ଭୁୁବନେଶ୍ୱର: କରୋନା ଯୁଦ୍ଧ ଲଢ଼ୁଥିବା ଡାକ୍ତର, ନର୍ସ ଏବଂ ସ୍ୱାସ୍ଥ୍ୟକର୍ମୀଙ୍କ ପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆଜି ଏକ ବଡ଼ ଘୋଷଣା କରିଛନ୍ତି । କରୋନା ଚିକିତ୍ସା ବେଳେ କୌଣସି ଡାକ୍ତର, ନର୍ସ କିମ୍ବା ସ୍ୱାସ୍ଥ୍ୟକର୍ମୀଙ୍କ ଜୀବନ ଗଲେ ସେମାନଙ୍କ ପରିବାରକୁ ମିଳିବ ୫୦ ଲକ୍ଷ ଟଙ୍କା । ଚାକିରିକାଳ ଶେଷ ପର୍ଯ୍ୟନ୍ତ ସେମାନଙ୍କ ପରିବାର ଲୋକେ ବି ତାଙ୍କ ଦରମା ପାଇବେ ।
ଖାଲି ସେତିକି ନୁହେଁ, ରାଜ୍ୟ ସରକାର ତାଙ୍କୁ ସହିଦ ଭାବେ ବିବେଚନା କରିବେ । ସମ୍ପୂର୍ଣ୍ଣ ରାଷ୍ଟ୍ରୀୟ ମର୍ଯ୍ୟାଦା ସହ ତାଙ୍କର ଶେଷକୃତ୍ୟ ସମ୍ପନ୍ନ କରାଯିବ । ଜାତି ପ୍ରତି ସଂପୃକ୍ତ ଯୋଦ୍ଧାଙ୍କ ତ୍ୟାଗକୁ ସ୍ମରଣ ରଖିବା ପାଇଁ ସେହି ସ୍ମୃତିରେ ପୁରସ୍କାର ପ୍ରଚଳନ କରାଯାଇ ଜାତୀୟ ଦିବସରେ ପ୍ରଦାନ କରାଯିବ ।
ମୁଖ୍ୟମନ୍ତ୍ରୀ ତାଙ୍କ ଭିଡ଼ିଓ ବାର୍ତ୍ତାରେ କହିଛନ୍ତି, ସମଗ୍ର ମାନବ ସମାଜ ଆଜି କରୋନା ଭାଇରସ୍ ବିରୁଦ୍ଧରେ ଯୁଦ୍ଧ ଲଢ଼ୁଛି । ୩ ମାସରେ ୨ ଲକ୍ଷ ଲୋକଙ୍କ ଜୀବନ ଗଲାଣି । କରୋନା କବଳରୁ ବିଶ୍ୱର କୌଣସି ମହାଦେଶ ମୁକୁଳି ପାରିନାହିଁ । ଏହି ଅଦୃଶ୍ୟ ଶତ୍ରୁ ସହ ଅଧିକାଂଶ ଦେଶ ଯୁଦ୍ଧ କରୁଛନ୍ତି । ତେବେ ଏହି ଯୁଦ୍ଧର ଫ୍ରଣ୍ଟଲାଇନ୍ ଯୋଦ୍ଧା ହେଉଛନ୍ତି ଡାକ୍ତର ଏବଂ ସ୍ୱାସ୍ଥ୍ୟସେବାରେ କାର୍ଯ୍ୟ କରୁଥିବା ସମସ୍ତ କର୍ମଚାରୀ । କରୋନା ପାଇଁ କୌଣସି ଔଷଧ ଏବଂ ଟୀକା ବାହାରି ନ ଥିବାରୁ ଡାକ୍ତର ଓ ସ୍ୱାସ୍ଥ୍ୟସେବା କର୍ମୀମାନେ ନିଜ ଜୀବନକୁ ବାଜି ଲଗାଇ ଆଗରେ ଲଢ଼ୁଛନ୍ତି ।
ଦେଶ ଓ ଜାତି ପାଇଁ ତ୍ୟାଗ କରୁଥିବା ଏଭଳି ମହାନ୍ ଯୋଦ୍ଧାଙ୍କୁ ସମ୍ମାନ ଜଣାଇବାରେ ଆମର ସମୃଦ୍ଧ ପରମ୍ପରା ରହିଆସିଛି ବୋଲି ମୁଖ୍ୟମନ୍ତ୍ରୀ ଅତ୍ୟନ୍ତ ଆବେଗତାର ସହ କହିଛନ୍ତି । ଏଭଳି ମହାନ୍ ଯୋଦ୍ଧାଙ୍କ ପ୍ରତି ସମସ୍ତେ କୃତଜ୍ଞ ରହିବାକୁ ମୁଖ୍ୟମନ୍ତ୍ରୀ ଅପିଲ୍ କରିଛନ୍ତି ।
ଏହି ଡାକ୍ତର, ନର୍ସ, ସ୍ୱାସ୍ଥ୍ୟକର୍ମୀଙ୍କ ବିରୋଧରେ କୌଣସି ଖରାପ ଆଚରଣକୁ ବରଦାସ୍ତ କରାଯିବ ନାହିଁ । ଏହାକୁ ରାଜ୍ୟ ବିରୋଧରେ ଆଚରଣ ଭାବେ ବିବେଚନା କରାଯିବ । ଏହି ଯୋଦ୍ଧାମାନଙ୍କୁ ସମ୍ମାନ ଦେବାରେ କିମ୍ବା ତାଙ୍କ କାର୍ଯ୍ୟରେ ବାଧା ସୃଷ୍ଟି କରୁଥିବା ବ୍ୟକ୍ତିଙ୍କ ବିରୋଧରେ ଏନଏସଏ ଲାଗୁ କରାଯାଇ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ମୁଖ୍ୟମନ୍ତ୍ରୀ ଚେତାବନୀ ଦେଇଛନ୍ତି ।
ରାଜ୍ୟର ସାଢ଼େ ଚାରି କୋଟି ଲୋକ ଏବଂ ରାଜ୍ୟ ସରକାର ଏହି କରୋନା ଯୁଦ୍ଧଙ୍କ ପଛରେ ଅଛନ୍ତି ବୋଲି ମୁଖ୍ୟମନ୍ତ୍ରୀ ଜଣାଇ ଦେଇଛନ୍ତି ।
