ଭୁବନେଶ୍ୱର: କରୋନା ପଜିଟିଭ୍ ରେ ରେକର୍ଡ । ଆଜି(ଗୁରୁବାର) ସକାଳୁ ସଂଧ୍ୟା ଭିତରେ ୫ଟି ପର୍ଯ୍ୟାୟରେ ୩୪ ଜଣ କରୋନା ଆକ୍ରାନ୍ତଙ୍କ ତଥ୍ୟ ଆସିଛି । ଗଞ୍ଜାମରୁ ସର୍ବାଧିକ ୨୪ ପଜିଟିଭ୍ ଚିହ୍ନଟ ହୋଇଥିବା ବେଳେ ଭୁବନେଶ୍ୱରରୁ ୩, ମୟୁରଭଞ୍ଜରୁ ୪, ବାଲେଶ୍ୱରରୁ ୨ ଏବଂ ଜଗତସିଂହପୁର ୧ ପଜିଟିଭ୍ ବାହାରିଛନ୍ତି ।
ଗଞ୍ଜାମର ସମସ୍ତ ୨୪ ଜଣ, ମୟୁରଭଞ୍ଜର ସମସ୍ତ ୪ ଏବଂ ବାଲେଶ୍ୱରର ସମସ୍ତ ୨ ଜଣ ଯାକ ସୁରତ ଫେରନ୍ତା ହୋଇଥିବା ବେଳେ ଜଗତସିଂହପୁର ଆକ୍ରାନ୍ତ ଜଣଙ୍କ କୋଲକତା ଫେରନ୍ତା । ଆଜିର ଏହି ୩୪ ପଜିଟିଭ୍ ସହ ରାଜ୍ୟରେ କରୋନା ଆକ୍ରାନ୍ତଙ୍କ ସଂଖ୍ୟା ୨୧୯କୁ ବୃଦ୍ଧି ପାଇଛି ।
ସକାଳୁ ପ୍ରଥମ ଦଫାରେ ଆସିଥିବା ୨୦ ପଜିଟିଭ୍ ମଧ୍ୟରୁ ୧୭ ଗଞ୍ଜାମର ଥିଲା ବେଳେ ୩ ଜଣ ଥିଲେ ମୟୁରଭଞ୍ଜର । ଦ୍ୱିତୀୟ ଦଫାରେ ମୟୁରଭଞ୍ଜର ଜଣେ ୩୫ ବର୍ଷ ଯୁବକଙ୍କର ପଜିଟିଭ୍ ଆସିଥିଲା । ତୃତୀୟ ଦଫାରେ ଜଗତସିଂହପୁରର ୭୦ ବର୍ଷର ବୃଦ୍ଧ ଏବଂ ବାଲେଶ୍ୱରର ୨୬ ଓ ୨୯ ବର୍ଷର ଦୁଇ ଯୁବକ ପଜିଟିଭ୍ ବାହାରିଥିଲେ ।
ଚତୁର୍ଥ ଦଫାରେ ଭୁବନେଶ୍ୱରରୁ ଚିହ୍ନଟ ୩ ଆକ୍ରାନ୍ତଙ୍କ ମଧ୍ୟରେ ଅଛନ୍ତି ମଞ୍ଚେଶ୍ୱରର ୩୬ ବର୍ଷର ଯୁବକ, ଭିଏସଏସ ନଗରର ୩୪ ବର୍ଷ ଯୁବକ ଏବଂ ସୂର୍ଯ୍ୟନଗରର ୬୭ ବର୍ଷର ବୃଦ୍ଧ । ଏମାନଙ୍କର କଣ୍ଟାକ୍ଟ ଟ୍ରେସିଂ ଜାରି ରହିଛି । ପଞ୍ଚମ ଦଫାରେ ଗଞ୍ଜାମରୁ ୭ ଜଣ ପଜିଟିଭ୍ ଚିହ୍ନଟ ହୋଇଛନ୍ତି । ସେମାନଙ୍କର ବୟସ ଯଥାକ୍ରମେ ୪୩, ୪୮, ୨୫, ୨୯, ୩୯, ୨୫ ଏବଂ ୬୦ ବର୍ଷ । ସମସ୍ତେ ପୁରୁଷ ।
ବର୍ତ୍ତମାନର ସ୍ଥିତିରେ ଯାଜପୁରରୁ ସର୍ବାଧିକ ୫୫ ଆକ୍ରାନ୍ତ ଚିହ୍ନଟ ହୋଇଥିବା ବେଳେ ଖୋର୍ଦ୍ଧା ଜିଲ୍ଲାରୁ ୫୦ ଚିହ୍ନଟ ହୋଇଛନ୍ତି । ମାତ୍ର ୪ ଦିନରେ ଗଞ୍ଜାମରୁ ୨୮ ଜଣ ଚିହ୍ନଟ ହୋଇଛନ୍ତି । ବାଲେଶ୍ୱର ଜିଲ୍ଲାରୁ ପଜିଟିଭ୍ ସଂଖ୍ୟା ୨୭ ରେ ପହଞ୍ଚିଛି । ମୋଟାମୋଟି ରାଜ୍ୟର ୧୮ ଟି ଜିଲ୍ଲାକୁ କରୋନା ଛୁଇଁଛି ।
୬୨ ଜଣ ସୁସ୍ଥ ଓ ୨ ଜଣଙ୍କର ମୃତ୍ୟୁ ହୋଇଥିବାରୁ ଏବେ ଚିକିତ୍ସାରେ ଥିବା କରୋନା ରୋଗୀ(ଆକ୍ଟିଭ୍) ଙ୍କ ସଂଖ୍ୟା ହେଉଛି ୧୫୫ ।
