରିଥିବା ଜଣାପଡ଼ିଥିଲା । ଏମଏସ୍ ନ୍ୟାସନାଲ୍ ଏଣ୍ଟରପ୍ରାଇଜେସ୍ ଭଳି ଅନ୍ୟ ୫ଟି କମ୍ପାନୀଠାରୁ ପୋଷ୍ଟ ଡେଟେଡ଼୍ ଚେକ୍ କରିଆରେ ୧୦୦ କୋଟି ଆଦାୟ କରିଥିଲା । ମୁମ୍ବାଇ ଥାନେର ଏକ ଘରୋଇ ହସ୍ପିଟାଲ୍ କୁ ୨୦୦ କୋଟି, ହାଇଦ୍ରାବାଦର ଏକ ଇଂଜିନିୟରିଂ କନଷ୍ଟ୍ରକସନ୍ କମ୍ପାନୀକୁ ୩୦୦ କୋଟି ଏବଂ ଭୁବନେଶ୍ୱରର ଜେକେ ମେଡ଼ିକାଲ୍ ସିଷ୍ଟମ୍ ନାମକ ଏକ ସଂସ୍ଥାକୁ ୫୦ କୋଟି ଟଙ୍କାର ଋଣ କରାଇଦେବାକୁ କହି ଜାଲ୍ କାଗଜପତ୍ରର ଆଶ୍ରୟ ନେଇଥିଲା ଏବଂ କୋଟି କୋଟି ଟଙ୍କା ଠକି ନେଇଥିଲା ।
ଖାଲି ଟଙ୍କା ଠକୁ ନ ଥିଲା ଗୋଲଡ଼େନ୍ ବାବା । ଗୋରୁ ଚାଲାଣ, ଦାଦାବଟିରୁ ମଧ୍ୟ ଆଦାୟ କରୁଥିଲା କୋଟି କୋଟି ଟଙ୍କା । ଏହିଭଳି ୧୯ଟି ସଙ୍ଗୀନ ମାମଲା ଆସିଛି କ୍ରାଇମବାଞ୍ଚ ନଜରକୁ ।
